بے لبزانک ءَ زند ناسرجم اِنت…..چندن ساچ 

لبزانک ءِ نبیسگ زندگانی اِنت۔ لبزانک یک انچیں چیزے کہ اِے وہد دئیگ لوٹیت۔ ہما مردم کہ لبزانک ءَ زندگی ءِ یک المی ئیں بہرے سرپد بنت ءُُ لبزانک ءِ لوٹ ءُُ گزراں پیلہ کن اَنت، لبزانک ءِ تب ءَ دارنت، لبزانک ہمایانی بیت۔ لبزانک ءِ نبیسگ ءَ دائم قلم چست کنگ ءُُ دائم نوکیں راہ ءُُ در شوہازگ لوٹنت۔ لبزانک چشیں مرغے نہ اِنت کہ آ اناگہ ءَ کیت ءُُ تئی لوگ ءِ دپ ءَ نندیت ءُُ گُشیت۔ من تئی لوگ ءَ بُوہگ لوٹاں، من ءَ ڈب ءَ بکن ءُُ وتی لوگ ءِ دیما بہ ٹَنگ ءُُ من وہد وہدے سرا وشیں تواراں گوں تئی تب ءَ بدل کناں۔۔۔۔۔ لبزانک ہچبر چش نہ کنت۔۔۔۔ لبزانک ءِ شوہاز ءَ ہمنچو در کپ ئے، آ دو ہمنچو تئی نزیک ءَ آیان کنت۔۔۔۔ لبزانک ءِ سفر ءَ دل پروشی نیست۔۔۔ پرچا کہ اِے پہ دگرے ءَ نبیسگ نہ بیت۔۔۔۔ آ لبزانک کہ دگرے ءِ گُشگ ءَ یا پہ دگرے ءَ نبیسگ بیت آ بگندئے وتی وہد ءَ کمو سالانی تہا بہ مانیت۔۔۔ بَلے پدا وہد ءِ مُجانی تہا گار بیت۔۔۔۔
لبزانک ءَ وانان بُو، نبیسان بُو۔۔۔۔۔ ۔ دلبڈی کسے دنت آئی ءِ منت ءَ بگر، اگاں کسے دلبڈی نہ دنت ہم پرواہ نیست۔۔۔۔ پرچا کہ لبزانک ءِ نبیسگ ءِ وشی چہ مردمانی دلبڈی دئیگ ءِ وشی ءَ وشتر اِنت۔۔۔۔ ہما کہ اِے جیڑ اَنت ما پمیشکا نبیسیں کہ مردم مئے بابت ءَ گپ بجن اَنت ءُُ ما دمگ ءَ نامدار بہ بئیں۔ اِے وڑیں حیال ءِ دارگ لبزانک ءِ پڑا یک احمقی یے ءَ ابید دگہ ہچے نہ اِنت۔۔۔۔ تو اگاں شریں لبزانک نبشتہ بکن ئے گڑا اِے درسیں چیز ترا وت رسنت، مردم ترا وت شوہاز اَنت ءُُ تئی ساڑاہگ ءَ وت شپ ءُُ روچ ءَ یک کن اَنت۔۔۔۔اگاں تئی گورا اساچشت نیست گڑا تئی توسیپ ءُُ ساڑاؤک لکھانی کچ ءَ بہ بنت، بَلے فائیدگ نیست۔۔۔ پرچا کہ لبزانک ءِ پڑا ترا ساڑایگ زندگ نہ کنت۔۔۔۔ اِدا ترا ساچشت زندگ کنت۔۔۔۔
ایرانی لچہ کار فروغ فروخ زاد وتی پت ءِ نام ءَ نمدی یے ءَ نبشتہ کنت کہ
’’تو من ءَ منی وڑ ءُُ پیم ءُُ وانگ ءُُ زانگ ءِ جاورانی بابت ءَ جُست کتگ۔ تو وَ زان ئے کہ منی زندگی ءِ منزل کُجام اِنت۔ بلکیں تو ہمے سرپد بہ بئے کہ اِے احمقی یے۔ بلے اِے یکیں جاہ اِنت کہ اِدا من گلاں۔۔۔۔ وشاں۔۔۔۔ من بس یک مزنیں شاعرے بوہگ لوٹاںءُُ من ءَ شاعری ءَ گوں مہر اِنت۔۔۔۔ اے کار ءَ چہ ابید من دگہ ہچ نہ کناں۔۔۔۔ ہر وہدے کہ من وت ءَ پجہ کاراں گڑا ہمے ماراں کہ من ءَ شاعری ءَ گوں مہر اِنت۔۔۔۔من وتی زانت ءُُ سنچ ءَ دیمروی دئیگ ءِ ہاترا کار کناں۔ من پہ ایف اے، بی اے ءِ واستا نہ ونتگ۔۔۔۔ بلکیں منی مول ءُُ مراد اے بوتگ کہ من وتی زانت ءُُ زانگ ءَ گیش بہ کناں ءُُ وتی ہما کار ءَ دیما بہ براں کہ من ءَ وشی دنت۔۔۔ آ کار شاعری اِنت کہ من ءَ وشی دنت‘‘۔
فروغ فروخ زاد دیمتر ءَ نبیس ایت کہ
’’شاعری منی حدا اِنت۔ بزانکہ من شاعری ءَ گوں انچو مہر کناں۔۔۔ منی روچ ءُُ شپ ہمے جیڑہانی تہا گوزنت کہ من نوکیں ءُُ زیبائیں شعرے بہ گشاں۔۔۔ ہما شعر کہ چد ءُُ پیسر کس ءَ نہ گشتگ۔۔۔۔ ہما روچ ءَ کہ من تہنا مہ باں۔۔۔۔ شعرے نبشتہ مہ کناں۔۔۔۔ گڑا بزانکہ منی آ روچ زوال بوتگ۔۔۔۔ بگندئے سر زاہری ءَ شاعری منی واستا وش بحتی مہ بیت بَلے من وش بحتی ءَ دگہ رنگے ءَ چاراں۔۔۔ وش بحتی منی واستا شوکیں پچ ءُُ پوشاک، وشیں زندگی یا وشیں وراک ءُُ وردن نہ اِنت۔۔۔۔ من ہما وہد ءَ وش نصیبے باں کہ منی ارواہ آسودگ ءُُ گل بہ بیت ءُُ شاعری ہما چیز اِنت کہ منی ارواہ ءَ آسودگ ءُُ گل کنت۔۔۔۔
من ءَ ہما درستیں چیز دئیگ بہ بنت کہ دنیا ءِ اے دگہ مردم ہمایانی واستا مرگ ءَ اَنتءُُ شعر گُشگ ءِ ہنر اچ من پچ گرگ بہ بیت۔۔۔ گڑا من وت کُشی کناں۔۔۔۔۔۔‘‘
لبزانک یک انچیں چیزے کہ آئی ءَ فروغ فروخ زاد سرپد بوتگ۔۔۔۔ آئی ءَ اے غم نہ بوتگ کہ مردم منی باروا چے گُشنت۔۔۔۔ آئی شعر پمیشکا گُشتگ کہ منی ارواہ آسودگ بہ بیت۔۔۔۔ فروغ فروخ زاد گشیت بگندئے شاعری ءَ مردم منی بد نصیبی سرپد بہ بنت۔۔۔ بَلے من کہ بے شعر ءُُ شاعری ءَ زندگ بوت نہ کناں۔۔۔۔ گڑا پرچا شعر مہ گُشاں؟۔۔۔ گڑا پرچا شعر مہ جیڑاں۔۔۔۔۔
اصل ءَ لبزانک ہمیش اِنت۔۔۔۔ لبزانک ءَ اگاں ما وت ارواہ ءِ آسودگی ءُُ زندگی ءِ المی ئیں بہرے سرپد بہ بئیں۔۔۔۔ گڑا لبزانک ہم گوں ما بے وفائی نہ کنت۔۔۔۔ بَلے شرط ہما اِنت کہ اِدا چو فروغ فروخ زاد ءَ علم پمیشکا حاصل بکن کہ تئی زانت ءُُ سنچ بہ ود اِیت۔۔۔۔
دانکہ تو وتی لبزانکی کاراں دیما بہ برئے۔۔۔۔ کئے چے گُشیت، کئے ءَ چے گُشتگ۔۔۔۔ اِے وڑیں گپاں گوات ءِ میار کن ۔۔۔۔ بِلے سفر کن اَنت۔۔۔۔ موسمی ساڑا، موسمی ایراد گیری چو درچک ءِ ہما تاک ءَ اَنت کہ گوات ءَ گون اِنت۔۔۔ گوات وڑے نہ وڑے اِے تاک ءَ زوریت ءُُ گواتارکے ءَ یا دگہ جاہے ءَ کل کنت ءُُ پدا اِے تاک گار ءُُ بیگواہ بیت۔۔۔۔۔ لبزانک ءِ نبشتہ کنوک ءِ زندگ داروک ساچشت اِنت۔۔۔۔