لندن، پیرس تاں کراچی ءِ سفر…..عبدالرسول نظامانی 

باز دیریں گپے انت، سال 1976 ءَ لندن ءَ چہ وتی سنگت واجہ اکبر بارکزئی ءُُ قادر بخش نظامانی ءَ مارا یورپ دعوت داتگ ءُُ سیلون ائیر لائن ءِ تہا سیٹ بُک کنائنتگوں، سیلوں ائیر لائن بالی گراب لندن ءِ وھد ءُُ پاس بیگاہ ءِ چار بج ہیترو ائیر پورٹ ءَ چہ چست بوت، آئی ءَ راہ ءِ تہا یک جاگہ بزاں پیرس ائیر پورٹ ایر کپگی اَت۔ لندن ءَ چہ پیرس دور نہ انت، یک ساعتے ءَ رند ماں پیرس ائیر پورٹ ءَ سر بوتیں مارا گشگ بوت کہ ادا تقریباً چل ءُُ پنچ منٹ انتظار کنگی انت، اگں ہر کس لوٹیت چاہ ءُُ آپ وارت بوارت چاہ خوری بکنت ماں جہاز ءَ چہ دومی مساپرانی ھوری ءَ ایر کپت۔ ماں اسکٹیرے سرا شُتیں دہ منٹ لگت چائے گپت آرام ءِ سرا ائیر پورٹ ءِ ڈیوٹی فری شاپ ءِ دکانانی چارگ ءَ مشغول بوتاں اناگت ءَ دہ منٹ نہ بوتگ ات توار پرجنگ کہ ائیر سیلون ءِ مساپر زوت بیاانت جہاز روگ ءَ تیار انت۔ ماں حیراں بوت کہ اے چہ طور ماں وتی چاہے کپ یلہ دات پدا اسکیٹر ءِ سرا سوار بوت باز دراجیں فاصلہ اَت ایر کپگ ءَ رند دورءَ چہ گندگا بوت کہ مئے سیلون ائیر لائن ءِ جہاز سرگا ءُُ چکر جنگ ءَ انت۔ من شیشگ ءِ دیوارے کر ءَ پریشان اوشتاتگ ات۔ لہتیں دگہ سیلوں ائیر لائن ءِ مساپرمنی ھوری ءَ حیران ءُُ پریشان جہاز سرگ ءَ گوں مئے پریشانی گیش بوت کہ قدرتی عملے انت۔ مئے درا سامان جہازے تہا اتنت، مارا پیرس ءَ یل دنت ءُُ وت کراچی ءَ بال کنت کمو دیر ءَ رند ائیر لائن ءِ گراؤنڈ اسٹاف ءِ مردم اتگ انت مارا تسلی دات ماں شمارا بس ءِ زریعہ ءَ بریں ماں آھاں ءَ گُشت کہ مارا کراچی ءَ روگی انت نہ کے لندن ءَ یا پیرس ءَ، ایشاں مارا وتی پروگرام گشت کہ مئے جہاز اد ءَ چہ پیرس ءِ دومی ائیر پورٹ ڈی گال ءَ تیل مان کنگ بزاں ری فیولنگ ءِ واستہ شتگ۔ اد ءَ چہ شما پیش ءَ نشتگیں مساپراں بس ءِ زریعہ اودا بریں شما ڈی گال ائیر پورٹ ءَ جہاز ءَ سوار بہ بیت۔ پیرس ءِ دو ائیر پورٹ انت اورلے ءُُ ڈی گال، ڈی گال ائیر پورٹ نوک جوڑ بیتگ۔ درستیں جہازانی پٹرول ءُُ تیل ءِ زورگ ءِ بند ءُُ بست ہمے ائیرپورٹ ءَ شفٹ کرتگ انت۔ انٹرنیشنل فلائیٹ درا ڈی گال ائیرپورٹ ءَ جال کپ انت، ری فیولنگ کن انت پدا وتی منزل ءِ نیمگا رادگ بنت۔
ڈی گال ائیرپورٹ فرانس ءِ پاگواجہ ءِ نام ءِ سرا ایر کنگ بوتگ، آزاتیں قومانی اے یک مزنیں سپتے انت کہ آ وتی نامی ءُُ مزنیں مردماں یات کن انت تنکہ آھانی نام مدام زندگ بہ مانیت۔
کساس نیم ساعت ءِ رند بس ءِ انتظام بوت مارا یک ءُُ نیم ساعتے ءَ پیرس ءِ روڑانی سرا سیل ءُ سواد کنان ءَ پیرس ایفل ٹاور، پارلیمنٹ، رسیک اسکو ائر مپت ءَ دیست۔ پریس ءِ مپت تر ءُُ گرد ءَ پد ماں ڈی گال ائیرپورٹ ءَ مئے دراھیں مڈی ءُُ چیز پدا جہاز ءَ بر کرت انت۔ مئے فلائیٹ وتی وھد ءُُ پاس ءَ چہ سئے ءُُ نیم ساعت لیٹ بوت۔ پیرس ءَ چہ جہاز ءَ سیدھا فلائیٹ کرت ءُُ مارا ھشت ساعت ءِ سفر ءَ پدا کراچی ءِ ائیرپورٹ ءَ سر کرت۔ سیلون ائیر لائن اسٹاف مارا چہ باز معافی لوٹت۔
بنی آدم ءِ زند ءِ تہا بازیں جہلی ءُُ برزی کیت منی خیال ءُُ واھگ ایش انت کہ مئے ورنا ءُُ بزرگ وتی زند ءِ تجربہ آں نبشتہ بکن انت۔ تہ باز شریں مواد دیما کائینت بلوچی زبان ءُُ ادب ءِ مزنیں ھذمت بیت۔ چو اے بتل ءِ وڑا قطرہ قطرہ دریا می شود بزاں قطرہ قطرہ دریا جوڑ بیت۔ بلوچ وتی بلوچی ءَ بے حال نہ بیت۔