یار جان ءُُ بلوچی زند…..ڈاکٹر نعمت اللہ گچکی

یار جان بادینی ہما ڈگار ٹک ءِ جاہ منندے مردمے انت کہ اودے مردم دو زبان ءَ گپ کن انت۔ براہوئی ءُُ بلوچی زبان ہر دو نوشکی ءَ کار مرزبنت۔ نوشکی ءِ مردم بلوچی ءُُ براہوئی زبان ءَ شری ءَ حبر کنگ ءَ ھوار نبشتہ ھم کرت کن انت۔ نوشکی ہمامسکیں ڈگار انت کہ آئی ءَ بازیں نامی ایں زانتکار ءُُ کلمکار ودی کرتگ۔ اے مزنیں نامانی تہا میر گل خان نصیر ؔ، میر عاقل خان مینگل ؔءُُ آزات جمالدینیؔءِ نام شموشگ نہ بنت کہ آھاں بلوچی زبان ءُُ ادب ءَ باز دیما برتگ نوشکی ءِ ڈگار باز زرخیز انت اے ڈگار انوں ھم شرّیں کلمکار ءُُ حوالکار ودی کنگا انت۔ یار جان بادینی ءَ بلوچی زبان ءُُ ادب ءَ نہ ایوکہ پاکستان بلکں در ملکان ھم دیما برتگ۔ چہ ایشاں یکے یا رجان بادینی انت آئی ءَ چل سالانی تہا اگں من ادا مہ بیں گوں صحافت ءُُ ادب ءَ گوازینتگ۔ من پہ سدک دل گشیں کہ آئی ورنائی ءِ چل سال بلوچی ادب ءُُ ثقافت ءِ حاترا ندر کرتگ۔ من واجہ یار جان بادینی ءَ مبارکباد دئیں کہ آ ماہتاک بلوچی زند ءَ ابید اوشت ءَ چہ 20 سالاں درکنگا اِنت۔ ایشی ءَ ابید آئی لہتیں کتاب ھم چھاپ بوتگ چوشکہ میر گل خان نصیرؔ، عبداللہ جانؔ جمالدینی، غلام حسین شوھازؔ، بیگ محمد بیگؔ، عمان ءِ بلوچ ءُُ دومی کتاب ھوار انت۔
یار جان بادینی ءَ زبان، ادب ءُُ ثقافت ءِ پڑءَ ھم باز کار کرتگ۔ آئی ءَ بازیں سالاں ادارہ ثقافت بلوچستان ءُُ پریس کلب ءَ مُدام زبان ءُُ ادب ءِ باروا سیمینار ءُُ دیوان برجم داشتگ۔ آئی ءَ وترا تاں بلوچستان ءَ محدود نہ کرتگ۔ آئی ءَ اے درگت ءَ بازیں مُلکانی تر ءُُ گرد کرتگ۔ درانڈیھ بلوچ Diaspora ءِ باروا پٹ ءُُ پول کرتگ۔ کہ آھانی زبان لبزانک، دود ءُُ ربیدگ زندگ انت یا آھاں وتی زبان ءُُ ثقافت یل داتگ۔ اے مُلکانی تہا ترکمانستان، اوگانستان، ایران، عمان، قطر، بحرین ءُُ دومی بازیں ملک ھوار اَنت کہ یا رجان بادینی اودا شُتگ بلوچانی باروا پٹ ءُُ پول کرتگ۔ پدا وتی پٹ ءُُ پولی کار ءَ وتی تاک ءِ خاصیں نمبرے در کرتگ۔ انوّں ہما حاصیں نمبرانی کتابی شکل ءُُ دروشم ءَ چھاپ ءُُ شنگ کنگ ءَ انت کہ اے بلوچی زبان ءُُ لبزانک ءِ حاترا مزنیں مڈّی ءِ زانگ بیت۔۔
صحافت وت یک جتا ایں لبزانک ے انت۔ اے پڑ ءَ یا رجان بادینی یک پختہ کاریں زانتکار ے انت چوشکہ من آئی ڈول کار ءُُ کرد ءَ گندیں آ چدو باز برزا روت ءُُ دیمرئی کنت۔
ماہتاک ءِ در کنگ وت یک گرانیں کارے انت۔ ماہتاک ءِ در کنگ پدا آئی ءَ برجاہ دارگ وت یک مزنیں حبرے انت۔ ماہتاک بلوچی زند ءَ بیست سال بیت کہ یک شریں رنگ ءُُ دروشمے ءَ در آیگ ءَ انت۔ اے پٹ ءُُ پولی تاک ءِ گشگ بوت کنت۔ بلوچی زبان ءَ اے وڑیں بازیں تاک ءُُ ماہتاکانی گزر انت تنکہ بلوچی زبان ءُُ لبزانک دیما بروت۔
منا دگہ کسے معلوم نہ انت بلے ماہتاک بلوچی زند منا پہ وھد ءُُ پاس ءَ رسگ ءَ انت۔ ملک ءِ تہا پوسٹ ءِ جاور حال شر نہ انت ڈاک سر نہ بنت یار جان بادینی مدام زند ءَ وت سر کنت یا کسے ھوری ءَ راہ دنت۔
بلوچی زبان ءِ وانگ ءِ بازیں اڑ ءُُ جنجال است انت اول ایش انت کہ وانگی تاک پہ وھد وانوکیں مردماں سر نہ بنت۔ تنکہ آ تاک ءَ بوان انت ءُُ چیزے آئی سرا نبشتہ بکن انت دومی مزنیں جنجال ایش انت کہ بلوچی زبان ءِ وانندہ سک کم انت۔ بنیاتی چیز ایش انت ہما ہر کس کہ بلوچی زبان ءَ وانیت یا نبشتہ کنت یا وترا بلوچی زبان ءِ زانتکارے سرپد بیت،آ وت بلوچی ءَ نا وانندہ انت بلوچی زبان ءِ وانگ ءِ جہد انت ہر کسے نہ وانیت ہمے حاترا بلوچی زبان ءِ وانوک کم انت۔
سیمی گپ بلوچی زبان ءِ نبشتہ ءُُ لکھوڑے انت اے حساب ءَ بلوچستان ءِ ڈولیں علاقہ باز انت کہ آھانی گشوک ءُُ لکھوڑ چہ بلوچی زبان ءِ اندگہ نبشتہ کار ءُُ وانوکاں جتا انت آ یک ڈولے ءَ وانندہ گشگ بنت۔ اے درگت ءَ بلوچی زند وتی گاماں ترند بکنت کم ءَ چہ کم ہما جاگہاں کہ اودا بلوچی زند ءِ رھبندے وانوک باز بہ بیت۔ بلوچی زند ءِ وڑا بلوچستان ءِ ہر شہر ءَ بازار ءَ ادبی ءُُ لبزانکی تاک ماہتاک در بیا اَنت۔ ماہتاکانی نیام ءَ مقابلہ بہ بیت کہ کجام ماہتاک شر شریں مواد چھاپ ءُُ شِنگ کنگا اِنت اے وڑا شرّیں مواد چھاپ ءُُ شنگ بوھگا ھوار بلوچی زبان ءُُ لبزانک ھم دیما روت۔