اسلام آباد ءَ بگرتاں رنگوں میانمارے سفر…..سینیٹر محمد اکرم دشتی 

من رنگوں دیست آ اے پیما کہ من اسلام آباد ءَ سینیٹ ءِ چیئرمین ءِ آفس ءَ شُت۔ سینیٹ ءِ چیئرمین صادق سنجرانی ءَ منا گشت ءُُ درائینت کہ تہ ینگوں میانمار (برما) ءَ تر ءُُ گرد ءَ روئے۔ آئی ءَ گُشت کہ پارلیمنٹ ءِ یک ڈلے اودا روگا اِنت من تئی نام ءَ ڈلے ءِ تہا ھور کناں۔ آئی ءِ اے جُست ءَ پد من آؤ کرت ءُُ ہمے ارادہ داشت کہ وھدے من اودا رواں گڑا ہندوستان ءِ بادشاہ بہادر شاہ ظفر ءِ ادیرہ ءُُ قبرے زیارت بیت۔
اے پارلیمنٹ ءِ ڈیلیگیشنءُُ ڈلے ءِ تہا ماں دو سینیٹر یک ایم این اے ءُُ دو سرکاری آفیسر گوں اتنت۔ مئے ٹکٹ امارات ائیر لائن ءِ تہا بُک کنگ بوتگ اتنت۔ امارات ءِ ائیر لائن اسلام آباد ءَ چہ شپ نیم ءَ بال کرت ءُُ صہب ءِ سئے بجہ ءُُ سی منٹ ءَ دبئی ءِ مزنیں بالی پٹ ءَ جال کپت۔ پدا صہب ءِ نو بج ءُُ سی منٹ ءَ دبئی ءَ چہ بال کرت ءُُ دیم پہ رنگوں ءَ رادگ بوت۔ اینگوں ءِ پیش ءِ نام رنگوں بوتگ۔ میانمار ءُُ برما ءِ حکومت ءَ اے ھر دو نام بدل کرت انت اے کالونئیل دورے نام اتنت۔ ہمے واستہ مارا دوست نہ بوتگ انت۔ مئے اے سفرسک دراج اَت کساس پنچ ساعت لگت رنگوں ائیرپورٹ ءَ امارات ءِ جہازے لینڈنگ ءَ پد ماں وتی سامان دست ءَ زرت ءُُ وتی ھوٹل ءَ رادگ بوت۔ نیم ساعتے سفر ءَ پد ماں وتی ہوٹل لوٹی (Lotte) ءَ سربوت۔
اے فورسٹار ہوٹلے اَت، ائیرپورٹ ءَ بگرتاں ہوٹل ءَ ھور شری ءَ شنزگ ءَ اَت۔ روچ بیگاہ اَت۔ من ءُُ بٹ صاحب، سینیٹر ہوٹل ءَ چہ درشت، مئے سیمینار ہوٹل ءِ مزنیں حالے تہا اَت، اے دو روچی سیمینار ے اَت۔ ہر دو ایں روچاں صہب ءَ بگر تاں بیگاہ ءِ پنچ بج ءَ سیمینار ءَ دزگٹ اَت۔ اے سیمینار ءُُ دیوان ءَ یوکے UK بیس آرگنائزیشن ءِ چیر دستی ءَ بوھگا اَت۔ اے سیمینار ءُُ کانفرنس ءِ ایجنڈا ءُُ سرحال پارلیمنٹ و قانون سازی، قانون ءِ سرا عملداری ءُُ کار بندگ اَت۔
اے سیمینار ءِ بہر زوروکیں ملکانی تہا اسٹریلیا، میانمار، بنگلہ دیش، انڈونیشیا، ملائیشیاء، نیپال، سری لنکا، پاکستان ءُُ بھارت ھور اتنت۔ اے در ملکانی پارلیمنٹ ءِ باسک ءُُ سرکاری آفیسراں وتی ملکانی پارلیمنٹ ءِ تاریخ ءُُ قانود ءِ اڈ دیگ ءِ باروا مضمون ءُُ نبشتانک ونت۔
پاکستان ءِ پارلیمانی ڈلے نیمگا پنجاب ءَ تعلقداریں قومی اسمبلی ءِ باسک فتحانہ ءُُ سرکاری آفیسر کریم گبول ءَ وتی مقالہ ونت انت۔ پاکستان ءِ پارلیمنٹ ءِ تاریخ ءُُ آئی جنجالانی باروا دیوان ءُُ مجلس ءَ سرجمی ءَ سرپدی دات۔
میانمار ءِ آبادی 53.37 ملین انت۔ درستیں آبادی ءِ 12 در صد دومی مردم انت 88 درصد بدھ مت ءِ منوک انت۔ اے ساؤتھ ایشیا ءِ ملک ءِ زانگ بیت۔ اے ملک ءَ صد ءَ چہ زیات نسلی گل ءُُ ٹولی است انت۔ اے ملک ءِ سیم سر گوں انڈیا، بنگلہ دیش، چین، روس، تھائی لینڈ ءَ لگ اَنت۔ ینگوں (رنگوں) میانمار (برما) ءِ مستریں شہر انت۔ بدھ متانی مستریں بنجاہ عبادت ءِ ھند ءُُ جاہ ہمدا انت۔ آئی نام پاگوڈا انت (Pagoda) اے عبادت ءِ مزنیں ھند ءُُ جاہے انت۔ اے شش سنچری ءَ ایشی بن ھشت ایر بوتگ ینگوں ءَ مزنیں پارک، لیک، شاپنگ سینٹر ءُُ ہوٹل است انت۔ چونائی ءَ موسم چار انت بلے آ گوش انت کہ مئے گورا سئے موسم انت گرماگ بزاں بشام چار ماہ ھور بیت۔ بہرے روچ در کیت پدا جمبری بیت ھور گواریت۔ اے چا ر ماہانی تہا ہر کس لوگ ءَ چہ در کیت ھور ءِ ترس ءَ چہ آئرا وتی چیز گوں انت۔ برما ریاستانی نام ریکان انت (Rakhne) ءِ باروا گشنت کہ آ پانزدہ (15) صدی ءَ عرب باپارانی ہمراہ ادا اتگ ءُُ آباد بوتگ۔ اے وتی مذہب دود ءُُ ربیدگ ءُُ شہری حقانی حاترا مدام احتجاج کن انت۔ اے ریاست ءِ سیم سر گوں بنگلہ دیش ءَ لگیت بازیں رینگیاں مسلمان پیش ءَ ہمے سیم سر ءَ پنا ہ گیرے وڑا نشتگ انت۔
اگست 2017 پولیس ءُُ پوج ءَ ریکانی ریاست ءِ سرا مزنیں اُرش ءِ کرت گڈا ہفت لکھ رینگیاں مسلمان وتی علاقہ ءَ یل دیگ ءَ لاچار بوت انت۔ برما ءِ نامداریں راہشون ہان سان سوچی میانمار ءِ سیاسی جمہوری حاترا جہد ءُُ کوشست ءِ مزنیں نام ءُُ توارے داریت۔ آئی ءَ را پانزدہ سال لوگ ءِ تہا بندی کنگ بوتگ انت۔ اے مزنیں قربانی ءُُ جہد ءُُ کوشست ءِ سوب ءَ کینیڈا ءِ سرکار آئی ءَ را وتی ملک ءِ اعزازی شہریت دنت۔
بلے بچار وھدے مسلمانانی سرا زُلم ءُُ زوراکی بیت آھانی لس قتل ءُُ کوش بیت۔ بلے آ اے زُلم ءُُ زوراکی ءِ وھد ءَ حاموش بیت۔ آ برما ءِ گیشتریں مہلوک ءُُ بد ھ متاں ناراض کنگ نہ لوٹیت پدا کینیڈا ءِ سرکار وتی اعزازی شہریت ءَ ہان سان سوچی ءَ پچ گیت۔
ہان سان سوچی ءِ باروا گُش انت کہ آ جیل ءُُ بندی ءِ وھد ءَ فلاسفی، سیاست آٹو بائیو گرافی ءِ وانگ ءَ گوازینتگ، پیانو جتگ مئے سیمینار دور وچ ءَ پد ھلاس بوت سیمی روچ ءَ من ءُُ سینیٹر شاہد بٹ ءُُ مصطفی بدھ متانی مزنیں عبادت جاہ ءِ چارگ ءَ شُت، آئی ءَ پد بہادر شاہ ظفر ءُُ آئی لوگ بانک زینت محل بیگم ءِ ادیرہ ءُُ قبر ءِ زیارت کرتءُُ دعا ونت۔ وھدے پرنگیاں ھندوستان گپت گڑا واک ءُُ اختیار ءِ واھند ایسٹ انڈیا کمپنی ات۔ بہادر شاہ ظفر شاہی کلات ءُُ ماڑی ء تہا بے اختیار ات۔ بہادر شاہ ظفر ءَ وتی زند ءِ تہا ھشت سیر ءُُ سانگ کرتگ۔ آئی گڈی ءُُ دوستیں زال زینت محل بیگم بوتگ۔ بازیں کتابانی تہا نبشتہ انت کہ بہادر شاہ ظفر وتی قلعہ ءُُ کلات ءِ تہا بند بوتگ۔ بلے بازیں ریاستانی والی آئی ءَ ھزت ءُُ شرف داینت ءُُ دوست داریت بہادر شاہ ظفر آزاتی ءِ جنگ ءِ بالا بندی ءَ کنت ہمے واستہ انگریز بہادر شاہ ظفر ءَ چہ ھندوستان ءِ قلعہ ءُُ کلات ءَ در کن انت ءُُ رنگوں برماءَ برانت ءُُ ھمودا بندی جاہ ءَ بند کن انت۔ بہادر شاہ ظفر یک شمبے 7 نومبر 1862 ءَ بیران بوتگ آئی لوگ بانک زینت محل 17 جولائی 1886 بیران بوتگ۔
بہادر شاہ ظفر باز شریں شاعرے بوتگ آ شریں شعر پر بستگ آئی یک نامداریں شعرے گال ءُُ گفتار چوش انت۔
کتنا ہے بد نصیب ظفر دفن کیلئے
دو گز زمین بھی مل نہ سکی کوئے یار میں
وھدے پرنگی ھندوستان ءَ گرانت وتی حکومت ٹہین انت۔ ہمے پیما برما ھم آھانی قوضہ ءَ کیت ءُُ کالونی جوڑ بیت۔ اودا ورنا ایں بادشاہ ءِ نام تیبو (Thibao) بیت۔ آئرءَ گوں آئی لوگی ءَ گرانت ءُُ ھندوستان ءِ ریاست رتن گری (Ratngiri) قلعہ ءَ بند کں انت۔ آ ھندوستان ءِ ریاست رتن گری ءِ جیل ءِ تہا مِراَنت۔ ھندوستان ءِ بادشاہ بہادر شاہ ظفر پیراں سالی ءَ برما رنگوں ءِ جیل ءُُ بندی جاہ ءَ مریت۔
مئے اے سفر 16 جون 2019 ءَ بگر تاں 23 جون 2019 ءَ ات ماں پدا وتی منزل اسلام آباد ءَ رادگ بوت یک شپ ءُُ یک روچے ماں امارات ءِ جلواناکیں شہر دبئی ءَ ھم سیل کرت۔ ماں 23 ءَ اسلام آباد رست۔