شونگال

بلوچی زبان ءِ نامداریں کلمکار ءُُ شاعر واجہ کریم آزات ءَ مارا یل دات
بلوچی زبان ءِ نامداریں کلمکار ءُُ شاعر واجہ کریم آزات مزنیں نادرائی ءَ پد 29 فروری 2020 ءَ اے دو روچی دنیا یل دات ءُُ وتی آکبت ءِ جاہ ءَ شُت۔ واجہ کریم آزات ءِ بیرآنی نہ ایوکہ آئی کہولے ءِ حاترا مزنیں تاوانے انت، بلکں آئی بیران بوھگ ءَ چہ بلوچی زبان ءُُ لبزانک یک نامداریں کلمکار ءُُ شاعرے ءَ زبہر بوت۔
چریشی ابید علم ءُُ زانت ءِ دیمرئی ءِ تہا آ یک استادے جہت ءَ قوم ءُُ راج ءِ ھذمت ءَ کرت۔ آئی بازیں طالب علم انت کہ زند ءِ بازیں پڑاں کار کنگا انت۔ پنجگور ءَ بلوچی زبان ءُُ لبزانک ءَ دیما برگ ءِ تہا واجہ کریم آزات ءِ تاریخی کردے بوتگ آ عزت اکیڈیمی پنجگور ءِ بن ھشت ایر کنوکانی تہا زانگ بیت۔ آئی ءَ پنجگور ءِ تہا علم ءُُ زانت ءَ ھوار زبان ءُُ لبزانک ءِ چراگ ھم روژنا ہ کرتگ ات۔ آئی ءِ بازیں شاگرد بلوچی زبان ءُُ لبزانک ءِ دیمرئی ءِ تہا وتی کرد ءَ پیش دارگ ءَ انت۔ آئی ءَ مدام ماہتاک بلوچی زند ءِ حاترا وتی شعر ءُُ نبشتانک روان دات۔آئی شعر ءُُ نبشتانک مدام زند ءِ تاکانی تہا چھاپ ءُُ شنگ بوت انت۔
آئرءَ گوں وتی وطن، ڈگار، قوم ءُُ راج ءَ بازمہر ءُُ دوستی ات، کریم آزات انوں مئے نیام ءَ ساڑی نہ انت بلے آئی کرتگیں ھذمت، کتابانی شکل ءُُ دروشم است انت۔ آئی نبشتہ کرتگیں کتاب بلوچی زبان ءُُ لبزانک ءِ مڈی زانگ بنت۔ اے عزت اکیڈمی پنجگور ءُُ دومی ادارہانی لبزانکی فرض انت کہ آ واجہ کریم آزات ءِ چھاپ نہ بوتگیں کتاباں زوت ءَ چہ زوت چھاپ ءُُ شنگ بکں انت۔
شاعر، کلمکار، کواس، ازمگر وتی قوم ءُُ راج ءِ سفیر زانگ ءَ بنت۔ چیاکہ آ مدام وتی زبان لبزانک، ساز ءُُ زیمل ءِ دیمرئی ءِ حاترا کارکن انت۔ آھانی جہد ءُُ کوشستانی سوب ءَ آھانی زبان لبزانک ءُُ ساز ءُُ زیمل تیوگیں دنیا ءِ تہا زانگ ءُُ پجارگ بیت۔ ایشانی جہد ءُُ کوشستانی سوب ءَ بلوچ قوم ءُُ راج ءَ دنیا ءِ تہا یک شناختے رستگ۔ بلے افسوزے مزنیں گپ ایش انت کہ بلوچی زبان ءِ شاعر، کلمکار ءُُ ازمگر نادرائی ءِ سوب ءَ بیران بنت۔ سرکارے گوش ءَ مورے نہ وارت تنکہ آھانی مدت ءُُ کمک ءَ بکنت۔گڈ سرا یک وارے پدامئے چہ پاکیں پروردگار ءَ دُعا انت کہ حُدا کریم آزات ءَ وتی پاکیں بہشت ءَ جاگہ بدنت ءُُ آئی چُک ءُُ زھگاں ءَ اے گرانیں ویل ءِ سگگ ءِ طاقت ءَ بدنت (آمین) (شونکار)