بنیادی صفحہ / آزمانک / ریک ءِ سرا ترانگے…..چندن ساچ 

ریک ءِ سرا ترانگے…..چندن ساچ 

من ءُُ پت برزیں ریکے ءَ بالا بوہگ ءَ اتیں۔ پت ءِ دست ءَ تھیلی یے اَت ءُُ آئی ءِ تہا چار دانگ انار ءُُ کمو انگور مان ات کہ ما شہر ءَ زرتگ اتنت۔ من ءُُ پت مدام دیگر ءِ وہد ءَ شتگ ات ءُُ ہمے ریک ءِ سرا نشتگ اتیں۔۔۔۔۔ دیما دریا ءِ ندارگ چارِتگ اتنت۔ دائمی وڑا من ءُُ پت شتیں ریک ءِ نلّے ءَ نشتیں۔ جمبری اَت۔ گوات لہم لہم ءَ کشگ ءَ اَت۔ پت ءَ تھیلی ءِ دپ پچ کُت۔ من انارے زرت ءُُ ورگ ءَ بوتاں۔
دریا ءِ نیمگا مُج ات۔ من پت ءَ را گُشت۔ اباّ مروچی دریا شرّی ءِ سرا گندگ بوہگ ءَ نہ اِنت۔
پت ءَ گُشت ہو۔۔۔۔ مُج چیزاں اندیم کنت۔ پدا من دومی نیمگا چَک ترّینت، تہ دومی نیمگا کبرستان ات ءُُ کبرستان ءِ نیمگا مُج نیست اَت۔ من پت ءَ را پدا جُست کُت۔ ابا گڑا کبرستان ءِ نیمگا مُج پرچا نیست؟
پت ءَ پسہ دات۔۔۔ مُج دریا ءِ تہا انت۔ ڈن ءَ مُج نیست۔۔۔۔ اے مُج دریا ءَ چست بنت ءُُ جمبر بنت۔ جمبر پدا گوار اَنت۔۔۔۔۔
منی انار ہلاس بوتگ ات۔۔۔ من نوں انگوراں گوں سر ءُُ پُٹ اتاں۔ پت گُشگ ءَ ات۔۔۔۔ ہور ءِ وہد ءَ اے ریک ءِ سرا نندگ ءُُ ندارگانی چارگ ءِ وتی یک وشی یے۔۔۔۔۔
من گُشت ہو اباّبَلے ہور ءِ وہد ءَ دیم گوں دریا ءَ مہ بیت۔۔۔ پرچا کہ دریا ءَ مُج بیت۔۔۔ مُج ندارگاں اندیم کنت۔۔۔ ہور ءِ وہد ءَ اگاں دیم گوں کبرستان ءَ بہ بیت گڑا ندارگ سک وش بنت۔۔۔
ما پدا وتی جاہ ءَ چہ پاد اتک ءُُ دیم پہ لوگ ءَ شُتیں۔۔۔۔۔۔۔۔
مزنیں مُدّتے ءَ پد مروچی پدا من اتکگ ءُُ ہما ریک ءِ سرا نشتگاں۔ بَلے مروچی من ایوکاں ءُُ وتی پت ءَ یات کنگ ءَ یاں۔۔۔۔ مروچی ہم ہما وڑا جمبری انت ءُُ مُج دریا ءِ سرا نشتگ۔
بَلے من کبرستان ءِ نیمگا چارِت کنگ ءَ نیاں۔۔۔۔۔ چم ارسی اَنت ءُُ ارسی ئیں چماں گوں کبرستان ہم مُج ءِ تہا گندگ کیت ءُُ من وتی پت ءَ مُج ءِ تہا چارگ نہ لوٹاں۔۔۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*