ماہتاک بلوچی زند ءَ گوں تاریخی نا انصافی

بلوچستان ءِ تہامیڈیاءِ سرا چمشانک دور دیگ بہ بیت۔تہ گندگا بیت کہ بلوچی زبانءِ تاکءُُ ماہتاکاں باز ڈلگ چار کنگ بوھگا انت۔ایشی زندگیں مثال ماہتاک بلوچی زند انت کہ گوستگیں بیست سالاں چہ ہمک ماہ چھاپ ءُُ شنگ بوھگا انت۔انوں اے وھدی اے بلوچی زبان ءِ ہمایکیں تاک انت کہ ہمک ماہ چھاپ بوھگا انت۔ماہتاک بلوچی زندءَ گوستگیں بیست سالانی تہا پنجاہ ءَ چہ زیات خاصیں تاک چھاپ ءُُ شنگ کرتگ۔اے دُرس پٹ ءُُ پولی تاک انتءُُ کتاب ءِ درجہ ءَ دارنت۔گوستگیں بیست سالانی تہا ماھتاک بلوچی زندءِ چھاپءُُ شنگ بوتگیں خاصیں تاکانی تہا،عبدالواحد آزاتؔ جمالدینی،بابو عبدالکریم شورشؔ،میرگل خان نصیرؔ،گوھر ملکؔ،چاغی ءِ باروا خاصیں تاک،عبداللہ جان جمالدینیؔ،سید ظہور شاہ ہاشمیؔ،عطاشادؔ،عبدالغفار ندیمؔ،عنایت اللہ قومی،ملک محمد پناہؔ،محمد حسین عنقاءؔ،غلام محمدؔ شاھوانی،یوسف عزیز مگسیؔ،میر عبدالعزیز کردؔ،صبادشتیاریؔ،عبدالصمد امیریؔ،غوث بخش صابرؔ،سلطان نعیم قیصرانیؔ،بیگ محمد بیگلؔءُُ دومی شاعرءُُ کلمکار ھوار انت۔انچو زندءِ ادارہ ءَ دنیاءِ دومی بلوچانی باروا مزنیں پٹءُُ پولے کرتگ۔ایشانی تہا عمان،قطرءُُ بحرین ءِ بلوچ ھوار انت۔چریشی ابید زندءِ ادارہ گوستگیں بیست سالانی تہا بلوچی زبانءِ نامداریں شاعر،کلمکارءُُ کواسانی انٹرویو کرتگءََ زندءِ تاک چھاپءُُ شنگ کرتگ۔ھستیں جام کمال ءِ سرکارءِ وھدءَ ماہتاک بلوچی زندءَ گوں باز زلم ءُُ ناانصافی بوھگا انت۔چیاکہ بلوچستان ءِ درستیں تاکءُُ ماہتاک ڈمیّ انت۔اے باروا ماں بلوچستان ءِ حال رسانی ءُُ شنکاریءِ وزیر واجہ ظہور بلیدی ءَ ھم گپ جتگ کہ ماھتاک بلوچی زندءِ ادارہ ءَ گوں تاریخ ءِ بدیں زلمءُُ ناانصافی بوھگا انت۔اے زلم ءُُ ناانصافی آئی وزارت ءِ تہا بوھگا انت۔
چریشی ابید تربت ءِ ایم پی اے لالہ رشید ءَ ھم بازیں وارءَ گشت کہ باپ ءِ سرکارے وھدءَ بلوچی زبانءِ یکیں تاک ماہتاک بلوچی زندءَ گوں زلمءُُ ناانصافی بوھگا انت۔اے شمے چمانی دیما بوھگا انت۔حال رسانی ءُُ شنگ کاری ءِ محکمہ ھم گوں شما انت۔چریشی ابیدبلوچستان نیشنل پارٹی ءِ ایم پی اے اکبر مینگل ءَ ھم گشتگ کہ بلوچی زبانءِ تاکءُُ ماہتاکاں گوں ناانصافی بوھگا انت۔بلوچی ماہتاکانی مسئلہءُُ جنجالاں تو اسمبلی ءِ فلورءَ بزور تاکہ اے مسئلہءُُ جنجال دیما بیاتءُُ ایشی گرءُُ دار بہ بیت۔بلے ”سرکن پرکن ھپ کن ہچ“۔
انّوں بلوچستان ءِ نمائندگانی جاور ایش بہ بیت۔مردم چہ کئے ءَ گلگ بکنت۔بلوچستان ءِ نمائندہ بائد انت وتی مہلوک ءِ ھر وڑا مدتءُُ کمک بکرتیں انت۔انّوں مدتءُُ کمک وتی جاگہا آھانی وزارت ءُُ سرکارءِ وھدءَ بلوچی زبانءِ یکیں تاک ءَ گوں زلمءُُ ناانصافی بوھگا انت۔بلے آھانی سرا اُمیتے نیست کہ اے زلمءُُ ناانصافی ءِ گرءُُ دار بکن انت۔
اے وھدی بلوچستان ءِ حال رسانی ءُُ شنگ کاری ءِ بجٹ کروڑانی کلدار انت۔اے دراہیں بجٹ ءَ درآمدیں تاکءُُ ماہتاک برگا انت،بلے آ بلوچستان ءِ باروا یک شونگالے ھم نبشتہ نہ کن انت۔اے کروڑانی زر بلوچستان ءِ تہا ھم خرچ کنگ نہ بنت۔اے کروڑانی کلداربلوچستان ءَ چہ ڈن ءَ دیم دیگ بنت۔بلے بلوچستان ءِ تاک،ماھتاکءُُ روتاکانی شونکار نشتگءُُ وتی بزگیءَ گوں وتی چماں چارگا انت۔چیاکہ بلوچ وتی گَسءِ تہا وت مہمان انت۔آھاں ءَ سروکءُُ رھدربرے نیست کہ آ ھانی مسئلہ ءُُ جنجالاں بزوریتءُُ دیما بہ بارت۔
٭٭٭٭٭٭٭٭٭

بلوچستان ءِ بجٹ2019-20
بلوچستان ءِ سرکارءَ وتی مالی بجٹ2019-20جونءِ آخرءَ پیش کرتگ۔بلوچستان ءِ مالی بجٹ ءَ بلوچستان ءِ ھزانگءِ صوبائی وزیر میر ظہور بلیدی ءَ پیش کرتگ۔بلوچستان ءِ مالی بجٹ ءِ سرا اپوزیشن ءَ باز کوکارءُُ سلوات کرتگ۔کہ اے اولس دوستین بجٹ ءِ نہ انت۔اے بجٹءَ چہ مہلوک ءِ سرا گرانی ءِ یک مزنیں کوہے دور دیگ بوتگ۔چیاکہ بنجاہی سرکارءَ گیس، بجلی، تیل ھر چیزءِ سرا ٹیکس جتگ۔سُنگءُُ ٹیکسانی سوب ءَ مہلوک سک پریشان انت۔عمران خان ءِ سرکار ءَ ملک ءِ مہلوک ءَ یک ھزابے ءِ تہا دور داتگ۔ملک ءِ مہلوک سک لاچارءُُ پریشان انت کہ چون وتی زھگان لاپ بدئے انت۔آھاں دارءُُ درمان چوں بکن انت۔آھانی اسکولءِ فیسءَ چوں بد ے انت۔زھگاں لاپ چون بدے انت۔اے ہما بنیاتی مسئلہ انت کہ ملک ءِ ہر مردم پریشان انت۔
وھدے بلوچستان ءِ بجٹءِ سرا چمشانک دور دیگ بہ بیت۔بلوچستان ءِ سرکارءَ بانک زبیدہ جلالءِ ہائیر سکینڈری سکول سرد ومند ءِ سالگی گرانٹ دوانزدہ لکھ ءَ چہ بیستءُُ چار لکھ کلدار کرتگ۔انچو بلوچی اکیڈیمی ءِ سالگی گرانٹ یک کروڑ کلدارءَ چہ گیش کناں ءَ یک کروڈ ءُُ پنجاہ لکھ کلدار کرتگ۔اے باز شریں گام گیجے انت۔
اے وھدی بلوچستان ءَ بازیں ادبی گلءُُ تنظیم است انت کہ آ بلوچی زبانءُُ لبزانک ءِ دیمرئی ءِ حاترا کار کنگا انت۔ایشانی تہا بلوچی لبزانکی دیوان کوئٹہ، سید ہاشمی اکیڈیمی گوادر،گوادر ایجوکیشنل اینڈ ویلفیئرسوسائٹی(جیوز)،آر سی ڈی سی،بلوچستان اکیڈیمی تربت،ملا فاضل اکیڈیمی تربت،عزت اکیڈیمی پنجگور،نصیرکبدانی اکیڈیمی خاران،زند اکیڈیمی نوشکی،راسکو ادبی دیوان نوشکی،سید ہاشمی ریفرینس لائبریری ملیر کراچیءُُ بازیں دومی ادارہءُُ گل است انت کہ آ بلوچی زبانءُُ لبزانک ءِ دیمرئی ءِ ھاترا کار کنگا انت۔
بلے افسوزے مزنیں گپ ایش انت بلوچستان ءِ سرکار،وزیر ھزانگ ظہور بلیدیءُُ سیکرٹری ھزانگ نور الحق بلوچءَ اے نیمگا ہچ دلگوش نہ دات تنکہ اے ادبی گلءُُ ادارہانی مدتءُُ کمک کنگ بہ بیت۔واجہ ظہور بلیدی ءُُ واجہ نورالحق بلوچ ءِ حاترا مزنیں موہ اے ات کہ آ بلوچی زبانءُُ لبزانک ءِ حاترا تاریخی کردے پیش بداشتیں۔تنکہ بلوچی زبانءُُ لبزانک ءِ تاریخ ءِ تہا آھانی کرد مدام زندگ بوتیں۔بلے افسوز چو نہ بوت۔وھد ہما چیزے انت۔کہ آ کسے ودار ءَ نہ کنت،باھد انت مردم وھدے ءِ ودار ءَ بکنت۔وھد یک وارے چہ دست ءَ در شُت رندءَ گرگ بوت نہ کنت۔باھد انت مردم چہ وھدءَ پائدگ چست بکنتءُُ وتی قوم ءُُ راج،زبانءُُ لبزانک ءِ ھزمتءَ بکنت۔
انوں ھم وھد است بلوچستان ءِ سرکار ءُُ خاص ھزانگ ءِ وزیر میر ظہور بلیدی ءُُ ھزانگ ءِ سیکرٹری نور الحق بلوچ بلوچستان ءِ گل ءُُ ادارہانی مدت ءُُ کمک ءَ بکن انت تنکہ بلوچستان ءِ تہا بلوچی زبان ءُُ لبزانک ءَ دیمرئی برسیت۔
انچو اے بلوچستان ءِ درا سیاسی ءُُ پارٹی واک ءُُ اختیار ءَ انت آ بلوچستان ءِ لبزانکی گل ءُُ ادارہانی مدت ءُُ کمک ءَ بکن انت چیا کہ بلوچی زبان ءُُ لبزانک درا قوم ءِ انت ایشانی دیما برگ قوم ءُُ راجے ھر فردے ذمہ واری انت۔ (شونکار)