ظفر علی ظفرؔ نمیران اِنت…..رحیم ظفر ؔ 

اے 1968 ءِ زمانگ ات من وتی گریجویشن توام کرتگ ات بی ایس او (انٹی سردار) باز گشاد و زرنگ ات۔بلوچستان ء قوم دوستی سیاست ءِ تک ءُُ پہنتات ءُُ آئے راستین رھبندانی سرا بحث ءُُ تران چارین کنڈان تالان ات۔اولی رندا بلوچستان ءِ سیاسی قبائیلی سروک ءُُ سردارانی سیاسی کرد ءِ سرا ایراد گیری ورناہانی دیواناں زیر بحث ات۔ یک نیمگا ما بی ایس او ءُُ نوکین سیاسی چست ءُُ ایرانی اڑءُُ جنجالان گلائش اتین دومی نیمگا لاپ ءُُ نان ءُُ روزگار ءِ پگر ہم گٹ ء لوپ ات۔
انچو کہ فیض صاحب گوشیت۔۔دنیا نے تیری یادسے غافل بنا دیا۔۔تجھ سے بھی دلفریب ھیں غم روزگار کے۔۔ مئے بزرگ سنگتانی تہا واجہ علی بخش تالپور و واجہ یوسف نسکندی ہر دوئین ھدا مرزی انت۔۔مئے روزگار ءِ باروا فکر مند ا تنت آہان اے ردا واجہ ھدا مرزی قادر بخش نظامانی صاحب ء ِکہ آ وھدا کراچی سویت یونین ءِ سفارت ءِ یک نشرو اشاعت ادارہ ءِ کار مستر ات مئے سفارش کرت۔۔
واجہ قادر بخش نظامانی صاحب ء ِمارا اے ادارہ ءِ تہا ملازمت دات۔۔وھدے من پہ دپتر ءِ سر بیتگان تہ بازین سنگت ءُُ بزرگ ادان کار کنگ ءِ دیست انت۔ واجہ عبداللہ جان جمالدینیؔ،واجہ مراد ساحرؔ، واجہ قیوم بارکزیؔ، واجہ رمضان بلوچؔ، آغا مسعودؔءُُ دگہ بازین پجہ آروک۔۔۔یہ ادارہ یک میگزین ”طلوع” چھاپ ءُُ شپنگ کنگ ات۔
ابید ایشی ءِ بلوچی،سندھی،پشتوءُُ دگہ علاقائی زبانان بلیٹن ھم چھاپ ءُُ شپنگ بیگ اتان۔
من طلوع میگزین ءِ شینگ ءُُ تالان Distribution کنگ ءِ ذمہ واری دئیگ بیت اودا مئے انچارج امام بخش بلوچؔ ات۔ منی اولی روچ ات امام بخش بلوچؔ کُلّین اسٹاپ ءِ گوں منی پجاری بزان تعارف کنگا ات۔ھمے دوران ءِ یک مزنین روسی موٹرسائیکل کہ آئے کش ءِ دگہ یک گیشین ڈبہ ھم بستگ ات آتک و مئے آفس ءِ دریگ ءِ دپ ءِ اوشتات یک لاگرین نزورین مردے چہ یہ بلاہ و ٹوھین موٹر سائکل ءِ ایر کپت دیم پہ پمنا آتک۔امام بخش بلوچ ءِ گشت یہ واجہ ظفر علی ظفرؔ انت۔۔آ وھداچو مروچیگین پیما ظفر علی ظفرؔ چوشین مزنین شاعر ءِ نہ ات۔۔بلے مھرناک ءُُ دوستناکین مردے ات۔من واجہ ظفر علی ظفرؔ اولی رندا دیستگ ات۔بلے من انچو ماریت کہ ما یکے دومی ءِ باز دیران چہ زانین روچ گوزاں من ءُُ ظفر علی ظفر ؔروچ پہ روچ نزیک بیان وڑ وڑین موضوع سرا گپ ءُُ تران جاری داشتگ ات۔۔بلے من چو ماریت کہ ظفر علی ظفرؔ ءِ اندر ءِ دگہ یک ظفر علی ظفرؔ ءِ بے تاھیر ڈن ءِ درائیگ لوٹیت۔۔اناگہ یک روچ منا یک شعر ءِ دو بند اشکنائنتی۔۔
؎”کپوتان پہ دل ء ِزیماں بچارت
زھیری نالگاں ساہتے بداریت“
من ماریت داں یک بلاھین توپان ءِ شرتگے ظفر علی ظفر ؔءِ جبین ءِ پہ ڈن ءِ درائیگ ءُُ بلوچی زبان ءِ سمبھینگ ءُُ پلگارکنگ ءِ بے تاھیرین۔مئے وش بہتی کہ یک روچ ءِ واجہ قادر بخش نظامانیؔ ءِ عظیم عوامی شاعر حبیب جالب ءِ یک مشاعرہ ءِ پروگرام ءِ جیبیس ھوٹل کراچی ءِ ٹاھنیتگ ات۔مارا کلین اسٹاف ءِ اے مشاعرہ شریک بیئگ لازمی ات۔مشاعرہءِ وھد بیگاہ ات پمشکا من ظفر علی ظفر زرت وتی کھارادر والا فلیٹ ءِ برت کمو آپ ءُُ تام کت دانکہ وتی ھمے شعر ءِ مروچی این مشاعرہ بوان ایت۔۔گشتے آ بازمزنین شاعر ءِ پدا مشاعرہ اردو انت۔۔من گشت تو وتی بلوچی شعر ءِ بوان من آئیا ترجمہ کناں۔۔۔بیگاہ ما وتا جیبیس ھوٹل ءِ سر کت بازین مہلوک ءِ اے مشاعرہ گوش دارگ آتکگ ات۔۔حال پرات من واجہ نظامانی ءِ گشت کہ ظفر علی ظفرؔ ء ِنام ءِ مشاعرہ ماں بنکنے آ ھم وتی شعر وانیت۔۔
بلے نظامانی صاحبءِ گشت اے مسلہ نہ انت بلے تو منا یک بلوچی مشہورین انچین بتل ءِ بگش کہ آ مازوے تنگ ءِ ھمے قول ءِ گوں میچ بکنت کہ SUCCESS NO WITHOUT ARM STRUGGLE.من گشت بگش۔۔۔” حیرانی تمن ویران انت کہ سیت گوں شکلیں جنگان انت ” من واجہ نظامانی ء ایشی ء ترجمہ ھم گُشت۔۔
وھدے نظامانی صاحب ءِ وتی تقریر ءِ تہا اے بلوچی بتل ءُُ ایشی ءِ ترجمہ گشت اے ھم گُشت کہ مازوے تنگ ءِ اے حبر ھنی کتگ بلوچان 500 سال پیسر گشتگ۔۔۔ہمینچو چاپ جنگ بیت کہ پیلئن حال ءِ توار ءِ چست بیت۔حبیب جالب ءِ پیسر یک دوشاعراں وتی شعر ونت۔پدا ظفر علی ظفر ؔءِ نام توار جنگ بیت۔۔ظفر ؔحیران پریشان بلے شت من ھم آئے کش ء ِاوشتاتان آئیا وتی شعر بلوچی زبان ءَ ونت من ترجمہ کت۔۔باز داد دئیگ بیت۔
پدا گڈا ظفر علی ظفر ؔءِ سنجیدگی ءِ گوں شاعری بنا کتءُُ مروچی آ بلوچی دستونک یا غزل گو شاعری ء سر ٹلان سر بیتگ۔۔ظفر علی ظفرؔ نہ ایوکا یک مزن نامین شاعرے بلکن یک نفیس،مھروان ءُُ باز مزنین انسان ءِ بیتگ مروچی آئی شاعری نوک باھندین شاعرانی حاترا نشان انت۔ظفر علی ظفر ؔزندگین آئی شاعری ہررنگ ءُُ دروشم ءَ نمیران انت۔