ماہتاک بلوچی زند ءِ بیست سال ءِ مساپری…..محمد اکرم دشتی

تحریک انصاف ءِ سرکار ءِ آیگ ءَ پد ہر چہاریں صوبہانی تہا بے واک ءُُ اختیاریں حکومت جوڑ کنگ بوت انت کہ آھاں ءَ مہلوک ءِ حاترا ہچ وڑیں حیرماں نہ انت، آ نہ مہلوک ءِ حقاں زان انت ءُُ نہ مہلوک ءِ مسئلہ ءُُ جنجالانی حاترا غم ءُُ پکر ے پرانت ءُُ نہ وتی واک ءُُ اختیاراں سرپد انت۔
اے وھدی درستاں چہ زیات میڈیا ءِ سرا سنسرشپ انت۔ الیکٹرانک میڈیا بہ بیت یا پرنٹ میڈیا درستانی سرا کاروائی بوھگا انت ہزارانی حساب ءَ احوالکار بے روزگار کنگ بوتگ انت۔ لہتیں سال بیت صدانی حساب ءَ احوالکار گار ءُُ بیگواہ ءُُ کُشگ بوتگ انت۔ اے ہما دلپدریں حبر انت کہ ملک ءِ تہا میڈیا ءُُ احوالکار آئی مقابلہ کنگا انت۔
اے جاور حالانی تہا ماہتاک بلوچی زند ءِ زند گ دارگ پہ وھد آئی ءِ چھاپ ءُُ شنگ کنگ اے گرانیں کارے انت۔ بلے اے نگیگیں جاوراں ابید یار جان بادینی ءُُ آئی ٹیم ءَ دم نہ برتگ ءُُ گوستگیں بیست سالاں وتی جہد ءُُ کوشست ءَ انچو برجاہ داشتگ۔ اے درگت ءَ آ لکھ ستائے لائق انت کہ یک بلوچی زبان ءِ تاک ءِ کہ بیست سال ءَ ابید چہ بند بوھگا چھاپ ءُُ شنگ بوھگا انت۔ پدا اے تاک یک پٹ ءُُ پولی تاکے انت گوستگیں بیست سالانی تہا ماہتاک بلوچی زند ءَ بازیں پٹ ءُُ پولی کار کرتگ، آئی پٹ ءُُ پولی کار بلوچی زبان ءُُ لبزانک ءِ مڈی زانگ ءَ بنت۔
بلوچی زبان ءِ تاک ءُُ ماہتاکاں مارکیٹ نہ بوھگءَ ابید آھاں ءَ چھاپ ءُُ شنگ کنگ یک مزنیں کمالے گپ انت۔ چیاکہ بلوچستان ءَ ھچ وڑیں کار جاہ ءُُ انڈسٹری نیست کہ آ بلوچی زبانءِ تاک ءُُ ماہتاکانی مدت ءُُ کمک ءَ بکن انت آھاں ءَ پرائیوٹ اشتہارے بہ رسیت۔ وانوک نہ بوھگ ءِ برابر انت۔ پیش ءَ تربت ءَ ملا احمد دشتی ءِ دکان ءَ یا دگہ ھند ءُُ جاہے ءَ کتابے ایر بوتگ انت، ادارہاں آتاک، ماہتاک ھم زرت انت انوں کسے تاک ماہتاک ءُُ کتاب ایر نہ کنت۔ انچو بلوچستان ءِ سرکار ماتی زبانانی تہا چھاپ ءُُ شنگ بووکیں تاک، ماہتاک ءُُ روتاکاں اشتہار دیگ ءَ سک کنجوس انت۔
ماہتاک بلوچی زند اے درا مسئلہ ءُُ جنجالاں ابید وتی بیست سال سرجم کرت ایشی اگں ماں توصیف مکناں تہ مزنیں کنجوسی ءِ بیت۔
ماہتاک بلوچی زند ءَ کشگ ءُُ آئی ءَ زند دارگ من یار جان ءُُ آئی ٹیم ءَ دل ءِ واھگ ءَ گوں شاباش ءُُ مرحبا گشاں کہ آئی ءَ زند ءَ را یک مشن ءِ شکل ءَ دروشم ءَ زرتگ پدا آئی ءِ معیارءُُ اسٹینڈر ءَ برجاہ داشتگ۔ اے گوستگیں بیست سال ءِ مساپری آئر ءَ مالی ءُُ دگہ بازیں جنجال بوتگ بلے آ وتی جہد ءَ دیما برتگ۔
ماہتاک بلوچی زند یک مزنیں ادارہ ے جوڑ بوتگ۔ بازیں ورناہاں بلوچی زند ءِ ادارہ ءَ چہ نبشتہ کنگ ھیل کرتگ۔ زند ءِ سوب ءَ باز نوکیں ورناایں شاعر ءُُ کلمکار پیداک بوتگ انت۔ ورناہانی تہا بلوچی نبشتہ کنگ ءِ دروشم روچ پہ روچا گیش بوھاں انت۔ اگں بلوچی زند ءِ تاک ءُُ آئی شعر ءُُ نبشتانک چھاپ ءُُ شنگ مہ بوتیں انت، مروچی انچو بلوچی زبان ءِ نامداریں کلمکار ءُُ شاعرپیداک نہ بوتگ انت۔
پاکستان ءِ ریاست ءُُ بلوچستان ءِ سرکار مدام اے دعوا کن انت کہ ادبی چست ءُُ ایراں ابید روتاک ءُُ ماہتاکانی مالی مدت ءُُ کمک داشتگ تنکہ آ وتی پادانی سرا وت بوشت انت۔ تنکہ مہلوک مسئلہ ءُُ جنجالاں نبشتہ صورت ءَ دیما بیار انت۔ بلے ادا انچو گندگ بوھگا انت کہ بلوچی رسالہ ءُُ ادارہاں ماتوی بوھگا انت۔ اے ترندیں حال رسانی ءُُ شنگ کاری دنیا بلوچی لبزانک ءُُ حال رسانی ءِ چاگرد باز پشت ءَ انت اگں اے بے روزگاریں بلوچ حوالکارے ءِ گوں حب ءُُ واھگ ءَ حال رسانی ءِ پڑ ءَ وتی تجرباں دیما بیاریت ءُُ گاماں ترند بکنت چیاکہ اے سینچری میڈیاءِ انت میڈیاءُُ حال رسانی ءِ شعبہ ءَ انقلاب اتگ مردم دروگ بند نہ بیت پدا بچاریں کہ بلوچ میڈیا کجا اوشتاتگ شما وت شر ترزاں ات۔ زندگیں راج ہما انت کہ وتی ذمہ داریاں زورانت وتی سیاسی مالی ءُُ لبزانکی دود ءُُ ربیدگی جہد ءُُ کوشتاں برجاہ داریت۔ اے ردایار جان بادینی ءِ ادبی ءُُ لبزانکی جہدءُُ کوشستاں زاناں کہ آئی ءَ ملک ءُُ در ملک کہ بلوچی زبان ءُُ لبزانکءَ حب ءُُ واھگ داروکیں سنگتاں تعلقداری ءُُ نزدیکی داشتگ۔ اے آئی زبان ءُُ ادب دوستی انت۔ انچو اے بنیاتی چیز آئی زانت ءُُ دوستی ءَ پیش داریت۔ اے گپ راست انت کہ آئی ءَ روچ ماہ ءُُ سال پہ لبزانکی کاراں مدام دزگٹ بوتگ۔ انچو مدام وتی زند ءِ ہمک ماہ ءِ چھاپ ءُُ شنگ ءَ تیار بوتگ۔ زند ہمک ماہ اتک وتی وانوکاں سر بوتگ۔
2018 ءَ بگرتاں انوں میڈیا ءِ سرا سکیں بندش انت سرکار ءِ تب ءِ بیانیہ پروجیکٹ کنگ ءِ گپ پیسری حکومتاں چہ گیش بوتگ بلے ایش 2019 ءِ سال ءَ ھلاس بوتگ۔ جنوری 2020 ءَ بی بی سی ءَ وتی پیسریں 51 سال ءِ پروگرام سیربین بندکرت۔ انچو ھیرالڈ پنجاہ سال ءُُ نیوز لائن 30 سال ءَ پد بند بوت انت۔ ھیرالڈ ءَ نیوز لائن وڑیں انگریزی زبان ءِ نامی ایں تاک اتنت۔ سنسر شپ ءُُ مالی نگیگانی سوبءَ بند بوتگ انت۔ مئے دعا انت کہ ماہتاک بلوچی زند یار جان بادینی ءِ سروکی ءَ وتی ادبی ءُُ لبزانکی جہد ءُُ کوشست ءَ برجاہ بداریت ءُُ یک محکمیں ادارہ ءِ جوڑ بہ بیت۔ آؤکیں وھد ءِ گزر ءُُ لوٹاں پورہ بکنت۔ تنکہ بلوچی زبان ءُُ لبزانک دیما بروت ءُُ نوکیں دورے لبزانکی گزر ءُُ لوٹا پورہ بکنت۔