ماتی زبانانی روچ ءُُ بلوچی زبان …..محمد یدگ 

انچوکہ ما ءُُ شما کل سرپدات کہ مرچی ماتی زبانانی میان اوستمانی روچ انت بزاں 21 فروری انت۔
مرچیگیں روچ ماں UN ءِ رد ا راجانی ماتی زبان ءِ روچ زانگ بیت۔
ھمئے پیم بلوچ کہ دنیا ءِ زندگیں راجانی تھا زانگ بیت ءُُ زندگیں راجانی پجار ماں میان اوستمانی کانود آنی در ا اولی آئی ءِ ماتی زبان انت ءُُ دومی آئی ءِ سرزمین انت بزاں راجے ءِ پجارگ ءِ ھاترا آئی ءِ زبان ءِ زندگ دارگ المی انت پدا ھاس گلامیں راجانی تھا آئی ءِ زبان ءِ بِستار ءُُ ارزشت بازیں معنی ءُُ بودشت ءِ داریت پرچکہ زورآوریں ھاکم مُدام جُھد کنت کہ گلامیں راج ءِ زبان ءِ زوال کنگ ءُُ پدمنتگ کنگ ءَ وتءَ سرجمیں زور ءُُ تاگت ءَ کارمرزایت تانکہ آ راج ءِ آؤکیں پدریچ تباہ بہ بیت تانکہ زوراک وتءِ جماداری برجم داشت بِکنت ءُُ اے ھم گوشگ بیت کہ زبان ءِ سرا کار کنوک ءُُ جدوجہد کنوکیں مردم راجی سپایگ ءَ گیشتر خطرناک تر لیکگ بیت پرچکہ آئی ءِ کلم ءِ زور چہ تیر ءَ انگت ءَ زوراک ترانت ہمے حاترا زبان ءِ نابودءُُ گار کنگ ءِ حاترا زالمیں وھدے ھاکم وتءَ سرجمیں قوت ءُُ تاگت ءَ کارمرز کنگ ءَ ھچ چک ءُُ پد نہ بیت۔
ماتی زبان ءِ ارزشت ماں راجی چاگرد ءَ المی انت انچو کہ ما گِندیں کہ مئے سیاسی گل پارلیمانی بہ بنت یا غیر پارلیمانی ما بس وتءِ رسانکدرا ءُُ وتءِ اھوال کاری ءِ تھا بس گپ کنیں کہ بلوچی زبان ءَ امیت دئیگ بہ بیت آئی ءِ دیمری ءِ ھاترا اے کنگ بہ بیت آ کنگ بہ بیت بلے عملاََ چو گندگ ءَ نئیت ما اگاں اے ردا گوں ایمانداری و مخلصی ءِ گوماں بچاریں ءُُ چمشانک بدئین گُڈا مئے سیاسی گل ءُُ جماعتانی اسٹیج تقریر بہ بنت یا پمفلٹس ءُُ چاکنگ ماں دری زبان ءَ بزاں لشکری زبانءَ نبشتہ اَنت حتی کہ آئین ومنشور ھم ھمئے لشکری زبان ءِ تھا نبشتہ اِنت پنجگور کیچ گوادر مند و تمپ یا پسنی ءُُ اورماڈہ یا زامران ءُُ بلیدہ ءِ وڈیں جاہ ھم مئے سیاسی سروک لشکری زبان ءَ وتی گشتانک آں دئینت گُڈا ما چوں وتء زبان ءِ دیم ءَ برگ ءُُ پھازگ ءَ مخلص اِنت بلے سندھ ءُُ پنجاب ءُُ خیبرپختوانخواہ ءَ ماں اسمبلی فلور ءَ آ وتء ماتی زبان ءَ تقریرءُُ گشتانک دئینت بلے بلوچ دشت ءُُ تمپ ءِ وڈیں جاھا ں ھم لشکری زبان ءَ ماں اسٹیج آں گپ جَننت اے وت یک مزنیں تضادءُُ تپاوت ءِ مئے سیاسی چاگرد ءَ استءُُ موجود انت۔
پدا زبان ءِ معاملہ ءَ بائیدیں ما بلوچ ھچ کمپرومائز مہ کنیں پرچکہ زبان بیت بلوچ مانیت بلوچ مانیت گڈا سرڈگار جاھ آرگ بیت
اگاں دومی نیمگ ءَ چارگ بہ بیت بلوچستان ءَ لبزانکی اکیڈمی ءُُ لبزانکی چاگرد سک باز انت بلے معذرت ءِ گوماں مئے لبزانکی گل آنی تھا انا پرستی ءِ رجحانات سک باز انت ہمے ھاترا زبان ءِ تھا لبزانکی اڈ ءُُ جنجال گیش بواننت ءُُ گیش ءُُ گیوار کنگءِ بابتءَ گپ سک باز کنگ بیت بلے رِزلٹ ھچ دیم ءَ نیاتگ ءَ انچو گُش انت کوریں چم ءَ پِٹ ءِ ارس ھم سک باز انت بلے ما نوں دستاں کٹ ءَ مہ کنیں مہ نندیت کہ کانفرس کنگ بوتگ مسلہ ھم گیش ءُُ گیوار بنت عملی رزلٹ ماں میدان ءَ ھچ گندگ نہ بوھگا انت زبان ھما وھد ءَ زندگ بیت ءُُ مانیت کہ آئی ءَ ماں وانگ جاھاں وانینگ بہ بیت ماں سرکاری ءُُ نیم سرکاری ادراھانی تھا رائج کنگ بہ بیت اے ھما وھدا ممکن بیت کننت کہ مئے لبزانکی گلءَ ادراھانی ھمرائی ءَ مئے پارلیمانی سیاسی گل ھم اے ردا مخلص ءُُ گوں ایماندری ءَ زبان ءِ امیت ءُُ ارزشت ءَ بے مارانتءُُ عملاََ کار ءِ بکننت مئے لبزانکی دانشورءُُ زبان زانت ءُُِ کلمکار وتی انا ءِ دموکا ءَ دور بکننت گوں تپاکی ءُُ ہمکوپگی ءَ وتااشعار جوڈ بکننت زبان بلوچ راج ئیگ انت لبزانکی ءُُ چاگردی ءُُ سیاسی گل ھم ھمئے بلوچ راج ءِ نام ءِ سرا جدءُُ جہد کنگاانت گڈا زبان ءِ سرا چے وڈیں تپاوت؟
ما 70 سال ءِ تجربت ءُُ مثالانی سرا گوں پچین چماں چمشانک بدئیں بچاریں کہ اے کشانچیلانی تھا زبان ءَ چِینکس تاوان رستگ ما چینچوک پشت ءَ شتگیں زبان ءِ تھا چِینک ءَ ھڈانک مِک بوتگ انت یا کنائینگ بیتگ انت ما چِنک ءَ گروپانی تھا بھر ءُُ بانگ بوتگیں بلے مارا رستگ چے؟؟؟؟؟
ابید ءِ پسماندگی تاوان نقص دوری ءُُ گستاء کسد ءُُ کینگ زبان ءِ یک مکمیں مسیت ءِ جاھ ءَ ما سدانی دو ھِشت ءِ مسیت جوڈ کتگ کہ نماز کنوک ھم نیست گڈا ما اے کلیں اڈ ءُُ جنجالانی سبب ءُُ نادراھی آں زانیں ءُُ سرپد انت گڈا پرچہ پاد پردئیں۔۔۔
اے زبان ءَ تو دوستدارے من من ہم تئی پیمءَ اے زبان ءِ دیمرئیءُُ پھازگ ءَ تو لوٹ ءِ من ھم سرین بستگءُُ اوشتاتگ آں چو تء پیم ءَ گُڈا اے دوری ءُُ گستاء پرچہ اے بگز و کینگانی* *درچک آں پرچہ ما ءُُ تو آپ دئین و مزن کنگ ءِ جد ءَ ایں آ کجام اسباب انت کہ مارا ءُُ ترا زبان ءِ دیمرئی ءُُ گِہتری ءِ ھاترا یکجا جھد کنگ ءَ نئیلگ ءَ انت؟
کمے سوچ کنگی انت کمے پگر کنگی انت پدا عمل کنگی انت پیشدارگی انت کہ بلوچ راجِ زبان ءِ پھازگ ءُُ راجی پجار ءِ زندگ دارگ ءَ ھچ کمپرومائزنہ کنت سیاست دان وتی کار ءَ بکنت بلے بلوچ ادیب ءُُ لبزانکی چاگرد وتی ماتی زبان ءِ پھازگ ءُُ زندگ دارگ ءِ حاترا وتی سیاسی سیادی ءَ چہ سیاست ءَ سست کنت بلے گوں زبان ءَ وتء بجار ءَ ببا دات نہ کنت۔