شرپدارءُُ مڑاداریں واجہ ! یار جان بادینی

سلام ءُُ دروت ءُُ دْراہ بات پَہ شُما !
شُمئے لک منتواراں کہ ماھتاک’’ بلوچی زند ‘‘ءِ ھمک تاک برے زوت برے دیر بلے من ءَ رسگ ءَ الّم ءَ رس اِیت ءُُ پَہ اِے چیزئیگی ھم منتواراں کہ شُما منی دیم داتگیں ھمک ساچشتءَ وتی ماھتاک ءِ تہ ءَ جاہ دَئیت۔ پدا سک ھجالت آں ھم کہ ھجبر گوں منتواری ءِ نمدی ءَ دیم ءَ نَہ اَتکگ آں کہ اے کار مُدام من دستی گوانکو ءِ سرءَ کُتگ ۔ بلے زِیک کہ من ءَ ماھتاک’’ بلوچی زند‘‘ ءِ’’ اکتوبر۲۰۱۸ ‘‘ءِ تاک دست کپت ، چارگ ءَ گوں پیسرءَ وشّی یے بوت کہ منی گُلگدار ءَ ابید گوشتانک ھم ھوار اَت ۔ بلے رندءَ مُلور بوت آں کہ ھردوئین ءِ تہ ءَ چیزے نہ چیزے کمی یا ردی یے گندگ بوت ءُُ اَگں من ایشاں سرگوز بہ کناں، پَہ منی جند ءَ ءُُ پَہ ماھتاک’’ بلوچی زند‘‘ءَ ھم شر نَہ اِنت ۔
چوشکہ اِے گوشتانک من پَہ’’ نوکاپ لبزانکی مجلس ۔ فقیر کالونی کراچی‘‘ ءَ آھانی داتگیں سرھال ءِ سرا وَنتگ اَت ۔ پمشکا من وتی گوشتانک دیم دَیگ ءِ وَھد ءَ اِے گَل ءُُ ایشی ءِ مراگش ءِ نام ھم وتی سرھال ءِ چیرءَ مان داتگ اَت بلے چاپءَ رند اِے گوشتانک ءِ سرھال ءِ چیر ءَ نے گل ءِ نام است اَت نے کہ مراگش ءِ۔ ءُُ منی دل ءَ اِے شریں گپّے نہ اَت کہ وانوک چَہ گوشتانک ءِ سرھال ءِ جند ءَ لوٹ کن اَنت کہ اِے گوشتانک کُجانگور دِیگ بیتگ۔ پدءَ منی جند ءَ اے گوشتانک دیوان ءَدیگ ءَ رند گوں نوکاپ لبزانکی مجلس ءِ کارمستر واجہ امین ضامن ءَ زُبان ھم کُتگ اَت کہ ھرکُج ءَ اِے گوشتانک پَہ چاپ ءُُ شنگ ءَ دیم دَیگ بیت ، آھانی گل ءِ نام اَلم ءَ ھور کنگ بیت بلے بژنیگیں گپّے کہ شُمئے تاک ءَ چوش نہ بوت۔
دومی مزنیں گلگ کہ اِے نمدی نویسگ ءَ من ءَ مجبور ءِے کُتگ آ منی گُلگدار اَت کہ گوں شُمئے ماھتاک ءِ باسک اصغر لعلؔ ءَ بوتگ اَت۔
چوشکہ بازیں وانوک سرپد اَنت کہ من داں مزنیں مدّتے ءَ وتءَ چَہ دیواناںءُُ گُلگداراں پَہ بھر زورگ ءَ دیر داشتگ اَت ۔
اَگں راستی ءَ بہ گشاں گیشتریں سَوَب ھمیش اَت کہ وَھدے کسے منی گپّاں آ رنگ ءَ پھم اِت مہ کنت کہ منی گوشگ ءِ مول ءُُ مراد بہ بیت گُڑا الّمی نہ اِنت کہ من وتی یا دیم ءِ مردم ءِ وھد ءَ زوال بہ کناں۔
چوشکہ شُمئے وتی جند ءَ گوں من ءَ دوسے رند ءَ گُلگدار ءِ گپّ جَتگ اَت بلے برے منی دزگٹی ءُُ برے شُمئے دزگٹی ءِ سوب ءَ اِے کار پشت کپتگ اَت پمشکا وَھدے شُمئے باسک ءَ چَہ شُمئے نیمگ ءَ رَھوت کُت، من ھما دمان ءَ منّ اِت ۔ آئی ءِ بازیں جُستانی پیم من ءَ دوست نہ اَت اَنت پمشکا پسّو ءَ من آ تچک کنگ ءِ ھم جُھد کُتگ اَت ءُُ چوشیں ھچ گپّے مَن سرگوز نہ کُتگ کہ یک لبزانکی تاکے ءِ لوٹ بِہ بنت ءُُ من چَہ پسّو دیگ ءَ پش بہ گیجاں ۔ بلے وَھدے کہ چاپ ءَ رند گُلگدار ءِ پجّار ءَ منی چَم کپت من ءَ سرترّگ ءَ گپت کہِ اے گپّ من کدی جتگ اَنت کہ واجہ اصغر لعل ءَ نبشتہ کُتگ اَنت۔
منءَ وھدے پجّار ءِ جُست کنگ بیت چوشکہ من وتی چاپ بوتگیں کتابانی پُشتی تاک ءَ مدام داتگ اَت کہ منی نام ’’ زاھدہ رئیسی ‘‘ اِنت ءُُ ندنام ’’ زاھدہ رئیس راجی ؔ ‘‘ گُڑاباید اَت کہ پجار ءِ تہ ءَ چہ اے دوئیں ناماں یکے گیچین کنگ بیت اِنت مٹ کنگ مہ بیت اِنت۔
دومی گپ من وتی گُلگدار ءِ تہ ءَ ’’ بلوچ پروموٹیوکمپیوٹر انسٹیٹیوٹ گولیمار ۔ کراچی ‘‘ ءَ مپتی وانینگ ءِ باروا گوشتگ اَت کہ اِدءَ من سالے نیم ءَ کارءَ رند ھپتگے یک یا دو کلاس داں دیمترءِ ھشت نو ماہ ءَ داتگ ۔ کساس دوسال مزنیں مُدتے وَ گوشگ نہ بیت اِنت کہ واجہ اصغر لعل منی پجّار ءِ تہ ءَ گوشگ ءَ اِنت۔ چَہ ایشی ءَ گیش وَ منی کار باسک لبزانکی دیوانءِ سرا اَنت کہ من ءَ سینزدہ سال اِنت کہ گوں اے کار ءَ ھمگرنچ آں۔
سیمی گپ کہ واجہ اصغر لعل ءَ چَہ وتی نیمگ ءَ جَتگ اَت کہ:
’’ آ بلوچی لبزانک ءَ واجہ غنی نقش ، محمد بیگ بیگل ءُُ اصغر علی آزگ ءَ وتی رَھشون زانت ۔ ‘‘آاَگں کسے منی گُلگدار ءَ پَہ الکاپی ءَ بوان اِیت آ ھم پھم اِیت کہ اِے شرپداریں واجھاں من ءَ وتی نام نہ مٹیگنگ ءُُ ماں بلوچی زبان ءَ ماھل بلوچ ءِ جاہ ءَ زاھدہ رئیس راجی ؔ ءِ نام ءَ دیم برگ ءِ نیمگ ءَ دلبڈی ءُُ سکین داتگ اَت۔
اِے گپّ لبزانکی رَھشونی ءِ رِ دا وَ ھوار نَہ بیت اِنت کہ لبزانکی رَھشون ھما مردم ءَ گوش اَنت کہ لبزانک ءِ ھمک تک ءُُ پھنات ءَ سرءُُ سوج بِہ دَنت ءُُ گام گام ءِ سرءَ شری ءُُ بدی ءِ شون ءَ بہ دَنت بلے اِے واجھاں گوں چوشیں رَھوتے وَ نہ بوتگ ءُ نے کہ وتی گُلگدار ءِ تہ ءَ من ایشانی یا دگرے ءِ رَھشونیءِ گپ جتگ اَت ۔
اگں مَنءَ جنگی بوت اِنت گُڑا چَہ وتی کما ش محمد سلیمان رئیسی ءَ رند مَن ناکو عبدالصمد امیری ءِ نام اَلّم ءَ نبشتہ کُتگ اَت کہ آئی ءَ باسک دامَگءِ بنداتی روچاں منی بلوچی پلگارگ ءِ رَھشونی کنگ ءَ ابید منی زاتی زندگی ءَ ھم من ءَ بازیں جاھاں وتی ھکیگیں چُکّ ءِ رنگ ءَ رَھشونی داتگ۔
اِے نمدی ءِ وسیلہ ءَ من گوں واجہ اصغر لعل ءَ گوشگ لوٹ آں کہ واجہ غنی نقش ، واجہ محمد بیگ بیگل ءُُ واجہ اصغر علی آزگ پَہ من سک شرپداراَنت ءَ آھاں اگں جاھے ءَ منی شائری یا دگہ ساچشتے ونتگ دلبڈی الّم ءَ داتگ اِت بلے گُلگدار ءِ تہ ءَ من تھنا دلبڈی ءُُ سکین ءِ گپ جَتگ ۔ باید واجہ اصغر لعل دلِبڈی ءُُ رَھشونی ءِ میان ءِ تپاوت ءَ بِہ زانت۔
اگں منی گپّ جاھے ءَ تْرند بیتگ من چَہ شُما ءُُ واجہ اصغر لعل ءَ پَھِلی لوٹاں ۔ بلے اِے دزبندی ءَ کناں کہ دیمترا ھیالداری بِہ کن اِت کہ اے رنگیں ردی کہ تاک ماھتاکاں چاپ ءُُ شنگ بنت دیمتر ا ریکارڈ ءَ ایر بنت۔
مدام سوبین بات اِت
گوں نیکیں دُوایاں
شُمئے کستر
زاھدہ رئیسی
وتی راج ءِ ھیر لوٹوک
۔۔۔*۔۔۔*۔۔۔*۔۔۔