رپورٹ: محمد اعظم بلوچ

زند اکیڈیمی نوشکی ءُُ بلوچی لبزانکی دیوان ءِ نیمگا مزن نامیں شاعر ظفر علی طفرؔ، عید محمد عیدؔ، رحیم بخش آزاتؔ، رحیم بخش نازؔ، حکیم بلوچؔ ءُُ طاہر پیشکانیؔ ءِ یات ءَ دیوان

رپورٹ: محمد اعظم بلوچ

7 جولائی 2019 ءَ یک شمبے ءِ روچ ءَ بیگاہ ءِ چار بج ءَ بلوچی زبان ءِ نامداریں شاعر ظفر علی ظفرؔ، عید محمد عیدؔ، رحیم بخش آزاتؔ، رحیم بخش نازؔ، حکیم بلوچؔ ءُُ طاہر پیشکانی ؔءِ یات ءَ یک پُرسی دیوانے پریس کلب کوئٹہ ءَ برجم دارگ بوت۔ اے دیوان ءِ جارچیں شاہینہ شاہین اَت۔
دیوان ءِ بندات کلام پاک ءِ تلاوت ءَ بندات بوت، کلام پاک ءِ تلاوت ءِ شرف محمد اعظمؔ ءَ حاصل بوت۔
اے دیوان ءِ پاگواجہ ماہتاک بلوچی زند ءِ سر شونکار یار جان بادینی اَت، وھدیکہ حاصیں مہمان بلوچی زبان ءِ نامداریں شاعرواجہ بشیر بیدارؔ اَت ءُُ اعزازی مہمان بلوچستان ءِ جا ن سلامتی ءِ پیش ءِ سر وزیر میر رحمت بلوچ ؔاَت۔

دیوان ءِ دیما تران کنان ءَ تاج محمد تاجلؔ ءَ گُشت کہ من رحیم بخش نازؔ ءُُ حکیم بلوچؔ ءُُ دومی ھدا مرزی آں گوں دل ءِ جہلانکی ءَ سلام پیش کناں کہ آھان وتی زند بلوچی زبان ءُُ لبزانک ءِ ھذمت ءَ گوازینت، آئی ءَ گُشت رحیم بخش ناز ؔءَ وتی زند ءِ تہا بازیں مسئلہ ءُُ جنجال دیستگ۔ بلے آئی ءَ وتی زند بلوچی ساز ءُُ زیمل ءِ حاترا ندر کرتگ اَت۔ بلوچی زبان ءِ ازمگر ءُُ آرٹسٹاں بازیں مسئلہ ءُُ جنجال دیما انت، سرکار ءِ نیمگا آھانی ہچ مدت ءُُ کمک نہ بیت۔ ازمگر ءُُ آرٹسٹ وتی قوم ءُُ راج ءِ سفیر انت۔ بلے نادرا ءُُ بیمار انت بزگی ءَ مرانت کسے آھاں ءَ جُست ھم نہ کنت۔
بلوچی زبان ءِ کراچی ءِ نمائندہ اصغر لعلؔ ءَ گلزار گچکیؔ ءِ نبشتانک استاد رحیم بخش نازؔ ءِ زند ءُُ ازمی سفر ءِ باروا ونت چریشی ابید اسحاق خاموشؔ ءِ نبشتانک طاہر پیشکانیؔ ءِ باروا عامر بلوچؔ ءَ دیوان ءِ دیما ونت ءُُ پیش کت۔
دیدگ بشیرؔ ءَ بانک بینش بخش ؔءِ نبشتانک بلوچی زبان ءِ نامداریں شاعر ءُُ کلمکار واجہ عید محمدعیدؔ ءِ باروا ونت ءُُ دیوان ءِ دیما پیش کت۔
میر بلوچ خانؔ ءَ واجہ رحیم بخش آزاتؔ ءِ لبزانکی ءُُ احوالکاری کردے باروا نبشتانک ونت دیوان ءَ ساڑھی ایں مردماں میر بلوچ خانؔ ءِ نبشتانک باز دوست داشت۔
بانک زاہدہ رئیس راجیؔ ءَ دیوان ءِ دیما وتی یک پر مغذیں مقالہءِ پیش کرت کہ آئی سرحال ”ظفر ءَ گوں وتی شائری ءَ یک کرنے ءِ کسہ توام کرت۔
دیوان ءَ ساڑی ایں مردماں بانک زاہدہ رئیس راجی ءِ نبشتانک باز دوست داشت۔
پروفیسر رحیم مہرؔ ءَ ظفر علی ظفرؔ ءَ گوں وتی یک براھداریں نبشتانکے ءَ شرّیں وڑھے ءَ خراج عقیدت پیش کرت۔ آئی سرحال ات”ظفر ءِ دستونک ءِ ازمی ءُُ فکری پہنات“ واجہ رحیم مہرؔ ءَ ظفر علی ظفرؔ ءِ شاعری ءِ ردانک ءُُ پہناتانی سرا گپ جت ءُُ آئی لبزانکی ھذمتاں سہڑاھت۔
پروفیسر واجہ اے آر دادؔ وتی نبشتانک ”ظفر ءِ امروز“ ءِ دیوان ءِ دیما ونت ءُُ پیش کرت واجہ اے آر دادؔ ءِ ظفر علی ظفرؔ ءِ شاعری ءُُ زند ءِ سرجمی ءَ عکس بندی کرتگ ات۔
دیوان ءَ ساڑی ایں مردماں آئی نبشتانک ءَ باز دوست داشت۔ دیوان ءِ دیما تران کنان ءَ ڈاکٹر عبدالصبور بلوچؔءَ ھم وتی یک شریں نبشتانک ءِ ظفر علی ظفرؔ ءِ باروا دیوان ءِ دیما ونت ءُُ پیش کرت کہ بلوچی شاعری ءُُ غزل ءِ پڑ ءَ لہتیں شاعراں کہ آ کمال ءِ شاعری کت انت ا ٓھانی بنداتی سرپ ءِ تہا یکے ظفر علی ظفرؔ انت۔ باھد انت نوک باھندیں شاعر ظفر علی ظفرؔ ءَ مدام بوان انت ءُُ آئی ءِ شاعری ءِ باروا ھیل کاری دربر انت۔
دیوان ءِ دیما تران کنان ءَ جان سلامتی ءِ پیش ءِ وزیر میر رحمت بلوچ ؔءَ زند اکیڈیمی ءُُ بلوچی لبزانکی دیوان ءِ شکرءُُ منّت ءَ گپت کہ آ مدام بلوچی زبان ءِ لبزانک ءُُ بلوچی زبان ءِ ازمگر ءُُ آرٹسٹانی روچ ءَ داریت۔ بلوچی زبان ءُُ لبزانک ءِ باروا پروگرام برجم داریت آئی ءَ گُشت ظفر علی ظفرؔ بہ بیت، عید محمد عیدؔ یا رحیم بخش آزاتؔ ءُُ مئے دومی گُشندہ ءُُ آرٹسٹ آھانی ھذمت قوم ءُُ راج ءِ حاترا سک باز انت چیاکہ آ مئے زبان ءُُ لبزانک ءَ دیما برگ ءَ ھوار مئے ساز ءُُ زیمل دود ءُُ ربیدگ ءَ ھم دیما برگ ءَ انت۔ وھدے مئے سرکار ات بلوچستان ء ِ مہلوک اے گپ ءِ شاھدی ءَ دنت کہ بلوچی، براہوئی ءُُ پشتو زبان ءِ حاترا باز کار کنگ بوتگ۔
مئے سرکار ءَ ماتی زبان آں شرّیں وڑے دیما برت بلکیں مئے بلوچی، براہوئی ءُُ پشتو اکیڈمی ءِ زراں ھم گیش کرت۔ انچو پہ شاعر ءُُ کلمکارے کتاب ءِ زرے سوب ءَ چھاپ نہ بوت ڈاکٹر مالک ؔءَ وتی نیمگا کتاباں چھاپ ءُُ شنگ کرت۔
انچو منا یات انت بلوچی ڈیپارٹمنٹ یونیورسٹی آف بلوچستان ءُُ واجہ ظفر علی ظفر ؔءُُ بیگ محمد بیگلؔ ءِ باروا پروگرامے برجم داشتگ ات۔ من وتی وس ءُُ واک ءِ نیمگا آھان لکھ لکھ کلدار دات۔ چریشی ابید ڈاکٹر مالک بلوچؔ ءُُ بلوچستان ءِ درا شاعر، کلمکار، کواس، حوالکار،ازمگر ءُُ آرٹسٹاں زردات تنکہ آ وتی دارو درمان ءَ کرت بکن انت ءُُ زھگاں بوانیں انت ڈاکٹر مالکؔ ءَ دراں ڈویژنل، ہیڈکوارٹر اں کلچر سینٹر جوڑ کنگ ءِ جہد ءُُ کوشست کرت۔ تنکہ سرونز دمبورہ گار ءُُ بیگواہ مہ بیت۔
دیوان ءِ خاصیں مہمان ءُُ بلوچی زبان ءِ نامداریں شاعر بشیر بیدار ءَ تران کناں ءَ گُشت کہ من یا رجان بادینی ءِ منّت واراں کہ آئی ءَ مارا کراچی ءُُ خاصیں وڑا اے دیوان ءِ حاترا لوٹائینتگ ءُُ شرف بخشاتگ۔ من سال 2014 ءَ پد کوئٹہ ءَ نہ آہتگ۔ انوں مزنیں مدتے ءَ پد یار جان بادینی ؔءِ گشگ ءِ سرا من ءُُ منی بچ دیدگ شہر کوئٹہ ءَ آہتگ ءُُ اے پرسی دیوان ءَ بہر زورگاں۔
ظفر ءَ من باز نزیک بوتگ یک مشاعرہ ءِ تہا ماں ھور اتنت واجہ مراد ساحرؔ ؔ،صدیق آزاتؔ، احمد زھیر ؔ، اسحاق شمیم ؔءُُ ظفر علی ظفرؔ ءَ بہر زرت۔
ظفر ءَ وتی غزل
؎ ”کپوتاں پہ دل ءِ زیماں بچار اِت
زھیری نالگاں سھتے بداراِت“
ظفر علی ظفرؔ یک باز مزنیں مردمے اَت خواریں مردمے اَت۔ مزنیں مدتے ءِ ملک ءَ چہ ڈن ءَ ات بلے آئی ءَ مدام وتی سنگتاں یات داشت۔ آئی شاعری وتی مَٹّ وت ات انت۔ ظفر ءِ روچ ءَ دارگ ءِ واستہ من یار جان بادینیؔ ءُُ آئی سنگتاں یک وارے پدا سلام گشین کہ درستیں بلوچستان ءِ تہا ایوکہ کوئٹہ ءَ زند اکیڈیمی ءَ ظفر ءِ یات ءُُ پرسی دیوانے داشتگ۔
دیوان ءِ دیما تران کنان بلوچی لبزانکی دیوان ءِ چیئرمین یا جان بادینیؔ ءَ ظفر علی ظفرؔ، عید محمد عیدؔ، رحیم بخش آزاتؔ، رحیم بخش نازؔ، حکیم بلوچؔ ءُُ طاہر پیشکانی ؔءَ خراج عقیدت پیش کناں ءَ گُشت کہ حدا آھان ءَ وتی بہشت ءَ جاگہ بدانت ءُُ آھانی پد منتگاں صبرے طاقت ءَ بدنت۔
آئی ءَ گُشت کہ من ظفر علی ظفرؔ ءُُ واجہ عید محمد عیدؔ ءَ ابید دگہ دومی واجہاں نہ دیستگ۔ بلے اے مئے فرض انت کہ آہانی وتی زند بلوچی زبان ءُُ لبزانک بلوچی ساز ءُُ زیمل ءُُ موسیقی ءِ حاترا ندر کرتگ انت۔ ماں دگہ ھچ کرت نہ کناں کم ءَ چہ کم آھاں ءَ خراج عقیدت پیش بکناں ءُُ آھانی کار ءُُ کرد ءِ توصیف ءَ بکناں۔
ظفر علی ظفرؔیک انچیں شاعرے ات کہ منی اولی گند ءُُ نند گوں آئی ءَ ابودبئی ءَ بوت اودا من ماہتاک بلوچی زند ءِ حاترا یک انٹرویو کرت۔ پدا گوں آئی ءَ مدام سلام ءُُ دعا بوت آئی مرک ءَ چہ لہتیں ماہ پیش ماہتاک بلوچی زند ءِ نمائندہ اصغر لعل ءَ ھم ظفر علی ظفرؔ ءَ گوں گند ءُُ نندے کرتگ ات کہ ماں زند ء تہا چھاپ ءُُ شنگ بوت۔
انچو من آئی واستہ مدام ماہتاک بلوچی زند آئی ڈس ءُُ نشانے سرا راہ دات آئی ءَ گُشت یار جان ترا شاباش انت کہ تو تاک دیم دے پدا جُست گرے کہ تاک سر بوتگ نہ۔ تئی اے جہد ءَ چہ منا منی ورناہی ءِ دور یات کیت۔ وھدے من یو ایس ایس ار ءِ سفارتخانہ ءَ کار کنگا ات من طلوع مجلہءَ در کرت ءُُ مردماں سر کرت۔
انچو واجہ عید محمد عیدؔ ءَ گوں منی گندِ ءُُ نِند ھم العین امارات ءَ بوتگ ات آ یک باز شریں انسانے اَت۔ مردم ءَ مدام ھذت ءُُ شرف بخشات منی دلی واھگ ات کہ کوئٹہ ءَ سیمینار ءُُ کانفرنس ءِ بہ بیت۔ تنکہ واجہ عید محمد عیدؔ ءَ بلو ٹائیناں بلے مرگ ءَ آئرءَ اجازت نہ دات تنکہ مئے گوں آئی کوئٹہ ءَ گند ءُُ نندے بہ بیت۔
مرگ برحق انت بلے شریں انسان ہما انت کہ آ وتی قوم راج ءُُ وطن ءِ حاترا چیزے کنت من گڈ سرا واجہ بشیر بیدارؔ، دیدگ بشیر ؔ، اصغر لعل ؔ، ڈاکٹرصبور بلو چؔ، رحمت بلوچ ؔ، زاہدہ رئیس راجیؔ، اے آردادؔ، رحیم مہرؔ، میر بلوچؔ خان ءُُ درا چہ کماشانی منت ءَ گراں کہ آ اے پرسی دیوان ءَ بہر زُرت ءُُ وتی قوم ءُُ راج شاعر، کلمکار ءُُ ازمگراں خراج عقیدت پیش کرت۔
دیوان ءِ جارچین ءَ دیوان ءِ ھلاسی ءِ جار جت اے دیوان تاں سئے ساعتاں برجاہ منت دیوان ءِ گُڈّ سرا دیوان ءَ ساڑی ایں مردمانی شرف ءَ ریفرشمنٹ دیگ بوت۔
رپورٹ:ا عظم بلوچ