انڈس کلچر فورم ءِ نیمگا ماتی زبانانی دیوان…..امیر حمزہ نمائندہ بلوچی زند اسلام آباد

انڈس کلچر فورم ءِ نیمگا ماتی زبانانی دیوان پاکستان نیشنل آرٹس کونسل ءِ مدت ءُُ کمک ءَ اسلام آباد ءَ پی این سی اے ءِ ہال ءَ برجم دارگ بوت۔ اے دیوان ءَ ھفتاد ءَ زیات زبانانی نمائندگان مزنیں تعدادے ءَ بہر زُرت۔
بلوچستان ءَ چہ بلوچی، براھوئی، پشتوءُُ ہزارگی زبان ءِ کلمکار ءُُ شاعراں ہم اے دیوان ءَ بہر زورگ ءِ دعوت دیگ بوتگ اَت۔ بلوچی زبان ءِ شاعر ءُُ کلمکارانی تہا ڈاکٹر مالک بلوچ، یار جان بادینی، صادق رھچار، عندلیب گچکی، ڈاکٹر قادر ھوار اتنت۔ دیوان ءِ بنگیجی مراگاہ پی این سی اے آڈیٹوریم حال ءَ برجم دارگ بوت۔ اے دیوان ءِ خاصیں مہمان ڈاکٹر مالک بلوچ اَت۔ وھدیکہ گشتانک دیوکانی تہا بشری صادق، سورج دامن، ثناہ نعمت، اسفند یار خٹک ءُُ علینہ چودھری ھوار اتنت۔
دیوان ءِ دیما تران کنان ءَ پی این سی اے ءِ سروک ڈاکٹر فوزیہ سعید ءَ درا مہماناں اسلام آباد آیگ ءِ سرا وش آت کرت ءُُ گشت کہ اے انڈس کلچر فورم ءُُ پی این سی اے ءِ حاترا مزنیں گپے کہ آ اے مزنیں دیوان ءِ مہمانداری ءَ کنگ ءَ ات انڈس کلچر فورم ءِ سروک نیاز ندیم ءَ انڈس کلچر فورم ءِ پنچ سال ءِ کار ءُُ کردے ءِ سرا چمشانک دور دات۔ کہ اے ملک ءِ یکیں ادارہ انت کہ آ درا زبانانی شاعر کلمکار کواساں لوٹاھینیتءُُ آ ماتی زبانانی دیمروئی ءِ باروا بحث ءُُ تران کں انت۔ چریشی نہ ایوکہ ماتی زبان زندگ دارگ بوھگا انت بلکں ہر کلمکار ءُُ کواس وتی زبان ءِ دیمروئی ءِ حاترا زیات جہد کنت۔
دیوان ءِ حاصیں مہمان ڈاکٹر مالک بلوچ ءَ انڈس کلچر فورم ءُُ پی این سی اے شکر ءُُ منت گپت۔ کہ آھان انکس مزنیں دیوانے اسلام آباد ءَ برجم داشتگ۔ ماتی زبان مئے قومی زبان انت ایشانی زندگ دارگ مئے درستانی فرض انت۔ بدقسمتی ءَ ملک ءِ تہا ماتی زبان ءَ قومی زبان گشگءَ چہ یک مزنیں ترس لرزے است۔ ہر قوم ءُُ راج ءَ گوں وتی ماتی زبان ءَ حب ءُُ واھگ است۔ باھد انت سرکار آھانی زبان دود ءُُ ربیدگ ءَ دلبڈی بہ دنت ڈاکٹر مالک بلوچ ءَ بنداتی دیوان ءُُ مراگاہ ءَ بندات کناں ءُُ پیتہ کاٹ کرت ءُُ دیوان بنگیج کرت۔
ھفتگ ءِ صوب ءِ دہ بج ءَ پدا سیشن ءُُ مقالہ بندات کنگ بوت انت۔
پی این سی اے کانفرنس روم ءِ تہا دیوان بندات کنگ بوت۔ کہ اے دیوان ءِ مہماندار ارشد وحید اَت اے دیوان ءَ پشتو، اُردو، سندھی، پنجابی ءُُ براھوئی زبان ءِ کتابانی دیمدارائی کنگ بوت۔ براھوئی زبان ءِ کتاب توبے نا سفر اکرم ساجد ءَ نبشتہ کرتگ۔
یکیں وھد ءَ پی این سی اے لیکچر روم ءَ کتابانی دیمرئی ءُُ دومی دیوان بندات کنگ بوت انت۔ اے دیوان ءِ مہماندار امجد نذیر ات۔ اے دیوان ءَ ھر چاریں صوبائی ٹیکسٹ بورڈے نمائند بہر اں زورگ ءَ اتنت وتی صوبہ ءِ ٹیکسٹ بُک بورڈ آنی باروا گپ جت انت۔
ایشانی تہا ڈاکٹر نگہت یاسمین کے پی کے، شوکت ترین بلوچستان ٹیکسٹ بورڈ پنجابی سٹیزن فورم عامر لیاقت صدیقی پاکستان فار ایجوکیشن ءَ بہر زرت آھاں وتی صوبائی حکومتانی نیمگ ءَ ماتی زبانانی کتابانی چھاپ ءُُ شنک کاری ءِ باروا گُشت۔
پی این سی اے ءِ کانفرنس آڈٹیوریم ءَ روچ ءِ دومی دیوان ءِ سرحال میاں استمانی ادب ءِ تہا پاکستان ءِ ماتی زبانانی رجانک ءِ سرا حال کرت اے دیوان ءِ مہماندار فاخرہ نورین ات۔
اے دیوان ءِ تہا شایدشبیر ءَ پنجابی ناول گو ڈ و دی اڈیک ڈاکٹر پارس نواز ءَ سندھی ناول رازق ابابکیءَ براھوئی ناول ءُُ ذاکر قادر ءِ بلوچی ناول آنی باروا گپ جت انت۔
انچو لیکچر حال ءِ تہا پاکستان ءِ لوک ادب ءِ باروا دیوان برجاہ ات کہ اے دیوان ءِ مہماندار عظمیٰ انجم ات۔ شفقت عاصی ءَ پشتو جاوید اقبال ءَ تورالی نصر اللہ عاصم گواربانی سرائیکی ءُُ دومی زبانانی باروا گپ ءُُ تران کرت۔
کانفرنس حال ءِ بے بنیاتیں حال ءُُ خبراں چوں دارگ بوت کنت ءِ سرحال ءَ دیوانے بوت۔اے دیوان ءَ گلمینہ بلال احمد، مریم سعید ءُُ اسد بیگ سرحال ءِ سرا سرجمی ءَ گپ ءُُ تران کرت۔ انچو لیکچر حال ءَ ماتی زبانانی تہا تھیٹر ءِ جاورے سرحال ءِ سرا دیوانے برجاہ ات۔ ایشی مہماندار زینب ڈار ات۔ خالد احمد ءَ اُردو زبان ناز سہتوءَ سندھی زبان، جمیلہ چترالی ءَ پشتو ءَ سیدال عمران ءَ پوٹھواری ءِ باروا سرجمی ءَ گپ جت۔ اے درگت ءَ بازیں جُست ءُُ پرس کنگ بوت ات۔ اے دیوان ءَ پد نیمررچ ءِ نان ءِ وقفہ ات۔ نان ءِ ورگ ءَ پددیوان پدا بندات کنگ بوت اے دیوان ءِ سرحال پاکستان ءِ تہا ماتی زبانانی رکھینگ اے سیشن ءَ نامداریں جج فخر الدین جی ابراھیم ءِ نام دیگ بوتگ ات۔
اے دیوان ءِ حاصیں مہمانانی تہا آئی اے رحمان، افراسیاب خٹک، ڈاکٹر مالک بلوچ، سسی پلیجو ءُُ زبیدہ ھوار اتنت آھان اے دیوانءِ تہا ماتی زبان ءِ کرد ءِ باروا گپ جت انچو آھان چہ بازیں جست ءُُ پرس ھم کنگ بوت۔
بیگاہ ءِ شش ءَ ماتی زبانانی شاعر ی ءِ کتابانی دیم درائی ھوار شعر ءُُ شاعری ءِ دیوان ھم بوت۔ اے دیوان ءِ پاگواجہ احمد سلیم ات۔ وھدیکہ خاصیں مہمان اُردو زبان ءِ نامداریں شاعر انور شعور ات۔
اے دیوان ءِ مہماندار ناصرہ زبیری ءُُ محبوب ظفر اتنت۔ اے شاعری دیوان ءَ بازیں زبان ءِ کتابانی دیمدرائی کنگ بوت۔ ایشانی تہا صادق رھچار ءَ بلوچی فاطمہ حسن ءِ اُردو سرورءِ سندھی لیاقت سنی ءِ براھوئی شکیل اعوان ءِ سیاڑی جاوید سحر ءِ گوجری افراسیاب خٹک ءِ پشتو جعفر زوتی ءِ کھوراں مظہر نیازی ءِ سرائیکی محمد حنیف ءِ ھندکو کریم فریادی ءِ براھوئی نورالعین سعدیہ ءِ پنجابی رازق کو ہزاد ءِ ہزارگی شکور حسن ءِ کھوہاری احمد فہیم ءِ میواتی، اے دراں زبانانی شاعرانی کتابانی دیمدرائی ھوار اے وتی گال ءُُ گفتاراں وتی زبانانی تہا پیش کرت ات رند ءَ ساز ءُُ زیمل ءِ دیوان بوت۔
23فروری دیوان ءِ گڈی روچ اَت۔ کانفرنس حال ءَ بیست ءُُ یکمی کرن ءَ ماتی زبانانی چیلنج ءُُ کلمکارانی کرد ءِ باروا دیوانے بوت۔ اے دیوان ءِ مہماندار زبیدہ بروانی ات۔ نامداریں کلمکار ءُُ کواسانی تہا ڈاکٹر نجیبہ عارف ثروت محی الدین، ڈاکٹر نصراللہ وزیر،مظہر عارف، انعام شیخ ءُُ حارث خلیق ھوار اتنت۔
وھدیکہ لیکچر روم ءَ ماتی زبانانی لبزانک ءِ رجانک ءِ سرحال ءَ دیوان برجاہ ات۔ اے دیوان ءِ مہماندار صفیہ کوثراَت۔ اے دیوان ءِ بازیں کلمکاراں دومی زباناں وتی ماتی زبانانی تہا رجانک کرتگ ات۔
انچو لیکچر حال ءَ ماتی زبانانی افسانہ آئی نوکیں کتابانی چھاپ ءُُ شنک ءِ باروا ھم زبانانی دیوانے برجم دارگ بوت اے دیوان ءِ مہماندار نعیم فاطمہ علوی ات اے دیوان ءَ ڈاکٹر مالک بلوچ ءِ مارشت،عندلیب گچکی ءِ کلی، حسن ناصر ءِ چیانٹ ءُُ دومی زبان ءِ کلمکار ھوار اتنت آھاں وتی آفسانہ آنی باروا گپ ءُُ تران کرت۔
انچو یک سیشن ءِ ماتی زبانانی دستاویزاتاں شکل ءُُ دروشم دیگ سرا گپ ءُُ تران بوھگا ات انچو یک دگہ سیشن ءِ تہا ماتی زبانانی تہا شہرانی کتابانی باروا گپ ءُُ تران بوت۔ اے درگت ءَ اختر بلوچ ءَ کراچی ءِ باروا وتی کتابے سرا چمشانک دور دات۔
گڈی دیوان ءَ چہ پیش دو سیشن برجم دارگ بوت انت۔ اولی سیشن ءِ سر حال ماتی زبانانی تہا سرحالانی باروا نوکیں کتاب اے سیشن ءَ ڈاکٹر طاہر نسوی ءِ نام دیگ بوتگ اَت۔
وھدیکہ دومی سیشن ماتی زبان ءِ دیمرئی ءِ تہا تاک ءُُ آن لائن فورمز آنی سرا اَت۔اے سیشن ءِ حاترا لٹریری نارتھ امریکہ ءَ مدت ءُُ کمک کرتگ اَت۔ اے دیوان ءِ جار جین زبہر توروی اَت۔ وھدیکہ مہمانانی تہا رضوان علی، زاہدہ ابڑو، پرویز ساحر حیات محمد، ملک ناصر وقار علی شاہ ءَ بالار نواز ھوار اتنت۔ اے دیوان ءِ تہا تاک ءُُ ماہتاکانی کرد ءِ سرا گپ ءُُ تران ءَ ھوار آن لائن تاک ءُُ ماہتاکانی باروا گپ ءُُ تران بوت۔ دیوان ءِ گڈ سرا بازیں جست ءُُ پرس کنگ بوت انت کہ دیوان ءِ تہا ساڑی ایں مہماناں آھانی پسودات انت۔
دیوان ءِ گڈی سیشن شپ ءِ ھشت ءُُ نیم ءَ بندات بوت انڈس کلچر فورم ءِ نیمگا زبیدہ پروانی ءَ سرجمی ءَ گپ ءُُ تران کرت۔
حاصیں مہمان بنجاہی وزیر شفت محمود ءَ گشتانک دات انڈس کلچر فورم ءِ کار ءُُ کرد ءَ سہڑاھت۔ بی این سی اے ڈاکٹر فوزیہ سعید ءَ بنجاہی وزیر ءُُ ڈن آتگیں مہمانانی شکر ءُُ منت گپت کہ ملک ءِ بازیں بہرآں اتکگ ءُُ اے دیوان ءَ بہر زرتگ انت۔
دیوان ءِ گڈ سرا ساز ءُُ زیمل ءِ دیوان بوت ملک ءِ نامداریں گشندہ عتیقہ کیانی ءَ وشیں توار ءَ درا قومی زبانانی تہا صوت گشت آئی صوتاں ہال ءِ تہا نشتگیں مردماں باز دوست داشت۔
امیر حمزہ نمائندہ بلوچی زند اسلام آباد