بلوچی زبان ءِ جیڑہ ءُُ آکبت…..بالاچ حمید نور

بلوچی زبان استیں دنیا ءِ کہن تریں زباناں چہ یکے زانگ بیت۔ لبزانتی حساب ءَ بلوچی زبان یک سیرلبزیں زبانے یک پراہ ءُُ شاہیگانیں زبانے ءِ ہرچند کہ سپت است انت آ درائیں گوں بلوچی زبان ءَ ہمدپ بنت۔ چوکہ بلوچی زبان ءَ سائنسی رہبنداں ءُُ ردانکی سپر (نبشتہ سپر) یکجائی ءَ 1950 ءِ دہک ءَ بندات کرتگ انت۔ ایشی ءَ ساری دو دست نبشت، یکے اوتمان کلمتی ءُُ دومی کمالان گچکی ءِ کتاب انت کہ ہپدوہمی ءُُ ہژدوہمی کرن ءَ نبشتہ کنگ بوتگ انت۔ مکتب درخانی ءِ کار اوں اے جاہ ءَ ستا کرنزنت بلئے سائنسی رہبنداں اے کار نہ بوتگ انت۔ سائنسی رہبنداں گوں بلوچی ءَ ہمے وہداں گامگیج زرتگ ات۔ اے تک ءَ جوان جوانیں پولکاری کار ہم کنگ بوتگ ات۔ نبشتہ رہبند ءُُ ردانکی کار سرجمیں رنگے ءَ گوں پُریں تہراں بوہگ ءَ ات انت بلئے انگت ءَ بلوچی زبان آ وڑءَ دیمروئی کنگ ءَ نہ ات۔ باز براں ہمے جست پگر ءَ کئیت کہ انچو کار ءُُ کتابانی چاپ کنگ ءَ پد اوں بلوچی زبان ءَ سوبمندیں دیمروئی کت نہ کتگ ایشی ءِ سوب چے اَنت؟ بیائے اے تک ءَ لہتیں جیڑگانی نیمگ ءَ دلگوش کنیں کہ بلوچی زبان ءَ گوں دوچار اَنت ءُُ ایشانی گیشواری الّم اِنت۔
٭کلاں مستریں اڈ پہ بلوچی زبان ءُُ لبزانک ءَ سرکار ءُُ حکومت ءِ نادلگوشی انت۔ بزاں ابید چہ حکومت ءَ دنیا ءِ ہچ زبان ءُُ لبزانک دیمروئی کت نہ کنت۔ بلئے مئے سرکار ءَ گوں زبان ءَ ہچ سر ءُُ کار نیست انت۔ دانکہ سرکاری دلگوشی ءُُ کمک گون مہ بیت زبان ءِ دیمروئی کنگ دروگے۔
٭ بلوچی زبان ءِ دگہ یک جیڑگے آئی ءِ ندکارانی یکے دومی ءَ گوں کینگ داری انت۔ ہچ ندکار دومی ندکار ءُُ آئی ءِ ساچشت ءُُ پولکاریاں نہ منیت آ تری ستر شر بہ بیت آ الم آئی ءِ تہا عیب در کنگ ءِ جہد ءَ کن اَنت۔ بلئے ایشی ءِ تاوان آ ندکار ءَ نہ بیت بلکیں زبان ءَ را بیت۔ اے دگہ دنیا ءَ ہم ندکار گوں یکے دومی ءَ زہر ءُُ کہر است انت۔ بلئے گوں ساچشتاں کس کسی ئے پادچکی ءَ نہ کنت ءُُ یکے دومی ءِ دلبڈی ءُُ داد ہم برجم انت۔ مئے ندکارانی کار یکے دومی ءِ پچوکانی شودگ اِنت اے نوبتاں زبان ءُُ لبزانک چون دیمروئی کت کنت۔
٭یک زبانے گوں وتی اڈ کتگیں اکیڈمیزاں دیمروئی کنت ءُُ وتی برزی منزلاں سر بیت کنت۔ اکیڈمی آنی جوڑ کنگ ءِ مول ءُُ مراد ہم ہمیش انت۔ بلئے مئے اکیڈمی آنی تہا ایوک ءَ ور ءُُ چر ءَ ابیدءَ زبان ءِ دیمروئی ءِ بابت ءَ جیڑگ نیست انت ایوک ءَ چندے مردم است اَنت کہ کار کنگ لوٹ اَنت بلئے تہنائی ءَ چے بیت کنت دانکہ درست ہوار مہ بنت۔
٭بلوچی زبان نبشتہ رہبند،گالوار ءُُ گالبندانی گیشگیواری ہم زبان ءِ مستریں جیڑگانی تہا کائینت۔ اے یک اجبیں ہبرے کہ انچو کتاب ءِ چاپ بوہگ ءَ پد اوں مئے نبشتہ رہبند پرچہ تچک بوہگ ءَ نہ انت۔ پرچہ ما چاہ پرستی ءُُ گروپ بندی ءِ سانکلاں چہ انگت ءَ در نہ کپتگ انت ءُُ قومی جیڑگانی سرا یکجائی ءَ پگر نہ کتگ۔
٭ زبانزانتانی کمی ءِ سوب ءَ بلوچی زبان ءِ لسانی جیڑھ روچ پہ روچ گیشتر بوہان انت۔ دومی مرچی ہما مردم کہ آئی ءِ گوں لسانی تک ءُُ پہناتاں دور دورءَ سیادی نیست۔ ہما لسانی جیڑگانی سرا نبشتہ کنگ ءَ انت گڑا آئی ءِ کار چونائی ءَ نیم شلونگ ءُُ بے سریں بنت۔
اے دراہیں گپ کہ برز ءَ کنگ بوتگ اَنت ایشانی استی پہ بلوچی زبان ءَ سک باز تاوان انت۔ اگاں ایشانی گیشواری زوت مہ بیت گڑا بلوچی زبان ءِ جیڑگ گیش ءَ چہ گیشتر بوہان بنت ءُُ بلوچی زبان ہم وتی گار ءُُ بیگواہی ءِ نوبتاں اتک انت۔ دنیا ءِ دپتر اے چیزے شاہد انت کہ بلوچی زبان ءَ دو،سری سیرلبز ءُُ تمردیں ملکانی زبان ہم گار ءُُ بیگواہ بوتگ انت ءُُ گڑا بلوچی زبان ءِ چے بستار۔۔۔۔۔ کہ پیسرا ءَ بازیں اڈاندانی واہند اِنت۔
دومی نیمگ ءَ اگاں ما اے جیڑگانی چارگ ءَ مہ کن انت ءُُ اے جیڑگانی بابت ءَ پگر مہ کن اَنت گڑاں بلوچی زبان ءِ آکبت سک بے ڈول ءُُ تہاریانی آماچ بیت۔ بلے امیتانی چراگ ءُُ شہم انگت ءَ گندگ بیت پرچکہ مرچی پہ بلوچی زبان ءِ رکینگ ءَ چیزے جوانیں کار ءُُ پولکاری ہم کنگ بوہگ ءَ انت۔
اے دراہیں چیز بلوچی زبان ءُُ لبزانک ءِ وشیں باندات ءِ شبین ءَ دئینت۔ مرچی لبزانک ءِ ہر دو تہرانی (شائری ءُُ ردانکی) سرا نبشتہ کنگ بوہگ ءَ انت ءُُ نوک باہندیں ورنا وتی جوہراں پیشدارگ ءَ انت۔ چہ اے درائیں ہبراں وت ہمے پدرائی بیت کنت کہ بلوچی زبان ءُُ لبزانک ءِ آکبت رژناہ انت۔ بلکیں مرچی بلوچی زبان میان استمانی جاہ ءَ ہم سر بوتگ ءُُ بازیں ڈنی مردمے ہم بلوچی زبان ءُُ لبزانک ءِ سرا کار کنگ ءِ واہگ درشان کتگ۔ بلوچی زبان ءِ نبشتہ کارانی رواج نوں ترند تریں ءُُ گوستگیں سالانی حساب ءَ اگاں چارگ بہ بیت داں بلوچی زبان ءَ سک باز دیمروئی کتگ۔ نوں لبزانک ءِ ہر دو پڑاں ردانک ءُُ شائری ءَ کار بوہگ ءَ انت۔ آ تُری ناول ءُُ آزمانگ بہ بنت یاکہ دستونک ءُُ لچہ دراہیں پڑانی سرا جوانی ءَ کار بوہگ ءَ انت چہ ہمے کار ءُُ کتہ کاریاں چہ وت زانگ بیت کنت کہ بلوچی زبان ءُُ لبزانک ءِ آؤکیں وہد چنچو زیبا ءُُ ڈولدار انت۔