اوگانستان ءِ بلوچانی نیمگا ماہتاک بلوچی زند نوشکی ءَ بیست سال ءِ چھا پ ءُُ شنگکاری مراد بات

مروچی ءَ چہ بیست سال پیش ماہتاک بلوچی زند وتی چھاپ ءُُ شنگکاری ءِ بندات اکتوبر 1999 ءَ کرتگ اَت۔ اے جہد ءُُ کوشست بلوچی زبان، ادب، دود ءُُ ربیدگ ءِ حاترا پکر داروکیں واجہ یار جان بادینی ءَ کرتگ اَت۔ اے ہما دور ءُُ باریگ اَت کہ دنیا ءِ مستریں قوم ءُُ راج وتی زبان، لبزانک ءُُ دود ءُُ ربیدگ ءِ زندگ دارگ ءِ حاترا بلین آنی ڈالر ہرچ کرت اَنت۔ ہر سال صدانی ٹن کاگدہمے تاک، ماہتاک، روتاک ءُُ کتابانی سرا ہرچ بوت۔ انچو آ قوم ءُُ راجانی بازیں ٹی وی چینل، ریڈیو، ایف ایم ریڈیو، سینما ءُُ سوشل میڈیا زبانانی دیمرئی ءِ حاترا جہد کنگا انت۔ بلوچی زبان اے بنیاتی آ سراتیاں چہ زبہر اَت بلکں دیم پہ بیگواہی ءَ روگا اِنت۔
گوستگیں بیست سالانی تہا ماہتاک بلوچی زند پہ بلوچی زبان ءُُ ادب ءِ حاترا مزنیں کارے کرتگ۔ اے ہچ وڑا دل ءَ برگ بوت نہ کنت ءُُ نہ کسے اے تاریخی ءُُ قومی ءُُ راجی کار ءَ شموشیت کنت، ماہتاک بلوچی زند ءِ چھاپ بوھگ ءَ پدزوت چاگرد ءِ تہا بلوچی زبان ءُُ ادب ءِ باروا ارزشت پکر ءُُ حیال ودی کرت۔
ماہتاک بلوچی زند گوستگیں بیست سالانی تہا ہچ وھدے دم نہ برت ءُُ شپ ءُُ روچ بلوچی زبان، ادب، دود ءُُ ربیدگ رسم ءُُ دودآنی باروا کار کرت۔ انچو بلوچ ڈیھ ءَ در ملکاں نندوکیں بلوچانی زبان ءُُ لبزانک ءَ در برگ ءِ باروا کارکرت۔
اے ملکانی تہا میاں ایشیا ءِ ملک ترکمانستان، افریقہ ءِ مُلک کینیا ءُُ تنزانیہ، عرب ملکانی تہا عمان، قطر، بحرین، امارات ھوار انت۔
اے بلوچانی زند راجدپتر زبان ءُُ رسم ءُُ دود دیما اورت انت ءُُ دنیا ءِ درا بلوچاں یک دومی ءَ نزدیک کرت انت۔
من وت ماہتاک بلوچی زندءِ اولی تاکاں بگر ءُُ انوں بازیں معلومداری گپتگ انچو”بلوچی زند“ ءِ وانگ ءَ چہ بلوچی زبان ءِ نامداریں کلمکار ءُُ شاعراں زانت ءُُ پچ اورت۔
منی کہنیں یار یارجان بادینی ءِ باز دل سوچی ءُُ خواری پد ماہتاک بلوچی زند ءَ مزن کرت ءُُ ورنائی ءَ رسینت۔ انوں کسے آئر ءَ داشت نہ کنت۔ ماہتاک بلوچی زندکہ مروچی بیست سال ءِ عمر ءَ رستگ، آئی ءَ بلوچی زبان لبزانک دو د ءُُ ربیدگ ءُُ رسم ءُُ دودانی باروا بوؤکیں گام چست کرت۔
ماہتاک”بلوچی زند“ماں بلوچانی زند راجدپتر ءُُ تاریخ ءِ تہا مدام زندگ مانیت۔ مئے دعا انت کہ ماہتاک بلوچی زند یارجان بادینی ءِ شونکاری ءَ بازیں دگہ سوب مندی بگند ایت۔ تنکہ بلوچی زبان ءُُ ادب یک سوب مندیں ھند ءُُ جاہے ءَ سر بیت۔
عبدالستار پُردلی
کابل اوگانستان
25 اکتوبر 2019