ماہتاک بلوچی زند ءِ کار ءُُ کرد …..منظور عالم 

ماہتاک بلوچی زند نوشکے ءِ بیست سال پورہ بوت انت ماہتاک بلوچی زند چہ نوشکے ءَ شنگ ءُُ تالان بوھگا انت ایشی کال خوا واجہ یار جان بادینی انت یار جان بادینی ءِ باز مزنیں جہد ءُُ کوشست کرت اے ماہتاک ءَ دیما آؤرت تنکہ بلوچ راج ءَ گوں وتی زبان، دود ءُُ ربیدگ ءَ چہ درستی راستی بہ کنت۔ شمارا اے معلوم بہ بیت کہ ماہتاک بلوچی زند چہ پاکستان ءَ ابید دری مُلکانی تہا وانگ بیت۔ اے مئے واستہ یک مزنیں چم برزی ءُُ دیم بُرزی انت کہ ماہتاک بلوچی زند گوں وتی رنگ ءُُ دروشم ءَ پر مہریں زبان دوستی ءَ زانگ بیت۔ دگنیائے مستریں کتاب جاہانی تہا مارا ماہتاک بلوچی زند پہ وانگ ءَ دست کپیت۔ چریشی دری مُلکانی تہا جاہ منندیں مردم وتی قوم راج، زبان ءُُ لبزانک ءِ باروا معلومداری گرگ ءَ انت۔ بلوچستان ءَ ھوار زند ءِ وانوکانی یک مزنیں کساسے خلیج ءُُ دری ملکانی تہا ہست انت ماہتاک بلوچی زند آ وتی منزل ءَ ترندی ءَ گام جناں ءُُ روان انت۔ اے درا یار جان بادینی ءِ جہد ءُُ کوشست انت۔ چہ بیست ءَ گیش نامداریں زانتکار، شاعر ءُُ کوّاسانی باروا تاک در کرتگ۔ ایشانی تہا میرگل خا ن نصیر، ؔ یوسف عزیز مگسی ؔ، عبدالواحد ؔ، آزات جمالدینی ؔ ماما عبداللہ جان جمالدینی ؔ، منیر احمد بادینی ؔءُُ دگہ بازیں نامداریں مردمانی نام ھوار انت۔ ماہتاک بلوچی زند بلوچی زبان ءِ ہر کلمکار ءُُ کواسءَ ھذت داتگ پمیشی ہر کس پہ زند ءِ واستہ وتی دل ءِ تہا مہر ءُُ محبت داریت۔
ماہتاک بلوچی زند ءِ نبشتہ کار باز وانندہ ءُُ زانتکار انت پٹ ءُُ پول ءَ پد نبشتہ کن انت۔ اگاں کسے پی ایچ ڈی یا ایم فل کنگ لوٹیت تہ آ چہ ماہتاک بلوچی زند ءَ پائدگ زرت کنت۔ اے پما مزنیں وشی ءِ حبرے انت کہ ماہتاک بلوچ زند 20 سال ءِ تہا باز دگہ نوکیں شاعر ءُُ کلمکاراں گوں ما درستی راستی کنائینتگ وت ھم بازیں نوکیں کلمکار ءُُ شاعر ودی کرتگ۔ ماہتاک بلوچی زند ءِ یک مستریں کار گسے شالکوٹ ءَ انت یکےّ نوشکی ءَ انت، شالکوٹ ءِ کار گس ءَ باز مزنیں زانتکار پٹ ءُُ پولکار وھد پہ وھد ترّ ءُُ تاب کن انت۔ چریشاں مئے نوکیں شاعر ءُُ زانتکار پائدگ زورگا انت۔ چریشاں ابید نو دربر ھم پائدگ زورگا انت اے کار گس شپ ءُُ روج پہ زانتکار ءُُ شاعرانی واستہ پچ انت۔ آ ہر وھد ءَ تاک ءُُ کتاب گپت کن انت۔وھدے ماہتاک بلوچی زند ءَ اکیڈمی ءِ کمیّ ءِ مارشت بوت گڑا ہمے کمیّ ءِ پورہ کنگ ءِ حاترا 2014 ءَ زند اکیڈمی ءِ بن ھشت نوشکے ءَ ھیر کرت۔ انوّں ہمے اکیڈمی یک ادارہ ءِ پیما کار کنگا انت۔ بازیں مراگش برجم داشتگ انت چوشکہ بلوچی زبان، دود ءُُ ربیدگ گوں وتی زیبائی ءَ زندگ ءُُ سلامت بے مانیت۔
زند اکیڈمی بازیں کتاب شنگ ءُُ تالان کرتگ۔چریشاں ابید خاصیں مردمانی گند ءُُ نند ءِ مواد اں یکجا کرتگ ءُُ دیما آؤرتگ تنکہ مئے آؤکیں باندات چہ اے علمی ءُُ لبزانکی بے دروریں کاراں پائدگ زُرت بکن انت۔ بلوچی ءِ مال ءُُ مڈّی ءُُ زند اکیڈمی ءَ شوھاز کرتگ،ماہتاک بلوچی زند ءِ تہا دیما آؤرتگ زبان ھما وھد ءَ پہ شرّی ءَ دیمرئی کنت کہ آئی وتی جند ے ءِ بے مٹےّں لوز ءُُ بتل کار مرز بہ بنت۔ ماہتاک بلوچی زند بلوچی زبان ءَ واستہ ءَ گوں نیک نیتی ءَ کار کنگا انت۔ زند اکیڈمی ءَ اے شرف ءُُ ھذت حاصل انت کہ آ پاکستان ءَ چہ ابید ڈنیّ ملکانی تہا لبزانکی مراگش برجم داشتگ ھما ھند جانی بلوچانی ساچستانی دیما آؤرتگ۔
ماہتاک بلوچی زند ءُُ زند اکیڈمی نوشکی ءِ مول ءُُ مراد ایش اِنت کہ بلوچی زبان دنیائے تہا دیمروئی بکنت ءُُ پجاّرگ بہ بیت مئے زانتکار پٹ ءُُ پولکار، ازم کار، شاعر دیما بیا انت۔ آہانی کتاب چھاپ بہ بنت،کلمکارےءِ دلبڈی آئی وتی جند ءِ زند ءِ تہا بہ بیت۔ واجہ یار جان بادینی ھما ہستی انت کہ آ ہر بلوچ ءِ واستہ وتی دل ءِ تہا مہر داریت پمیشکہ وتی زند ءَ پہ بلوچ راج ءِ دیمروئی ءِ حاترا ندر کرتگ۔ آئی کار ہچ وھد ءَ شموشگ نہ بنت آ ھما مردم انت کہ بازیں ڈگری ءُُ سندانی گرگ ءِ باوجود سرکاری نوکری نہ کتگ بلکہ حوالکاری ءُُ زانتکاری ءَ وتی مول ءُُ مراد جوڑ کتگ۔ آپہ جوانیں وڑے ءَ وتی کاراں برجاہ داشتگ اُمیت انت کہ ماہتاک بلوچی زند ھمے پیما بلوچ راج ءِ زبان ءُُ دود ءُُ ربیدگ ءِ رکّینگ ءِ حاترا وتی جہد ءُُ کوشستءَ برجاہ داریت۔