ماتی زبان ءِ میان اوستمانی جھانی روچ ءِ ردءَ اسلام آباد ءِ دورچی میلہ ءُُ بلوچی زبان ءِ جھگیری

زاہدہ رئیس راجی ؔ

کساس چار سال بیت اِنت کہ چَہ انڈس فورم ءِ نیمگءَ ماتی زبان ءِ میان اوستمانی جھانی روچ ءِ ردءَ دوروچی میلہ برجم دارگ ءِ دود بنگیج بیتگ۔
سال 2016 ءَ برات پناہ بلوچ ءِ وسیلہ ءَ گوں بانک ڈاکٹر عظمی انجم ءَ رَھوت بوت آئی ءَ بندات ءَ پَہ شئیری دیوان ءَ منی نام ھوار کُتگ اَت رند ءَ کہ منی پروفیشنل پروفائل (کارگسی زانت دپتر) دیست ءِے گُڑا پہ ’’ماتی زبان ءِ دیم روئی ءَ انفارمیشن ٹیکنالوجی ءِ کرد‘‘ ءِ سیشن یا برنامہ ءَ من ءَ پہ گوشتانک دیگ ءَ ھوارءِے کُت۔
اے میلہ ءِ تہ ءَ چونائی ءَ چَہ من ءَ ابید اے آر داد، رحیم مہر، ستّارسنی، ڈاکٹر زینت ثنا،عبدالواحد بندیگ، عبدالواحد بُزدار، پناہ بلوچ ءُُ لھتے دگہ مردم ھم پہ بلوچستان ءُُ بلوچی ءِ جھگیری کنگ ءَ گون اَت اَنت۔ ءُُ ساز ءُُ زیمر ءِ دیوان ءَ نوشین ءُُ افشین ءِ شیرکنیں توار ھم گون اَت انت۔
گں وتی بُگوشاں باوستی رنگ ءَ گوشتانکی دیوان ءَ بھر زورگ ءِ اے منی زند ءِ اولی تجربگ اَت رد نہ باں۔ چونائی ءَ یک دو دگہ ھم نامداریں بلوچ کواسانی نام اِے سال

ءِ ایجنڈا ءِ تہ ءَ ھوار اَت اَنت بلے دیوان ءَ آھاں وَت ءَ رسینت نہ کُتگ اَت۔
سال 2017 ءَ یک برے پدءَ چَہ انڈس فورم ءِ نیمگ ءَ آھانی کارگُشادیں بانک نصرت زہرہ ءَ رَھوت کُت ءُُ نوں پہ ھما سرھال ءَ من ءَ گوشتانک دیگی اَت آئی ءِ بُن گپ ایش ات کہ ’’سوشل میڈیا ءَ ماتی زبان (بلوچی) ءِ دیمروئی ءَ چے کرد پیش داشتگ‘‘۔ اے دگہ گپّے کہ دیوان ءِ روچ ءَ مئے سیشن ءِ مُدیریا موڈیریٹر ءَ اے سرھال گوں مئے جند ءِ کار ءُُ کرد ءَ ھمگرنچ کنائینت۔
اے میلہ ءَ ھم چَہ من ءَ ابید ڈاکٹر واحد بزدار، طارق رحیم، عابد میر، ھیبتان عمر، ضیا کبدانی، پناہ بلوچ پہ گوشتانکی دیواناں گون اَت انت ءُُ پَہ شئیری دیوان ءَ من بزاں زاھدہ رئیسی، بانک ڈاکٹر زینت ثنا ءُُ بانک ڈاکٹر عنبرین مینگل گون اَت ایں کہ مارا وتی پربندانی اُردو رجانک ھم وانگی اَت۔
پَہ من ءَ اِے گوشتانکی ءُُ باوستی دیوان یک مزنیں تجربہ یے اَت کہ اے دیوان ءَ واجہ امر فیاض ءِ رنگیں آئی ٹی ءِ کواس ھم گون اَت۔ آ برنامہ ءِ توک ءَ ءُُ چَہ برنامہ ءَ ڈن ھم اِے پڑءَ کارکنوکانی رھشونی کنگ ءَ اَت۔ چَہ اے دیوانءَ من ءَ اے سرپدی اوں رس ات کہ مئے کش گورءِ ھند ءُُ دمگانی ماتی زباناں چے پیم ءَ دیمروئی کُتگ ھاس سندھی زبان چے پیم ءَ گوگل ءِ ردءَ ھوار بیتگ۔ چَہ اے دیوان ءَ واتر کنگ ءَ رند ’’یونی کوڈ، بلوچی زبان ءِ دیمروئی ءِ کلیت‘‘ سرنام ءِ سرءَ من یک ٹیکنیکل نبشتانکے نبشتہ کُت ءُ تاک ءُ ماھتاکاں شنگ کُت۔
سال 2018 ءِ فروری ءِ ماہ ءَ چوشکہ من اِے میلہ ءَ گون نہ اتاں پمشکا پھکا ایکیم اتاں کہ بلکیں دیمتر ءَ اوں من ھوار مہ باں بلے چیزے ماہ ءَ رند واجہ نیاز احمد ءَ رَھوت کُت کہ من وتی بلوچی پربندانی اردو رجانک ءَ آئی ءَ دیم بہ دَیاں کہ آ کتابے ءِ تہ ءَ ھوار کنگ ءَ دلمانگ اِنت۔
پدءَ ھمے سال ءِ گُڈی ماھاں میان اوستمانی اردو کانفرنس ءَ کہ چَہ جرمنی ءَ اتکگیں اردو ءِ کواسیں بانک بُشری رحمان کہ وومن رائیٹرز فورم ءِ کارمستر اِنت، آئی ءَ گوں نند ءُُ نیادے ءَ واجہ نیاز احمد ءَ ھم ڈیک وارت، آئیءَ من ءَ سندھی ءِ نامداریں گدارنویس ءِ نامداریں گدارے ءِ اردو رجانک سوگات کُت ءُُ چَہ ھمائی ءِ وسیلہ ءَ مالوم بیت کہ ماں براھوی زبان ءَ جنین گدارنویسے ءِ اولی گدارے دیم ءَ اتکگ گُڑا من گوشت کہ بلوچی ءَ ھم اے کار بیتگ۔
بلکیں کسے ءَ چَہ من ءَ پیشتر ھم کُتگ بلے منی جند ءِ جولائی 2018 ءَ چَہ رئیسی چاپ ءُُ شنگ جاہ ءِ نیمگ ءَ چاپ بیتگ۔ آئیءَ منی گدارُک ءِ پلاٹ ءُ خلاصہ لوٹ اِت۔ ایشانی وانگ ءَ پد من ءَ گوشت ءِے کہ پہ آئی ءَ پولکاری بہ کناں کہ بلوچی زبان ءِ اولی جنین گدار نویس کے اِنت۔
پہ اِے جُست ءَ من باسک ایف بی گروپ ءَ ابید، ڈاکٹرعبدالصّبور(تربت مزن شاہ دربرجاہ)، ڈاکٹر واحد بُزدار، مجاھد بلوچ (بلوچستان مزن شاہ دربرجاہ)، چندن ساچ، ھیبتان عمر (بلوچی اکیڈمی)، شرپ شاد (کراچی مزن شاہ دربرجاہ)، نزر دوست ءُُ دگہ بازینے ءَ ھم تچک ءَ جُست پُرس کُت ءُُ پسّو ھمے رس اِت کہ بید ءِ چَہ ترا دگہ کسی گدار جنینانی تہ ءَ مئے دیم ءَ نہ گوستگ یا نہ اتکگ۔
من پدءَ ھم واجہ نیاز احمد ءَ ھمے گوشت کہ بلکیں انچیں جنین گدارنویسے ھم بہ بیت کہ آئی ءِ باروا کسے مہ زانت بلے اے ساھت ءَ کواس ءُُ پولکار ءُُ زانتکارانی پسّہ ھرچے انت شُمئے دیم ءَ اِنت۔
آئی ءَ دراھینت کہ ’’بلوچی ءَ جنینانی تہ ءَ اولی گدار نویس ءِ پولکاری تھنا پہ وتی ریکارڈ ءَ ایرکنگ ءَ لوٹ اِتگ اَت دگہ تئی کتاب پَہ مئے یک سیشن یے ءَ چَہ پیسرءَ گیچین بیتگ۔‘‘۔
سال 2019 ءِ جنوری ءَ واجہ نیاز احمد ءَ گوانکو کُت کہ باریں کراچی ءَ ئے یا شال ءَ کہ ترا میلہ ءَ بھر زورگی ایں۔ من پسّو دات کہ اِے وھدءَ شُمارا زبان دات نہ کناں کہ ھمے روچاں مزن شاہ دربرجاہ ءِ چکاسے (ایم فل اینٹرنس ٹیسٹ) ھم دیم ءَ اِنت۔ اگں دوئیناں ڈیک نہ وارت بھر زوراں نتہ شُمارا ایکیم کناں۔ میلہ ءِ رمز کہ نزیک ءَ اتک آئی ءَ دوبر رَھوت کُت ءُُ چوشکہ منی شاہ دربرجاہ ءِ چکاس ءِ شیڈیول انگت گار اَت من ھو کُت۔
دوروچ ءَ پد میلہ ءِ ایجنڈا دیم دیگ بیت۔ منی نام ءَ ابید مریم سلیمان، عابد میر ءُُ عبداللہ شوھاز ءِ نام بلوچی ءِ جھگیری ءَ گون اَت اَنت، گندگ ءَ گوں وشّی بوت۔ پہ یک دوسیشنزاں منی دل ءَ اتک کہ مارا مردم وَ است پرچا اے سیشنزاں بلوچی ءِ جاہ ھالیک اِنت۔
دوسے روچ ءَ رند دومی ایجنڈا کہ دیم دیگ بیت آئی ءِ توک ءَ ڈاکٹر بدل خان ءُُ شاہ محمد مری ءِ نام ھم ھوار اَت اَنت ۔ھمے درگت ءَ سوشل میڈیا ءَ نگدی توارے چست بیت کہ باریں اِے میلہ ءِ توک ءَ بلوچستان ءِ جھگیری ءَ کے کنگ ءَ اِنت کہ سینئرز ءِ مچُی ءَ جونیئیرز ھوار کنگ بیتگ اَنت۔ لھتے سیشنز ءِ تہ ءَ بلوچی ءِ جھگیری ءِ ردءَ من ھم لھتے کواس ءُُ زانتکارانی نام واجہ احمد نیاز ءَ دیم دات اَنت کہ باید اے لوٹگ بہ بنت۔
گُڑا آئی ءَ اے گپ تچک کُت دات کہ آ مالی جیڑھانی دیمپان اَنت پمشکا باز مردم توارکُت نہ کن اَنت ءُُ ھما مردمانی نام تو (زاھدہ رئیسی ءَ) داتگ اَنت آ درست انڈس فورم ءِ جتا جتائیں دیواناں لوٹائنگ بیتگ اَنت۔ ءُُ اے رندی انچیں نام ھم ھور کنگ بیتگ اَنت کہ ایشاں پیش ءَ ھجبر بھر نہ زُرتگ چوشکہ شاہ محمد مری اِنت۔
ڈاکٹر بدل خان کہ دوبر بھر زورگ ءَ اِنت آ ھم چَہ وتی جندءِ ھرچ درچ ءَ پیداک اِنت (رند ءَ دزگٹی ءِ سَوَب ءَ آئی ءَ بھر نہ زُرت)۔ ھمے چَہ تئی داتگیں ناماں یکے ءَ اول سرءَ مارا زبان داتگ کہ بَھر زُورایت ما بالی گراب ءِ رویاءِ بلیت گپت ءُُ پَہ آئی ءِ نندگ ءُُ ورگ ءِ ھوٹل ءِ ھم انتظام کُتگ بلے گوشئے آ مرد ءِ دل ءَ مئے بستار ھچ نیست اَت کہ مارا ھال ءِے ھم نہ دات کہ اتک نہ کنت ھمے رنگ ءَ دگہ یک بلوچ کواسے ءَ ھم چَہ میلہ (دیوان) ءَ یک روچے پیش ھال داتگ کہ آ بَھر زُرت نہ کنت۔ اے دوئیں کیسانی توک ءَ مارا مالی تاوان ھم سگگ کپتگ پمشکا نوں چَہ دیر دیریں جاھاں مردم توار کنگ ءَ ما سک باز ھیالداری کنگ ءَ ایں۔
اے گلگ تران ءَ رند وھدے سیمی ءُُ آھری ایجنڈا مئے دیم اتک نوں پناہ بلوچ، ضیا کُبدانی ءُُ طاہرہ بلوچ ءِ نام ھم ھوار اَت اَنت کہ چریشی ءَ مئے دل کمے گیشتر ڈڈ بیت۔
ھمے وھد ءَ مئے دیم ءَ میلہ ءِ بھرزوروکانی گونڈیں پروفائل یے ھم سک زیبداریں دروشم ءَ دیم ءَ یارگ بیت چریشی ءَ مارا وتی سیشنزاں ھواریں مردمانی باروا اوں چیزے سرپدی رس ات ءُُ پدءَ پَہ ھمک سرھال ءِ سیشن ءَ واٹس ایپ ءِ گروپ ھم چَہ انڈس فورم ءِ مینجمنٹ ءِ نیمگ ءَ جوڑ کنگ بیت چریشی ءَ یکے وَ سیشن ءِ مردمانی پجّار گوں یک دومی ءَ تچک ءَ بیت ءُُ لھتے گپ ھم گیش اِت اَنت کہ اودءَ باوست ءِ کرائیٹیریا چے بیت اِنت اے دگہ گپّے کہ منی سیشن ءِ موڈیریٹر یا مُدیر ءَ وتی ھما گپّانی جُست ءِ واٹس ایپ ءِ گروپ ءَ نہ کنگ ءِ دلجم کنائینتگ اَت اَنت آ پدءَ ھم کُت اَنت ءُُ باوستی دیوان ءِ پیٹرن ءُُ تب پھک ءَ مٹینت اَنت بلے چوشکہ اے رنگیں میلہ آنی توک ءَ چَہ بھرزورکاں ابید دیم ءَ نندوکیں مردم ھم چَہ ماتی زبان ءِ جھگیراں بازیں جُست پُرسے کن اَنت پمشکا چریشی ءَ وانگ ءُُ زانگ ءُُ پولکاری یے مزنیں درے پچ بیت اِنت۔
فروری 2019 ءِ 16 ءُُ 17 رمزاں برجم داشتگیں اے میلہ ئیگی سوشل میڈیا ءَ اے جُست ھم گردگ ءَ اَت کہ بلوچی ءِ جھگیری وَ اودءَ انچو نہ بیتگ اَنت کہ بوھگ زلوری اَت گُڑا بلوچستان ءِ توار چون ءُُ چتو اسلام آباد ءَ بُرزتر اِشکُنگ بیگ ءَ اَت، منی پسّو ایش اَت:
’’بلوچستان ءِ توار چارکُنڈ ءَ پمشکا گردگ ءَ اَت کہ اولی روچ ءَ چونائی ءَ واجہ ڈاکٹر شاہ محمد مری ءَ میلہ بُنگیجی دیوان (افتتاحی تقریب) ءَ چَہ درستاں آھر ءَ تران کُتگ اَت بلے وتی مقالہ ءِ اولی گالریچ ءَ بہ گرداں گڈی گال ءَ انچوش سھریگ کُتگ اَت کہ کہ یک نیمگے ءَ آئی ءِ تہ ءَ میلہ ءِ مول ءُُ مُراد گون ات اَنت ءُُ دومی نیمگ ءَ بلوچستان ءِ سرجمیں تک ءُُ پھنات ءِ پجارے ھ۔م کہ نہ اُوشتوکیں چاپانی توارءَ مئے سرچَہ پھر ءَ بُرز بیتگ اَت۔
ڈاکٹر بدل خان ءِ داتگیں زبان ءِ ردءَ وھد ءِ سرءَ میلہ ءَ نہ رسگ ءِ سَوب ءَ پناہ بلوچ ءَ بلوچی ءُُ براھوی ھردوئیں زبانانی جھگیری ءِ زمہ واری دیگ بیتگ اَت ءُُ آئی ءَ ھما رنگ ءَ پیلو کُتگ اَت کہ اے دگہ بھرزورک ھم اڑ اِت اَنت ء دیوان ءَ باج ءِے بُرت۔
عابد میر ءَ ’’مئے ھند ءَ چے نبشتہ کنگ نہ بیگ ءَ اِنت‘‘ ءِ سیشن ءَ چیریں سرھالانی سرءَ ھما تچکیں باوست پَہ بلوچستان ءِ جھگیری ءَ کُت کہ اے دگہ چَہ وت ءَ سینئیر ءُُ نامداریں جھگیراں کہ بازینے آھانی دیم ءَ داشت نہ کنت وت ءَ منّائینتگ۔
مریم سلیمان کہ یک کسان سالیں ندکارے ءُُ بلوچ جنیں آدمانی تہ ءَ اولی سپر نامہ نویسوکے ءِ جھت ءَ گون اَت۔ وھدے مُلک ءِ بازیں نامداریں سینئیر کواسانی میان ءَ نشتگیں اے گونڈو ءَ وتی کتاب ءِ اولی تاک ءِ رجانک زگریں اُردو ءَ وَنت سرجمیں ہال ءَ ابید اے گوشتانک ءَ رسانکدرانی سرءَ لائییو چاروکاں ھم دلبڈی دات۔
ھمے دیوان ءَ ضیا کُبدانی کہ پی ایچ ڈی اسکالربوھگ ءَ ابید علامہ اقبال اوپن یونیورسٹی ءَ بلوچی ءُُ براھوی ءِ اُستاد اِنت ھم، آئی ءَ چَہ براھوی زبان ءَ گیچین پربند اردو ءَ رجانک کُتگ ءُُ ونتگ ءُُ سرجمیں دیوان وتی شیدائی کُتگ۔
سُبارگ ءَ رند منی گدارُک ءِ سیشن اَت کہ یکے وَ موڈیریٹر(مُدیر) ءِ ابرمی مللی ءِ سَوب ءَ ءُُ دومی چَہ واٹس ایپ گروپ ءَ داتگیں رھبند ءَ پَھک ءَ دَر رَوگ ءِ سَوَب ءَ لھتے جَھگیر سک ناوش ءُُ مُلور اَت اَنت بلے پدءَ ھم باوستی ءُُ جُست پُرسی دوادار ءِ اے مراگش سرجمی ءَ شراَت۔ چوشکہ وت گلایگ ءِ دپ پیماز ءِ بوءَ کنت پمشکا من وتی جھگیری ءِ باروا ھچ گپ نہ جناں بلے ھو کسے چیزے گوشگ لوٹیت یوٹیوب ءُُ ایف بی ءَ ویڈیو ریکارڈنگ ایر انت الم ءَ بہ چاریت ءُُ نوں وتی چمشانک ءَ بہ دَنت۔
منی سیشن ءِ ھلاسی ءَ رند من ءَ درستاں زُور کُت کہ وتی کتاب ءِ اُردو رجانک ءَ وت بہ کناں ءُُ زوت دیم ءَ بیاراں۔ ھمے یکیں وھد ءَ دومی ہال ءَ طاہرہ بلوچ گوں اے دگہ ماتی زبانانی نامداریں ٹی وی ازمکارانی (بانک ثمینہ احمد ءُُ بانک سکینہ سمّوں ءِ) ھمرائی ءَ نشتگ بلوچستان ءِ ٹی وی رسانکدرءِ جھگیری ءَ کنگ ءَ اَت ءُُ دیوان ءَ رند مردمانی چمشانک آئی ءِ باروا ھم سک توسیپی ئیگ اَت۔
منی چم نزر ءَ شئیری دیوان ءَ عبداللہ شوھاز ءَ وتی زمہ واری باریں شموشتگ اَت یا درگوز کُتگ اَت کہ نے پربندءَ آ توانے مان اَت کہ دری جاھاں بلوچی ءِ جھگیری ءَ کُت بہ کنت نے کہ آئی ءِ الکاپیں رجانکے گون اَت (چونائی ءَ واجہ نیاز احمد ءَ چَہ اولی روچ ءَ گوں ھمک بھر زورک ءَ اِے گپ دوسے رند ءَ گوشتگ اَت کہ پَہ وتی سیشن ءَ بھر زورگ ءَ وتی گیچین تاک یا پربند ءَ اگں وت ماں اردو ءَ ترینت نہ کنت دگہ زانتکارے ءَ بہ پرمائیت)۔ وھدے اے گلگ من گوں مینجمنٹ ءِ مردم یے ءَ کُت آئی ءَ ھمے پسودات کہ اے دیوان ءِ رَھبند ایش انت کہ ادءَ تھنا ھما شائر بھر زُرت کن اَنت کہ آھانی شئیری وانگی ھمے زوتاں چاپ بیتگ۔ اگں عبداللہ شوھاز ءِ مراگش درگوز کنگ بہ بیت دگہ بلوچی ءُُ بلوچستان ءِ سرجمیں جھگیری اے میلہ ءِ تہ ءَ جوان اَت ءُُ ھمک بھر زوروک ءَ وتی زمہ واری پیلو کنگ ءِ الکاپیں جُھدے کُتگ اَت۔
پدءَ اے گلگ کہ سرجمیں میلہ ءَ سندھ ءُُ سندھی ءِ جھگیری گیشتر گندگ بیتگ ات ایشی ءِ باروا انڈس فورم ءِ سروک ءَ وتی افتتاحی تقریب (بنگیجی مراگش) ءَ وت اے گپ مردمانی دیم ءَ پچ کُتگ اَت کہ بید ءِ چَہ سندھ سرکار ءُُ سندھ ثقافتی وزیر ءِ مالی کمک ءِ دگہ یک ھم صوبہ یا اوستان یے ءَ پَہ وتی ماتی زبانانی کُمک ءَ مالی کمک دیم ءَ نیاورتگ اَنت پمشکا چَہ سندھ ءِ نیمگ ءَ رس اتگیں مالی کمک ءَ ما گیشترمردم ھمایانی لوٹائنتگ ایں بلے چوش ھم نہ انت کہ ما دگہ صوبہ (اوستان) پھک ءَ درگوز کُتگ ایں۔ بلکیں ھمنچو مئے وس ءُُ واک ءَ اَست اَت ما اے دگہ زباناں ھم جھگیری دیگ ءِ جُھد کُتگ ایں۔ ‘‘
چَہ 15 فروری 2019 ءَ بہ گرداں 18 فروری 2019 ءِ سپر ءَ ءُُ 16 ءُُ 17 فروری ءِ میلہ ءَ من ءَ ھما چیز ءَ سک باز وتی نیمگءَ دلگوش گور کنائینتگ ات آ ایش اَت کہ انڈس فورم ءِ اے میلہ ءِ سوبین کنگ ءَ اگں یک نیمگے ءَ آھانی وتی جند ءِ مردمانی شپ روچی مھنت گون بیتگ اَت دومی نیمگ ءَ آھانی ھمراھی ءَ پہ مپتی کمکی کاراں دست مان دیوکاں (وولینٹئرز) ھم وتی زمہ واری پیلو کُتگ اَت۔
چَہ 2016 ءَ بہ گرداں 2019 ءَ منی چم دیست ایش انت کہ یکے وَ اے درست وت ماں وت ءَ سک تپاک اَنت کہ یکے ءِ گپ چَہ دومی ءَ جتا نہ اَت۔ دومی ایشانی مستر بہ بنت چوشکہ نیاز احمد (انڈس فورم ءِ کارمستر ءُُ سروک)، اشفاق چاندیو، نصرت زہرہ، ڈاکٹر عظمی انجم ءُُ دگہ بازینے یا کستریں ورنا بہ بنت کہ والینٹری کمک کنوکانی ردءَ ھوار اَت انت ایشاں ھمک مھمانے ءِ ھیال گور اَت داں آھاں دمانے ءَ ھم ھچ پیمیں پریشانی یے چیزے مہ بیت۔ ادءَ اے گپّ ءِ جنگ ءِ مول ءُُ مراد ایش انت منی جندءَ بازیں سیمناراں بھر زُرتگ بلے اے گپ تچک ءَ ماراِتگ کہ سیمنارانی کارمستر ءُُ سروک مردماں چَہ دیردیریں جاھاں توار وَ کن اَنت بلے رند ءَ پَھک ءَ شموش اَنت کہ آھانی رویا ءُُ ورگ وپسگ ءِ انتظام ءَ ابید ایشاں مراگش ءِ بُن گپّ ءُُ وھد ءُُ پاس ءِ باروا الکاپیں سرپدی بہ دَینت چریشی ءَ بازینے دلپروش بیت ءُُ وتی پاداں چَہ دیواناں بَھر زورگ ءَ کش ایت۔
سال 2016 ءَ انڈس فورم ءِ میلہ سک مزن اَت ءُُ مھلوک باز اَت اَنت۔ میلہ ءِ گُڈی روچ ءُُ گُڈی مراگش ءَ آ وھد ءِ وزیرِ اطلاعات سینیٹر پرویز رشید ھم گون اَت۔ 2017 ءَ پنجاب ءِ یک ھم وزیرے گون نہ ات بلے سندھ ءِ ربیدگی وزیر گون اَت ءُُ دیوان ءِ براھداری ءُُ مزنی ھم پیسریگیں رنگ ءَ اَت بلے 2019 ءَ میلہ ءِ مراگشانی کساس (سیشنز ءِ ردءَ) چَہ پیسرءَ نیم ءَ رس اِتگ اَت ءُُ مھلوک ھم چَہ پیسریگ ءَ کمتر اَت اَنت کہ ھمے روچاں چَہ اَرب ملکے ءَ اتکگیں شاھزادگے ھم اسلام آباد ءَ گردگ ءَ ات ءُُ اے مُلک ءِ سروکاں وتی کھنیں دود برجم داشتگ ات پمشکا رویا ءِ بازیں راھے بند اَت اَنت ءُُ چَہ بدل راھانی شُلوکی ءِ تُرس ءَ مردم ھمے جُھدءَ اَت انت کہ چَہ لوگ ءَ درمہ کپ اَنت۔ بلے پدءَ ھم نے انڈس فورم ءِ ٹیم ءِ ھمّت ءِ تہ ءَ نزوری یے گندگ بیت ءُُ نے کہ ایشانی کمک کاریں ورناھانی ھاٹیگ ءَ۔ ءُُ ھمے چیز ایشانی سوبمندی ءِ نشانی اِنت۔