بلوچی زبان ئِ نامداریں ندکار واجہ یارمحمد بادینی ئِ وانگی ” عمان ئِ بلوچ “ ئِ سر ئَ چمشانکے…..مہر اللہ مہر

اَلبت من اِے گپّ وتی بازیں رِدانکی نبشتانکانی تہا دیم ئَ آﺅرتگ ئُُ گُشتگ ،کہ من چوشیں باز ندکار ئِ لبزانکی ساچشتانی وانگ ئَ پد ہمے سرپد بوتگ آں ،کہ من آئی ئِ کارستانی بہرے آں۔ پمیشکا گُش اَنت ،کہ لبزانکی شَرّیں ساچشت وتی وانوک ئَ اَلّم ئَ گوں وتی پاداں بارت ۔ ماں لبزانک ئِ توری کُجام تک ئِ س´ےاہگے بِہ بیت یا سرجمیں وانگی یے ۔ وہدے وانوک ئَ را آئی ئَ ماں وتی اَمبازاں زُرت، تاں گُڈّی منزل ئَ وتی ہمراہ کرت، تہ آ نبشتہ کار اَلّم ماں اِے پِڑ ئَ سوبمند بیت۔ چیاکہ ہر یک انسانے ئِ اولی ئُُ مستریں جہد ہمیش انت، کہ من اَنچیں زانت ئُُ سرپدی دَ ربرآں، کہ وتی زِندمان ئِ ہمک تَک ئُُ پہنات ئِ پِڑ ئَ سوبمند بِہ باں۔ اِے تَک ئَ من واجہ یار محمد بادینی ئِ جہدانی مُزّ وانگی ” عمان ئِ بلوچ “ کہ اِے یک اَنچیں وانگی یے ،ایشی ئِ ہمک سرحال ئِ دَروَنت وتی وانوک ئَ را راجی نوکیں سرپدی دَنت۔ ئُُ ایشی ئِ سَرپَدّیانی بارہ ئَ اَچ من گیش ہما ندکار نبشتہ کرت کن اَنت ، کہ آ اَچ من گیش پُہتہ کار اَنت ئُُ من اِے وانگی ئِ راجی سرپدّیانی وانگ ئَ پَد، ہر چیکہ مارِاِتگئُُ سَرپَد بوتگ آں، تہ وتی زانت ئِ کَچّ ئُُ کِساس ئَ دیم ئَ آرگ ئَ آں۔ ئُُ من اِے بارہ ئَ سَرپَد آں، کہ کَسّے ئِ راجی پَٹّ ئُُ پولی نکانانی بارہ ئَ نبشتہ کَنَگ یا گیشتر شِنگ ئُُ تالان کَنگ اَرزانیں کارے نہ اِنت۔ بَلے شَرّ ئُُ پائداریں سرپدی ئِ دیم ئَ بَرَگ سَترگر´ان بِہ بیت، تہ آئی ئِ شِنگ ئُُ تالان کَنگ اَلّمی اِنت۔ چوش کہ اِے بارہ ئَ واجہ یارمحمد بادینی وتی وانگی ” عمان ئِ بلوچ “ ئِ پیشگال ئِ تہا جاگہے گُشگ ئَ انت:
” عمان ئِ بلوچانی باروا اے کتاب ئِ چھاپ ئُُ شِنگ کنگ ئِ بُنّکی مول ئُُ مراد ایش انت کہ آھاں وتی ماتی زبان زندگ داشتگ، آھاں وتی دود ئُُ ربیدگ رسم ئُُ دودھم زندگ داشتگ عمان ئِ وڑا ودمی عرب مُلکانی بلوچانی یک مزنیں کساسے آباد انِت کہ آ صدانی سالاں چہ اودا جاہ منند اَنت۔“
اَلبت اِے گپّ من ہر وہد چہ وتی مستریںکماشاں ہُشکرتگ، کہ مسکت بلوچاں چہ پرتگیزاں پَچ گپتگ بَلے آیاںچونہ زانتگ، کہ کدی ئُُ چے پیم بَلے اِے راجی سرپدی ئَ نوںمارا واجہ یارمحمد بادینی ئِ وانگی ” عمان ئِ بلوچ “ دیگ ئَ انت، کہ ایشی ئِ تاکدیم ۱۱ ئَ نبشتہ انت:
” سلطنت عمان عربستان ئِ زرباری رودراتک ئِ نیمگااِنت۔ عمان ئِ گو´ریچانی روبرکتی نیمگا عرب امارت ، روبرکتی نیمگا سعودی عرب، زرباری، روبرکتی نیمگا یمن انت عمان ئِ ساحلی ھند ئِ د´راجی ۵۶۱۳کلومیٹر انت۔ عمان ئِ رقبہ ۰۰۵۹۰۳ مربع کلومیٹر انت۔ عمان ئِ آبادی ۳۲۹۳۹۸۴ انت۔ عمان ئِ تہا بازیںقوم آباد انت۔ عرب ئُُ بلوچاں ابید زرباری ایشیائ، پاکستان ، سری لنکا، بنگلہ دیش ئُُ افریقہ ئِ مردم ھم جاہ منند اَنت۔
عمان ئِ آبادی ئِ ۵۷ درصد آبادی مسلمان اَنت۔ عمان ئِ تہا وانگ ئُُ زانگ ئِ شرح ۰۸ درصد اِنت۔ عمان ئِ کرنسی ئِ نام ریال اِنت۔“
ماں ہمے وانگی ئِ تاکدیم۴۱ ئَ واجہ بادینی گُشگ ئَ اِنت، کہ :
” ریاض نجیب الرئیس وتی کتاب ” مصاحف وسیوف “ عرب ملکانی تہا بلوچانی باروا نبشتہ کنت کہ مصر، عمان ، امارات، سعودی، بحرین، کویت، عراق، سوریہ ، زنجبار، تنزانیہ ئُُ یوگنڈا ئَ چاردہ لکھ ئُُ ھشتاد ہزار بلوچ آباد انت۔“
اِے گپّ راستے ،کہ یک راجے ئِ تاریخ ئِ بارہ ئَ نبشتہ کَنَگ ئُُ راج ئِ دیم ئَ آرگ اَرزانیں کارے نہ اِنت ماں اِے کار ئَ مزنیں تَگ ئُُ تاچ ئُُ پَٹّ ئُُ پول پکار اِنت ، کہ اِے کار ئِ تاں حَدّے ئَ واجہ بادینی ماں وتی وانگی ” عمان ئِ بلوچ “ ئَ سوبمند اِنت۔ چوشکہ ماں وتی ہمے وانگی ئِ تاکدیم۶۱ ئَ گُشگ ئَ اِنت:
” وھدے شانزدھمی کرن ئَ عمان ئِ سراپرتگیزاں قوضہ کرت۔ عمان ئِ سلطان امام سلطان بن سیف العربی سک لاچار بوت ئُُ پناہ گرگ ئِ حاترا مکران ئِ ھند چابہار ئَ جاہ منند بوت۔ عمان ئِ سلطان ئِ ھواری ئَ آئی سپائیگ ھم گوں اتنت۔ مکران ئِ بلوچاں عمان ئِ سلطان ئُُ آئی ئِ مردماں ئَ گوں دل ئِ حُبّ ئُُ واھگ ئَ ب´ےابخیر گُشت ئُُ وتی بلوچی رسم ئُُ دودانی ردا آھانی خدمت کرت۔ عمان ئِ سلطا ن بلوچانی مہر ئُُ دوستی ئُُ مہمانداری ئِ سوب ئَ چیزے سالاں ہمدانشت۔ رند ئَ عمان ئِ سلطان ئَ پرتگیزاں چہ وتی مُلک ئَ درکنگ ئِ فیصلہ کرت۔ اے تکئَ آئی ئَ چہ بلوچان کمک لوٹ اِت۔ بلوچان امام سلطان بن سیف العربی ئِ لوٹ ئِ ردا پہ وت ئَ مزنیں عزتے زانت ئُُ سلطان ئَ بازیں لانچ جنگی سامان ئُُ بلوچانی مزنیں لشکرے زُرت ئُُ چہ مکرّان ئِ بندن ئَ دیم پہ مسکت ئَ رھادگ بوتنت۔ بلوچ لشکر ئَ عمان ئِ سلطان امام سلطان بن سیف العربی ئِ سروکی ئَ مسکت ئِ سرا اُرش کرت۔ آئی ئَ مسکت گپت رند ئَ پورئیں عمان وتی دست ئَ آورت اَنت۔ بلوچ لشکر ئَ پرتگیزاں چہ عمان ئَ سال ۰۵۶۱ ئَ دیم پہ رودراتکی افریقہ ئَ تاچینت اِے پیم ئَ عمان ئِ سرا یک ئُُ نیم سد سالانی پرتگیزی حاکمیت ھلاس بوت۔ پرتگیزاں بلوچ لشکر ئِ دیماپروش ورگ ئَ پد عمان یلہ دات ئُُ رودراتکی افریقہ ئِ بندنی شہر ممباسا ئُُ زنجبار ئَ شُت اَنت۔ اے ھند ساری ئَ آھانی کر ئَ است اتنت۔ پرتگیزانی پر´وش ئَ پد عمان ئِ سلطان، سلطان بن سیف العربی ئَ بلوچان ئَ باز عزّت ئُُ شرف بخشات ئُُ آیانی گوں دل ئِ واھگاں شکر ئُُ منّت گپت۔ بزاں عمان ئَ بلوچانی آیگ ئِ دومی بہر بلوچ لشکر ئِ کمانڈر میران ئُُ جلال ئَ پرتگیزآنی ھر دوئیں کلاتانی سرا قوضہ کرت۔ ھمے حاترا اے کلاتانی نام میرانی ئُُ جلالی ئِ نام ئَ چہ زانگ ئُُ پجاّرگ بنت۔ ھپدھمی کرن ئَ بندات بوت ئُُ چہ ھما وھد ئَ عمان ئِ سلطان کہو لئِ نیمگا بلوچان ئَ مزنیںعزّت ئُُ شرفے دئیگ بیت۔ چیریشی ابید وھدے سال اکتوبر ۸۵۹۱ ئَ گو´ادر پدا پاکستان ئَ دیگ بوت۔ اے وھدآن ھم مکران ئَ خاص گو´ادر ئِ مزنیں مردمے ئَ را عمان ئِ جاہ منندی Nationality) (دیگ بوت۔ اے بلوچانی گیشتر س´ےادی چہ مکران ئُُ خاص گو´ادر ئَ اِنت۔
عمان ئِ حاترا بلوچانی قربانی سک باز انت۔ ھمے وڑا یک روایتے است۔ وھدے ھپدھمی کرن ئَ میرشہداد ئَ یک بلوچ لشکرے زُرت کہ آئی تہا چیز مضروعی عرب اتنت۔ دیم پہ رودرتکی افریقہ ئَ رہادگ بوتنت۔ وھدے میر شہداد گوں وتی لشکر ئَ رودراتکی افریقہ ئَ رست۔ آئی ئَ رودراتکی افریقہ ئِ تیاب گ´وری شہر ” ملنڈی “ ئُُ ” ممباسا “ ئَ را مزنیں جنگے ئَ پددست ئَ آورت۔ ھمے جنگ ئِ تہامیر شہداد ئِے برات میراحمد جنگ بوت۔ وھدے عمان ئِ سلطان امام سیف بن سلطان ئَ را میر شہداد ئِ سوب مندی ئِ حال رست۔ تہ امام سیف بِن سلطان وت میر شہداد ئِ مبارکباتی ئِ حاترا رودراتکی افریقہ ئَ شت ئُُ آئرئَ گوں دل ئِ حُبّ ئُُ واھگ ئَ مبارکبات دات۔ عمان ئِ سلطان ئِ ھواری ئَ علاقہ ئِ مردم ھم سک وش بوتنت کہ میرشہداد ئَ آھاں ئَ چہ پرتگیزانی زُلم ئُُ زوراکیاں رکیّنت۔ امام سیف بن سلطان وھدے چہ رودراتکی افریقہ ئَ دیم پہ عمان ئَ واتر بوت۔ تو آئی ئَ میر شہداد ئَ وتی ھمرائی ئَ عمان ئَ برُت ئُُ وتی گ´وھار ئَ آئرئَ سانگ دات۔ چریشی ابید رودراتکی افریقہ ئَ مزروعی عربان گوں سلطان ئَ بغاوت کرت بلے بلوچ سلطان ئِ ھاترا گوںمزروعی عرباں ھم جنگ کرت۔ تنکہ رودراتکی افریقہ ئَ ھم سلطان ئِ واک ئُُ اختیار برجاہ بہ مانیت چریشی ابید عمان ئِ تہا صلالہ ئِ جنگ ئَ بلوچانی یک مزنیں کساسے مرتگ۔ صلالہ ئَ بلوچانی قبر حساب نہ بنت۔ بلوچاں بنداتی روچاں ئَ بگرتاں انوّں عمان ئِ ھاترا ھر وڑیں جانی ئُُ مالی قربانی داتگ۔“
ماں ہمے سرحال ئِ نبشتانک ئَ واجہ بادینی عمان ئِ ہَند ئُُ میتگانی ناماں اَنچیںپیمے ئَ گران کنت، وانوک ہمے سرپد بیت من وت واجہ بادینی ئِ ہمرائی ئَ گون آں ئُُ اِے د´رائیں ندارگاںچمّ ءوت گِندگئَ آں۔
” عمان ئَ بلوچانی یک مزنیں کساسے جاہ منند انت۔ اے وھد ئَ عمان ئِ آبادی ئِ ۵۲ درصد بلوچ انت۔ اے بلوچ عمان ئِ شہر مسکت ، مطرح، سیپ ، رمیس، برکا، صحار، الباطنہ ئِ کوسٹ ئَ آباد اِنت۔ چریشی ابید عمان ئِ دومی ھند و جاگہاں ھم بلوچ آباد انت۔ عمان ئِ تہا بلوچانی بازیںقبیلہ اَست اَنت ۔ ھوت، رئیسی، جدگال، رند ئُُ لاشاری بازیںدگہ بلوچ قبیلہ است انت۔ بلے گیشتر مردم وتارا بلوچ گُشنت ئُُ باز قبیلہ چہ پت ئُُ پیروکانی نام ئَ زانگ بنت۔“
چِددیم وانگی ” عمان ئِ بلوچ “ ئِ تاکدیم ۱۲ ئَ گُلگِدار چھاپ اَنت، کہ اَوَلی گُلگدار عبدالعزیز حسین نور محمد رئیسی ئِ ” بلوچ اصل ئَ عرب انت“ کہ ایشی ئِ تاکدیم ۳۲ ئَ آ گُشگ ئَ انت:
” آ وھداں ابو سعیدی چہ عمان ئَ درکپتگ ئُُ بلوچستان ئَ شُتگ اَنت۔ آچہ بلوچانی حاکمان مدت لوٹتگ ۔ بلوچانی حاکم آئی مدتّ ئَ کرتگ انت۔ آئی ئَ رازمین دئینت۔ ھما زمانگ ئَ گو´ادر ابوسعید ئَ گفٹ کنگ بیت۔ بلوچ ھر چنکس اَست اَنت، آ عرب انت ، درست کتاب گشنت۔ انوں عراق ئَ جنگ انت، مردم درکپگ ئَ انت، باز مردم ایران ئَ گوزیت چوشکہ بلوچ دنیا ئِ ملکاں آباد انت۔ مردم ھم شد ئُُ جنگ ئَ چہ لاچار انت۔ یک دومی جاگہ ئَ بروانت شیخ سعید بن راشد بن اسماعیل البلوشی نبشتہ کرتگ کہ بلوچ قحطانی انت۔ بلوچ اصل ئَ عرب انت۔“
پہ منی گونگیناں اِے سَرپدَی نوک اَنت،کہ کُجام سبب ئَ گ´وادر ابوسعید ئَ دیگ بوتگ۔ ہمے پیم ئَ وانگی ” عما ئِ بلوچ “ ءِ دیمتر ئِ گُلگِدار واجہ شیخ حمد شھداد البلوشی ئِ اِنت ،کہ آئرا واجہ بادینی جُست کنت :
” شہداد اے منی پیرک نہ اِنت اے مئے وتی قبیلہ ئِ مردمے بوتگ۔ شہداد ئِ لوگی ئِ نام مریم کمال بوتگ۔ شہداد پرتگیزانی خلاف ئَ جنگ کرتگ۔ اے دریا ئِ تہا روگ ئَ بیتگ اَنت۔ آھاں ئَ جُست ئُُ پُرس کنگ بوتگ۔ ھما زمانگ ئَ بلوچاں باز کس چہ افریقہ ئَ آﺅرتگ، وتی نوکر جوڑ کرتگ۔ برٹش ئَ ایشان ئَ جُست کرتگ۔ شہداد ئَ جنگ کرتگ ئُُ بازین مردم کُشتگ۔ پدا آ ئرئَ گپتگ دست ئُُ پاد ئے قید کرتگ انت ئُُ آئی ئَ را منور ئِ تہا برتگ انت۔ پدا جُست کرتگ کہ شہدا تو چتور اے مردم کُشتگ اَنت؟ شہداد گشیت کہ شما منی دست ئُُ پاد قید کرتگ اَنت۔ شما من ئَ یل بدئیت من شمارا پیش داریں کہ مردم چون کُش اَنت۔ انگریز کسے گُیشت تپنگ ئَ بدئے، کسے گُشیت مدئے، ھمے وھدآں آئر ئَ تپنگ ئَ دات انت۔ ھما منور ئِ تہا بیست ئُُ سرسے مردم کُشیت۔ پد اآئر ھمودا بر انت رند ئَ وتی موت ئَ وت مُرتگ۔
جُست: عمان ئِ تہا بلوچانی کساس چنکس اَنت۔ بلوچانی قبیلہ کجام انت؟
شیخ حمد شہداد البلوشی:عمان ئِ تہا بلوچانی تعداد پنجاہ درصد بیت۔ بلوچانی بازیں قبیلہ است انت۔ چوشکہ رئیسی اَنت ھوت، گ´ورگیج ، جَدگال، رِند، صابری، البلوشی چہ مچاں زیات البلوچی انت۔“
ئُُ گو´ادر سعید تیمور ئِ پرمان ئِ رِد ئَ ایوب خان ئَ بہا دیگ بیت، کہ اِے رِدئَ شیخ حمد شھداد البلوشی ماں جُستے ئِ پَسّہ ئَ گُشیت:
” ھر چنکس ظفاری بوتگ انت۔ آھاں آزاتی لوٹتگ کہ آ چہ عمان ئَ جتا ئُُ آزات بہ بنت سعید تیمور آ ٹائم ئَ صلالہ ئئَ بوتگ، حکم کرتگ کہ گو´ادر بہا کنگ بہ بیت۔ چیاکہ جنگ ئِ حاتر ئَ اوزار درکار انت۔
آئی ئَ گو´ادر ایوب خان ئَ را پہ بہا داتگ۔ اکتوبر ۸۵۹۱ئَ گ´وادر پاکستان ئَ بہا کنگ بوتگ۔ چہ گو´ادر ئَ مرد م بھرتی کنگ بوت انت۔ چہ ایران ئَ فوج لوٹائینگ بوت۔ جنگ بوت صلالہ ئَ بلوچانی مزنیں قبرستانے است اِنت، بازیں بلوچ صلالہ ئَ شہید کنگ بوتگ انت۔ صلالہ ئَ گُڈّی آپریشن ۷۷۹۱ ئَ بوتگ۔“
ماں ہمے گُلگِدار ئِ جُستے ئَ واجہ بادینی واجہ شیخ حمد شہدادالبلوشی ئَ ماں بلوچستان ئَ آیگ ئِ کَڈّن کنت ،تہ آ گُشیت:
” واجہ آپ ئُُ تام نصیب بوت، باند ئَ پونشی ھفتگے ماہے ئِ تہا سالے شش ماہئَ من ضرورکایاں۔
کئے زانت کدیں واتر کناں ئُُ مکران تئی کولیگ باں چاریگ بان من بلوچستان ئِ حاترا جذباتی آںکہ ما رواں بلوچستان ئِ سرزمین ئِ پُلکا ں وتی چمّ ئِ سرمگ کناں۔“
ماں ہمے وانگی ئَ واجہ احمدعبدالکریم الھوتی وتی گُلگِدار ” خلیج ئِ توک ئَ بلوچان ئَ باز عزّت است “ ئِ سرحال ئِ تہا جاگہے گُشگ ئَ اِنت:
” تئی حبر راست انت، بلوچاں باز عمان ئَ کُمکّ کرتگ۔ تنکہ پرتگیز چہ عمان ئَ درگیجگ بہ بنت۔ الیربی ءِ زمانگ ئَ بعد شانزدمی سنچری ئَ سلطان احمد بن سعید امام احمد بن سعید اے سلطان قابوس ئِ بن پیرک انت۔ ایشی من گشاں کہ سلطان احمد بن سعید ئِ ھر چنکس آرمی بوتگ انت، آد´رستیں بلوچ بیتگ انت۔ ھر چی مردم العربی ئِ کر ئَ بوتگ اَنت۔ آپدا سلطان احمد بن سعید ئِ کر ئَ شت انت۔“
سیدظہورشاہ ہاشمی ئِ بارہ ئَ پہ من یا منی وڑیں دِگہ بازیں ندکاراں اِے نوکیں سَرپَدی یے ، کہ عبدالمجید گو´ادری ماں ہمے وانگی ئَ وتی گُلگِدار ” منی شاعری ئِ بنیاتی خیال بلوچستان انت“ ئِ تہا َجاگہے گُشگ ئَ اِنت:
”شروع ئَ شاعری انچو ات، مکمل نہ اَت آئی تہا بازیں نزوری است اَت۔ لہتیں اُردو شاعری ھم کرتگ ات۔ آزمانگ ئَ ظہور شاہ ئَ بلوچی شاعری نہ کرت۔ آئی ئَ اُردو شاعری کرت، آئی ئِ انگت ئَ یک شعرے من ئَ یات انت۔
”اٹھ قوم بلوچ کی شان والا“
آئی ئِ ھمے ٹکر من ئَ یات انت۔ آئی شاہ صاحب اختر تخلص بیتگ آئی نام ساری ئَ ملنگ شاہ بیتگ۔ رند ئَ وتی نامے ظہور شاہ کرتگ۔“
ئُُ بلوچستان ئِ قومی ترانہ ” چک اےںبلوچانی “ ماں بلوچستان ئِ بازیں وانگجاہانی تَلّوہانی سَر ئَ گوں وشتواری ئَ وانگ بُوَگ ئَ انت۔ بَلے ماں ہمیشاں سک بازمردُم سرپد نہ انت، کہ اِے ” قومی ترانہ “ کَے نبشتگ ئُُ کَے ردھم داتگ؟ پمیشکا من گُشاں اِے بارہ ئَ اُستاد عبدالمجید گو´ادری ماں وتی ہمے گُلگِدار ئِ تہا گُشگ ئَ اِنت:
”اے کمال اِنت کہ من ایشرا پانزدہ بیست منٹ ئِ تہا بستگ۔ آزمانگ ئَ منی جند ئِ آواز شربوتگ ۔ گٹ خراب اِنت، من ئَ یات اِنت، ھمے زمانگ ئَ من سک ذہنی صورت ئَ پریشان اتوں، باریں چیا من ئَ تکلیفی بیتگ اَت۔ آزمانگ ئَ ھمے سیاسی لیڈر است اتنت کمو متحرک اتنت ۔ من ئَ یات اِنت ھمے روچاں من سک تکلیف اتوں من تھنائی پسندیاں من بیگاہ ئَ شُتگ، اے تیاب ئِ کرّ ئَ آتیابئِ کر ئَ آ ٹائم ئَ دراں جنگل اَت۔ آنوّں آبادی گڈبڑانت گڑا من زمستان ئَ تپیگ بیتاں کوٹ گو´را اَت۔ سوئٹر گوراات۔ بلائیں پژھمی کلاےے منی سراَت۔ منی کاگد ئُُ قلم کیسگ ئَ اَت۔ من تیاب ئِ کرّ ئَ ایرکپتاں آہستہ آہستہ روگ ئَ لگتاں، ھمے خیال ئِ تہا ما بلوچان چون اَنت۔ ” ما چک ئِ بلوچانی ما گُلّدیں شیرآنی “ فلاں فلاں اکثر من گ´وادر ئَ بوتگوں ، ھر مغرب ئِ نماز ھمودا کرت۔ پدا اتک اوں۔“
ماں ہمے گُلگِدار ئَ وہدے واجہ بادینی حُدامرزی عبدالمجید گو´ادری ئَ را مشکت ئِ کُہنیں شاعرانی بارہ ئَ جُست کنت، تہ آ گُشیت:
” جُست: مسکت ئِ جند ئِ کہنیں ئُُ بلوچی ئِ قدیمیںشاعر است انت؟
استاد عبدالمجید گو´ادری: من بیست سال صلالہ ئے ئَ بوتگاں منی یک دگہ عادتے بوتگ کہ من کدی مشاعرہ ئَ نہ شتگ اوں ، ھمے حاترا من ئَ معلوم نہ انت کہ شاعر کسے است نیست۔ انوگیں شاعر است انت من ایشاں ئَ پچ نیاراں۔“
پہ لاپ ئِ والینگ ئِ توجیل ئَ بلوچ راج چَہ ہما سر ئَ مالدار ئُُ ماں کِشت ئُُ کِشاری ئَ ہمگ´رنچ پیداک اِنت۔چوشکہ وہدے یارمحمد بادینی زمینداری ئِ بارہ ئَ واجہ یاسین بن اُمیتان البلوشی ئَ جُست کنت، تہ آ گُشیت :
” من بیست ئُُ یک ایکڑ ڈگار زرتگ۔ انوّں منی ڈگار ئَ شست ئُُ پنچ ہزار ریال ئَ لوٹتگ انت۔ پاکستان ئِ زرّانی یک کروڑ بنت۔
جُست : عمان ئِ بلوچانی تہا مزنیں زمیندار است؟
یاسین بن امیتان البلوشی: جی واجہ : چہ منی باگ ئَ شرتریں ئُُ مستریںباگ استنت۔ آباد ترین باگ انت۔ تو منی باگ دیستگ تئی خیال ئَ ھمے مستریں باگ اِنت۔ اد ئَ میجر غلام صاحب اِنت آئی تعلق چہ بالیچہ ئَ انت آئی ئَ را شریں باگ ئِ است، انوّں میجر عثمان انت، آئرا ھم مزنیں باگ ئِ است۔ آئی باگ چہ منی باگ ئَ مستر انت ۔ عمان ئِ توک ئَ بلوچانی باگ بے حساب انت۔
جُست: عمان ئِ بلوچ اد ئَ چہ پس ئُُ پیرکی وھد ئَ ڈگار داراَنت
یاسین بن امیتان البلوشی: بلوچاں ئَ چہ پس ئُُ پیرکانی دور ئَ ڈگار است ” باطنہ “ مئے کوسٹل ایریا انت، ایشی توک ئَ بلوچانی ڈگار باز انت چہ بن پیرکاں ڈگار آھانی جندئیگ انت۔
جست : اد ئَ ھر کسے کر ئَ ڈگار چہ پس ئُُ پیرکان است آئی کر ئَ ڈگار انی کبز ئُُ کاگد ھم است انت؟
یاسین بن امیتان البلوشی :اد ئَ ملکیہ گشنت ڈگار آنی ملکیہ اَست اِنت باز ڈگار آنی ملکیہ رسمی نہ انت، اد ئَ ھما علاقہ ئِ والی است انت ۔ اودا شیخ اَست اِنت کہ کاگدے دنت کہ من شاہدی دیاں اے زمین فلاں جاگہ ئَ فلاح مردمے اِنت۔ اے کاگد ئَ مردزوریت والی ئِ کرّ ئَ رﺅت ۔ والی آئی ئَ را تصدیق کنت۔ منطقہ ئِ اسرداریں مردم بازیں جاگہاں شیخ ئَ والی ھم است انت۔ تو ایشانی واستا چوشیں مسئلہ ئِ نہ بوتگ۔“
ہمے پیم ئَ اِے گپّ چمشانک ئِ بندات ئَ ہم دیم ئَ اَہتگ ات، بَلے اِد ئَ محبّ اللہ البلوشی وتی گُلگِدار ئِ جُستے ئِ پَسّہ ئَ گُشیت :
جُست : بلوچستان ئِ خان ئَ گ´وادر سلطان ئَ داتگ، اے تاریخ ئِ باروا تئی چہ خیال انت؟
محبّ اللہ البلوشی : ۸۵۹۱ ئَ اے لوٹنت گ´وادر ئَ انڈیا ئَ ٹرانسفر بکں انت۔ تو پاکستان ئَ اے چیز نہ منتگ کہ گ´وادر منی زمین ئِ سرااِنت گ´وادر پیش ئَ خان قلات ئَ گوں بوتگ، اد ئَ سے شیخ بوتگ اَنت، یک دومی ئِ بر´ات بوتگ اَنت۔ آ گوں وت ئَ مڑتگ اَنت، یکےّ چہ ایشاں زنجبار ئَ شُتگ یکےّ گ´وادر ئَ شُتگ ئُُ چہ گ´وادر ئَ سید ھا وتاراقلات ئَ سر کرتگ۔ اے خان ئِ کرّ ئَ شُتگ کہ من شیخ ےے آں پناہ لوٹیں من وتی ملک ئَ گِرگ لوٹاں تو من ئَ مدت ئُُ کمک بکن۔ خان ئَ گُشتگ من ترا مدت دات نہ کناں بہر حال من ترا جاگہے دیاں۔ تو اودا بے نند وتی حاترا سپاھی بھرتی بکن ئُُ برو جنگ بکن۔ گ´وادر تئی اِنت اد ئَ تو بلوچ بھرتی بکن ئُُ برا وتی حق ئَ پچگر ۴۱ / اکتوبر ۸۵۹۱ ئَ وھدے عمان ئَ گ´وادر بہا کنگ لوٹیت۔ چیاکہ گ´وادر آئی کنٹرول کنگئَ چہ ڈن بیت۔ پاکستان ئَ گشت ایشرا ما بہا کنگ ئَ نیلاں، ایشرا ماوت زُوراں پاکستان ئَ گ´وادر ئَ چہ عمان ئَ یک معاہدہ ئِ ذریعہ ئَ زُرت کہ من ترا گ´وادر ئَ ھما شرت ئَ دیان تو من ئَ آرمی ئِ واستا بلوچ بدئے آھانی گپ منت پیسہ ھم دات۔“
اِے پہ ما بلوچاں یک وشّی ئِ گَپّے ، کہ مئے بازیں بلوچ پائلٹ ہَست اَنت ۔چوشکہ اِے بارہ ئَ ماں کتاب ” عمان ئِ بلوچ “ ئِ تاکدیم ۰۰۱ ئَ کیپٹن عبدالقادر البلوشی ماں وتی گُلگدار کہ ایشی ئِ سرحال اِنت” من ئَ چہ کسانی ئَ پائلٹ بوھگ ئِ باز شوق بوتگ “ ئِ جاگہے ئَ گُشگ ئَ انت:
جُست : واجہ تئی خیال ئَ عمان ئَ بلوچ پائلٹانی تعداد چنچو بیت؟
کیپٹن عبدالقادر البلوشی: عمان ایئر ئَ یک پائلٹ ئِ است آئی نام آدم انت۔ اے افریقہ ئَ انت دگہ یکے ئِ مند ئِ بلوچے است انت۔ یک بلوچ پائلٹ ئِ دشت ئِ انت ئُُ یکے ئِ تعلق چہ گ´وادر ئَ انت گ´وادر ئِ پائلٹ ئِ نام بابر انت ئُُ دشتئِ نام طالب انت۔ آئی ئِ تعلق چہ مند ئَ انت آئی نام انور انت۔ یک دگہ پائلٹ ئِ است آئی نام عبدالقادر انت آھمودا ئَ عمان ئِ بلوچے بنیاد ئَ آئی تعلق چہ چاہ بہار ئَ اِنت۔ بلے چہ پت ئُُ پیرک ئَ ھمودا نشتگ آ ایئر فورس ئَ کمانڈر ھم بیتگ انوّں گلف ایئر ئَ پائلٹ انت۔ یک دگہ بلوچ پائلٹ ئِ کہ آئی نام نواف اِنت آئی تعلق چہ بحرین ئَ انت۔ بنیات ئَ نزانیں آئی تعلق چہ کجا اِنت۔ اے گیشتر گلف ایئرلائن ئَ کار ئَ اَنت۔ امارات ئُُ عمان ایئر ئِ تہا ھم بلوچ پائلٹ کار ئَ اِنت۔“
ئُُ ماں ہمے گُلگِدار ئَ واجہ کیپٹن عبدالقادر البلوشی بالی گراب ئِ چِست بُوَگ ، نندگ ، رَوگ ئُُ دِگہ سک باز ہمے وڑیں سرپدی وتی وانوک ئَ دَنت۔ ئُُ ہمے بارہئَ واجہ غلام فاروق البلوشی ہم وتی گُلگِدار” پائلٹ جوڑ بوھگ ئِ حاترا احمد نواز ئَ من ئَ باز دلبڈّی دات“ ئِ سرحال ئَ جاگہے گُشگ ئَ انت :
” آھانی خیال ئَ کہ پائلٹی یک باز خطرناکیں چیزئے آسمان ئِ دیما مردم رﺅنت۔ پت ئُُ مات نہ لوٹ اِت کہ من پائلٹ جوڑ بباں۔ منی مزنیںشوق ھمیش اَت کہ اے بلوچ قوم ئِ واستا یک راھے بیت، منی گندگ ئَ لہتیں دگہ چار پنچ بلوچ کیت پائلٹانی تہا مئے بلوچانی تعدا باز بیت، من ئَ خدا ئَ وتی محنت ئِ سرا کامیا ب کرت۔
جُست : تئی پاکستان ئَ پائلٹی ئِ کورس کنگ ئِ بنیادی سوب چے ات۔؟
غلام فاروق البلوشی : اپسوز ئِ گپ ایش انت بلوچستان ئَ من ئَ یک پائلٹ ئِ ھم نہ رست کہ من چہ آئی مدتّ ئُُ کُمکّ ئِ بلوٹاں۔ تاکہ منی واستا گائیڈے جوڑ بہ بیت۔ ہرچ یک فیلڈئے واستا جُست ئُُ پد لوٹیت، تنکہ ترا کسے معلومداری بدنت۔ چوشکہ اے فیلڈ ئَ من ئَ کسے نہ رست۔ یک بلوچ ئِ نام ئَ گپت انت، حیات کہ آئی تعلق چہ پنجگور ئَ انت منی خیال ئَ بلوچستان ئِ اولی ئیں پائلٹ ھما بیت انت، ملتان فلائنگ کلب ئَ آئی ئَ فلائنگ کرتگ۔ آئی ئَ چہ پدامریکہ ئَ شتگ من دومی مردم بوتگ اوں چہ بلوچستان ئَ کہ اے کورس ئَ بکناں۔ گڑا ماںپشاور سلیکٹ کرت سال ۸۸۹۱ ئَ وھدے من اودا شُتاں۔تاں ۹۸۹۱ئِ آخر ئَ من ایڈمیشن ئِ خواری ئُُ ھمے چکراں باز سیاہ دل ئُُ پریشان بوتاں۔ یک سالے شت تنکہ من ئَ داخلہ رست۔“
بلوچ کُٹم ئِ بارہ ئَ ، ئُُ بلوچ ئُُ عرب ئِ دود ئُُ ربیدگ ئِ باہ ئَ وھدے واجہ بادینی ڈاکٹر دلمراد البلوشی ئَ جُست کنت ، تہ آ گُشیت:
”جُست : تاریخ ئِ گپ بوھگ ئَ انت، تئی خیال ئَ بلوچ سامی نسل انت یا آرین انت؟
ڈاکٹر دلمراد البلوشی : ھمے گپانی بنیاد ئَ بلوچ سامی نسل انت، بابلین سامیٹک انت بابلین عرب نہ انت۔ سمیرین ئَ عربانی نیام ئَ دوستی بوتگ بوت کنت اے غلط انت بابلین ئِ توک ئَ بلوچانی مشاورت ئِ تاریخ رسیت۔
جُست : بلوچ ئُُ عربانی دود ئُُ ربیدگ ئُُ رسم ئُُ رواج یک دومی ئَ باز نزدیکی کن انت۔ شمے خیال کئے ئَ یک دومی ئِ دود ئُُ ربیدگ زرتگ؟
ڈاکٹر دلمراد البلوشی : تاریخی حوالہ ئَ چارگ بہ بیت عرباں بلوچانی دود ئُُ ربیدگ زرتگ۔ چیا کہ بلوچ کوہن ترین قوماں چہ یکے انت۔ ماترا اے ھم گشاں سمیٹک ئَ ابید بوت کنت مئے تہا آرین ھم مکس انت۔ بلوچ مختلف حالتانی توک ئَ اتکگ ئُُ بلوچستان ئَ آباد بوتگ انت۔“
ماں ہمے گُلگِداراں میجر عبدالمجید البلوش ئَ ہم واجہ یارمحمد بادینی ئِ جُستانی پَسّہ باز شَرّیں پیمے ئَ داتگ اَنت۔حالانکہ وانگی ” عمان ئِ بلوچ “ ئِ لہتیں گُلگِدارانی وانگ ئَ پد منی ہم دل ئَ لوٹ اِت ، کہ من واجہ یارمحمد بادینی ئِ اِے بے دروریں پٹ ئُُ پولی کار ئِ بارہ ئَ وتی چمشانک ئِ گُڈّی ئَ شاباشی ئِ داد دیاں۔ بَلے اِے کار ئِ باج اَچ من واجہ میجر ئَ بُرت، کہ آگُشگ ئَ اِنت:
” جُست : واجہ ماں ماہتاک ” بلوچی زند “ ئِ ذریعہ ئَ بازیں پٹ ئُُ پولے کرتگ ئُُ کنگائیں یک کلمکارے ئِ جہت ئَ مارا بگش اِت کہ ماں وتی پٹ ئُُ پول کار ئَ شرتر چوں کرت کنیں؟
میجر عبدالمجید البلوشی : واجہ ! ماں اے گپ ئَ تئی دیما بگشاں تو تعریف بیت تو وتی جِند ئِ خرچ ئِ سرا دنیا ئِ بلوچانی پٹ ئُُ پول ئِ حاترا یک انچیں جہدے کرت۔ اے یک انچیںکارے کرتگ بزاں تو بلوچانی تاریخ زندگ کرتگ ہمے مردمانی نام زند ئِ توک ئَ چھاپ بوتگ انت، آشتگ زند ئَ پہ بہا ئَ گپتگ ، مئے دعا انت تئی وڑیںمردم مئے قوم ئِ توک ئَ ودی بہ بنت ئُُ وتی قوم ئُُ راج ئِ حاترا قربانی بدنت۔ اے بلوچ قوم ئِ حاترا مزنیں ھزمت ئِ کہ ایشر ئَ کسے ھم شموش کاربوت نہ کنت۔ منی چہ تو اے لوٹ انت کہ تو سوریا ئُُ حلب ئِ چکر ئَ بجن کہ اودا بلوچ است انت۔ آھاں بلوشی گش انت، انگت ئَ ہمودا آباد انت۔ تو برو ہمودا چکرے بجن۔ منی سنگتے کورس ئِ حاترا سوریا ئَ شتگ ات۔ آئی ئَ گشت کہ اودا بلوچ آباد انت۔ من جُست کرتگ کہ تو بلوچی زانے، آئی ئَ گشتگ کہ مئے زبان عربی انت، ڈریس عربی ات بلے شکل ئُُ دروشم ئَ بلوچے انت۔ “
”عمان ئِ بلوچ “ ئِ گُلگداری بہر ئِ تہا وہدے یار محمد بادینی بانکیں گُہار سارہ البلوشی ئَ ماں عمان ئِ دود ئُُ ربیدگ ئِ رِد ئَ دریس بِزاں پُچ ئُُ پوشاک ئِ کارمرز کنگ ئِ بارہ ئَ لہتیں جُست کنت، تہ آ گشیت :
” سارہ البلوشی : اد ئَ نیشنل ڈریس کس پر نہ کنت۔ عمان ئِ مردمانی وتی جند ئِ نیشنل ڈریس است انت۔ آ گورا نہ کن انت۔ پارٹی ئے بیت سیر ئُُ آروسے بیت۔ آ بلوچی گُد گورا کن انت ۔ من وتی بلوچی گد UK ئَ برتگ۔ اود ئَ فنکشن بوتگ انت من بلوچی گد گورا کرتگ ۔ اود ئَ من ئَ یک اٹلی ئِ دز گوارے است ات۔ آئر ئَ بلوچی گد دوست بوتگ انت من بلوچی گدلوٹائینتگ ئُُ آئر ئَ گفٹ داتگ۔
جُست : عمان ئُُ بلوچستان ئِ جنینانی تہا چہ فرق گندے؟
سارہ البلوشی : عمان ئَ گیشتر مردم مصروف انت ، اد ئَ جنین کار کن انت۔ اود ئَ بلوچ جنین گد دوچنت یا حبر کن انت۔ اد ئَ ھر کس وتی کار ئَ گوں مشغول انت کسے ئَ را گوں دومی ئَ کارنیست۔
جُست : بلوچستان چہ عمان ئَ سک پدا انت۔ وھدے شما مکران ئَ روات چہ مارات؟
سارہ البلوشی : مکران ئَ من ئَ یک چیزے ھم وش نہ بیت۔ اودے مردم Dependentانت۔ بچک انت ، کار ئِ لائق انت بلے وتی پت ئِ جیب ئَ چارایت۔ من جنکے یاں منی پت من ئَ خرچ دنت۔ منی توک ئَ Self.respectاست انت۔ شرم کیت بائد انت من وت کار بکناں ، مکران ئِ مردمانی توک ئَ اے چیز گندگ ئَ نہ بیت۔ “
بانک زلیخہ الحاج الزدجالی ئَ وہدے آئرا ماں آئی ئِ گُلگدارئَ عمان ئِ دود ئُُ ربیدگ ئِ بارہ ئَ جُست کنگ بیت ، تہ آ گُشیت:
” درستیں بلوچی کلچر رسم زندگ انت۔ ما بلوچی گد پر کنیں، سیر ئُُ بلوچی پروگرام ئِ وھداں دراھا بلوچی گد پرکنیںبلوچانی سیر گیشتر بلوچی وڑا بنت۔“
عبدالواحد مشتا ک ئَ آئی گُلگدار ” عمان ئَ بلوچ گوں دومی قوم ئُُ راج آں سانگ بندی کن اَنت“ ئِ تہا جاگہے واجہ بادینی گ´وادر ئِ بہا ئِ بارہ ءجُست کنت:
”جست : پاکستان ئَ گ´وادر چنچو زر ئِ بدل ئَ گپتگ؟
عبدالواحد مشتاق : پاکستان ئَ گ´وادر چہ عمان ئَ ھشتاد ملین ڈالر ئَ گپتگ۔“
ماں ہمے گُلگدار ئَ واجہ بادینی ئِ جُستے ئِ پَسّہ واجہ عبدالواحد مشتاق دَرّائین ایت :
” بلوچ قوم باز وفادار ئُُ دِلیریں قومے انت۔“
یارمحمد بادینی وہدے آئی ءِ اِے گپّ ئَ ہُشکنت ، تہ آئرا جُست کنت:
”جست : بلوچ پرچے وتی زبان ئَ یل دینت ئُُ دومی قومانی زبان ئَ زورانت ایشی ئِ سبب چے انت؟
عبد الواحد مشتاق : ھر یک انسانے ئِ ضمیرے است۔ آوتی ضمیر ئِ مالک انت۔ ما شما وتی ضمیر ئِ مالک ایں، من اد ئَ یک آفس ئے کار ئَ کرتگ۔ من فون ئِ منیجر بوتگ۔ باز بلوچ منی دیمانشتگ۔ ما بلوچی کرتگ آعربی کرتگ انت کہ من دوحبر بلوچی ئَ کرتگ ۔ آ بلوچی نزانت پرواہ نیست۔
جست: واجہ تو گشت بلوچ وفادار انت یک مردمے گوں وتی زبان ئَ وفا دار مہ بیت، آ چون وفا دار انت؟
عبدالواحد مشتاق : ھنچو قربانی بلوچ دگہ قومے واستا داتگ، وتی جند ئِ قوم ئِ واستانہ داتگ۔ اے عربستان ئَ بصرہ ئَ بگرتاں عمان ئَ زنجبار، افریقہ ایشان قربانی داتگ۔ ایشان جانی ئُُ مالی ھر پیمیں قربانی داتگ۔ ایشاں بلوچ وتی سرزمین ئِ واستا ھچ قربانی نہ دات۔ مروچی بلوچ وتی قوم ئُُ سر زمین ئِ حاترا قربانی ئُُ جان نثاری بداتیں ما ئُُ شما چودراں ڈیھ نہ بوتیں ۔ اے ملکانی توک ئَ ما غریبیں جائے ئَ ایشان عرب دوست انت بلوچ آھاں ئَ دوست نہ بنت۔“
اِے گَپّ ئَ من مَنّاں ،کہ َچہ منی گپاں ایدگہ ندکاران ( کہ من سرشون داتگ اَنت ) گپ گیشتر انت۔ چیاکہ ماں اِے چمشانک ئَ منی مول ئُُ مراد ایش انت ، کہ اگاں واجہ یارمحمد بادینی ئِ وانگی ” عمان ئِ بلوچ “ کَسّے ئَ را دست مہ کپ ایت ، تہ آ چندے سرپدی چہ منی چمشانک ئِ سرشون داتگیناں دَربُرت کنت۔ اِے درگت ئَ واجہ یارمحمد بادینی ئِ ماں مسکت ئَ روگ ئُُ گوں اود ئِ زبان ئُُ لبزانک دوستیں مردماں گِند ئُُ نند کَنگ ، راجی بے مَٹّیں سرپدی دیم ئَ آرگ اَلّم ئَ داد کرزاَنت ۔
( دِلگوش : من جہد کرتگ، کہ ماں چمشانک ئَ وانگی ” عمان ئِ بلوچ “ ئِ سیاہگانی لکوڑ سُرینگ مہ بنت۔)