بنیادی صفحہ / چمشانک / د ید و …..مہر اللہ مہر

د ید و …..مہر اللہ مہر

ماں ماہتاک ”بلوچی زند“ نوشکے ءِ جولائی 2011 ؁ئئِ آزمانکانی تہ ءَ من ءَ یار جان بادینی ءِ آزمانک ”دیدو“ سَک باز دوست بُوت کہ اِے آزمانک ءِ آسر وتی وانوک ءَ را باز شَرّیں دَرونتے دَنت۔ بلے آزمانک ءِ درنیامجین ءِ لہتیں ناسرجمیں گَپّاں آزمانک ءَ را نیم بندگ کُرتگ۔ من نہ زاناں ہمے ناسرجمیں گَپّ چہ گالجوڑ (Composere)ءِ نادِلگوشی ءَ بوتگ اَنت یانکہ چہ آزمانکار ءِ ماں نادِلگوشی ءُْ نابلدی ءَ آزمانک ءِ آزمانکی لوٹ ءُْ گَرز پیلو کُرت نہ کُرتگ اَنت۔
بلے بزاں من ءَ آزمانک ”دیدو“ ءِ بُن حیال باز دوست بُوت کہ دِل ءَ لوٹ ات ایشی ءِ ہمے نیم بندگ ءُْ ناسرجمیں گَپّانی بارہ ءَ دو دانک نبشتہ بِہ کن آں۔
اگاں نہ آزمانک”دیدو“ ءِ کَمّی ءُْ گیشیانی بارہ ءَ پہ من نبشتہ کَنَگ ءِ ہِچ گَپّے پَشت نہ کپتگ ات بلے من ءَ آزمانک ”دیدو“ ءِ نیم بندگیں گَپّاں پَدرد کُرت کہ ماں چوشیں جاہ ءَ ولی عابدؔ وتی پِربندے ءِ تہ ءَ گُش ایت:
؎اِے بے دَردیں دُنیا ءَ ہرکَس پہ وت
نہ بیت کَسّے کَسّی پہ دَرد ءَ پَدرد
چیاکہ آزمانکار ءَ آزمانک ءِ بندات ءَ محمد ءِ تنگدستی ءِ جاورالاناں شَرّیں پیمے ءَ پَدّر کُرتگ انت۔ محمد ءَ ڈگارانی بازیں پیشی پاشی ءَ وار ءُْ لنگڑ کُرت۔بلے اِد ءَ اِے گَپّ ہم سَہرا کَنَگ نہ بوتگ کہ محمد گوں کَے پیشی پاشی کَنَگ ءَ انت ءُْ پرچا…….؟؟
آئی (محمد) ءِ زہگ دیدو ءَ جہد ءُْ کوشست کُرت دُکانداری بندات کُرت۔ برے سبزی بہا کُرت برے گُد ءُْ پُچ ایران ءَ بُرت بہا کُرت کہ آماں وتی کار ءُْ روزگار ءَ اَزگار جوڑ بوت۔ بلے اِے گَپّ منی پہم ءَ آیگ ءَ نہ اِنت کہ آئی (محمد) ءِ ناکوزہگ رحموؔءَ گڑا پرچا محمد ءَ واری ءُْ تنگدستی ءِ شِگان جَت ءُْ محمد ءِ لوٹکی ءَ را گُشت یئِ بہ رَو محمدءَ بِہ گُش:
”انبار ءَ جوہان کپتگ انت آشاہو ءِ انت۔ بزاں رحمو ءَ محمد ءَ را غریبی ءِ شِگان جت کہ انبار ءِ جوہان دیگر ے انت کہ محمد ءَ ورگ ءَ نان نیست آوتی بچ ءِ آروس ءَ مہلوک ءَ چوں نان دنت۔“
باید اِنت آزمامکار ءَ اِے گَپّ ماں وتی آزمانک ءَ بِہ نویستین ات ءُْ پَدّر بِہ کُرتین ات کہ محمد چہ اَزگاری ءَ اِے وڑاِے وڑ ءَ تنگدست ءُْ نیزگار بُوت۔
چیاکہ محمد چہ آزمانک ءِ بندات ءَ نیزگار اِنت، آزمانک کَمّو دیم ءَ رَوت تہ محمد ءِ زہگ دیدوؔ ءِ چہ بازیں جُہد ءُْ کوشستاں محمد اَزگار بیت۔محمدحج ءَ رَؤت،واتری ءَ کَیت، وتی زہگ دیدو ءِ آروس ءِ چِن ءُْ لانچ ءَ کنت۔ بلے انگت آئی (محمد) ءِ ناکو زہگ رحمو آئرا نیستی ءُْ تنگدستی ءِ شِگان ءَ جنت، نہ زاناں آزمانکار ءَ را آزمانک ءَ اِد ءَ پرچا نہ مَرّینتَگ؟
چیاکہ آزمانک ءِ لوٹ ءُْ گَرز اَنچوش نازرک اَنت کہ ایشی ءِ یک گالرِدے ءِ ناسرجم بُوَگ تیوگیں آزمانک ءَ بے تام کنت ءُْ ماں آزمانک ءَ تانکہ وانوک ءَ را تچکیں درونت ءُْ سرپَدی یے مہ رَس ایت۔گڑا وانوک ہما آزمانک ءُْ کِسّہ ءِ وانگ ءَ پہ وت ءَ وہدزوالی یے سرپدبیت،ءُْ بَژنیگ ہم بیت۔
بلے من وتی گَپّ ءِ گُڈّی ءَ یکرندے انگت ہم اِے گَپّ ءَ گُش آں کہ آمانکار ءَ آزمانک ”دیدو“ ءِ آسر شَرّیں پیمے ءَ دیم ءَ آؤرتگ۔
پمیشکا من گُش آں منی اِے دوئیں دانکانی نبشتہ کَنَگ ءِ مول ءُْ مراد واجہ یار جان بادینی ءِ آزمانک ”دیدو“ ءِ ایر جَنَگ نہ اِنت بلکیناں من اِے گُشگ لوٹ آں کہ آزمانک ءِ ہمے ناسرجمیں گَپّانی پَدّر نہ بُوَگ ءِ سبب ءَ من سکّ دل پَدرد ءُْ بژنیگ بوتاں۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*