”بے کسہ ءَ من ءَ واب نییت“ءِ سرا کسانیں چمشانکے…..ڈاکٹر عطاء اللہ قحطانی

من زی بیگاہ ءَ زاھدہ رئیس راجی ءِ آزمانکانی اولی کتاب”بے کسہ ءَ من ءَ واب نییت” وانگ ءَ ھلاس کت، پیسرا منی ھیال ہمیش ات، کہ کتاب ءِ وانگ پد کتاب ءِ سرا چمشانک یا دیدانک ءِ نبشہہ کناں بلے پدا ھیال کت، دیدانک ءِ نبشہہ کنگ ءِ واستہ باز زانت ءُُ علم لوٹیت، چُوکہ فلسفہ ءِ علم بنی آدم ءِ نفسیات ءِ علم، لبزانک ءِ علم، جمالیات ءِ علم، جنسیات ءِ علم، سوشیالوجی ءِ علم، مذہب ءِ علم، من چرے درسیں علماں شپاداں لہزا دیدانک ءِ نبشتہ منی وس ءِ گپ نہ اِنت، پمیشا منی پیسراگیں ھیال اِشکند بوت نوں کتاب ءِ سرا لہتیں گپ نبشہ کناں ایشاں دیدانک یا چمشانک مہ لیکیت بلکیں کتاب ءِ سرا منی نوٹ بہ لیکیت اِت، زاھدہ وت گُشیت کہ آزمانک ءِ پڑ ءَ اے منی اولی جھد اِنت، اولی، غلطی، اولی گناھے ہر مذہب ءَ معافی گنجاہش است اِنت، بائد اِنت لبزانک ءِ مذہب ھم بہ بیت، بلے اے گپ ءِ مطلب ھچبر ایش نہ اِنت کہ زاھدہ ءَ لبزانکی گناھے کتگ۔زاھدہ ءَ گیشتر آزمانک فلش بیک ٹیکنیک ءَ نبشتہ کتگ انت اے ٹیکنیک ءَ وانوک تیوگیں قصہ بوانیت، نوں زانت کی کردار چی اِنت زاھدہ ءِ گیشتریں جیڑھانی سرا کہ آزمانکاری کتگ آگیشتر جنینی ءُُ لوگی جیڑھ انت،ایشی ءِ سبب ہمیش بوت کنت کہ زاھدہ وت جنین ءِ آ جنینانی جیڑہ ءَ مردین ءِ نسبت گیشتر فہمیت، زاھدہ چہ لیاری ءَ در نہ ایت، وانوکءَ انچُو گمان بیت زاھدہ تیوگیں روچ ءَ لیاری ءَ لوگ پہ لوگ اِنت، باریں کجا دو جنین میڑیتگ آیہے قصہ ھما دمان ءَ ھمودا بندات کنت،ھماہانی جندے ڈاہیلاگاں نبشتہ کنت، زاھدہ ءَ جنینی گپ ءُُ ڈاہیلاگ ءِ نبشتہ ءَ کمال اِنت، چوناہی زاھدہ درستیں آزمانک جوان انت بلے منی آہیے آزمانکhumm سک دوست بیت اے یک سکیں بُولڑ آزمانک ءِ اے وڑیں بُولڑ آزمانک زاھدہ نبشہہ کت کنت ھر کسی وس ءِ گپ نہ اِنت، گڑی گپ زاھدہ ءِ تہا یک شریں آزمانکار ءِ ٹپیتگ چیر اِنت، شوھاز کنگ لوٹیت،
نوں من آیہے اول ناول ” تو کہ زند ءِ درورئے”بندات کتگ۔