ڈراویڈین…..سینیٹر محمد اکرم دشتی

نبشتانک

ڈراویڈین کاینت آ چہ کجا اتگ انت۔ آھانی بُنکی ھنکین کجام بوتگ؟ ادا ہما عالم ءُُ زانتکارانی گپ پٹ ءُُ لوٹانی حبراں کنین کہ آ کہن ءُُ کدیمیں راجانی بن دپتر زانوک انت۔
اگاں ماں بلوچ راج دپتر، آئی ءِ نسل ءُُ لڑ بار دومی ھند ءُُ علاقہاں روگ ءِ پد رنداں گرگ بلوٹیں۔ گڈاہمے کہن ءُُ کدیمیں لڑ ءُُ بار کنگ ءِ راہ ءُُ کشکاں بزانیں گڈا مارا بلوچ ءِ بنکی جاگہانی شوھاز ءَ آسانی بیت۔ بازیں عالم ءُُ زانتکار آنی واھگ انت کہ ڈراویڈین منگول ءِ نسل ءَ چہ تعلق داریت۔
اے چہ تبت ءُُ ہما لیہ ءِ کر ءُُ گور ءِ تک ءُُ پہناتاں اتگ انت۔ کالڈول ءِ حیال ءَ اے تورانی انت۔ ایشانی بُنکی ھنکین وسطحی ایشیا بزاں میاں ایشیا انت۔ ایچ بی ولز ءِ گشگ انت کہ ڈراویڈینءُُ عراق ءِ سومیری یکیں نسل انت۔ ایشانی بازیں چیز ھیل ءُُ عادت یک انت۔ بازیں پٹ ءُُ پول آں اے حبر تچک کتگ کہ ڈراویڈین ہندوستان ءُُ مروچیگیں پاکستان ءِ نندوکیں مردم نہ بوتگ انت۔ اے چہ در ءَ اتگ انت۔آ دور ءُُ باریگ ءِ باروا کسے یقین ءُُ سدک ءَ گشت نہ کنت کہ آھانی زند چون ءُُ چہ پیم بوتگ۔ البت آھانی زبان،کتگیں کار، بستگیں لوگ ءُُ جاگہ شعر آھانی نشان ءُُ یات گار است انت۔ آھان چہ پد میدی ءُُ آرین ہمے علاقہاں کاینت ءُُ آباد بنت آ پدا کنزاں ءَ دگہ ھند ءُُ جاہاں روانت ءُُ آبات بنت۔ ڈاکٹر ایچ آر اے گپ ءَ تچک ءُُ راستی ءَ گشیت کہ ڈراویڈین سندھ، پنجاب ءُُ بلوچستان ءَ یک کرن یےءَ نشتگ انت۔ اصل ءَ اے عراق ءِ رُدراتکی پٹ ءُُ میدانی علاقہاں نندوک بوتگ انت آہاں بازیں سبب ءُُ ھلت ءَ لڑ ءُُ بار کرتگ ءُُ ہندوستان ءِ گوریچانی روبرکتی پٹاں اتگ ءُُ نشتگ انت۔ اے وت یک دگہ پٹ ءُُ پولے لوٹیت کہ ایشاں لڈ ءُُ بار چون ءُُ کدی اوچیا کرتگ۔؟
کہنیں راجانی دود ءُُ ربیدگ، زبان، تاریخ، آھانی لڑ ءُُ بار اگاں کمے سرپد بہ بیں مارا وتی راجے ھُنڈلانی درگیجگ ءَ ارزانی بیت اد ءَ مئے نوکیں گپانی مول ءُُ مراد ہمیش انت۔ مئے دومی حبر آرین نسل ءِ باروا بیت۔