نوکیں باندات…..شریف قاضی 

لیمار کیٹ ھشت چوک ءَ ھجّام ءِ دکان ءِ دیم ءِ ایریں بنچ ءِ سرا نشتگ ات ابت ھجام پارگ بیت وتی سر ءِ پُٹاں کستر کناں پدا جمعہ شریف ءِ نیکیں روچ اَت چمّ واب ءَ پُرّ اتنت پرچہ کہ دوشیگیں سجہیں شپ ءَ واب نیاتکگ اَت، یکّے بس ءِ گیروگار ءَ دومی ایرانی ڈیزلانی بوہ …… سُہب ءِ کساس ھشت بج بوتگ اَت گونڈیں زھگاناں وتی کتابانی بیگ گون اتنت دیم پہ دربرجاہاں رھادگ اَت انت ہمے ھجّام ءِ کوٹی ءِ دیما یک موچی یے اَست ات۔
بے چارگ چو مدامی ئیں وڑا وتی لاپ ءِ شوہاز ءَ مَھلہ دراتکگ اَت، ھمے حیالانی تہا گڈ ءُُ منج اتاں تہ یک کماشے ءَ را وتی زھگے کساس آئی اُمر ھپت ھشت سال بوتگ اَت ہمے موچی ءِ گورا اتک ءُُ وتی زھگ ءِ بوٹاں پالش کنگ ءَ لگیت آئی ءِ اُمر شست ءُُ پنچ مالوم بوتگ اَت،چشمکے چمّ ءَ ءُُ کُلاہ یے سرا اَت ئے لیاری ءِ بَزگیں بلوچے مالوم بوتگ اَت زھگ اوشتاتگ اَت وتی دومی پادیے شہارتگ اَت بے چارگ بوٹاں پالش کنگ ءَ اَت من چہ ھجّام ءَ بے سما اتاں ءُُ ہمے ندارگ ءَ چارگ ءَ اتنت دوشیگیں راہ ءِ ژند ءُُ پندی ءُُ چمانی سُچگ ءُُ بے وابی بیگواہ اَت انت۔ اے ندارگ ءَ منا دگہ دگُنیائے بُرتگ اَنت پت ءَ وتی زھگ دست ءَ گپت ءُُ رھادگ بوت۔ من ءَ وتی اسکول ءِ زمانگ یات پیداک ات کہ مئے مات ءُُ پتاں پما چنچو ازابی ءُُ واری کش اتگ وھدے سہب ءِ سرا مارا وانگ ءَ راہ اش داتگ راہ ءِ نیم ءَ وتی کتاب ءُُ کاپی لانکاں جتگ انت وت ءَ را چیر داتگ وھدے اسکول موکل ءِ وھد بوتگ کتاب بگل ءَ کُتگ انت لوگ ءَ شُتگیں بزاں ما وانگ ءَ بوتگیں وتی بزگیں مات ءُُ پتاناں رد داتگ آ بے چارگاں ھمے گُشتگ کہ باندامنی چُک منی راستیں کوپگ جوڑ بیت سکی ءُُ سوری ءِ وھد ءَ منا کار دنت، بلے مرچی گیشتر ورنا، ہمے بے وانگی ءُُ زانگی ءَ سرے اش ماں دُزی ءُُ ڈنگی ءَ کپتگ وڑ وڑیں نشہ آنی توک ءَ برباد انت وتی مات ءُُ پتانی بزگی ءُُ واری پُشت ءَ چگل داتگ انت آ بے چارگانی اُمیت ءُُ واھگ ھاکاں ھوار کُتگ انت اے ہمے بے وانگی ءِ ھلّت ءُُ سوب انت گوں ہمے رنگیں حیالاں سر ءُُ چیراتاں داں ھجّام ءَ من توار کُت واجہ اے پنجمی مردم انت ترا سرٹاپ کنگی نہ انت، منی انچو پدّر اتاں گُشے سالے ءِ واب ءَ اتاں۔
بس ھمے دُعاکت اے ھُدا! اے پیریں مرد وتی زھگ ءِ پادانی دیما نشتگ ءُُ بوٹانی پالش کنگ ءَ انت ایشی نااُمیت ءُُ بے مراد نہ کنئے ایشی زھگ ءَ یک جوانیں مردم ءُُ کوم ءِ ھذمت گار ے جوڑ بکن چہ دگنیاءِ ھرابی ءُُ سِلگتاں بہ رکھےّں۔