کرکٹ ءُُ یار جان بادینی …..محمد شعیب

یار جان بادینی ءَ من ہما دور ءُُ باریگ ءَ چہ زانیں کہ گوں کہ آ لیب ءُُ گوازیانی باروا نبشتہ کرت۔ آ لیب گرانی مسئلہ ءُُ جنجالانی باروا نبشتہ کرت۔ آ لیب گرانی انٹرویواں گپت ءُُ ماہتاک بلوچی ءَ چھاپ ءُُ شنگ کرت۔ اے سال 1988 ءِ گپےّ انت۔ چیاکہ یار جان بادینی وت کرکٹرے اَت آئی ءَ چاغی کرکٹ ایسوسی ایشن ءِ بن ھشت ایر کرت۔ آ چاغی کرکٹ ایسوسی ایشن ءِ صدر اَت وھدیکہ جمیل احمد چاغی کرکٹ ایسوسی ایشن ءِ جنرل سیکرٹری اَت۔ نوشکی ءَ چاغی ءَ کرکٹ ءِ بُن ھشت ایر کنوک واجہ یار جان بادینی اَت۔
آئی ءَ چہ ڈی سی نوشکی احمد بخش لہڑی ءَ چاغی کرکٹ ایسوسی ایشن ءِ حاترا گراونڈے گپت آ گرونڈءِ تہا یک سیمنٹ ءِ وکٹ ءِ جوڑ کرت کہ نوشکی ءِ زھگ آئی سرا گوازی کرت انت۔ پدا آئی ءَ چاغی ءِ کرکٹ ٹیم ءَ کوئٹہ ءَ آورت نواب اکبر خان بگٹی کرکٹ اسٹیڈیم ءَ یک میچ ءِ گوازی کرت۔ منا شری ءَ یات انت کہ چاغی کرکٹر پادشاد لیدرے گیند ءَ گوازی کرت انت کوئٹہ ءِ کرکٹر آھانی سرا کندِت انت۔
بلے مروچی ایں دور ءَ نوشکی ءِ کرکٹ ٹیم انڈر 19 ءِ ھوری ءَ ٹرافی گوازی کنت۔ انچو نوشکی ءِ کرکٹ گراؤنڈ یک اسٹیڈیم ءِ شکل ءُُ دروشم گپتگ۔ اودا مزنیں کرکٹ ءِ لیب ءُُ گوازی بنت اے درا کریڈٹ یار جان بادینی ءَ روت کہ آئی ءَ نوشکی ءَ کرکٹ ءِ بن ھشت ایر کرتگ اَت۔
انچو آئی جندءَ ٹنڈو جام یونیورسٹی ءَ سپورٹس ءِ ذریعہ ءَ سیٹ رستگ اَت کہ آ ٹنڈو جام یونیورسٹی ءِ نیمگا کرکٹ لیب کرت ءُُ ونت۔
نوشکی ءَ یار جان بادینی اولی مردم بوتگ کہ کرکٹ ءِ لیب ءَ بندات کرتگ انچو آ اولی مردم انت کہ نوشکی ءَ چہ بلوچی زند ءِ نام ءَ یک مجلہے ءِ چھاپ ءُُ شنگ کرت کہ آ تاں روچے مروچی چھاپ ءُُ شنگ بوھگا انت۔
آ زند اکیڈمی نوشکی ءِ بُن ھشت ایر کنوکانی تہا حساب بیت۔ زند اکیڈیمی ءَ کسانیں مدّتے ءَ بازیں ادبی پروگرام برجم داشتگ ءَ بلوچستان ءِ نامداریں شاعر ءُُ کلمکار اں نوشکی ءَ اورتگ۔ زند اکیڈیمی ءَ کسانیں مدّتے بازیں کتاب چھاپ ءُُ شِنگ کرتگ کہ اے نوشکی ءَ زبان ءُُ ادب ءِ دیمرئی ءِ حاترا مزنیں کردے پیش دارانت۔ یار جان بادینی ءِ زبان دوستی ءِ مزنیں مثال ایش انت کہ آئی ءَ ڈاکٹر مالک بلوچ ءِ سرکارے وھد ءَ راسکو ادبی دیوان ءِ حاترا یک ملین کلدار گپت ءُُ دات چریشی ابید آئی ءَ آزات جمالدینی ءُُ میر عاقل خان مینگل ءِ ادیرہ ءِ جوڑ کنگ ءِ جوڑ کنگ ءِ حاترا پنچ پنچ لکھ کلدار ڈاکٹر مالک بلوچ ءَ چہ گپت ءُُ راسکو ادبی دیوان ءَ دات۔ چریشی ابید بابو عبدالکریم شورش ءِ ادیرہ ءِ جوڑ کنگ ءِ حاترا ھم پنچ لکھ کلدار چہ ڈاکٹر مالک بلوچ ءَ گپت ءُُ سنگت اکیڈیمی ءَ دات۔ تنکہ بابو عبدالکریم شورش ءِ ادیرہ جوڑ بہ بیت۔
یا رجان بادینی زبان، ادب، ثقافت، لیب ءُُ گوازی ءَ ابید گہبودی کارانی تہا ھم بہر زوریت۔ اگاں کسے دارو دمانے مسئلہ بہ بیت یا کسے نوکری ءِ مسئلہ بہ بیت آ ذاتی وڑا جہد ءُُ کوشست کنت تنکہ مردماں ھر وڑا مدت ءُُ کمک بہ بیت۔ یار جان بادینی زند ءِ ہر پڑ ءَ جہد کنگا اِنت۔ مئے آئی ءَ چہ یک لوٹ ءِ ھست کہ نوشکی ءَ شریں ڈاکٹر نیست بائد انت ماہ ءِ یک ءَ دو میڈیکل کیمپ نوشکے ءَ جنگ بہ بیت تانکہ بیمارانی دارو درمان کنگ بہ بیت۔ چیاکہ نوشکی ءِ مردم غریب ءُُ لاچار انت آھانی کر ءَ زرّ نیست کہ آ وتی نادرا ں کوئٹہ ءُُ کراچی ءَ برت بکن انت۔
انچو مئے یار جان بادینی ءَ یک دگہ لوٹے ایش ھم ھست کہ آ نوشکی ءَ یک انگلش لینگویج سینٹرے جوڑ بکنت آئی تہا کمپیوٹرے ھیل کاری بہ بیت تنکہ نوشکی ءِ طالب علم چہ آئی ءَ نپ ءُُ پائدگ چست کرت بکں انت۔
انچو نوشکی ءِ زھگاں وانگ ءِ حاترا یک پرائیوٹ اسکولے پچ کنگ بہ بیت تانکہ نوشکی ءِ زھگاں ءَ مفت شرّیں علم ءُُ زانت دیگ بہ بیت چیا کہ دنیا ءِ تہا ہما قوم ءُُ راج دیما روت کہ آ علم ءُُ زانت ءِ پڑ ءَ کار کنگا انت۔