زبان چوں زندگ دارگ بوت کنت…..یار جان بادینی

یونیسکو گوستگیں 20 سالاں چہ ماتی زبانانی روچ ءَ ہمک سال 21 فروری ءَ برجم داریت اے روچ ءِ زندگ دارگ ءِ بنیاتی مول ءُُ مراد ماتی زبانانی زندگ دارگ ءَ ھوار ماتی زبانانی تہا علم ءُُ زانتے ءَ رواج دیگ انت ۔
ماتی زبانان اے وھدی بازیں مسئلہ ءُُ جنجال دیما انت چوشکہ ہر دو ہفتگ ءِ تہا یک ماتی زبان ءِ گارءُُ بیگواہ بوھگا انت۔
یونیسکو ءَ سال 2019 ءَ حقیقی زبانانی سال اڈ داتگ زبان ہر روچی زند ءِ تہا یک خاصیں کردے پیش داریت چیاکہ زبان رابطہ علم ءُُ زانت ءُُ دیمرئی ءِ یک بہرے انت بلکں ہر مردمے شناخت رسم ءُُ دود ءُُ ربیدگ ءِ نشانی انت ۔ بلے بازیں زبان گار ءُُ بیگواہ بوھگا انت اے حاترا ھوریں قومانی گل ءَ 2019 ءَ حقیقی زبانانی سال اڈ داتگ ۔ تنکہ اے سال ءَ مہلوک ءِ تہا خاصیں وڑا پکر ءُُ سسا ودی کنگ بہ بیت ۔ تنکہ آ وتی ماتی زباناں زند گ بدارانت ۔
پاکستان ءِ تہا اے وھدی یک اندازے ءِ ردا 67 ءَ بگرتاں 73 زبان گشگ ءَ بنت اے زبانانی تہا لہتیں زبان انچیں انت کہ آھانی گشوک ءُُ گپ کنوکانی تعداد سک کم انت ۔ بزاں چار صد ءَ بگر تاں پنچ صد مردم انت ۔
چریشی ہمے ترس پدر بیت کہ اے وڑیں بازیں زبان گار ءُُ بیگواہ بنت کہ آھانی تہا گپ کنوکانی تعداد سک کم انت یونیسکو ءَ سال 2019 ءَIndigenous language ءِ سال اڈ داتگ ۔
یونیسکو ءِ ردا ملک ءِ تہا 67 زبان گشگ بنت ۔ اے زبانانی تہا باز انچیں زبان است کہ آھان گار ءُُ بیگواہ بوھگ ءِ نزدیک ءَ انت ۔ اے باروا باز جہد ءُُ کوشست کنگ لوٹیت کہ تنکہ ماتی زبان زندگ بہ مان انت۔
اے درگت ءَ نامداریں زبان زانت ءُُ اپسالہ یونیورسٹی ءِ استاد کارینہ جہانی گشیت کہ زبان بنی آدمے یک پجارے انت اگں کسے وتی زبان ءَ گار ءُُ بیگواہ بکنت تو آ چہ وتی پجارے مزنیں بہرے ءَ سدیت ۔ اے حاترا زبان ءَ زندگ دار گ المی انت بلوچی ءِ زندگ دارگ ءَ واستہ بلوچی حبر بکں بلوچی بواں ءُُ بلوچی ءَ نبشتہ بکں انت۔
پاکستان ءِ آئین ءِ آرٹیکل ءِ رداگشیت کہ زبان ءُُ دود ربیدگ ءَ زندگ دارگ آئی ءَ رکھینگ ءُُ دیما برگ ریاست ءِ ذمہ داری انت۔
ریاست ہر قوم ءُُ راجے زبان دود ءُُ ربیدگ ءُُ رسم ءُُ دودانی زندگ دارگ ءِ جہد ءُُ کوشست بکنت آھانی دیمرئی ءِ واستہ گام گیج بزوریت تنکہ قوم ءُُ راجانی زبان دود ءُُ ربیدگ زندگ بہ مان انت ءُُ چہ گار ءُُ بیگوائی ءَ رکھینگ بہ بنت۔
بلوچی زبان ءِ تہا ریڈیو ءُُ ٹیلی ویژن ءِ پروگرام نہ بوھگ ءِ برابر انت ۔ بلوچستان ءِ درا ڈویژنل بنجاہاں ریڈیو ءُُ ٹی وی اسٹیشن جوڑ کنگ بہ بنت بلوچستان ءِ درا ضلعی بنجاہانی تہا ایف ایم ریڈیو ءِ زریعہ ءَ بلوچی زبان ءَ پروگرام شنگ ءُُ تالان کنگ بہ بنت چریشی بلوچی زبان ءِ ازمگر ءُُ گشندہانی مالی مدت ءُُ کمک بیت بلکں بلوچی زبان دیما روت ءُُ مہلوک ءَ بلوچی ساز ءُُ زیمل ءِ پروگرام رست کنت ۔ اے وھدی بلوچی زبان ءِ درستاں چہ مستریں مسئلہ ءُُ جنجال نبشتہ راھبندے انت اے درگت ءَ بلوچستان ءِ اکیڈیمی ءُُ گل ھور ھوار بہ نند انت ءُُ بلوچی زبان ءِ واستہ یک نبشتہ راھبندے دربے گیج انت ءُُ آئی سرا صد در صد کار بندگ بہ بیت۔
انچو بلوچی زبان ءَ دیما برگ ءِ حاترا میاں اُستمانی لبزانک ءِ حاصیں کتاباں بلوچی زبان ءَ ترینگ بہ بیت انچو بلوچی زبان ءِ شاعر ءُُ کلمکارانی کتاباں انگریزی ءُُ دومی زباناں رجانک کنگ بہ بیت تنکہ دنیا ءِ دومی مردم ھم بلوچی زبان ءُُ لبزانک ءِ باروا پوہ ءُُ سرپد بہ بنت ۔ رجانک کرتگیں کتاباں بواں انت۔