بنیادی صفحہ / آزمانک / کرامات…..چندن ساچ 

کرامات…..چندن ساچ 

منی کماش ہر چار شمبے ءِ روچ ءَ میاہ جھنڈو نامیں مردمے ءِ گندگ ءَ شتگ ات ءُُ من ہم کماش ءِ ہمراہ اتاں۔ جھنڈو چہ شہر ءَ دُور، جنگل ءَ دریا ءِ دپ ءَ ایوک ءُُ تہنا نشتگ ات۔ آئی ءِ بندر مزنیں کہورے ات ءُُ کہور دریا ءَ چہ کمو گستا اَت۔ کہور ءِ چیر ءَ لہتیں کوہن ءُُ درتگیں تگرد پچ ات۔ دریا ءِ نزینک ءَ کوہے ات ءُُ ہمے کوہ ءِ سر ءَ میاہ جھنڈو ءَ شپ ءَ عبادت کتگ ات۔ کوہ ءَ را یک نیمگے دریا سک ات ءُُ دومی نیمگا حشکی ات۔ حشکی ءِ نیمگا کوہ ءِ دیما کونڈے ہم ہست ات کہ زمستانی شپاں میاہ جھنڈو ءَ ہمے کونڈ ءِ تہا عبادت کتگ ات۔ جھنڈو ءِ لہتیں رلی ءُُ کتھو کہور ءِ چیر ءَ ات ءُُ لہتیں ہمے کونڈو ءِ تہا۔۔۔۔۔میاہ جھنڈو پٹکیں مردے ات ءُُ ریش ءِے کسان ءُ ُسر ءِ مود ءِے سک دراج اتنت۔ گپ گپ ءِ تہا برے برے اناگہ ءَ بے توار بوتگ ات ءُُ برے برے چہ وتی جاہ ءَ پاد اتکگ ات ءُ ُکوکار ءِے کتگ ات۔ باز وہد ءَ انچیں زبانے ءَ حبر کتگ ات ءِے کہ ما آئی ءِ حبراں سرپد نہ بوتگ اتیں۔
میاہ جھنڈو ءِ کِرا برے برے من جینے ہم دیستگ ات کہ آئی ءِ عمر کساس سال پنجاہ بوتگ ات۔ جان ءَ پُر ءُُ وش روحیں جنینے اَت۔ من کماش یکرندے ہمے جنین ءِ بابت ءَ جست کت کہ اے جنین میاں جھنڈو ءِ چی اِنت۔ کماش ءَ من ءَ گشت کہ اِے جنین میاہ جھنڈو ءِ مرید اِنتءُُ اِے چہ باہو ءَ کیت ءُُ مزنیں جاتوے۔ ہمے جنین ءَ مزن مزنیں مہرگ گُٹ ءَ ات۔ چار ءُُ پنچ ہفتاری دنتان ہم ہمے مہرگانی تہا مان ات۔ آئی ءِ راستیں دست ءِ چونکی لنکک ءَ مندریکے ہم مان ات کہ آئی ءِ ٹِپ سبزے اَت۔ برے برے من آئی ءِ پیشانی ءِ سرا چم سک داتگ اتنت کہ باریں منی بازیں چارگ ءَ آئی ءِ تب حراب بیت کہ نہ بیت۔ بلے آئی ءَ ہچبر وتی دیم تہار نہ کُت۔
من جاتوانی بارو ا بازیں کسہ اش کتگ ءُُ ونتگ ات کہ اِے کپتوکیں جنینانی دل ءَ کش انت ءُُ اگاں ایشاں بال کنگی بیت گڑا کنگیں مرغاں سوار بنت ءُُ بال کن انت۔ اگاں حشکی ءَ دراجیں پندے ءَ کہ سفر ءَ در کپنت گڑا اے ہفتاراں سوار بنت ءُُ سفر ءَ در کاینت۔۔۔۔۔ من جنین ئیں جاتوانی بابت ءَ اش کتگ ات کہ آ ہفتاراں گوں وتی جنسی واہگاں ہم پیلہ کن اَنت۔
مئے ہمساہگے ہست ات کہ آئی ءِ نام ڈولی ات۔ ما آئی ءِ لوگ ءَ مدام شت ءُُ کسہ گوش داشت۔۔۔۔ ڈولی ءِ دیوان ءَ کسان عمر ءُُ مزن عمریں ہر وڑیں مردم اتکگ ات۔ آئی ءِ پیرکے ءِ نام بیت بہرام شکاری۔۔۔۔ ڈولی ءَ وتی پیرک ءِ کسہ آورتگ اتنت کہ آ سکیں کُنڈ گردیں مردے بوتگ۔ کراچی، بمبئی، بصرہ، مشکت، ایران، کندہار ءُُ بازیں ملکاں سیل کنت۔ لہتیں سال آ گوں دُز ءُُ ٹیکاں ہم گوازینت ءُ ُآئی ءِ سر صومالیہ ءَ کپیت۔ صومالیہ ءِ وہد ءَ آئی ءَ جاتوئی در برگ ءِ ھُب گور جنت۔ پدا آ گڑا مشکت ءَ روت۔ مشکت ءَ ماکو نامیں جنینے بیت کہ سکیں مزنیں جاتوے بیت۔ بہرام ءِ سنگتے آئی ءَ سوج دنت کہ تو ماکو ءِ گورا برو جاتوئی در بر۔۔۔۔۔
بہرام مشکت ءَ ماکو ءِ لوگ ءُُ ٹکانہ ءَ شوہاز کنت ءُُ گوں آئی ءَ وتی شوق ءِ گپ ءَ کنت کہ من ءَ جاتوئی ءِ ھُب ءُ ُواہگ ءَ گور جتگ ءُُ من مکران ءِ مردماں بَلے چیزے سال اِنت کہ مشکت ءُ ہمے دمگاناں، من ءَ تئے ماکو وتی مُرید کن۔۔۔۔ جاتو ماکو یکبرے بہرام ءَ وتی مرید کنگ ءَ رازی نہ بیت۔۔۔۔ بہرام دو سئے روچ ءَ پد ماں پد آئی ءِ لوگ ءَ روت ءُُ ماکو ءَ بازیں منتے کنت ءُ ُگشیت من مراں کہ زندگ باں نوں واتر نہ رواں۔۔۔۔ بازیں اینگر ءُُ آنگر کنگ ءَ پد، ماکو آئیءَ گشیت کہ شر گڑا منی گورا بجل من ترا جاتوئی ءَ سوج دئیاں بلے جاتوئی ءِ اولی شرط ایش انت کہ ترا وتی دوستریں مردمے ءِ دل کشگی ءُُ ورگی اِنت۔۔۔۔ بہرام اے شرط ءَ منظور کنت۔۔۔۔ گڑا ماہے کپے ءَ آ چہ جاتو ءَ بازیں چیزے دربارت۔ بَلے آ یک چیزے ءَ حیران بیت کہ جاتو ماکُو ہر شپ تالے بٹ ءَ پُر کنت ءُُ زوریت روت ڈن ءَ۔۔۔۔ پدا گوربام ءَ کروسانی اولی بانگ ءَ لوگ ءَ واتر کیت، آئی ءِ دست ءِ تال حالی اِنت۔۔۔۔یک شپے ماہیکانی بیت ءُ بہرام ماکُوءِ سرا بیت کہ چاراں باریں اِے کُجا روت۔۔۔۔
ماکو آئی ءَ ورگ وارینت ءُُ شام ءَ پد آ چو دائمی وڑا وتی واب جاہ ءَ روت پہ وپسگ ءَ۔۔۔۔۔ بَلے آ وت ءَ ساڑی کنت کہ مروچی من الم ماکو ءِ سرا باں، باریں اِے ڈن ءَ روت چے کنت۔
شپ ءِ نیم ءَ ماکو وتی تال ءِ بٹ ءَ زوریت ءُ ُدر کپیت۔۔۔۔۔ بہرام ہم آئی ءِ پُشت ءَ چیروکائی گون بیت۔۔۔۔ ہمدا مزنیں کورے بیت کہ گز ءَ پُر اِنت ماکو ہمے کور ءَ ایر کپیت۔ بہرام چاریت تہ ہفتارے، ہفتار کہ ماکو ءَ گندیت دوئیں دستاں چست کنت ءُُ آئی ءَ گلائش کنت۔۔۔۔ شپ ماہیکانی بیت ءُُ بہرام ہمدا وت ءَ گزے ءِ پُشت ءَ چیر دنت کہ من ءَ ہفتار ءُُ ماکو مہ گندنت۔۔۔۔ ماکو تال ءِ بٹاں ہفتار ءِ دیما دنت۔۔۔ ہفتار بٹاں وارت ءُُ ہفتار ءِ بٹانی ورگ ءَ پد ماکو وتی گداں کشیت ءُُ برہنگ بیت۔۔۔۔۔
پدا ماکو ءُُ ہفتار چیر ءُُ سر بنت۔چیر ءُ ُسری ءَ پد دوئیں یکجاہ ءَ بگل پہ بگل وپس اَنت۔۔۔ بہرام اِے ندارگ ءَ شری ءِ سرا چاریت ءُُ نوں کہ ہفتار ءُُ ماکو ءِ رخصتی ءِ وہد بیت گڑا بہرام درکاں زوریت ءُُ کیت وتی واب جاہ ءَ وپسیت کہ جاتو شک مہ کنت۔۔۔۔
نوں اِے ندارگ ءِ چارگ ءَ بہرام ہمک شپ روت۔۔۔۔ داں ہفتگے ءَ بہرام اِے ندارگ ءَ چاریت بَلے پدا بہرام ءَ اوپار نہ روت ءُُ یک شپے بہرام گوں وت ءَ شور کنت کہ من اِے ہفتار ءَ کُشاں، بلکیں ماکو ءِ دل گومن بہ بیت ءُُ پدا من ماکو ءَ چیر کشاں۔۔۔۔۔ ہمے شپ ءَ بہرام تفنگ ءَ زوریت ءُُ تیر کنت۔۔۔ گز ءِ پُشت ءَ چیر بیت۔۔۔۔۔ ہفتار ءِ بٹانی ورگ ءَ پد ماکو ءُُ ہفتار ہما وڑ ءَ بند ءُُ گلائش بنت کہ پیسر ءَ بوتگ انت۔۔۔۔بہرام ہفتار ءِ پیشانی ءَ ٹک کنت ءُُ شاپیت تیرے۔ ہفتار ہما جاہ ءَ سر لیٹیت ءُُ کپیت۔۔۔۔۔ ماکو اینگو آنگو چاریت داں کس نیست۔۔۔۔ بہرام شکاری چیروکائی درکاں زوریت ءُُ کیت وتی واب جاہ ءَ وپسیت۔۔۔۔۔بَلے ماکو رسگ ءَ بہرام ءَ گوں ہکل ءُُ نہرداں مان بندیت کہ ترا منی ہفتار ءَ چے کُتگ؟ ترا اگاں جاتوئی در برگی ات، جاتوئی در بُرتیں۔ منی کارانی تہا پرچا دزمانجنی کنئے؟۔ تو نزان ئے کہ من چنچو وہد گوں ہمے ہفتار ءَ گوازینتگ ءُُ منی مہر بوتگ؟ درا چہ منی لوگ ءَ، اگاں ناں شت کشان ءِے قاہارے ہمدا سنگ ءُُ سیاہ بہ بئے۔۔۔۔ حبر دار نوں وتی ناہاریں شگل ءَ منی دیما بہ کپ ئے۔۔۔۔۔
بہرام شکاریہما شپوئی شپ وتی ساہ ءَ زوریت ءُُ چہ ماکو ءِ لوگ ءَ در کیت، گوربام ءَ میلے ءَ سوار بیت۔چہ مشکت ءَ در کپیت ءُُ مکران ءَ کیت۔ چیزے وہد ءَ بہرام واب نہ کپیت ءُُ گنوک بیت، بَلے وہد ءِ ہمراہی ءَ پدا آ شر بیت۔۔۔
ہمے جاتوئیں جنین کہ میاہ جھنڈو ءِ کرا اتکگ ات من ءَ انچو گمان بوتگ ات کہ جاتو ماکو ہمیش اِنت۔ منی کماش ءَ چہ میاہ جھنڈو ءَ دم در برتگ ات ءُُ اے دگہ دنیائی گپ ءُُ تران ہم بوتگ ات۔۔ من ہمے وہد ءَ نوک ورناہ اتاں۔۔۔۔۔ ءُُ من ءَ ہم دم ءُُ میاہ گری ءِ شوق ات ءُُ من پمیشکا پت ءِ ہمراہ اتاں۔۔۔۔
ہمے جاتوئیں جنین کہ میاہ جھنڈی ءِ کِرا اتکگ ات، آئی ءِ نام مُروارد ات ءُُ آ چشیں بد رنگیں جنینے نہ ات کہ آئی ءِ گندگ ءَ گوں دل ءَ ترسے پاد بیاتکیں یا دل حراب بہ بوتیں۔۔۔۔ برے برے من گوں مروارد ءَ گپ ءُُ تران ہم کتگ ات۔۔۔ بَلے من آئی ءَ گوں ہمنچو گیشتر گپ کتگ ات، گڑا من ءَ ہمنچو گیش گمان بوتگ ات کہ جاتو ماکو ہمیش انت ءُُ اِے دروگ بندیت ایشی ءِ نام مُروارد نہ اِنت۔۔۔۔۔۔ گپ گپ ءِ تہا منی دل ہم برے برے پہ آئی ءَ مان بوتگ ات۔۔۔ بَلے پدا من ہچ گشت نہ کتگ ات۔۔۔ یکے ایش کہ من ءَ چہ آئی ءِ جاتوگری ءَ ترس اتگ ات ءُُ دومی ایش کہ آ عمر ءِ حساب ءَ سک مزن ات۔۔۔۔
بلے گوں آئی ءَ گپ گپ ءَ نوں منی حیال مدام ٹگل اتگ ات۔ برے برے دل ءَ انچو سکین داتگ ات کہ کلہے من آئی ءِ دست ءَ بگران ءُ ُبگشاں۔۔۔۔ بِل ناں اِے ہفتاراں۔۔۔تو انسانے ئے ءُُ بیا گوں انساناں مہر بکن۔۔۔ بیا من ترا گشاں کہ انسانی مہر چی ءَ گشنت۔۔۔ اگاں زندگی ءَ زیبا کنگ لوٹ ئے گڑا بس یکبرے منی ہمبازاں بیا۔۔۔ پدا من ترا گشاں کہ زندگی چنچو زیبا بیت۔۔۔۔ انسان گوں رستراں وپت ءُُ واب ءَ ہچ زیبا نہ اِنت۔۔۔ یکے کہ تئی مارشتاں سرپد مہ بیت گوں آئی ءَ چوں وپت ءُُ واب بوت کنت؟۔۔۔۔۔انسان ءَ انسان سرپد بیت۔۔۔ مُروارد بیا،ناں۔۔۔۔
بَلے پدا من ہیمات کُت نہ کناں۔۔۔۔۔
یک شپے من واب ءَ گنداں کہ من ہمے درچک ءِ چیر ءَ نشتگاں کہ میاہ جھنڈو ءِ ٹکانہ انت۔۔۔۔ ہمے درچک من ءَ جست ءَ اِنت کہ من اگاں مُروارد ءَ بگشاں،گوں تو سور بکنت گڑا تو گوں آئی ءَ سُور کنئے؟
من گشت ہو۔۔۔۔ بَلے یک شرطے ہست کہ آ پدا ہفتاراں یلہ بکنت۔۔۔ پرچا کہ من چشیں جنین ءَ وتی لوگ ءَ نہ کناں۔۔۔۔ کہ شپ بہ بیت ءُ من واب بہ کپان ءُُ آ پدا بروت گوں ہفتاراں وپت ءُُ واب بہ کنت۔ چشیں چیز من ءَ وش نہ بیت۔
درچک ٹھک دنت۔۔۔ اِے وہمے۔۔۔۔ مُروارد چشیں جنینے نہ اِنت۔۔۔۔ اگاں مروارد چشیں جنینے بوتیں گڑا میاہ جھنڈو ءِ کِرا نہ کپتگ ات۔۔۔۔ مُروارد ءَ تو نہ زان ئے۔۔۔ مروارد جاتوے نہ اِنت۔۔۔۔ بلکیں یک ہفتارے۔۔۔۔ اِے میاہ جھنڈو ءِ کرامات انت کہ آئی ءَ ہفتارے زرتگ ءُ انسانے کُتگ۔ تو ہمے ہفتارءَ مروارد ءِ نام ءَ زان ئے ءُُ آئی ءِ عشق ءَ گرفتار ئے۔۔۔ مروارد ہم زانت کہ تئی دل پہ من باز کشیت، بَلے آ وتی وعدہانی پدا زندگ انت۔ داں جھنڈو ہست۔ آ جھنڈو ءِ لوگی اِنت۔۔۔۔ چہ جھنڈو ءَ پد۔۔۔۔ پہ چشیں مسافراں زمین ءَ بازیں لوگے یلہ اِنت۔
اِے واب ءِ گندگ ءَ پد من پدا ہچبر گوں کماش ءَ میاہ جھنڈو ءِ کِرا نہ شتاں۔۔۔۔ کماش ءَ باز رند ءَ من ءَ گشتگ ات کہ بیا گوں، ترا مروارد باز یات کنت۔۔۔۔۔۔۔۔ برے برے مُروارد ءَ پہ من گُڑ ءُُ مزری شکر ہم راہ داتگ ات۔۔۔۔ بَلے من ناں آئی ءِ راہ داتگیں گڑ ءُُ مزری شکر وارت اَنت ءُ ُنئیکہ پدا آئی ءِ باروا جیڑ اِت۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*