ماہتاک بلوچی زند…..ڈاکٹر عبدالمالک بلوچ

یار جان بادینی ءِ چمانی ہور دگانی رچک ءُُ سرے پوٹانی کپگ ءَ پد ماہتاک بلوچی زند ءَ را زندے رستگ بلوچی زند ءِ گوستگیں بیست سال چون گوستگ انت ایشی ءَ یارجان بادینی ءُُ آئی دل شری ءَ زانت۔
ماہتاک بلوچی زند ءِ چھاپ ءُُ شنگ بوھگ ءِ باروا بندات ءَ چہ بازیں واجہانی حیال ات کہ اے ہما پیش تریں بلوچی ماہتاکانی پیما آھستہ آھستہ کُٹیت ءُُ ھلاس بیت۔ چیاکہ بلوچی زبان ءِ گیشتر تاک ءُُ ماہتاک سال دو سال ءَ پد بند بوتگ انت۔
بلے یار جان بادینی ءِ شپ ءُُ روچ ءِ جہد ءُُ کوشست ءِ برکت ءَ آئی ساہ بچیت ءُُ وتی بیست سال پورہ کرت۔ واجہ یار جان ءَ ماہتاک بلوچی زند ءِ چھاپ ءُُ شنگ کنگ ءِ سوب ءَ وتی آرپیں پت ءِ محنت ءُُ مزدوری ءِ کٹ ءُُ کمائی ہمے تاک ءِ سرا جتگ، ایشی ءَ سر پد بوھگا ابید کہ منا زر نہ رسیت، اے کار ءَ نپ ءُُ پائدگ نیست، آ شر سرپد اَت کہ آئی زر زوال بوھگا انت، من وتی توم سورگ نہ چنڈتگ، آئی ءَ محکمیں یقین اَت کہ اے روچے نہ روچے برکاریت، بلوچی زبانءُُ لبزانک ءَ گوں اے یارجان بادینی ءِ مہر ءُُ دوستی اَت کہ آئی ءَ بلوچی زند ءَ ہمے حاترا چھاپ ءُُ شنگ کرت۔ تنکہ آ بلوچ بلوچی ءُُ بلوچستان ءِ باروا پٹ ءُُ پول بکنت، اے گپ ءِ تہا ہچ شک نیست کہ بلوچی زبان ءِ نبشتہ کنوک ءُُ بلوچی ماہتاکانی بہا زورکانی ڈُکال انت۔ آئی ءَ ماہتاک بلوچی زند ءَ بلوچستان کراچی ءُُ گلف ءِ بازیں ملکاں مپت ءَ بہر کرت۔ تنکہ بلوچی زبان ءِ وانوک گیش بہ بنت ءُُ بلوچی زبان ءُُ لبزانک دیما بروت۔
آ ماہتاک بلوچی زند ءِ مضمون ءُُ نبشتاکانی حاترا ہر شاعر ءُُ نویس کار ءِ کر ءَ وت شُت ءُُ آئی ءَ چہ لوٹ کرت کہ آ ماہتاک بلوچی زند ءِ واستہ نبشتہ بکن انت۔ یار جان بادینی ءَ گوں منی دوستی ءُُ سنگتی ءَ سک دیر انت من آئی ڈوک حیالاں جوانی ءَ سرپد بیں کہ من ہر وھد ءَ آئی کار گس ءَ شُتگ آئی ءَ گوں اے بنیاتی جنجالانی باروا گپ ءُُ تران بوتگ۔
یار جان بادینی ءَ ماہتاک بلوچی زند ءِ ذریعہ ءَ بازیں نامداریں کلمکار، کواس، شاعر، احوالکار ءُُ سیاستدانانی حاصیں نمبر ھم در کرتگ کہ اے خاصیں تاکاں چہ بلوچ بلوچی ءُُ بلوچستان ءِ آؤکیں باندات بزاں زھگ ءُُ ورنایاں مزنیں معلومداری رسیت۔ آ وتی قوم ءُُ راج ءِ کلمکار ءُُ کواسانی قومی ءُُ راجی ھذمتاں سرپد بنت، تہ گشت کنئے کہ ماہتاک بلوچی زند ءُُ گوستگیں بیست سالانی تہا بلوچ قوم ءُُ راج ءِ شاعر کلمکار، کواس، احولکار ءُُ سیاستدانی باؤگرافی دیما آورتگ کہ اے بلوچی زبان ءِ پٹ ءُُ پول کارانی شریں وڑے ءَ مدت ءُُ کمک ءَ کنت۔
یار جان بادینی یک سکیں محنتی ءُُ ایماندار یں مردمے انت آ سُہب ءَ بگرتاں شپ نیم ءَ وتی دفتر ءَ ماہتاک بلوچی زند ءِ کاراں دزگٹ انت۔ آئی جہد ءُُ کوشستانی سوب ءَ نوشکی ءَ زند اکیڈمی جوڑ بوت کہ آ ماہتاک بلوچی زند ءِ گوستگیں بیست سال ءِ پٹ ءُُ پولی کاراں کتاب ءِ شکل ءُُ دروشم ءَ چھاپ ءُُ شنگ کنگا انت۔ اے باروا بازیں کتاب چھاپ ءُُ شنگ بوتگ انت۔ یار جان بادینی بلوچستان ءِ ہما اولی بلوچ انت کہ آ ملک ءَ ابید در ملکاں جاہ منندیں بلوچانی سرا ھم پٹ ءُُ پول کرتگ۔ اے ملکانی تہا ترکمانستان، افریقہ، عمان، قطر، بحرینءُُ امارات ءِ بلوچ ھوار انت۔
یار جان ماہتاک بلوچی زند ءَ ابید بلوچستان ٹوڈے ءِ نامءَ انگریزی زبانءَ ھم تاکے درکنگ انت۔ تنکہ مہلوک انگریزی زبان ءُُ بلوچ بلوچی ءُُ بلوچستان ءِ باروا بوانیت ءُُ سرپدی ھیل بکنت۔
یار جان بادینی ءَ نوک گامیں زند ءَ شری ءَ رودینتگ ءُُ جوان کرتگ۔ یک شریں ادارہ ءِ شکل ءُُ دروشم داتگ کہ انوں ماہتاک بلوچی زند ءُُ زند اکیڈمی ءِ کتاب آن لائن وانگ بوت کں انت۔ دنیا ءِ ھر کنڈ ءَ بلوچے است یا کسے بلوچی زبان ءِ سرا کار کنت آ چہ ماہتاک بلوچی زند ءِ تاک ءَ پائدگ زرت کنت۔
یار جان ءِ دفتر بلوچی زبان ءِ شاعر ءُُ کلمکارانی واستہ یک بُنجاھے انت۔ بلوچستان ءِ ھر شہر ءُُ میتگے ءَ شاعر ءُُ کلمکارے کوئٹہ ءَ کیت آ الم ءَ یار جان ءِ دفتر ءَ کیت، زبان ءُُ لبزانک ءِ سرا گپ ءُُ تران بیت۔ انچو آئی دستر خواں شاعر ءُُ کلمکارانی واستہ مدام پچ انت، آ ھر وڑاشاعر ءُُ کلمکارانی مدت ءُُ کمک ءَ کنت۔
من وھدے بلوچستان ءِ سر وزیر ات کہ آ مدام منا بلوچی زبان ءِ شاعر کلمارانی مدت ءُُ کمک ءِ گشت آئی صلاح ءُُ سوج ءَ پد بابو عبدالکریم شورش، آزات جمالدینی، میر عاقل خان مینگل ءِ ادیرہ جوڑ کنگ بوت انت۔ انچو میر گل خان نصیر ءِ سد سالگی مراگانی باروا دسمبر 2014 ءَ میاں استمانی کانفرنس ءِ تہا ملک ءُُ در ملکاں بلوچ لوٹاھینگ بوت انت۔ ایشی تہا ھم آئی صلاح ءُُ سوج گوں اتنت۔
یارجان ءِ اے جہد پہ بلوچ بلوچی ءُُ بلوچستان ءَ نمیران ءُُ آابدمان انت، اُمیت انت کہ آ وتی اے قومی ءَ راجی کار ءَ انچو برجاہ دار یت، تنکہ بلوچ ءُُ بلوچی زبان یک آپسرے ءَ سر بہ بیت۔