”بلوچی زند“…..ثاقبہ مینگل 

یک راجے زندگ بوھگ ءِ واستہ آئی زبان ءِ زندگ بوھگ الّمی اِنت ءُُ زبان ھما وھد ءَ زندگ گُشگ بیت کہ آئی تہا نبشتہ کنگ بہ بیت۔ ماہتاک ”بلوچی زند“ بلوچی زبان ءَ زندگ دارگ ءِ جہد ءَ گوں ھوار اِنت۔
ماہتاک بلوچی زند ءَ اگاں ”بلوچانی زند“ بہ گُشاں گڈا ہچ رد نہ اِنت، ایشی ءِ تہا راج ءِ ھر رنگ گنِدگ ءَ کیت۔ واجہ یار جان بادینی ءَ بلوچ راج ءِ شہدیں ءُُ شیرکنیں زبان بلوچی ءِ واستہ سک باز جہد کُتگ ءُُ کنگ ءَ انت ءُُ دعا اِنت آئی اِے کارواں ہمے پیما روان بہ بیت ءُُ وتی جہداں برجم بدارایت ءُُ اے پڑ ءَ گیشتر بلوچ دیما بیا اَنت ءُُ زبان ءِ حاترا وتی ذمہ داریاں ادابہ کن انت۔
1999 چہ بگرتاں 2019 بیست سالگیں اے سفر چنکس اڑ ءُُ جنجال ءُُ خواری آں چہ گوستہ ءُُ اے مقام ءَ رستہ اے بابت ءَ لالا یار جان بادینی بہتر زانت بلے ما ایوکا اے بچار ایں بنی آدم ءِ زند ءِ اے دوڑ ءُُ وھد ءَ کہ ہر مردم وتی ذاتی زند ءِ غم ءَ مصروف اِنت۔ ”بلوچی زند“ ءِ وڑیں ماہتاک چھاپ ءُُ شنگ کنگ آسانیں کارے نہ انت۔ لالا یار جان بادینی ءَ وتی حق پہ وتی راج ءُُ ڈیھ ءِ واستہ شرّی ءَ سر ءَ ادا کرت ءُُ انگت ءَ کنگا اِنت۔
ماہتاک بلوچی زند یک پلیٹ فارمے بیت کہ آ یک راجے واستہ فلاسفر، قلمکار، زانتکار، نگدگارءُُ صحافی دیما کاریتءُُ بلوچی زند ھم بلوچاں ءَ ھمے سکیں ءَ دیگا اِنت۔ مردیں بباں یا زالبول،کماش ءُُ ورنا، دراہاں نبشتہ کنگ ءُُ وانگ ءِ سکیں ءَ دیگا اِنت۔۔
دری مُلکانی تہا بلوچ آنی زند چون گوزگ ءَ انت۔ آہانی دود ءُُ ربیدگ چون اِنت۔ آہانی زبان دری زباناں چہ چنکہ اثر زرتگ اِے وڑیں بازیں دگہ پٹ ءُُ پولی کار زند ءِ تاکاں ءَ چھاپ ءُُ شنگ بوتگ انت۔
راج ھما دیما کیت کہ وتی راج دپتر ءَ چہ فراموش مہ بیت کہ آکئے اِنت ءُُ کجا اوشتاتگ اَنت۔ دپتری پڑ ءَ ھم بلوچی زند وتی راج دپتر ءَ زندگ داشتگ، وتی بیراں بوتگیں لیڈر ءُُ راہشوں ءُُ زانتکاراں چہ بے حال نہ بوتگ۔ آوانی باروا خاصیں تاک چھاپ ءُُ شنگ کتگ۔
ماہتاک بلوچی زند ءِ خاصیں تاک چوشکہ میر گل خان نصیرؔ، آزات جمالدینی ؔ، گوھر ملکؔ، سید ظہور شاہ ہاشمی ؔ، استاد عبدالمجید گوادریؔ، غفار ندیم،ؔ غلام حسین شوہازؔ، عطاء شادؔ، حاجی عبدالقیوم، ؔ عنایت اللہ قومی،ؔ غلام محمد شاہوانی ؔ، محمد حسین عنقاؔ، ملک محمد پناہؔ، یوسف عزیز مگسی ؔ، میر عبدالعزیز کردؔ، غوث بخش صابرؔ ءُُ بازیں دگہ کلمکار ءُُ کواسانی باروا خاصیں تاکاں چہ بلوچ قوم ءُُ راج ءِ آؤکیں پسّگ بزاں زھگاں معلومداری رسیت کہ بلوچستان ءَ چون چونیں مردم ودی کرتگ ءُُ آھاں وتی زبان ادب قوم ءُُ راج ءِ باروا چونیں قربانی داتگ۔
ماہتاک بلوچی زند ءِ ادارہ ءَ درملکاں جاہ منندیں بلوچانی زبان، لبزانک ءُُ راجدپترے حاترا کارکرتگ ءُُ خاصیں تاک چھاپ ءُُ شنگ کرتگ۔ چوشکہ عمان، قطر، بحرین ءُُ دومی ملک ھوار انت کہ اودا جاہ منندیں بلوچاں وتی زبان، لبزانک ءُُ رسم ءُُ دود زندگ داشتگ۔
ماہتاک بلوچی زند ءِ ادارہ ءِ جہد ءُُ کوشستاں چہ مئے قوم ءُُ راج ءِ زبان، ادب، سیاست، تاریخ ءُُ راجدپتر زندگ مانیت۔ دنیا ءِ زندگیں قوم ہما انت کہ آ وتی زبان، تاریخ،ثقافت ءُُ رسم ءُُ دوداں زندگ دارانت۔
بلوچ راج ءُُ بلوچی زبان واجہ یا رجان بادینی ءِ منت وار انت کہ آئی ءَ اینکس مزنیں ذمہ داری وتی سرا زرتگ ءُُ بلوچی زبان ءِ دیمروی ءِ حاترا وتی کرد ءَ ادا کرتگ۔ بلوچی زند بلوچ راج ءِ زانتکاراں دیما آرگ ءَ اِنت ءُُ آہانی حوصلہ افزائی ءَ ھم کنگ ءَ اِنت۔ بلوچی زند ءِ کامیابیں بیست سال پورا بوھگ ءَ من لالا یار جان بادینی ءُُ آئی دوستاں مبارک باد گُشیں حدا وند مُدام شمارا سلامت ءُُ کامیاب بہ کنت۔ (آمین)
٭٭٭