بلوچ راج ءِ پَجّار…..یاسمین شِمامہ ؔ 

بلوچ راج بہ بیت یا ایدگہ راج آیانی پَجّار چار چیز ءَ چَہ زانَگ بیت۔ اوّلی زبان اِنت دومی زند آدینک اِنت، سیمی تاریخ ءُُ چارمی سرزمین اِنت تناہداں یک راجے سرجمیں راجے زانگ ءُُ گُشگ نہ بیت۔ دانکہ آئرا اے چاریں چیز مہ بنت۔ اللہ پاک ءَ مارا شَنک جَتگ پروتی نَودءُُ نہہ ئیں ناماں مارا اے چاریں چیز داتگ اَنت۔ بَلے ما وت چہ چاریں بے مَٹّ ءُُ بے بہائیں چیزاں گِستا ءُُ پراموش ایں۔ من وتی پُلّیں راج ءِ کسان ءُُ مزن مات ءُُ گُہارں اِے سرپدی دیاں کہ کُجام راج وتی زبان ءَ چہ پراموش بہ بیت گڑا کُلّیں دنیا چہ آئی پراموش بیت۔ اگاں راجے چہ وتی زبان ءَ پِراموش مہ بیت۔ بِزاں کہ وتی زبان ءَ گوں ہمگرنچ بہ بیت۔ گڑا پہکیں دنیا ءِ تہا راج چہ آئی پراموش بوت نہ کن اَنت۔اِے گپّ ءَ من پر وتی راج ءَ یلہ دیاں کہ آ چے گُش اَنت۔ مئے راج پہکیں جہان ءَ پراموش بہ بیت یا پِراموش کَنَگ مہ بیت۔ من زاناں بلوچ راج گوں یک آواز ءَ گُشیت کہ ہچ وڑ ءَ مئے نہ ُترس ءُُ گیرت مندیں راج کُلّیں دنیا ءَ پراموش کنگ مہ بیت۔ گڑا بیا اِت مرچی ءَ چَہ آجام کنیں کہ گوں وتی شہد ءُُ شکّلیں زبان ءَ ہمگرنچ بئیں ءُُ وتی بے مَٹّ ءُُ بے بہائیں زِندآدینک ءِ سر ءَ پہر ءُُ ناز کنیں۔ بِزاں کہ مرچی ءَ چَہ وتی شہدیں زبان ءِ وانگ ءُُ نبشتہ کنگ ءَ بندت کنیں ءُُ دومی راجانی زانتکار ءُُ نبشتہ کاراں ہم سِکین دئیں پہ بلوچی زبان ءِ وانگ ءُُ نبشتہ کنگ ءَ۔ دانکہ آ مجبور بِہ بنت بلوچی بِہ وان اَنت ءُُ نبشتہ بکن اَنت۔ انچو کہ نماز دین ءِ ڈیکی گُشگ بیت۔ راج ءِ اوّلی ڈیکی آئی زبان گُشگ ءُُ زانَگ بیت۔اگاں یکے ءَ را وت شہد ءُُ شکّلیں زبانے بہ بیت ءُُ آ دِگر ءِ زبان ءُُ زندآدینک ءِ سر ءَ پہر ءُُ ناز بکن انت۔ منی حیال ءَ شہ آئی مستریں بے اگل ءُُ بے زانت نہ بوتہ نہ بیت دومی نیمگ ءَ ما بچاریں اگاں یک ماتے ءِ گوراناں شیر مان بہ بیت ءُُ زہگ ءِ پِت ءُُ مات انگت ءَ وتی زہگ ءَ را ڈبُّکی شیر بِہ دنت۔ شما چے گُش اِت کہ آئی پِت ءُُ مات سار اَنت یا گنوک اَنت من زاناں کہ شما پہکیں گُش اِت کہ آگنوک اَنت۔اِے من سرپد آں یکءُُ دو زبان ہَست اَنت اَبید چَہ زباناں ساڑی ئیں وہد ءَ زند ءِ وشحال بُوَگ اَڑاند انت اِے زبان کہ پہ زند ءِ وشحالی ءِ واستہ اَلّمی اَنت۔ ایشاں ہم پراموش مہ کن اِت۔ بَلے وتی ماتی شہد ءُُ شکّلیں زبان ءَ چَہ کدی پِراموش مہ بئے۔ انچو کہ من گُشت کہ کَسّے چہ وتی زبان ءَ پراموش بوت گڑا پہکیں دنیا ءِ تہ ءِ راج چہ راج ءَ پراموش بنت۔ یکبرے پد ءَ من گوں وتی گُلیں مات ءُُ گُہاراں ءُُ پُلّیں برات ءُُ کماشاں گوں دزبندی کناں کہ آ بلوچی نبشتہ بکن اَنت ءُُ بِوان اَنت۔ چیاک بلوچی زبانءِ دیمرئی ءُُ زندگ بُوَگ، منی ءُُ شمئے دیمرئی ءُُ سوبمندی ءِ نشان اِنت۔
بلوچی بِوان اِت ءُُ بلوچی بِزان اِت