شونگال

بلوچی ساز ءُُ زیمل ءِ نامداریں استاد امام بخش مستانہ بیران بوت
بلوچی ساز ءُُ زیمل ءِ نامداریں استاد امام بخش مستانہ 23 جنوری 2020 ءَ اے دو روچی دنیا یل دات ءُُ وتی آکبت ءِ جاہ ءَ شُت۔ استاد امام بخش مستانہ ءِ بیران بوھگ بلوچی موسیقی ءُُ ساز ءُُ زیمل ءِ حاترامزنیں تاوانے انت کہ اے تاوان ہچ وھد ءَ پورہ بوت نہ کنت۔
بلوچی زبان ءِ ازمگر بہ بنت یا شاعر ءُُ کلمکار کہ آ وتی زند ءَ بلوچی زبان، لبزانک ءُُ ساز ءُُ زیمل ءِ حاترا ندر کرتگ۔ آھانی چک ءُُ زھگ وانگ ءُُ زانگ ءَ زبہر انت آھانی کہول جان سلامتی ءِ بنیاتی آسراتیاں زبہر انت۔ انچو وھدے آ وت نادرا بنت کسے آھانی جُست ءَ نہ کنت کہ آھانی جاور چون انت آھان وتی زند بلوچی زبان لبزانک ءُُ ساز ءُُ زیمل ءِ حاترا ندر کرتگ۔ بلے بلوچ قوم ءُُ راج ءَ اے نادرائی ءِ آماچ بیت ءُُ اے دو روچی دنیا یل دنت ءُُ وتی آکبت ءِ جاہ ءَ روت۔
دنیا ءِ دومی قوم ءُُ راجانی ازمگر آرٹسٹ ءُُ کلمکار اں چارگ بہ بنت تہ گندگ بیت کہ آ وتی قوم ءُُ راج ءِ سفیر زانگ بنت۔ آھانی مالی جاور انچو شر انت کہ آ کسے محتاج نہ انت۔بلکں آ دنیا ءِ سیرتریں مردم زانگ بنت کہ آ دنیا ءِ ھر ھند ءُُ جاہے ءَ پروگرامے کن انت تہ آھانی شریں وڑھے مالی مدت ءُُ کمک بیت۔ چیاکہ آ وتی قوم ءُُ راج ءِ سفیر انت وتی ساز ءُُ زیمل ءَ دنیا ءِ تہا تالان کنگا انت آ وتی ملک قوم ءُُ راج ءِ تہا مزنیں ھذمت ءِ واھند انت۔ اے درگت ءَ بلوچستان ءِ تہا سیل کنگ بہ بیت تہ زانگ ءَ بیت نہ بلوچستان ءِ تہا ازمگر، آرٹسٹ ءُُ کلمکار ءِ ہچ جہت ءِ نہ دار انت کسے آئی ءَ سوج نہ کنت۔انچو بلوچستان ءِ سرکار ءُُ خاص کلچر ڈیپارٹمنٹ ءِ منصب دارآنی گوش کر ءُُ چم کور انت کہ آ بلوچستان ءِ بزگیں ازمگر ءُُ آرٹسٹانی مالی مدت ءُُٗ کمک ءَ بکں انت تنکہ آھانی مالی جاور گہتربہ بیت۔
وھدیکہ بلوچستان ءِ کلچر محکمہ ءِ گورا ملین آنی کلدار ایر انت بلے آ بزگیں بلوچی زبان ءِ ازمگر، آرٹسٹ ءُُ کلمکار آنی واستہ ھرچ نہ بنت۔ تنکہ بلوچی زبان ءِ آرٹسٹ ءُُ ازمگرانی جان سلامتی ءِ حاترا مدتءُُ کمک کنگ بہ بیت۔
استاد امام بخش مستانہ ءِ مثال مئے دیما انت کہ کلچر ڈیپارٹمنٹ ءُُ بلوچستان ءِ سرکارے گوش ءَ مورے نہ وارت کہ استاد امام بخش مستانہ ءِ نادرائی ءِ وھد ءَ دارو درمانے حاترا مدت ءُُ کمک بکرتیں تنکہ آئی شر ی ءِ سرا دارودرمان بوتیں۔ چیاکہ آئی ءَ وتی درستیں زندبلوچی، موسیقی ءِ ھذمت گوازینت۔ بلوچی سازءُُ زیمل ءَ دیما برت۔ وتی وشیں توار ءَ دیوان ءُُ مجلساں تامدار کرت۔ گڈ سرا مئے پاکیں پروردگار ءَ اے دعا انت کہ حُدا استاد امام بخش مستانہ ءَ وتی پاکیں بہشت ءَ جاگہ بدانت ءُُ آئی پدمنتگاں ءَ صبرے طاقت ءَ بدانت۔ آمین
الہٰی بخش مُرید ھم بیران بوت:
گوستگیں روچ ءَ بلوچی زبان ءِ نامداریں شاعر الہیٰ بخش مرید اناگت ءَ بیران بوت۔ آ بلوچی زبان ءِ یک شریں ورنائیں شاعر ے ات آئی ءَ را گوں بلوچی زبان ءُُ لبزانک ءَ مزنیں ھُب ءُُ واھگے ات آ مدام وتی گال ءُُ گفتار اں ماہتاک بلوچی زند ءِ سرا پہ چھاپ کنگا دیم دات۔ زند ءِ ہمک تاک ءَ آئی شاعری چھاپ بوت انت مئے دعا انت واجہ حُدا الہیٰ بخش مرید ءَ وتی پاکیں بہشت ءَ جاگہ بدانت آئی پشتپداں اے مزنیں غم ءِ سگگ ءِ طاقت ءَ بدانت۔ آمین (شونکار)