بلوچی زبانءِ نامداریں شاعر ظفر علی ظفرؔءَ مارا یل دات

بلوچی زبانءِ نامداریں شاعر ظفر علی ظفرؔ اے دو روچی دنیا یل دات۔بلوچی زبان ءِ نامداریں غزل گشیں شاعر واجہ ظفر علی ظفرؔ 26جون 2019ءَ اے کوڈھیں دنیا یل دات۔ واجہ ظفر علی ظفرؔءِ بیران بوھگ بلوچی زبانءُُ لبزانک ءِ واستہ مزنیں تاوان انت۔اے تاوان ھچ وھدءَ پورہ بوت نہ کنت۔ ہر مردمے ودی بیت آ المءَ یک روچے بیران بیت۔بلے شرّیں بنی آدم ہما گشگ بنت کہ آ وتی زندءَ یک مولءُُ مرادے ردا گوازیننتءُُ وتی قومءُُ راج ءِ ھزمت ءَ کن انت۔واجہ ظفر علی ظفرؔ ہما بنی آدماں چہ یکے ات کہ آئی ءَ وتی زبانءُُ لبزانک ءِ شریں وڑے ءَ ھزمت کرت۔آئی نبشتہ کرتگیں گالءُُ گفتار بلوچی زبان ءُُ لبزانکءِ مڈی انت۔
واجہ ظفر علی ظفرؔ ءَ غزل ءِ بادشاہ گُشگ بہ بیت تو رد نہ بیت۔ چیاکہ آئی ءَ بلوچی زبان ءِ تہا ہما غزل نبشتہ کرتگ آھانی مٹ ءُُ بدل نیست۔ آئی بنداتی دورءِ غزل چارگ بہ بنت تو زانگ بیت کہ واجہ ظفر علی ظفر بلوچی زبان ءِ تہا غزل ءِ بادشاہ انت۔ آئی مٹ ءُُ درور نیست۔ چوشکہ آ گُشیت؛
؎کپوتاں پہ دل ءِ زیماں بچارت
زہیری نالگاں ساعتے بدارت
رند ءَ بلوچی زبان ءِ نامداریں گشندہاں واجہ ظفر علی ظفرؔ ءِ اے گال ءُُ گفتار گوں وتی وشیں توار ءَ گشتگ انت۔ ایشانی تہا اُستاد شفیع، ستار، جاڑک، فقیر محمد قصر قندی ؔءُُ دگہ بازیں گشندہ ھوار انت، واجہ ظفر علی ظفرؔ ءَ ڈرامہ ھم نبشتہ کرتگ آئی ءَ زرد ءِ ایمنی ءِ سرحال ءَ ڈرامہ نبشتہ کرتگ۔ ڈرامہ ءَ ابید آئی ءَ فیچر ءُُ مضمون ھم نبشتہ کرتگ۔ بزاں لبزانک ءِ درائیں پڑانی تہا تجربت کرتگ۔ہر شاعر ءُُ کلمکار حساس بیت بلے ظفر علی ظفرؔ یک باز حساسیں مردمے بوتگ۔
بلوچی زبانءِ شاعر،کلمکارءُُ ازمگرانی مزنیں جیڑہ مالی لاچاری انت۔تنکہ آ ورناءُُ جان سلامت انت۔آ ملکءُُ در ملکءَ کارءُُ روزگارے کن انتءُُ وتی چُکءُُ زھگاں لاپ دیئنت۔بلے وھدے پیر ءُُ کماش بوت انت۔نادرائی ءِ سوب ءَ مالی بزّگی ءِ آماچ بنت۔ نہ ایوکہ وتی زھگاں لاپ دات نہ کن انت وتی دارودرمان ءَ ھم کرت نہ کن انت۔ اے وڈا بلوچی زبان ءِ نامداریں شاعر،کلمکارءُُ ازمگر نادرائیءُُ مالی بزگی ءِ سوب ءَ وھدءَ چہ پیش بیران بنت۔
واجہ ظفر علی ظفرؔ مزنیں مدّتے ملک ءَ چہ ڈن امارات ءَ کارءُُ روزگار کرت۔وھدے ملک ءَ واتر بوت تہ آئرا کارءُُ روزگارءِ دگہ وسیلہ نیست ات۔آ نادرائی ءَ ھوار مالی بزگی ءِ آ ماچ بوت۔آ سک دیر ات نادرا ات۔بلے بلوچستان ءِ سرکار ءُُ حاص وزیرءُُ گزیرانی چم کورءُُ گوش کر انت کہ آ بلوچی زبانءِ کلمکارءُُ کواسانی دارو درمان ءِ حاترا آھانی مالی مدتءُُ کمک بکن انت۔تنکہ نادرائیءِ وھدءَ آ وتی دارو درمان ءَ کرت بکن انت۔بلوچی زبانءِ نامداریں شاعر واجہ ظفر علی ظفرؔ انوں مئے نیام ءَ ساڈی نہ انت۔
بلے آئی نبشتہ کرتگیں کتاب بلوچی زبانءُُ لبزانک ءِ مڈّی انت۔مئے رب ءَ چہ دعا انت کہ واجہ حدا ظفر علی ظفرؔ ءَ بہشتءَ جاگہ بد انت آئی چکءُُ کہولءِ مردماں اے مزنیں غم ءِ سگگ ءِ طاقتء َ بد انت۔امین (شونکار)