کویتءِ سپر نامہ…..محمد دیدگ 

یک روچءِ من انچو گوں وت جیڈاِیت کہ من کلیں مزن ھورآں شُتگاں بلے کویت ءَ نہ شُتگاں گڈا من ارداہ کت کہ رواں سنگت ءِ ھم گنداں ءُُ مُلک ءِ ھم چاراں 18 ستمبر2019 من وت سنگت ئے ءَ فون کت کہ منی بالی گُرابءِ ٹِکِٹءَ بُک کن من کویت ءَ رواں ءُُ من وت سنگتءُُ دوزواھ ھم ھال داتنت کہ من اے تاریخ ءَ پیداکاں بلے اوئےءِ بھت انچیں دزگٹی ءِ آتک ءُُ دیمءَ مئیلانک بیت کہ من وت روگ کوتا کت ءُُ پدا سنگتء َوٹس آپ کت کہ منی آھگ نہ بیت کہ من چو دزگٹاں حیر یک ھپتگےءَ پد بزاں 25 تاریخ ءَ منی سنگت ءَ منا وٹس آپ کت کہ من ٹکٹ گیپتگ باندا سُہب ءَ وتا بالی پٹ ء َسر کن من تراھمودا گنداں من ھیرانءُُ ھَبُکہ مزنیں گپءُُ ھال ئے ءَ پد ھیر من گُشت شر من وتا سر کناں۔۔۔
دومی روچءَ من مشکت ء ِبالی پٹ ءَ سر بیتاں گنداں ھمئے منی سنگتءَ یک سوٹ کیسءِ دست انت اوشتاتگ منی وِدارءَ من کہ نُزیک ءَ رستاں دست ءُُ دروت ءَ پد من جُست گِپت یار ا ے ترا پہ من چہ گوں انت من سامان نہ براں گشی اڈئے دیدگ اے پرتئی واستہ نہ انت اے ھمئے بالی گرابءِ انت ھمسپرآں من پسو دات یار مسکرا مکن۔۔۔
ھیر بزاں اے وت یورپءَ رواگائیں ءُُ بالی گراب ماں بحرینءَ8 ساھت مھتل بیت پمئے ھاترا کہ من آئرءَ َاے ھشتیں ساھتاں کمپنی بدئیاں۔۔۔
من ھم دلء َگُشت شر بس ھمینچوکہ بحرین ءِ بالی پٹء َما اِیر بکپئیں گڈا تو منا گندے۔۔۔۔
ما کہ بحرینء ِبالی پٹ ء َاِیر کپتیں ءُُ دیم پہ ٹرانزٹ ءِ کونٹرءَ من گُشت بچار تو رواگائے یورپ ءَ من کویت ءَ بالی گراب دگہ سئے ساھتءَ پدانت ءُُ منی ھَشت ساھت ءَ پد من ادا ترا چے پد پنچ ساھتءَ نشت نہ کناں اگاں کائے گوں منی ھمرا بہ بے منی دیم ء َکسے آتکگ بالی پٹءَ ڈن منی وِدارانت من ترا بَران گوں ءُُ سئے ساھت ءَ پد ترا پدا بالی پٹ ءَ سر کنیں اگاں ناں من شُتاں اللہ ءِ میارءِ۔۔۔
پدا بیگاہءَ پنچ بج ءَ بالی پٹ ءَ سر بیتاں ءُُ دیم پہ کویت ءَ وھدئے کہ من کویت ءِ بالی پٹ ءَ وتا چہ ایمرگریشن ء َپارگ کت گڈا منی دیم بلوچی زبان ءِ نامئیں نبشتہ کار ءُُ عہدی کِسّہانی پٹ ءُُ پولکار ءُُ آزمانکار ءُُ شائر واجہ علی جمعہ زامرانی ءُُ بلوچی زبان ءِ کلاسیکل شائرواجہ راجی بلوچ اوشتاتگ انت ءُُ سلام ء ُدراھبات ءَ پد کمئے اوشت ءَ پد ماں ماشین ء َسوار بیتیں دیم پہ واجہ علی جمعہ زامرانی ئےءِ گِسءَ گڈا واجہ راجی بچ رائدءُُ رگام ھم منی وش آتکءَ آتک انت۔۔
واجہ راجی ءِ پجار اے وڈاِنت،،،،
واجہ مھمد بکش ءِ نزر مھمد درازھی چہ رندانی ٹک درازھی کٹم ءَ سیادی دار ایت ءُُ واجہ پنام راجی بلوچ انت۔
جوانیں راجی ءُُُ زرمبشتی شائرے ءُُ زبان زانت ءُُ زبان دوستے، آئی دو ءُُ سے کتاب پہ چھاپ ءُُ شنگ ءَ جاڑی انت،،،،،،،،،،،،،
وھدے کہ ماواجہ علی جمعہ زامُرانی گِسءَ سر بوتیں گڈا دگہ دو واجہ کار کہ یکے نام پہلوان سرجمیں نام نواب پھلوان، جاہ منن،بمپشت ءُُ دومئیگے نام واجہ کسور اَت۔ آ ھم بمپشت ءِ جاہ منند،،،، من ءَ وش آتک کت ءُُ سپرے ھالء ُاھوال گِپت ءُُ پدا ما نِشت ءُُ شام کت تاں شپے یک بجء َما ھال ءُُ اھوالءُُ گپء ُتران کت ءُُ دیوان آسر کت،،
دومی روچ آدینگے روچ اَت ما کُلاں آدینگے نماز نزیکیں مسیت ء َوَنت ءُُ پدا سُبارگ کُت،،
پدا ھمئے بیگاہ ءَ واجہ راجی بلوچ ءُُ آئئ ِبَچ رائد ء ُگُونڈلیں رگام آتک ءُُ مارا زُرت ءُُ سیلءُُ سوادء َماں گرینڈمول کویت ءَ ترءُُ تابءَ شُتیں اے سِئیل ءُُ سُوادے جاھ سَک ڈولدارءُُ زیبناک اَت ھمئے تَرء ُگَردےءَ ما بازیں چیز دیست پدا ھمئے مولے اندرء َعربی سازءُُ زیملی مراگشے کہ سمبہینگ بیتگ اَت باز سُکونے گوماں ما اُوشتاتء ُگُوشداشت،،
پدا ما دیم پہ سوق مبارکی نامیں بازار ئے ءَ شُتیں کہ کویت ءِ کوھن ءُُ قدیمئیں بازاراں چے یکے ات کہ باز ڈولدارء ُجلواناک اَت ترءُُ گردءَ پد گڈا ما شام ھم ھمئے کونیں بازارءَ پچیں جاھےء َ نِشت ءُُ کُت کہ کویت ءِ وشیں ورگءُُ کباب ءُُ تِکا وارت کہ سَک وشءُُ تامداریں وَرِگ اِتنت،،،
شام ءَ پد ما پدا آتکءُُ واجہ علی جمعہ زامُرانی ءِ گِسء َدیوان کُت تاں شپے 2 بَجءَ،،،
ایندگہ روچ ءَ سُہب ءَ واجہ علی جمعہ ءَ پہ مارا وشء ُتامداریں ناشتہ جوڑ کُت ءُُ وارینتءُُ واجہ وتء کارجاھ ءَ شُت سُہبے یازدہ بج ءَ واجہ راجی آتکءُُ منا زُرت پہ ترءُُ گَردءَ شُتیں دیم پہ کویت سٹی ئےَ پدا ما ھما جاھ ء َھم شُتیں کہ واجہ صدامءَ کویت ءِ قبضہ کنگے وھدا ھمئے راھ ءَ کویت ءَ پُتِرتگ ءُُ مُلکے سرا یلگار کتگ کہ جبل صدام ءِ نام ءَ تاں روچے مروچی زانگ بیت کہ یک پچیں ڈنے ءُُ بازیں کسان کسانیں کوہ ء ُجُونپ اَنت ءُُ میانءَ دگے کَشگ بیتگ کہ ھما وھدءَ صدامء ِفوج ءَ پہ وت اِے کِشک کش اِتگءُُ کویت ءَ پُتِرتگءُُ یلگارے کُتگ،انگت ءَ ٹوپء ُتیرانی شِلنگ ماں اے دمگاں کپتگ اَنت،،،
پدا دیم پہ احمدی نامئیں بازارئے ءَ شُت ءُُُ سِئیل ءُُ سُواد کت ءُُ پدا ما سئیل کنانءُُ کویت مَرین تیاب دیم ءَ شُتیں کہ باز ڈولدارءُُ مُوڈرن وڈءُُ پیم ءَ یک مزنیں سئیل ءُُ سُوادی مول ءِ جوڈیں کہ مِئیل ءُُ بوجوگ چو کتاراَنت ءُُ مھوکءِ رش ھم بازاَت ما سُبارگ ھم ھمئے جاہءَ کے ایف سی ئےَ کُت باز تامداریں سُبارگے اَت،،،
پدا ما شُت ایں واجہ علی جمعہ زامرانیء ِکارگِسء َکہ جی ایم سی کمپنی ئے ِنامء َزانگ بیت واجہ ء َمارا لِذت داریں چاھے وارینت،،،
پدا ما نِشت ءُُ ھالء ُاھوال کت ءُُ پدا ما لوگء َواتر بوتیں،،،
شپ ءَ پدا گوں واجہاں دیوان کُت شام ءَ پد شِئر ء ُشائری دیوانے کُت واجہ راجی ءَ وتء دِلکشءُُ دل تاہیریں شِئر مارا گوشدارینت ءُُ ما ھم وتء کَپی چُنڈیئیں شِئر واجہانی دیم ء َوَنت اَنتءُُ دلبڈی گِپت تاں شپے 12 بجءَ،،،،
سیمی روچ بِزان کہ منی کویت ءِ سپرے آھری روچ اَت واجہ علی جمعہ ءَ گوں وتء دستے مبارکاں پہ ما وشء ُلِذت دارءُُ تامداریں ناشت جوڑ کتءُُ وارئینت ءُُ منا اِجازت کت واجہ علی ءُُ پہلوان ءُُ واجہ کسورءَ دیم پہ وتء کارجاھ ءَ شُتَ ا نت،،،
سُہبے یازدہ بج ءَ واجہ راجی بلوچء ُورناھ رگام آتکَنت منا زُرت ءُُ ماں واجہ راجیءِ فیکٹری کہ واجہ ءِ کارجاھ اَت مارا بُرت ءُُ پیش داشت پدا ما سُبارگ کُت کہ کویت ءِ وشتام ءُُ لِذت داریں بَٹء ُگوشت کہ من اولی رندا وارتگ اَت سَک باز وش اِتَنت واجہ رائد ھم ھمودا اَت نیمروچے 3 بَج ءَ ما درآتگ ءُُ دیم پہ بالی پَٹ ءَ شُتیں واجہ راجی ءُُ سنگت رگام ءَ منا آورت ء ُبالی پَٹ ءَ سر کُت،،،
منی اے سپر سَک وش اَت پرچکہ من گوں اِے واجہانی مھران انچو دلگوش بیتگاں کہ من نہ زانت کہ اے سئیں روچ کدی کُٹ اِتَنت واجھانی مھراں من ھِچ پیم شموشکار نہ باں،،،،
مہمانداری مھرء ُدوستی یکجاھی ءُُ تپاکی ھمکوپگی ھم دستی من کہ گوں واجہاں دیستگ من باز متاثر بوتگاں۔۔۔۔
بہرحال زندے اے دابیں تَرء ُگَرد مردماں باز کم نسیب بیت بَلے اے واجھانی مھرء ُزبان دوستی ءُُ لبزانکی نزدیکی گوں وتءِ ماتی زبان ءَ ء ُگوں وتء راج ءَ الم ءَ سَتا کرزانت،،،
من ھچ رَنگ ءَ شموشت نہ کناں اگاں ھاوندء َزندے دات گڈا الم ءَ پدا دل گُوشیت کویت ءِ تَرء ُتاب ء َبُرو پرچکہ انگتءَ گُشے من پہ واجہانی مھراں تُنیگاں۔۔۔۔۔
اے سئیں روچانی کویت ء ِتَرءُُ گَرد منی زندے وشتریں روچ زانگ بنت۔۔۔۔
من یک برے پدا واجہانی مھرانی لکہ منت واراں۔۔۔۔