گوادرءِ کتاب میڑہ…..یار جان بادینی

سفر نامہ دومی بہر
گوادرءِ کتاب میڑہ
یار جان بادینی جون 2019

گوادرءَ وھدے سُہب ءَ واب ءَ چہ پاد ات۔واجہ فدا دشتی ءِ مردماں مارا ناشتہ دات۔ناشتہ کنگءَ پد زوت تیار بوت۔موٹر ءَ سوار بوت ءُُ دیم پہ گوادر کتاب جاہ ءَ رہادگ بوت آں۔اودا سر بوھگا گوں کتابی میلہ ءِ آرگنائزر واجہ ناصر سہرابیؔ،عبدالغفار ؔھوت،واجہ بہرامؔ بلوچءُُ دومی بازیں سنگتاں مارا بیا بخیر کرت۔دراہ ءُُ جوڈی ءَ پد ماں آرگنائزراں چہ لوٹ کرت کہ مارا ”زنداکیڈیمی“ ءِ کتابانی واستاٹیبلء ِبدے ات تنکہ ماں زنداکیڈیمی ءِ کتاباں ایر بکناں۔گوادر کتابی میلہ ءِ آرگنائزراں مارا شرّیں ھندے ءَ ٹیبل دات، ما کتاب ٹیبل ءِ سرا ایر کرت۔ٹیبلءِ پشتءَ زند اکیڈیمی ءِ بینر جت۔زنداکیڈیمی ءِ نائب صدرمنظور عالمؔءُُ جنرل سیکٹری عبدالباسط زنداکیڈیمیءِ بک اسٹالءَ نشت انتءُُ کتاب بہا کنگ شروع کرت۔ما شُت کتابانی اسٹال سیل کرت۔سنگتاں حالءُُ حوال کرت۔گوادرءِ کتاب میلہ بازیں سالاں چہ گوادرءَ برجم دارگ بوھگا انت۔اے کتابی میلہ ءَ ہر سال ملکءِ بازیں بہراں چہ شاعر،کلمکارءُُ کواس بہر زور انت۔ملکءِ بازیں پبلشرزگوادر کتابی میلہءَ وتی کتاباں ایر کں انت۔اے میلہءِ تہا لکھانی کتاب بہا انت۔گوادر بلوچستان ءِ ہما یکیں علاقہ انت کہ اودا کتاب بہا بنت۔بلوچستان ءِ دومی ہچ علاقہ ءِ تہا کتاب بہا نہ بنت۔چریشی پیش کیچءِ بنجاہ تربتءَ کتاب بہا بوت انت۔اودا ھم کتابانی بک اسٹالانی سرا ایر کنگءِ سرابندش لگت۔بلوچستان ءِ دومی ہچ علاقہءِ تہا کتاب بہا نہ بنت۔

گوادرءِ کتابءِ میلہ بلوچستان ءِ تہا علمءُُ زانت ءِ یک روژنائی ءِ اُمیت ئے زانگ بیت۔بائد انت اے روژنائی دراہا بلوچستان ءِ شہرءُُ میتگانی تہا تالان بہ بیت۔تنکہ علمءُُ زانت،وانگءُُ زانگءِ روژنائی تیوگیں بلوچستان ءِ شہرءُُ میتگانی تہا تالان بہ بیت۔ماں گوادر کتابی میلہ ءِ یک یک اسٹالءَ چارگءَ ات۔بلوچی زبان ءَ ھوار بازیں اردوءُُ انگریزی زبانءِ کتاب ھم ایر اتنت۔سُہب ءِ دہ بج ءَ گوادرءِ بلوچستان اسمبلی ءِ باسک حمل کلمتی آہتءُُ دیوان جاہ ءَ سر بوت۔واجہ حمل کلمتی ءِ سر بوھگا گوں سے روچی کتاب میلہ ءِ بندات بوت۔اے دیوان ءِ حاصیں مہمان واجہ حمل کلمتی ات چریشی ابید سندھءَ چہ ڈاکٹر کلیم اللہ لاشاریؔ،حفیظ جمالیؔ ناصر سہرابیؔءُُ دومی بازیں کلمکارءُُ کواساں چہ ملک ءِ بازیں شہراں لوٹائینگ بوتگ ات۔آ اسٹیج ءَ نشتگ ءُُ ساڑی اتنت۔ملک ءِ بازیں بہراں بہر زوروکیں کلمکارءُُ کواساّں واجہ ناصر سہرابی ءُُ آھانی سنگتانی شکرءُُ منّت گپت کہ آئی ءَ خاصیں وڑا آھاں گوادرءَ لوٹائینگ تنکہ آ اے کتابی میلہ بہر بزور انت۔آھاں گشت کتاب ہما یکیں دوست انت کہ مردم ءَ علمءُُ زانتءِ ذریعہ ءَ مدت ءُُ کمک کنت۔کتاب ءَ گو ں دوستی بنی آدمءَ فرشءَ چہ عرشءَ سر کنت۔دنیاءِ تہا ہما قوم ءُُ راج دیما روانت کہ آ ھاں علمءُُ زانت ءِ پڑءَ جہد کرتگ۔ابید علمءُُ زانتءَ ہچ قوم،راجءُُ ملکے دیما نہ شتگ۔ گوادرءِ کتابی میلہ ءَ چہ ہمے پدّر بیت کہ بلوچستان ءِ مردم خاص ورنا ٹک علم ءُُ زانتءِ نیمگا دلگوش دیگا انت۔گوادر ءَ لکھانی کتابانی بہا بوھگ وت اے گپ ءِ دلیل انت کہ بلوچستان ءِ تہا علم ءُُ زانت ءِ روژنائی تالان بوھگا انت۔ دُرستان ناصر سہرابی ءُُ آئی سنگتانی جہدءُُ کوشست ساڑات کہ آ ہرسال اے وڑیں پروگرام برجم دارانت۔تنکہ بلوچستانءِ تہاعلمءُُ زانتءِ باروا پکرءُُ سسا ودی بہ بیتءُُ مردم کتاب ءِ نیمگا دلگوش بدے انت۔زیات ءَ چہ زیات کتاب بہ وان انت۔
بلوچستان اسمبلی ءِ تہا گوادرءِ نمائندہ حمل کلمتی ءَ ڈن ءَ چہ آتگیں مہمانانی شکرءُُ منّت گپت۔کہ آ ملک ءِ کنڈ کنڈءَ اے کتابی میلہ ءَ آہتگ ءُُ ساڑی انت۔ آئی ءَ گوادرءُُ آئی مہلوک ءِ نیمگا آھاں ءَ وش اتک گشت۔آئی ءَ گشت سی پیک ءِ سوب ءَ گوادرءِ نامءُُ توار باز مزن انت۔بلے راستی ءَ چارت کہ گوادرءَ ورگی آپ نیست۔گوادر ءُُ سی پیکءِ سوب ءَ چین ءَ پاکستان ءَ اربا نی ڈالر رستگ۔بلے رستگیں اربانی ڈالراں چہ یک ڈالرے گوادرءُُ آئی مہلوک ءِ سرا ھرچ کنگ نہ بوتگ۔انّوں ایوکا گوادر ءِ نام کارمرز بوھگا انت۔گوادر ءَ سیکوریٹی سک باز ات۔گوادرءِ کتابی میلہ یک جشن ءَ چہ کم نہ ات۔میلہ ءِ ہر ھندءُُ جاہ ءَ علمءُُ زانتءُُ کتابے گپّ بوھگا ات۔۔ہر مردم کتاب گرگ ءَ ات۔کسانیں زھگاں پت،ناکوءُُ کماش گون اتنت۔طالب علم کتاب زرت انت۔پتءُُ ناکو آھانی واستہ زر دات انت۔زند اکیڈیمی ءِ اسٹال ءَ بازیں مردم چارگ ءَ ات۔واجہ حمل کلمتی،واجہ حسین اشرف،نور محمد نورلؔءُُ دومی بازیں سیاسی،علمی ادبی مردماں ترءُُ تاب کرت کتاب پہ بہا زُرت۔
دمانے ءَ پد نیمروچ ءِ نان ءِ وھد بوت۔جار جنگ بوت کہ درا مہمان واجہ غفار ھوتءِ ھوٹل صدف ءَ سر بہ بنت۔من منظور عالم،عبدالباسطءُُ ڈرائیور عبداسمیع ءَ نان ءِ ورگ ءِ حاترا دیم دات۔ چیاکہ آسہب ءَ چہ زند اکیڈیمی ءِ بک اسٹال ءَ نشتگ ات۔بک اسٹالانی دراہیں مردم نانے ورگ ءَ شت انت۔ماں زند اکیڈیمی ءِ بک اسٹال نشتگ ات۔بازیں ورنائیں شاعر ءُُ کلمکار آہت انت۔ سلام ءُُ دعا کرت۔ماہتاک بلوچی زندءِ تاکانی باروا سوج کنگا ات۔ ماں آھاں ءَ ماہتاک بلوچی زند ءُُ ماہتاک بلوچستان ٹوڈے ءِ کاپی مپتءَ سوغات کرت۔طالب علم وش بوت انت کہ تاک مپتءَ رسگا انت۔من ءُُ اے ایف پی ءِ فوٹو گرافر بنارس خان زنداکیڈیمی ءِ بک اسٹال ءَ نشتگ ات۔منی تب ھم وش نہ ات۔چیسٹ انفیکشن بوتگ ات۔ تپ ھم است ات۔بلے گوادرءِ کتابی میلہ ءَ انجوائے کنگا ات۔
نیمروچ ءِ نان ءِ ورگا پدعبدالباسط،منظور عالم ءُُ ڈرائیور سمیع اللہ آہت انت۔پدا من ءُُ اے ایف پی ءِ فوٹو گرافر بنارس خان نان ءِ ورگ ءِ حاترا واجہ غفار ھوتءِ صدف ھوٹل ءَ شُت۔واجہ غفار مارا نندارینت۔حکم دات شر شریں ورگ بیار ایت۔مارا ماھی ءِ وڑ وڑیں ورگ دیگ بوت۔تاں دیرءَ واجہ غفارءَ دیوان ءُُ مجلس کرت۔مزنیں دیوانے ءَ پد ماں واجہ غفارھوتءَ موکل کرتءُُ آر سی ڈی سی ءِ سید ظہور شاہ ہاشمی آڈیٹوریم حال ءَ شت کہ اودا دیوان برجاہ ات۔اودا رضا ربانی ءِ کتاب چمان اندریں مہلوک ءِ ھم دیمدرائی بوھگا ات کہ اے آزمانکانی کتاب ءَ انگریزی ءَ چہ بلوچی ءَ ترینگ بوتگ۔اے کتابءَ بلوچی زبانءِ نامداریں کلمکارءُُ کواس واجہ غلام فاروقؔ بلوچءَ رجانک کرتگءُُ بلوچی لبزانکی دیوان ءَ چھاپ ءُُ شنگ کرتگ۔اے کتاب ءِ باروا تربت یونیورسٹی کیچ ء استاد طاہر حکیم بلوچ ءَ مزنیں نبشتانکے ونتءُُ کتاب ءِ رجانکار واجہ غلام فاروق بلوچؔ ءَ ھم وتی پکرءُُ حیالانی درشانی یک نبشتانکے ذریعہ کُرت۔چماّں اندریں مہلوکءِ دیمدرائی شریں وڑئے ءَ برجم دارگ بوت۔ رند ا ماں غلام فاروق بلوچ ءَ آئی کتابے دیمدرائی ءِ سرا مبارک بات دات۔واجہ غلام فاروقؔ بلوچ ءِ ھوری ءَ واجہ عبداللہؔ بلوچءُُ طاہر حکیمؔ بلوچ ھم گوں اتنت۔آھا ں گوں ھم حال حوال بوت۔رندا غلام فاروقؔ بلوچ ءُُ طاہر حکیم تربت ءَ رہادگ بوت انت۔عبداللہ بلوچ تربت ءَ داشت۔منی طبعیت ھم شر نہ ات۔حال ءَ چہ در کپت ءُُ زندءِ بک اسٹال ءَ شت۔عبدالباسطءَ سوج کرت کہ چنکس کتاب بہا بوتگ آئی ءَ گشت کہ کساس دہ ھزار کلدارے کتاب بہا بوتگ انت۔من حیران ءُُ حبکہ بوت کہ یک روچ ءَ اینکس کتابانی بہا بوھگ مزنیں چیزے انت۔چوشکہ منی طبعیت شر نہ ات۔من ڈرائیور ءَ گشت منا وتاخ ءَ سر بکن ایت۔سمیع اللہ ءَ بنارسءُُ منا زرت واجہ فدا دشتی ءِ لوگ ءَ اورت سر کرت۔منا تپ ءَ گپتگ ات بدن سک درد کنگا ات۔
عبدالباسط ءُُ منظور عالم دیرءَ پد ات انت۔بنارس ترند آپ ورگ ءِ شوقین ات۔من سنگتے ءَ فون کرت کہ منی ھمراہ ءِ حاترا چیزے راہ بدے۔آئی ءَ زوت راہ دات۔ من بنارسءَ گشت من وپساں تو انجوائے بکن۔ساری ءَ گور ھراب ات انوں لاپ ھم ھراب بوت۔سک تپیگ ات بدن درد کنگا ات۔صحب ءَ منی کتاب عمان ءِ بلوچ ءِ دیمدرائی ھم است ات۔ڈاکٹرے ءَ فون کرت۔ آئی ءَ فون ءِ سرا درمان نبشتہ کنائینت۔عبدالباسط ءَ درمان گپت ءُُ من وارت۔سُہب ءَ طبیعت گہتر بوت،ناشتہ کر ت پدا آرسی ڈی سی ءِ بنجاہ سید ہاشمی آڈیٹوریم ءَ شت اوں۔عبدالباسط ءُُ منظور عالمؔ زند اکیڈیمی ءِ بک اسٹال ءَ نشت انت۔منی کہنیں سنگت واجہ شیر دل بلوچ ءَ فون کر ت کہ مروچی نیمروچءَ منی گورا نان بور ات۔من گشت کہ منی طبیعت شر نہ ات۔آئی ءَ گشت شمارا گوں سنگتاں الّم ءَ آیگی انت۔ من گشت شر نمازءَ پد کایاں۔گوادرءِ کتابی میلہ ءَ باز مہلوک جم ات۔کتاب بہا بوھگا اتنت۔روچے ءِ یانزدہ ءَ منی کتاب عمان ءِ بلوچ ءِ دیمدرائی دیوان ات۔اے روچ ءَ ھم بازیں سنگتءُُ واجہاں گوں دیوان ءُُ مجلس بوت۔یانزدہ بج ءَ مارا اسٹیج ءَ لوٹاھینگ بوت۔منی ھوری ءَ حفیظ جمالی ڈاکٹر کلیم اللہ ؔلاشاریءُُ چندن ؔساچ ھوار اتنت۔مہماندار ءَ منی پجاروکی گوں دیوان ءِ مردماں کنائینت۔کہ واجہ یارجان بادینی ءِ تعلقداری چہ نوشکے ءَ انت۔آ ماہتاک ”بلوچی زند“ءُُ ”بلوچستان ٹوڈے“ سر شونکار انت۔بلوچی زبانءِ پڈا پٹ ءُُ پول کنگا انت۔
ترکمانستان،افریقہ،قطر،بحرین ءُُ عمان ءِ بلوچانی باروا پٹ ءُُ پول کرتگ۔مروچی عمان ءِ بلوچ ءِ دیمدرائی دیوان گوادر کتابی میلہ برجم دارگ بوتگ۔گوادرءُُ عمان ءِ یک دومی ءَ مزنیں سیادی یے است۔اے کتاب ءَ چہ گوادرءُُ عمان ءِ باروا بازیں معلومداری رست کنت۔
دیوانءَ بنداتءَ تربت یونیورسٹی کیچءِ رجسٹرار واجہ غلام فاروقؔ بلوچءِ نبشتانک ءَ واجہ چندن ساچءَ ونت کہ عمان ءِ بلوچ یک مزنیں ارزشت داریت۔خاص گوادرءُُ عمان ءِ بازیں تاریخی تکءُُ پہناتانی باروا معلومداری رسیت۔گوادر تربتءُُ مکران ءِ مردم اودا بازیں ھندءُُ جاہاں جاہ منند انتءُُ مزنیں منصبانی سر اکار کنگا انت۔اے کتاب ءَ چہ ورنایاں بازیں معلومداری رست کنت۔
دیوا ن ءِ دیما تران کناں ءَ حفیظ جمالی ءَ گشت کہ گوادر ءُُ عمان ءِ سیالی باز کہن ءُُ کدیم انت۔گوادر مزنیں وھدے عمان ءِ دست ءِ چیرا بوت۔عمان ءِ سلطان برات ءَ گوں وتی ناوشی ءِ سوب ءَ آہتگ ءُُ گوادرءَ جاہ منند بوتگ۔بلوچستان ءِ خان ءَ گوادر عمان ءِ سلطان واتی گزران ءِ واستاداتگ تنکہ آ وتی چک ءُُ زھگاں لاپ دات بکنت۔انچو پرتگیزیانی ھم گوادرءَ مزنیں تاریخے است۔حمل و جیئندءِ جنگی داستان سک نامدار انت۔یارجان بادینی ءِ کتاب عمان ءِ بلوچ عمانءُُ گوادرءِ یک تاریخی پجاّرے انت۔چریشی وانوکاں بازیں معلومداری رست کنت۔یارجان بادینی بلوچی زبانءِ اولی کلمکارءُُ پٹءُُ پول کار انت کہ آئی ءَ عمان،افریقہ،ترکمانستان ءُُ دومی ملکانی تہا جاہ منندیں بلوچانی باروا پٹ ءُُ پول کرتگءُُ کتاب چھاپ کرتگ۔

سندھءِ نامداریں آرکیالوجسٹ ڈاکٹر کلیم اللہ ؔلاشاری ءَ ترا کنانءَ گشت کہ منا باز وشی بوت کہ عمان ءِ بلوچانی باروا اے کتاب نبشتہ کنگ بوتگ،من بلوچی ونت نہ کنیں۔ باھد انت اے کتاب زوتءَ چہ زوت اردو،انگلشءُُ عربی زبان ءَ رجانک کنگ بہ بیت۔تنکہ اے بنیاتی معلومداری ہر کس معلومدار بہ بیت۔آئی ءَ گشت ہمے زوتاں من عمان ءَ کانفرنسے ءَ شتگ ات۔اودا مزنیں تعدادے ءَ بلوچ آباد انتءُُ آھان وتی رسمءُُ دود ھم زندگ داشتگ۔دیوان ءِ دیما یارجان بادینی ءِ کتاب ءِ دیمددرائی کنگ بوت۔اسٹیج ءِ سرا نندوکیں درا مردم کتاب زرت ءََ مردماں پیش داشت۔گڈ سرا وھدے منی گشتانک دیگ ءِ وھد ات من درستان چہ پیش آر سی ڈی سیءِ سروک ناصر سہرابی،واجہ خدابخش،بہرام بلوچ، عبداللہ،غفار ھوت،بجار بلوچءُُ دومی سنگتءُُ واجہانی شکرءُُ منت گپت کہ آھاں منی کتاب عمان ءِ بلوچ ءِ دیمدرائی دیوان گوادرے کتابی میلہ ایر کرتگ من ءَ شرف بخشتگ۔اے کتا ب عمان ءِ بلوچانی یک کسانیں تاریخے انت۔اے باروا گیشتر پٹ ءُُ پول کنگ بہ بیت تو بازیں چیز دیما ات کن انت۔اے دیوان واجہ حسین اشرف،بانک مریم سلیمان،بانک زاہدہ راہیس راجی ءُُ دومی بازیں مردم ساڈی اتنت۔کتاب ءِ دیمدرائی ءَ پد بازیں جنکءُُ بچکاں کتاب ءِ باروا جستءُُ پرس کرتءُُ کتاب ءِ سرا آٹو گراف گپت۔
نیمروچءِ نان ءِ وھد نزدیک ات بہرام گشگا اَت۔ زوت تیار بہ بیت۔نان ورگی انت۔من منظور عالم، عبدالباسطءُُ ڈرائیورءَ بہرام ءِ پجی ءَ را دات۔من ءُُ بنارس خان بک اسٹالءَ نشت،ماں ہمے سرپد بوت آں کہ اے مردم صدف ھوٹلءَ روانت زوت نان ور انتءُُ کاینت۔بلے ایشاں سک دیر کرت۔شیردل فون کنگا ات کہ من شمے ودار ءَ نشتگ آں زوت بیا ات۔وھدے من منظور عالم ءَ فون کرت آئی ءَ گشت کہ مارا گوادرءِ بریگیڈیرے گِسءَ برگ بوتگ۔ اودا نان ءِ دعوت انت۔ماں گشت کہ زوت نان بور اتءُُ بیاات۔واجہ نور محمد نورلءُُ اے ڈی بلوچ ھم مئے پجیّ ءَ نشتگ اتنت۔ماں منظور عالمءُُ عبدالباسط ءَ فون فونے سرا گشت زوت بیا ایت۔رندا ماں بہرام ءَ فون کرت کہ مئے مردما ں زور راھ بدے۔بہرام ءَ منظور عالم ءُُ عبدالباسط گاڑی ءِ زریعہ ءَ سر کرت۔آ زند اکیڈیمی ءِ بک اسٹال ءَ نشت انتءُُ ماں واجہ شیردل ءِ لوگ ءَ رہادگ بوت۔اودا آ مئے ودار ءَ نشتگ ات۔شیردل ءَ گوں درا جوڈیءَ پد مارا باز شریں نانے دات۔شیردلءِ لوگ ءِ پتکگیں ماہی باز وش اتنت۔من بنارس خان اے ڈی بلوچءُُ واجہ نور محمدنورلءَ شریں نانے وارت۔پد ا ماں واجہ شیردلءَ گشت کہ مارا گوادر پیش بدار۔آئی ءَ مارا برت،کوہ باتلءَ پیش داشت۔وھدے ماں پی سی ھوٹل ءَ شت۔تو آئی گیٹ ءَ مارا داشت ءُُ گشت کہ شما ھزار ھزار کلدارے ٹوکن بزور ات پی سی ءَ بچارات۔ چاہءُُ کافی بور ات۔ماں گشت انوں ماں سبارگ کرتگ۔ہچ ورگ ءِ ضرورت نہ انت۔واجہ شیردل ءَ مارا شری ءَ ترینت۔بیگاہ ءِ وھدءَ سید ظہور شاہ ہاشمی آڈیٹوریم ءَ سر کرت۔ماں شیر دل ءَ زند اکیڈیمی ءَ چہ کتابانی سیٹ ئے دات۔ کتاب ءِ میلہ ءَ سیف اللہ کہ واپڈاءَ ایس ڈی او انت ات ءُُ گشت۔ شپءَ شمے نان گوں ماں انت۔ہمے دمان ءَ قندیل کتابجاہ پیشکان ءِ شبیر شاکر ات ءُُ گشت کہ واجہ شما باندا روگا ات۔ منا چیزے کتاب بدے ات من وتی کتابجاہ ءَ ایر کناں۔من گشت شبیر جان تہ ہر چنکس کتاب زورے بہا کنگءِ واستہ بزور۔آئی ءَ عمانءِ بلوچ،بیگ محمد بیگل،بشیر بیدار،بشیراحمد بلوچ ءُُ غلام حسین شوھازءِ پانزدہ پانزدہ کتاب داتءُُ وتی دومی کتاباں کاٹنانی تہا بند کرت۔چیاکہ سُہب ءَ مارا کوئٹہ ءَ رہادگ بوھگی ات۔
وھدے ماں لوگ ءَ سر بوت عبدالباسط ءُُ منظور عالم ءِ مجلس گپت۔ آھاں گشت کہ آرسی ڈی سی ءِ مردماں مارا گوادرءِ بریگیڈیرءِ گسءَ برتگ۔اودا مئے نیمروچءِ نان بوتگ۔نانے تہا ایوکا مارا بریانی دیگ بوتگ۔دگہ ورگ ءَ ہچ نہ بوتگ۔ڈرائیور گوں بریگیڈیر ءَ یک صوفہ ءِ سرا نشتگءُُ بریگیڈیرءَ گشتگ منی سیالے ھم فوج ءَ انت۔ہمے حاترا بلوچی ءَ گش انت کہ بیاّ گوں سردار ءَ ناں وارت۔منظور عالم ءُُ عبدالباسط یک یک کپ گون ات کہ بریگیڈئیرءَ سوگات کرتگ ات۔ آھان گشت کہ واجہ عبداللہ بلوچ ءَ بریگیڈیئر ءَ گشت کہ شما مئے گوادرءِ کلچر سینٹر ءِ سرا قوضہ کرتگ۔ اے شریں چیزے نہ انت بریگیڈئیر ءَ واجہ عبداللہ ءَ گشت کہ ماں شمے زھگانی واستا اسکولے پچ کرتگ۔ واجہ عبداللہ ءَ آئی ءَ گشت اسکولے واستہ دگہ ھند ءُُ جاہ باز اَت شما مئے کلچر ءِ سرا قوضہ کرت۔من سنگتاں گشت کہ شمے بریگیڈیرءَ چہ شیردلءِ دعوت سک وش ات۔مغرب ءِ وھد سیف آہت۔ آئی مارا زرت یک شریں ھوٹلے ءَ برت شریں نانے دات،تاں دیرءَ گوں آئی ءَ مجلسءُُ دیوان بوت۔پدا وھدے ماں فدا احمد دشتی ءِ گسءَ ات۔ فدا دشتی ءِ کارہندہ ءَ گشت کہ واجہ شیردل بلوچءِ مردم کاٹن ءِ ماہیءُُ حلوہ اورتگ۔من حلوہ سنگتانی نیامءَ بہرءُُ بانگ کرتگ کہ ہر کس وتی گسءَ حلوہ ببارت۔
من سُہب ءَ مہلہ پاد آہت۔ واجہ فدا دشتی ءِ کارہندہ ءَ مارا ناشتہ دات ماں تربت ءِ راہ ءَ کوئٹہءَ رادگ بوت۔شہر ءَ در کپگ ءِ وھدءَ ماں راہ ءَ رد کرت،پد ا کسے جست کرت۔آئی ءَ مارا راہ پیش داشت۔دو ساعتءَ پد ماں تربت ءَ سر بوت۔راہے سرے ھوٹلےءَ چاہ وارت۔پدا پنجگورءَ چاہ وارتءُُ گاڈی ءَ تیل مان کرت۔نیمروچءِ ناں ماں بیسمہ وارت۔ پدا بیگاہ چاہ ماں سوراب ءَ وارتءُُ گاڈی ءَ تیل مان کرت۔
مغرب ءَ پد ماں کوئٹہ رست ۔پیسرا عبدالباسط سریاب برما ہوٹل ءَ جہل کپت۔رند ا بنارس خان ءَ آئی گسءَ سر کُرت۔آگڈ سرءَ استاد سمیع اللہ مارا گسءَ سر کُرت۔من سمیع اللہءِ ھفتگءِ حساب کتاب کرت،بزاں آئی ھفتگءِ سی ءُُ پنچ ہزار کلدار جوڈ بوت انت۔چیاکہ گاڈی ءِ تیل دومی ھرچءُُ درچ منی
سرا اتنت۔مئے مکران ءِ ترءُُ تاب ھمدا ھلاس بوت۔
٭٭٭