بلوچی ءَ لبزانکی تاکاری ءِ ربےّت ءُُ بلوچی زند…..رحیم مہر بلوچ 

بلوچی زبان ءَ لبزانکی تاکاری ءِ بند پتر ءُُ ربےّت ءِ چار ءُُ تپاس ءَ ہمے راستی دیما کیت کہ اے سفر چہ بابائے بلوچی خیر محمد ندوی ءِ ماہتاک اومان ءَ (1951) بناء بیت، اشی ءَ سنگینی ءُُ معیاری دروشمے دئیگ ءَ عبدالواحد آزات جمالدینی ءِ کرد ماہتاک بلوچی 1956 ءِ دروشم ءَ ابد مانیں چیدگے ءَ است ءُُ نمیران اِنت۔ اے ھر دوئیں واجہانی تاک کشّگ ءِ پژ دری زانت ءُُ وژن ءِ تپاّس ءَ ڈلگیں نکتو ھمیش انت کہ بلوچی زبان نبشتاری دروشم بہ گپت، بلوچی لبزانک گوں وھد ءَ ھمگام بوہاں ءَ دنیا ءِ ایندگہ دیما شتگیں زبانانی ھمسری ءَ بئیت ءُُ بہ اُوشتیت۔ اے درگت ءَ گچینی وڑے ءَ ماہتاک بلوچی ءِ اولی ءُُ دومی دور ءُُ نوبت ءَ چھاپ ءُُ شنگ بوتگیں مواد چارگ بہ بنت تہ زانگ بیت آہاں گوں چونیں سنچ ءُُ سمائی جہد ءَ بلوچی زبان ءُُ لبزانک ءَ را دیمروی داتگ،بلوچی زبان ءَ استیں دور ءَ رواجیں درائیں تہر ءُُ بہرانی (شعری ءُُ ردانکی)بندات ءُُ ردوم دئیگ ءَ بُنی کرد ھمے واجہانی منتّاں زیر بار انت۔ دومی پَلو ءَ ایش ھم است کہ اے واجہانی گوں کجام واری ءُُ جنجال وتی کار کرتگ انت، نئے آوانی گورا وسائل بوتگ۔ نئے زر ءُُ نیکہ دگہ آسراتی یے، بس یک عشقے بوتگ یک واب ءُُ وژنے ءُُ آ ھمیش کہ چون ءُُ چتور بلوچی ءِ بانور سینگارگ بہ بیت، چون اے زبان دنیا ءِ دیما شتگیں زبانانی ہمردی ءَ بہ اوشتارینگ بہ بیت۔
اے گپ تاریخ ءِ تاکاں نبشتگ انت کہ آزات جمالدینی ءَ ماہتاک بلوچی ءِ گُڈّی پیش لبز وتی مرگ ءِ بسترانی تل ءَ نبشتگ۔ چرئے درور ءُُ مسالاں ہمے گپ دیما کیت کہ بلوچی زبان لبزانکی تاکاری ءِ بن ھشت ایر کنوکیں مئے کماش، چنچو کمیٹڈ، ایماندار، سنگین ءُُ وژنری مردم بوتگ اَنت۔ آہاں بدنی، مالی ءُُ ھمک رنگیں کربانی داتگ، بے تماہ بید لالچ ءُُ جو پاہ ءَ۔
بلوچی ءَ تاکاری ءِ اے ربےّت کہ پنجاہ ءِ دیک ءَ دیما اہتگ وھد ءِ بچّیگ ءَ دیمروی سیمسراں گوزان بوتگ۔ چدءُُ پد بازیں ماہتاک، تاک ءُُ تاکبند چھاپ ءُُ شنگ بوتگ انت۔ اگاں گونڈیں لڑ سازی یے بکناں تہ زمانہ بلوچی، نوکیں دور، اُلس، سوغات،بہارگاہ، لبزانک آساپ، زندمان، بلوچی زند سچکان ءُُ دگہ بازیں نام کہ جتائیں وھد ءُُ نوبتاں دیما اہتگ ءُُ پدا گار ءُُ بیگواہ بوتگ اَنت۔ اے چندئے نام کہ برزا گوشگ بوتگ اَنت اے ماہتاکاں بلوچی لبزانک ءِ دیمروی ءَ بُنی کردے ساز اِتگ۔ استیں زمانگ ءَ چہ اے تاکاں ایوک سئے ماہتاک ریگولر انت کہ ہمک ماہ درکا ینت، ماہتاک بلوچی، ماہتاک بلوچی زند ءُُ سچکان، اے ہر سئیں تاکانی وانوک ھزارانی کچ، ملک ءِ کُنڈ کُنڈ ءَ بگر داں در ملک ءَ شنگ اَنت، بلوچی ءَ ھمک ھند ءُُ دیارءَ ھمک گس ءَ سر کنگ ءَ ایشانی مزنیں کنڑی بیوشن ءُُ کردے است۔ چہ نوشکی ءِ سرمگیں دیار ءَ بلوچی عشق ءَ شیدائیں کارست عبدالواحد آزات جمالدینی ءِ ناسرجمیں واب ءُُ ارمان دگہ سر متابیں کار ستے واجہ یار جان بادینی ءَ وتی چماّں پتاتگ ءُُ دیما جُنزان اِنت۔
مروچیگیں اے دیوان چوشکہ ماہتاک بلوچی زند ءِ بیست سالی سفر ءِ سرجم کنگ ءِ درگت ءَ برجمینگ بوتگ، گڑا بیائت نگاہے ہمے سفر ءِ کتہ کاری ءُُ باندات ءِ امکان ءُُ باوستائی سرا جنین ءُُ وتی گپ ءَ دیما بریں۔
ماہتاک بلوچی زند ءِ چہ درستاں مستریں شرّی کہ منا دوست بیت آ اشی ھمک ماہ پہ وھد در آئیگ اِنت۔ ریگولر بوھگ اِنت۔ دومی شری کہ بلوچی لبزانک ءِ تاریخ ءَ پہ وتا گچینی ھند ءُُ مقامے ٹاہینتگ ئے آ بلوچی زند ءِ گچین تاک ءُُ حاصیں نمبر اِنت۔ منی حیالاں بلوچی لبزانکی تاکاری ءَ اے اولی تاک انت کہ ایشی ءَ چہ درستاں گیش گچین تاک کشّ اِتگ ءُُ بلوچی ءِ نمیرانیں کار ستانی منّاک ءَ بے دروریں نکش اِشتگ، اے تاکانی ارزشت ءُُ بستار ایش انت کہ اسکالر ءُُ پولکاراں پہ پٹ ءُُ پول ءَ بنی سرشونانی بستار دارنت۔
ترکمانستان ءَ آباتیں بلوچ بہ بنت کہ افریقہ ءُُ اومان ءِ بدر نگاں آہانی ربیدگی، سیاسی، معاشی زند ءِ بابت ءَ اہوالی درجنگ ءُُ بلوچ مہلوک ءَ گوں پجار ءُُ ھمگرنچ کنگ ءَ یارجان بادینی ءُُ بلوچی زند ءِ کرد مسالی انت۔ چوشی ھواریں سورت اے ماہتاک ءَ وتی بیست سالی سفر ءَ چوشیں بازیں مسالی کار کرتگ کہ لائک ستا انت ءُُ مچکاّئی رنگ ءَ بلوچی زبان ءُُ لبزانک ءِ دیمروئی ءِ سوب جوڑ بوتگ اَنت۔
گُڈ سر ءَ ماہتاک بلوچی زند ءُُ ایندگہ ریگولر چھاپ بوہوکیں تاکانی بابت ءَ اگاں دوگپ بہ جناں تہ باکے نہ اِنت۔ چوشکہ سرا گوشگ بوتگ اَت کہ بلوچی زبان ءَ تاکاری ءِ بن ھشت مئے کماشیں سراں گوں ستکدلی، مہر ءُُ سچویں کمٹمنٹ ءِ بنیات ءَ ایر کرتگ، آہاں بے غرض ءُُ جو پا ءَ گوں بے آسراتی ءَ مسالی کار کرتگ۔ استیں زمانگ ءَ جاور باز گہتر اَنت نوں تاکاری یک بیوپارے ءِ دروشم ھم گپتگ، اے لاپ ءُُ روزگار ھم دنت، کٹ ءُُ کمائی ءُُ نام آوری ءِ ھم سوب اِنت، چوشیں بازیں تاک است اَنت کہ ڈمّی انت، چہ سرکار ءَ اشتہار ءُُ گرانٹ گرنت بلے نیادی ءَ گندگ نہ بنت۔ بلے ھما تاک کہ پہ وتا بلوچ چاگرد ءَ یک ھند ءُُ مقامے ٹاہینتگ ئے ءُُ پہ وھد درکاینت ءُُ ھاسیں وژن ءُُ حیالے ءَ چوشکہ ماہتاک بلوچی، ماہتاک سچکان ءُُ ماہتاک بلوچی زند، تہ اے تاکانی ذمہ واری کمے گیش بیت، ایشانی کار ءُُ ھذمتانی دگہ ہچ شک ءُُ شعبہ یے نیست، بلے گپ اگاں اسٹینڈر ءُُ ذگریں لٹریری اکّرءُُ موادانی کیت تہ مردم کمے نا دلجمی ءُُ نا سرجمی یے ماریت۔ اے دراجیں سفر ے ءِ بُرّگ ءَ پد ھما اسٹینڈر ءُُ معیار کہ دیما بیاتکیں آوڑ نہ اِنت۔ گوشئے بس خانہ پُرّی ءِ گمان ءَ بیت۔ تانکہ بلوچی زبان ءُُ لبزانک ءِ پجّیگ ءَ تاک ءُُ ماہتاکانی معیار ءُُ اسٹینڈر ھم برز بہ بیت۔ گُڈّ سرا ماہتاک بلوچی زند ءِ شونکار یار جان بادینی ءُُ آئی سرجمیں ھمرایاں اے سفر ءِ سرجم کنگءَ مبارکی دیاں۔