منی نا سرجمیں سوت ۔۔۔۔۔سُلیمان لائق (رجانک: میر بلوچ خان ؔ )

باندا نوکیں سال ءِ نیک بھیتں نوک منی پُلیں ڈیھ ءِ کوچگ ءُُ ڈناں وتی براہداریں رُژن تالان کنت ، بلے من انوں بہارگاہ ءِ موسم ءِ وش آتک کنگ ءَ تیار ءُُ ساجو نہ اوں ؛
باندا زیبا ءُُ ڈولداریں جنک کوہانی سرا دَرکپنت ءُُ تاجگیں پُل وتی زیبائیں بیکاں پُرمشنت ءُُ براہدار کن اَنت؛
ورناہیں شپانک وتی رمگاں پَراہ ءُُ شاھیگانیں ڈگارانی ملگزاریں چراگ جاہاں چارینگ ءَ بَرنت ، گمیں ہند ءُُ دمگاں لڈ ءُُ بار کنوکیں اولی ابابیل نادراہیں شاعر ءِ کڈک ءَ کیت ءُُ پتریت ءُُ آئی ءَ بھارگاہ ءِ موسم ءِ مستاگ ءُُ کلوہ ءَ سر کنت ؛
بہارگاہ ءِ وش بوہ ءُُ سُبک رفتاریں گوات ہر بزگ ءُُ چورہ ئیں دلاں وشی ءُُ لیب و گوازی ءِ جوزہ ودی کنت ءُُ آئی ءِ بَرد ستانی تہا نوکیں ءُُ توانائیں زندے ودی کنت ۔
سبزیں آزمان ءَ تالانیں سیاہ ءُُ بزیں جمبرانی نیام ءَ کونجانی قطار بستگیں رَم ، ورنائیں شکاریاں وتی نیمگا کشاں بکنت ؛ وھدیکہ پن چکی ءِ سرا بستگیں برف آپ بہ بنت تہ پن چکّی ءِ زھگ پُل بہ کشنت ؛
کِشار کارکوہانی نیام ءَ گرمیں داماں ءُُ کوچگاں یلہ دیاں ءَ سردیں کوہانی نیام ءَ لڈو بار بہ کن انت ءُُ بہار گاہ ءِ روگ ءِ موتکاں الہان بہ کن انت ۔
شہکو دُور سریں لُردیں آپاں کارنت کہ چو بد مَستیں اُشترانی ڈول ءَ آہانی چول چست بنت۔
ہمے وھد ءُُ پاساں راج دپتر ( تاریخ) جُہد کاریں راجانی کار ءُُ کردانی بابت ءَ یک دِگہ نوکیں تاکدیم ئے مٹ کنت ؛
بلے مَن پہ وتی اُلس ءِ اوست ءُُ اُمیتانی سرجمی ءِ حاترا تاں اے وھد ءَ وتی ٹیکی ءُُ سوگاتاں بہر ءُُ بانگ کرت نہ کرتگ مروچی من چو ہما روژنا گر ءِ ڈول ءَ آں کہ تہا رونکی ءَ زر ءِ یاگئی ئیں چولانی تہا اوژناگ نہ کنت ، بلے آئی ءَ اے سما نہ انت کہ وتارا چہ اے ڈولیں زوراکیں چولاں چوں بہ رکینیت ؛ گواچی ءَ من چہ اے چولانی تیلانکاں دل تپرکہ نہ اوں ، ءُُ وتی دراج پندیں جُہد و کوشستاں دَم بردہ ہم نہ اوں ، بلے منا ترس اِنت کہ منی اے سوت ناسرجم بیت ءُُ من وتی اُلس ءِ اوست ءُُ ہمے متاگ ءَ بہارگاہ ءِ بادشاہ ءَ پیش کُرت مہ کنیں؛اے منی بزگ ءُُ دِرتہ پُچیں مہلوکات !’’ گوں شما منی عرض ہمیش اِنت ، کہ منی کمک ءَ بکن اِت ‘‘ ۔