کورونا راستی یے…..کازی ریحان 

جھان گْوش ئے زاناں یا اناگاہ ءَ بھمنتگ کہ اے چونیں وبایے آیانی سر ءَ کپتگ۔ اے چہ ھاوند ءِ نیمگ ءَ چکاسے یا بیریکہ جھان ءِ آبادی ءِ چنڈگ ءُُ تنک کنگ ءَ اَتکگ۔اے وَ انگت گھ اَت کہ اے نادراھی چہ پاکستان، ھندوستان ءُُ اپریکا رنگیں پدمنتگیں زمین ٹکے ءَ نہ ٹومب اتگ کہ اد ءَ نادراہ پہ وتی ھمک درد ءِ درمان ءَ بگوان، اللہ، پنڈت، ملاءُُ شک ءُُ پالانی سر ءَ مھرکمیں ستک دار اَنت۔ پہ ایشاں مزھب کردانکی ءُُ دودمانی بستارے نہ دار ایت۔مزھب کہ آ چاگرد ءَ پاکی، نیکی، پلگاریءُُ مردمگری ءِ سوج دنت پہ ما ایوک ءَ وتی بدیانی چیردیگ ءَ چادرے جوڑ بیتگ۔ما انچیں چاگردے ءَ نشتگ ایں کہ اد ءَ کس ءَ اے گپ ءِ سما پر نیست کہ آئی ءِ ھمساھگ ءَ شپ ءَ شام کرتگ یا ناں، کدی چوش نہ جیڑ ایت کہ من پہ ھمساھگ ءَ چہ وتی گنجاں روزگار ءِ دروازگے بہ بوجا ں بلے ھمے چہ زند ءِ دزگٹیاں تتکگیں لھتے ناپھتوئیں مردماں ھمراہ کنت ءُُ ھمساھگ ءِ در ءَ ٹک ایت ءُُ چہ آئی ءَ لوٹ ایت کہ آ گور ھمے ھمشامی ءَ آئی ءِ ھمراہ بہ بیت، داں ھاوند پہ آئی ءَ بھشت ءِ دروازگاں پچ بہ کنت۔ اے پزوریں مردم من دیستگ اَنت کہ بھ مردمانی لگوشتگیں پچ،دراتکگیں شاگور ءُُ ریتکگیں چماں نہ چار اَنت۔ کسے ھست کہ ایشاں مزھب ءِ مادنیں کشک ءَ پیش بہ دار ایت کہ گوں مھروانیں پنت ءُُ دانکاں سمبھ اتگ؟ اے گْوش اَنت کہ جھان برگشتگ، مسلمان چہ مسیت ءَ دیر اَنت بلے اے وتی کرد ءَ سیل نہ کن اَنت کہ ایشاں مسیت وتی سیاسی سنگر جوڑ کرتگ اَنت۔
سیاست جوانیں چیزے بلے مزھب ءَ اگاں گوں سیاست ءَ پیوند بہ کن ئے، مزھبی ستک ءُُ پرستشاں چہ مردم ءِ جند ءِ دوستی، زانت ءُُ زانگ ءُُ لوٹ ءُُ واھگاں بہ سند ایں ءُُ پہ زور آیانی سر ءَ بہ مش ئے گڑا نا مزھب مان ایت نا سیاست سیاست ءِ چھرگ ءَ جنت۔ مزھب گْوش اَنت کہ اے جھان ءَ مردمانی پہ وتی سیتاں بادشاھی کنگ پہ مردماں تاوان اِنت۔آیانی نز ءَ جھان ءِ راستیں بادشاہ ھما توان اِنت کہ آئی ءَ سرجمیں گیھان جوڑ کرتگ ءُُ مردم ءِ ساچگ ءِ بن ھشتکار اِنت، ھمک جھانی بادشاہ باید ھمائی ءِ سوج ءُُ پنتاں بہ زیر ایت۔ ھچ مزھب چہ ابرمی راستیاں سرسند نہ بیتگ بلکیں ابرم ءِ ماں گالانی تہ ءَ درشانگ ءُُ آئی ءَ ستک ءِ بت ءِ دْروشم ءَ ساچگ ءُُ پیش کنگ ءِ نام مزھب اِنت۔ھمک مزھبانی ھدا گوں ابرم ءَ ھمگرنچ اِنت پمیشکا آ ھور گوار ایت، مولم ءِے پہ رد ءُُ بندی داشتگ اَنت، جلگہ ءُُ لوھڑیں زر ءِے مھار کرتگ۔وھدے کہ مردم چہ شریاں زبھر بیتگ اَنت گڑا ابرم ءَ زھر کرتگ ءُُ چوش کہ ھاد ءُُ سمود ءِ راجانی سر ءَ پہ آیاں وتی مورک مجینتگ۔
مزھب توری ھندوستان ءِ راماین ءِ داستانانی رنگ ءَ وتی سوجاں شکسائیت یا ھومر ءِ الیاڈا ءِ تہ ءَ دیوتایانی کارستانی دروشم ءَ درشان بیت، مدام ھرابیانی گر ءُُ دار کنت ءُُ شریانی سوج ءَ دنت۔ ھومر ءِ کارست روچ ءِ ھاوند ھما وھدی زھر کنت کہ وھدے اگامیمنون ءِ لشکر روچ ءِ ھاوند ءِ درگاھی یے ءِ منجارے ءِ جنک ءَ آوار جنت، منجار اگامیمنون ءِ در ءَ زار جنت کہ منی جنک ءَ یلہ بہ دئے بلے کسملیکیں اگامیمنون ھچ مان نہ یار ایت ءُُ آئی ءَ بیمنگہ کنت۔منجار چہ روچ ءِ ھاوند اپالو ءَ لوٹ کنت کہ آئی ءِ بے منگھی ءِ بیر ءَ بہ گیپت۔
ھاونداپالوگوں وتی تنگوبندیں ترکش ءُُ کمان ءُُ نگرھیں تیراں اگامیمنون ءِ لشکر ءِ سر ءَ تاھون ءِ وبا ءَ شانک ایت، اینچو مردم کہ ٹروئے جنگ ءَ نہ مرتگ دو ھمینچک ءَ تاھون کش ایت داں کہ اگامیمنون ءِ لشکر ھوش کنت ءُُ چہ وتی بدیں کار ءَ پشومان بیت گڑا پہ آیاں سوبمندی ءِ دروازگ پچ بہ اَنت ءُُ دیوتا ھم آیانی سر ءَ مھروان بہ اَنت۔
ھمے پیم جھان ءِ نوکتریں مزھب «اسلام» چہ درساں گیش گیھانی راستیانی بنپد ءِ سر ءَ اوشتاتگ:
سورہ ء پجر ءِ تہ ءَ اللہ درائین ایت:
رجانک:”اے ھما مردم اَنت کہ ایشاں جھان ءِ ڈیھانی تہ ءَ باز سرکشی کرتگ ءُُ آیانی تہ ءَ جنگ ءُُ جیڑہ ودی کرتگ۔ ھمے کارانی برورد ءَ شمئے رودینوک ءَ آ گوں وبالانی چابک ءَ مان بست اَنت۔راست اِیش اِنت کہ شمئے رودوینوک ءَ کمین جتگ ءُُ نشتگ۔ بلے مردم ءِ جاور ایش اِنت کہ وھدے آئی ءِ رودینوک آئی ءَ آزمائش ءِ تہ ءَ کنت ءُُ آئی ءَ منگہ ءُُ آسیدگی دنت گڑا آ گْوش ایت من ءَ منی رودینوک ءَ منگہ دار کرتگ۔ ءُُ وھدے کہ آئی ءَ آزمائش ءِ تہ ءَ کنت ءُُ آئی ءِ روزیگ ءَ پہ آئی ءَ تنگ کار ایت گڑا آ گوش ایت کہ منی رودینوک ءَ من ءَ بے منگہ کرتگ۔ بھ چوش نہ اِنت،بلکیں شما گوں چورواں مڑاہ ءُُ منگھی پیش نہ کپ اِت۔ ءُُ نیزگارانی وارینگ ءِ یک دومی ءَ سکین نہ دئے اِت ءُُ چہ پت ءَ رس اتگیں درسیں مڈیاں مچ کن ءُُ ور اِت۔ ءُُ گوں مڈی ءِ مھر ءَ سک بے وڑی ءَ گیر اتکگ ئے۔“
بلے ھما مردم کہ وت ءَ دینداریں مسلمان گْوش اَنت آیاں کورونا ءِ آیگ ءِ ھال ءِ اش کنگ ءَ پد چی کرتگ؟
درساں پیسر وَ آیاں وتی سر ءَ ناباوری ءِ منگیر ساھیل کرتگ کہ کورونا یک دروگے؟
وھدے کہ چہ دروگ گْوشگ ءَ ھم کورونا ءِ گام نہ اوشتات اَنت گڑا نی گْوشت اش کہ کورونا چین ءِ سر ءَ اللہ ءِ زھرشانی اِنت کہ چین ءَ ایگورمسلمانانی سر ءَ زوراکی کرتگ آ چہ نماز، روچگ ءُُ کرآن وانگ ءَ داشتگ اَنت۔۔۔ اے ھم راستی اَنت بلے کورونا ءَ تیوک ءَ مسلمانانی سر ءَ زوراکی کنوکیں چینی نہ گیپت اَنت بلکیں دینداریں مسلمانانی نیمگ ءَ ھم گوں تیزی ءَ بیڑ ءِے برت ءُُ شیھائیں مسلمانانی بنجلیں شھر کم ءَ سرکش اِت۔ نی مئے نیمگ ءَ سنیاں گْوشت کہ اے نادراھی پہ شیھاھاں ھدا ءَ دیم داتگ کہ آیانی مزھب ءِ راہ کج اِنت، شرک ءُُ گیشی کن اَنت پمیشکا ھدا آیانی سر ءَ زھرشانی کنگ ءَ اِنت بلے دیر نہ گْوست کہ کورونا مکہ ءَ سربوت۔ مکہءِ در پہ لاچاری نمازیاں بندکنگ بوت اَنت۔
منی ھم سرجمیں پاکستان ککار کنگ ءَ اِنت کہ کورونا چہ ایران ءَ اتکگ۔ بلوچستان ءِ بنجاھی شھر شال ءِ ھزارہ پہ کینگی چارگ بیگ ءَ اَنت کہ ایشاں کورونا بار جتگ ءُُ آرتگ بلے راستیں گپ ایش اِنت کہ پاکستان ءَ چہ کورونا ءَ دنیگت دو انچیں نادراہ ھم مرتگ کہ چہ آیاں یکے چہ دبی ءَ اتکگ ءُُ دگرے چہ مکہ ءَ۔سرکاری بنشون ءَ ایشانی بیرانی ءُُ نادراھی ھردوئیں گپ من اتگ اَنت پرچا کہ کورونا انچیں راستی یے کہ چہ دروگ ءُُ چیردیگ ءَ گار ءُُ گمسار نہ بیت بلکیں چہ پاشکی ءُُ ھال ءَ پھریز بیت۔
باز مردمانی گپاں من اش کنگ ءَ آں کہ آ گْوش اَنت پاکستانی سرکار چہ جھان ءَ پوڑی گرگ لوٹ ایت پمیشکا دروگ بندگ ءُُ کورونا ءِ تالانی ءَ چہ راستی ءَ گیشتر گْوشگ ءَ اِنت۔ ایران ءَ کورونا نادراھی ءِ درگت ءَ ھم مردمے ءَ انچیں نبشتانکے پہ چاگردی رسانکدر ءَ شکساتگ اَت کہ:”کورونا ءِ نادراھی دروگے پرچا کہ دنیگت چہ منی پجاروکیں مردماں کس ءَ کورونا ءَ نہ گیپتگ، گڑا اے مردم کئے اَنت کہ نادراہ بیگ ءُُ مرگ ءَ اَنت۔“ بلے اے گپ ءَ ھچ ھوشمندیں مردم باور نہ کنت کہ یک سرکارے وتی ڈیھ ءِ بازار ءُُ سرکاری کارگساں بندکنت، شھراں چہ یک دومی ءَ سند ایت۔آ اے کار ءَ پمیشکا وَ نہ کنت کہ مردم پریشان بہ بہ اَنت بلکیں اے پیم کنگ چہ مردماں گیش پہ سرکار ءَ تاوان اِنت کہ آئی ءِ سرکاری کار اوشت ءِ آماچ اَنت۔بازار بند اَنت کئے سر کار ءَ سنگ دنت؟ وھدے کہ سرکار ءَ سنگ مہ رس ایت آ وتی کارمنداں چہ کج ءَ پگار دنت ءُُ والین ایت؟ ھمے پیم جھان ءِ نامی ئیں کمپنیاں وتی کار داشتگ اَنت۔ اے درس پہ یک دروگے ءِ پشت ءَ بوت نہ کن اَنت۔
مئے چوناھیگا پدمنتگیں راجے، چہ زانتءُُ سرپدی ءَ دور تچ ایت بلے بہ یا کہ مروچیگیں جھان ھم زَر ءِ مھر ءَ سک مُھر پیڑاتگ،اے زردوستیں جھان ھم چہ راستی ءَ سک ترس ایت۔راستی یے کہ آئی ءِ بدمستیں دیمروی ءِ گاماں کنٹ بہ کنت، راستی یے کہ آئی ءَ بہ ڈس ایت کہ تئی دیمروی ماتیں ابرم ءَ زدگ ءُُ ژامبیل کنگ ءَ اِنت۔ زراں روپگ ءُُ مچ کنوکیں زردوستیں جھانی واکداراں اے رنگیں راستی کج ءَ دوست بیت۔ چین ءَ ھم یک برے چہ اے راستیءَ دیم گیپت۔ آ اُود ءِ پہ جھان ءِ ایرمادی ءَ ریٹوبیتگیں سرکار ءَ لیک اتگ کہ اے پہ آئی ءِ جھاندرای ءِ دیم ءِ دارگ ءَ پندلے۔
چین ءَ 34سالی ئیں ڈاکٹر واجہ لی وینلیانگ ھما بنداتی ڈاکٹر اَت کہ آئی ءَ چین ءِ سرکار ھژدار دات کہ سرکار شیوار بہ بیت ڈیھ ءَ سارس گونگیں نادراھی یے ٹومب اتگ، زیت گر ءُُ دار کنگ لوٹ ایت۔اے گپ آئی ءَ گوں وتی ھمکاریں ڈاکٹراں جتگ اَنت۔ سرکار ءِ باید اَت کہ آئی ءِ گپ ءِے ٹپاس اِتین اَنت مرد ءِ جند ءِ سرءَ میار لڈ اتگ کہ آ دروگ بندگ ءَ اِنت۔ ڈاکٹر لی ءِ پجیگ ءَ دگہ ھپت ڈاکٹر «دروگ بندگ ءُُ مردماں ترسینگ ءِ بھتام»ءَ دزگیر کنگ بوت اَنت بلے کورونا راستی یے اَت، آئی ءَ پدر بیگی اَت ءُُ پدربوت۔
31 جنوری 2019 ءَ لی ءَ چین ءِ چاگردی رسانکدر ءَ پوسٹے شنگ کرت گْوشت کہ ”آسرال ھمے بوت کہ نادراھی راستے بوت۔“ بلے اے وھدی لی ءِ جند کورونا ءَ گور جتگ اَت۔
لی ءَ چہ کورنٹین بنجل ءَ رسانکدرے ءَ گپ جنان ءَ گْوشتگ کہ”اے پہ من ارزش نہ دار ایت کہ منی گپ راست بیتگ یا ناں بلکیں چہ درساں پرارزش تریں گپ ھمیش اِنت کہ نی ھریکے راستی ءَ زانت۔“ راستی ءِ زانوکیں ڈاکٹر لی گوں ھمے ایمنی ءَ کورونا ءِ ارجان بوت کہ آئی ءِ مرگ ءَ پیش جھان راستی ءَ سرپد بیتگ۔