شونگال

سال 2019 ءِ سرا چمشانک دور دیگ بہ بیت زانگ بیت کہ اے سال بلوچ ءُُ بلوچستان ءِ حاترا یک گرانیں سالے بوتگ۔ چیاکہ بلوچ قوم ءُُ راج ءِ سرا زُلم ءُُ نا انصافی پیش ءِ وڑا برجاہ انت، بلوچ قوم ءُُ راج ءِ حاترا انصاف ءِ راہ ءُُ در بند انت۔ گوستگیں گچین کاری 25 جولائی 2018 چارگ بہ بیت تہ گندگ بیت کہ تیوگیں ملک ءُُ خاص بلوچستان ءِ انچیں مردماں دیما آرگ بوت انت کہ درستیں بلوچستان ءِ تہا ہچ ھند ءُُ جاہے ءَ گچین کاری نہ بوت۔ مردم سلکیٹ کنگ بوت انت۔
بلوچستان اسمبلی ءِ تہا شش ھفت مردم ءَ ابید درا سلکیٹ کنوکیں مردم نشتگ انت۔ پدا جام کمال ءِ سروکی ءَ یک انچیں سرکارے جوڑ کنگ بوت کہ آ گوستگیں یک ءُُ نیم سالے ءِ تہا ہچ وڑیں کار ءُُ کردے پیش نہ داشتگ بلکیں آئی ءَ بلوچستان بجٹ ءِ نیمگ زر سلنڈر کرتگ انت۔ بلوچستان ءِ وزیر ءُُ گزیر درا حاموش انت۔ اے باروا ہچ گپ کنگا نہ انت۔
ایشی بنیاتی سوب ایش انت کہ بلوچستان ءِ صوبائی ءُُ قومی اسمبلی ءِ ھر چنکس مردم گچین کاری ءَ آرگ بوتگ انت۔ آھانی گوش کر ءُُ زبان گُنگ انت کہ آ اے باروا گپ ءُُ حبرے بکن انت۔ انچو بلوچستان ءِ تہا کرپشن ءُُ سلکاری پدا گیش بوھگا انت۔ بلوچستان ءِ وزیر ءُُ گزیر وتی اسکیماں بیست در صد ءِ سرا بہا کنگ ءَ انت۔ انچو بازیں محکمانی پوسٹ ھم بہا بوھگا انت کہ حقداریں مردماں آھانی حق رسگ ءَ نہ انت۔ اے جاورآنی تہا بلوچستان ءِ دیمرئی ھشکیں وابے انت۔ بلوچستان ءِ تہا ھندی تاک، ماہتاک ءُُ روتاکاں گوں باز نا انصافی بوھگا انت۔ بلوچستان ءِ کروڑانی کلدار درآمدیں مردمانی تاک، ماہتاک ءُُ اخباراں دیگ بوھگا انت۔
بلوچی، براہوئی ءُُ پشتو زبان ءِ تاک ءُُ ماہتاک ڈھلگ چارکنگ بوھگا انت۔ حال رسانی ءُُ شنگ کاری ءِ محکمہ یک انچیں ادارہ ءِ زانگ بیت کہ صوبائی یا بنجاہی حکومت ءِ سرینءِ ھڈ زانگ ءَ بیت۔ بد قسمتی ءَ اے باروا ہچ دلگوش دیگ بوھگا نہ انت۔
وزیر ءُُ گزیر آنی حیال ایش انت کہ آھاں مہلوک ءَ ووٹ نہ داتگ آ پرچے کسے پرواہ بکن انت۔ آ وت سوب مند بوتگ انت۔ اے حاترا آھاں ءَ کسے پرواہ نیست۔ بلوچستان ءِ الیکشن ٹریبونل ءَ بارکھان ءُُ کیچ ءِ دو سیٹ ءِ سرا پدا گچین کاری ءِ پنت ءُُ شون داتگ چریشی ہمے پدر بیت کہ جولائی 2018 ءِ گچین کاری پاک ءُُ پلگار نہ بوتگ انت۔ مہلوک ءِ مینڈیٹ دُزی کنگ بوتگ تاں وھدے ملک ءُُ حاص بلوچستان ءِ تہا گچین کاری پاک ءُُ پلگار نہ بنت۔ بلوچستان ءِ دیمرئی ھشکیں وابے انت۔
بلوچستان ءَ پارٹی یک شپ ءَ جوڑ بنت پدا گچین کاریانی تہا سوب مند بیت ءُُ سرکار جوڑ کنت۔ اے رنگ ءُُ دروشم ملک ءِ دومی صوبہانی تہا گندگ نہ بیت بلوچستان یک بے واھندیں صوبہ اِنت آئرءَ واجہ نیست آئی ءَ گوں ہرچ زُلم ءُُ نا انصافی بیت کسے آئی سوج ءَ نہ کنت۔ بلوچستان ءِ مسئلہ ءُُ جنجالانی گیش ءُُ گیوار ھمیش انت کہ بلوچستان ءِ حق دیگ بہ بنت ءُُ بلوچستان ءِ تہا پاک ءُُ پلگار یں گچین کاری کنگ بہ بیت۔ (شونکار)
۔ (شونکار)