شونگال

زالبول ءُُ جنینانی میاں اُستمانی روچ:
ہر سال ھشت مارچ کیت میاں استمانی وڑا زالبول ءُُ جنینانی میاں اُستمانی روچ برجم دارگ بیت۔اے روچ ءِ برجم دارگ ءِ بنیاتی سوب جنین ءُُ زالبولانی کرد ءَ منگی اِنت۔
بلوچ چاگرد ے تہا جنین ءِ مزنین ھزتے است۔ بلوچ چاگرد ءِ تہا دگہ قوم ءُُ راج ءِ زالبول ءُُ جنین ءِ بہ بیت آئی ھم مزنیں ھزتءُُ شرفے انت۔
بلے بد قسمتی ءَ بلوچ زالبول ءُُ جنین گوستگیں بازیں سالاں باز بزگ ءُُ وار انت ایشی بنیاتی سوب ایش انت کہ بلوچستان ءِ ہزارانی مردم گار ءُُ بیگواہ انت اے مردمانی گار ءُُ بیگوائی ءِ سوب ءَ آھانی مات گوار جن ءُُ چُک بازیں سالاں چہ کیمپانی تہا نشتگ انت کہ مروچی آھانی پت ءُُ برات کاینت آھانی لوگ ءِ واھند کاینت آھانی چم ہمے ودارءَ سک انت۔ مئے دعا انت کہ اللہ اے وڑیں امتحان کسّے سرا میاریت کہ آئی چم شپ ءُُ روچ دروازگ ءَ سک بہ بنت کہ آئی چمانی چراگ ءُُ دل ءِ بند انوں پیداک انت۔
اے تاریخی زُلم ءُُ نا انصافی گوں بلوچستان ءِ مات ءُُ گواراں بوھگا انت۔ بازیں مات ءُُ پت وتی زھگانی ودار ءَ اے دورچی دنیایل داتگ ءُُ ھزارانی گوار مات ءُُ جِنک ہمے ودار ءَ انت کہ انوں آھانی دل ءِ بند پیداک انت۔ اللہ ہچ قوم ءُُ راجے سرا اے وڑیں چکاس میاریت کہ زند ھزاب ءِ جوڑ بہ بیت کہ نان ورگ ءِ سما مہ بہ بیت ءُُ پچ ءُُ پوشاک ءِ سما مہ بیت اے درد ءَ ھما مات ءُُ پت گوار ءُُ برات ءُُ زھگ سرپد انت کہ آھاں گوں اے زُلم ءُُ زوراکی بوتگ۔
چریشی ابید بلوچ راج ءِ زالبول ءُُ جنیناں صد آفرین انت کہ آ تار یخ ءِ مزنیں زلم ءُُ زوراکی ءِ مقابلہ ءَ کنگا انت۔ گسءَ مردیں زھگے نیست بلے آ وتی چُک ءُُ زھگاں لاپ دینت آ وڑ وڑیں نا درائی آنی مقابلہ کنگا انت۔ آ وتی چُک ءُُ زھگاں دارو درمان کرت نہ کں انت آھاں وانینت نہ کن انت شریں ورگے دات نہ کں انت شریں لوگ ءُُ ماڑی ءِ تہا نشت نہ کن انت۔ بلے چریشی ابید آھاں ءَ آفرین انت کہ اے تاریخی زُلم ءُُ نا انصافی ءُُ جنجالاں ابید وتی دود ءُُ ربیدگ رسم ءُُ دود مرک ءُُ زند زندگ داشتگ انت۔ یک زندگیں قومے وڑا دیما روگا انت۔
بلوچی زالبول وتی مردیں زھگانی درگیجگ ءِ حاترا کوئٹہ تاں اسلام آباد ءَ لانگ مارچ کرتگ۔ سالانی سال کیمپ ءَ نشتگ انت تنکہ آھانی زھگ، برات ءُُ لوگ ءِ کماش درگیجگ بہ بنت۔ اے کرن ءِ اگں شیر زالیں زالبول بلوچ جنین ءُُ زالبول گشگ بہ بنت تُہ دروگ نہ بیت کہ آ مزنیں جنجالیں زند گوازینگ ءَ انت۔ (شونکار)