کرونا وائرس ءُُ گریبی…..کمالان بلوچ

کرونا وائرس ءِ آسر ءُُ انجام چہ بیت، کدیں اُرد کنت ءُُ داریت۔ چنکس کد تباہی ءُُ بربادی کاریت۔ چُنت لکھ ءُُ کروڑ مردم ءَ کشُیت۔ باریں چنت وھد ءَ مردم یک دومی ءَ دور ءُُ گستا بہ بیت۔
نند ءُُ نیاد مہ بیت یک شہرے مردم دومی شہر ءَ مہ روت یک ملک ءِ مردم دومی ملک ءَ مہ روت ہچ وڑیں سفر ءُُ تر ءُُ گرد مہ کنت۔ اے وائرس ءَ ملکانی اکانومی ءَ چنکس تاوان داتگ۔ زانگ نہ بیت چنت گار ءُُ چنت وار بیت۔
سیر ءُُ آبا دیں ملک اے طوفان وباء ءَ وت ءَ چہ ڈولءَ کش انت۔ بلکے نزور ءُُ کم طاقتیں ملکاں اے وبا وتی پاداں بارت اے نزور ءُُ وامداریں ملک ءُُ آھانی مردم وار ءَ بزگ بنت۔ اے ملکانی مردم بے کار بد حال غریب ءُُ گژنگ بنت۔
کرونا وائرس وھدے کہ وتی زور ءَ جنت ءُُ روت آؤکیں دنیا نوکیں دنیائے بیت۔ نوکیں چاگرد ءُُ نوکیں سماجی رشتہ جوڑ بنت۔ دنیا ءِ ملکانی تعلقداری دگہ رنگ ءُُ دروشمے گندگ بیت۔ ہما ملک کہ اودا گژن ءُُ گریبی باز بیت۔ نوں گپ ایش انت کہ گریبی مردم ءَ چہ چہ نہ پرمائیت۔ اگں دنیا ءِ حاکم ءُُ حکومتاں گریبی ھلاسی ءَ ہوش نہ کرت گڈا واری انسان ءَ دوزی، ھورکشی، جان فروشی، عصمت داری، بے ایمانی، نا درائی دور ءَ آئی ءَ وش اھت کنت۔
دگہ زنڈیں مسئلہ کہ دنیاءِ آئی دیم پہ دیم بنت کہ آئی دست ءِ وت پیداک کنگ ہچ وڑا گر ءُُ دار بوھگا نہ انت۔ آ ماحولیات انت۔ شہراں زردار ءُُ سرمایہ دارآنی فیکٹری ءُُ کارجاہ چاگرد ءَ را تباہ کرتگ۔ شہرآنی تہا گریب ہما علاقہانی تہا نشتگ انت آھاں ءَ ورگ ءِ حاترا صافیں آپ نہ رسیت۔ الکاپیں لوگ ءُُ جاگہانی تہا زند گوازینگ ءَ انت۔ ڈیھ ءُُ گلگی علاقہانی مردماں پہ وتی لاپ ءُُ روزگار ے حاترا جنگل آنی درچک ءُُ دار ساپ کتگ۔ آ نہ پہ وت ءَ سر ساھگ ءِ اشتگ ءُُ نہ مالی ءُُ دلوتانی چرگ ءِ واستہ درچک ءِ داریت۔ نوں گپ ایش انت کہ دنیائے عاقل،ڈاکٹر،سائنسدان ، سیاستدان دست ءِ سرا انت ءُُ آ حیران انت کہ کرونا وائرس ءِ چون گر ءُُ دار بوت کنت اے وائرس ءَ نہ ملکانی سیم سر داشت کنت ءُُ نہ دنیا ءِ طاقتور یں پوجے، دنیا ءِ سیریں ملک وتی حفاظت نزوریں ملکانی قوضہ کنگ ءِ حاترا پوج داشتگ بلے کرونا وائرس ءَ درستیں دنیا اتکگ ءُُ حیران کرتگ کہ چہ بکن انت۔
اے درگت ءَ دنیا ءِ ملکانی حاکم ھوش بکن انت بنی آدم ءِ جان سلامتی ءِ حاترا وتی دیمپانی ءِ بجٹ ءَ کم بکں انت۔ اے زراں کہ جنگی جہاز ٹینک ءُُ توپ کنگ ءَ انت انوں اے زراں پہ جان سلامتی وانگ ءُُ زانگ روزگار پٹ ءُُ پول ءُُ چاگرد ءِ گہتری ءِ حاترا ہرچ ءُُ درچ بکں انت۔
بلے ہر مزنیں ٹوھیں جنگے ءَ پد دنیا پیسری دنیا نہ مانیت۔