راج ءَ بے ھال کُت…..عمران جان بلوچ 

چوکہ من راج دوستاں گنداں من ءَ ھمے گمان بیت کہ تو شموشگ بوتگ ئے ،انچو گما ن بیت کہ تئی نام ءِ وڑیں مردم اے دنیا ءُُ جہانءَ نہ بوتگ۔ چیا من ءَ چو گمان بیت کہ تو پہ وت زندگ ءُُ پہ وت مُرت ئے؟۔ نبیل! تئی اے وڑیں وت کُشی ءَ رند اگاں راج غمیگ نہ انت بلے یک روچے کئیت کہ راج تئی کمی ءَ ماریت۔
نبیل قادرؔ چونیں راج دوست ءُُ ادب دوستیں سنگتے بوتگ ،ایشیءَ من شر زاناں ۔آ روچ منءَ انگت ءَ شری ءَ یات اِنت کہ نبیل قادرمنی گورءَ کراچی ءَ منی آفس چاکر جان ٹرانسپورٹءَ اتک ،گوں ہرسیگیں چماں من ءَ گشت ءِے کہ منی برات عمران جان !من حیراناں وتی ھلک ءُُ ملک ءِ مردماں گنداں کہ کس کسیگی نہ اِنت چیزے وتی ٹرانسپورٹءَ گوں دزگٹ اِنت ءُُ چیزے وتی فونءَ گوں دلگوش اِنت ،من کہ ھر دومی آفس ءَ رواں کہ وتی میتگ ءِ مردماں سلام ءُُ دعایے کناں بلے مردم من ءَ گنداں وتی دیم ءَ تہارکن اَنت، چو گشئے کہ من مردمانی گورءَ پہ ٹکٹ ءِ پنڈگ ءَ اتکگاں، یا زرّ ءِ پچگرگ ءَ۔ من گشت: نبیل ! تو وتی جاگہ ءَ راست گشئے بلکل ھمے وڑ اِنت بلے تو انگت نزان ئے کہ اے ٹرانسپورٹءِ مُنشی ءُُ سیٹاں، منی برات! ھیشانی تہا انچیں بے ضمیریں انسان ہست کہ مردین مردین انت اے ظالم زالبول ءُُ کماشانی عزت ءُُ احترام ءَ ھم نہ کن اَنت، اگاں زالبول ءُُ کماشے پہ زر ءَ نہ گیگ بہ بیتءُُ اے وڑیں منشیانی گور ءَ بروت کہ مارا مرچی مئے ملک ءَ دیم دئے کہ ڈاکٹراں مئے زر ہلاس کتگ انت ،اے گش انت کہ مئے دست ءَ ھچ نہ بیت مارا ٹرانسپورٹ ءِ واھند ءَ مکن کتگ کہ کس ءَ مفت ءَ ٹکٹ مہ کن اِت۔ اے بے چارگیں زالبولاں ھم جواب کن انت ، اگاں تو یک دیمے ھمے مُنشیاناں بچار کہ ایشانی وتی دوست ءُُ عزیز گوں فراڈو گاڑی ءَ سوار ایشانی گور ءَ کاینت اے آیانی مردماں بے زَر ءَ تربت ،گوادر ، مند ءُُ تمپ ءَ دیم دیئنت۔ اے کہ فراڈو ءَ کاینت ایشاں زر ءِ کمی ءَ نہ گپتگ بلے اے آ منشیانی دوست ءُُ سنگت اَنت ۔
نبیل قادر منی گپانی گوشدارگ ءَ پد حاموش بوت ءُُ ھچی نہ گشت ءُُ آئی ءِ چمانی تہا من ءَ دگہ بازیں جستے گندگ بوت۔
من ھمے گپ ءَ حیراناں کہ نبیل قادر ءِ وڑیں گشندہءَ کہ مئے راج ، ڈیھ ءُُ پُلیں ھمبلانی نازینگ ءَ روچ ءُُ شپ یک کت اَنت ، بلے مئے راج ءَ ھچ سما نیست انت کہ مارا چہ چونیں ہستی یے جدا بوتگ۔ من حیراناں ادیب ، شاعر ءُُ نبشتہ کارانی حاموشی ءَ کہ دو لبز پہ وتی قومی گشندہ ءَ نبشتہ نہ کن انت۔سک افسوس ءُُ دردناکیں گپ اِنت ۔ من سک پدردبوتاں آ روچی کہ سوشل میڈیا ءَ بلوچی ازمکار انور غلام، نبیل قادر ءَ بد ءُُ رد کنگ ءَ اَنت۔
سوشل میڈیا ءَ یک گونڈیں جیڑہ یے بہ بیت انور غلام بلوچ راھشون ءِ درگت ءَ درستاں ساری دیما کئیت ءُُ وتی دانکاں پہ راج ءَ ندر کنت ۔ بلے نبیل قادر ھم یک بلوچی گشندہے اَت ءُُ آئی ءَ وتی راج ساڑاتگ مدام گوں وتی شیر کنیں توار ءَ توئے انور غلام اگاں نبیل قادر ءِ توسیف ءُُ ستا نہ کت بلے بد ءُُ رد مہ کتیں ءُُ آئی ءِ ارواہ ایر جیگ مہ کتیں ۔ من شر چار اِتگ کہ منی دوستیں براتانی مزاج پہ کُلیں مئے بلوچی گشندہاں یک نہ انت ۔ اگاں مزاج یک بوتیں گُڑا کس ءَ نہ گشت کہ نورخان بزنجو وتی مرگءَ مُرتگ۔ من گُشاں کہ نور خان بزنجو وتی مرگ ءَ نہ مُرتگ! چیاکہ یک زانتکارے دست ء وت وتار ءَ مرگ نامیں نشاھانی آماچ کنت گڑابزاں کہ آئی ءَ وتارا وت کشتگ آ وتی مرگ ءَ نہ مُرتگ۔