بنیادی صفحہ / نوشتانک / بلوچی زبان ءُُ لبزانک ءِ حاترا واجہ کریم آزات ءِ کرد…..سجاد کوثر بلوچ

بلوچی زبان ءُُ لبزانک ءِ حاترا واجہ کریم آزات ءِ کرد…..سجاد کوثر بلوچ

بلوچی زبان ءِ نامی ئیں لبزانت ءُُ شاعر واجہ کریم آزات 15 جولائی 1957 ءَ ماں چتکان پنجگور ءَ ودی بوت۔ آئی آرپیں پس ءِ نام محمد عثمان ات. وتی بنداتی وانگ ءُُ زانگ ئے اچ وتی میتگ ءِ وانگجاہ ءَ دربرت۔دوانزدہمی تبک ءِ دربرگ ءَ پد اچ بلوچستان شھدربرجاہ شال ءَ گریجویش ءُُ پدا بلوچی زبان ءُُ لبزانک ءِ تہ ءَ ماسٹرے کرت ءُُ وتی ایم۔فل ءِ سَند اچ علامہ اقبال اوپن یونیورسٹی اسلام آباد ءَ چے گپت۔وانگ ءُُ زانگ ءِ شعبہ ءَ استاد لگ ات ءُُ چہ ایلمنٹری کالج پنجگور ءَ سینئر استاد ءِ جہت ءَ ریٹائرڈ بوت۔
کریم آزات ءَ را سی ءُُ شش سال ات کہ گوں زبان ءُُ لبزانک ءَ ہمگرنچ ات۔آ عزت اکیڈمی پنجگور ءِ بنگیجکارانی تہ ءَ ھوار ات ءُُ ہمے پیما اے لبزانکی گَل ءِ اولی ئیں ”مزن کارگشاد” اوں بوتگ۔عزت اکیڈمی پنجگور ءِ دیمروئی ءُُ ماں پنجگور ءَ یک لبزانکی چاگردیے ءِ ودی کنگ ءَ آئی ءِ مزنیں دستئے مان ات۔
کریم آزات ءَ اول سرا شاعری ءِ پڑ ءَ وتی نَد چست کرتگ ءُُ سسّاساچ دیما آؤرتگ انت بَلے آئی ءَ لبزانک ءِ ایدگہ بُنگپانی سرا نویستگ۔کریم آزات ءِ شعرانی اولی دپتر ”اوپار” ءِ نام ءَ اچ عزت اکیڈمی پنجگور ءِ نیمگ ءَ 2017 ءَ چاپ ءُُ شنگ بوتگ۔
اگاں اے وانگی ءِ پربندانی سرا چارگ ءُُ ٹپاسگ بہ بیت،آئی ءَ اے رِد ءَ دستونک ءُُ نظم ہر دوئیں تہرانی سرا وتی نَد چست کرتگ ءُُ رھبند کار بستگ۔آئی ءِ زبان ءُُ اسلوب ءِ تچکی ءُُ ارزانی ءِ سبب ءَ ہمک مردم آئی ءِ گال ءُُ پربنداں پہمیت پمیشکہ کریم آزات ءِ شاعری لَس اولس ءِ تہ ءَ نامدار انت۔آئی وتی شعرانی تہ ءَ ابہام ءَ کار نہ بندیت بلکنہ آ وتی گپّاں گوں تچک ءُُ سادگیں اسلوب ءَ بیان کنت دانکہ ہمک وانوک آئی گپّاں سئی ءُُ سرپد بہ بیت چشکہ؛
ہر کار ءُُ مشکل ءَ منا دست ءُُ دپا کن ئے
دوزواہ ءَ تو دشمن ءُُ بدواہ منا کن ئے
بدنامیں نام ءِ زورگ ءُُ پہ زرّ ءُُ دولت ءَ
ہرچی ترا تء دل گُشیت بس تو ہما کن ئے
کریم آزات پہ دیمروئی ءِ ہاترا مدام جہد ءُُ جکانسری ءُُ ہمت ءُُ مردانگی ءِ گپّ ءَ جنت۔وتی راج ءِ پُسّگ ءُُ ورنایاں مدام ہمے پنت ءُُ سکین ءَ دنت کہ آ جھد ءُُ جکانسری ءَ ھور وتی وتی تہ ءَ زانت ءُُ چم پچی ءُُ رژن ودی بکن انت دانکہ آ ہمک تہاری ءِ دیما چو کوہ ءَ مِک بہ بنت ءُُ کسئے آیان ءَ چو دلوت ءُُ اسپیت پس ئیگ ءَ مہار مہ کنت ءُُ وتی غرض ءُُ مکسدانی ہاترا کارمرز مکنت،پمیشکہ آ گُشیت؛
وتی محنت ءِ کٹ ءُُ برورد ءَ بور
وت ءَ در در ءِ تو سوالی مکن
کسے چو پس ئیگ ءَ مہار ات بکنت
دماغ ءَ وتی اینچو ھالی مکن..
فروری 2020 ءِ گڈ سرا واجہ ءَ اے کوڑہ ئیں دگنیا یلہ داتگ، مئے دُعا انت پاکیں ھاوند ھدامُرزی ءَ بہشت ءَ جاگہ بدئنت ءُُ پشتپداناں صبر ءُُ ھاٹی بدئنت۔
ما گوں ھدامُرزی ءِ بچ واجہ خدارحم شوھاز (مزن کارگشاد عزت اکیڈمی پنجگور)،الطاف کریم ءُُ خدانظر ءُُ آئی کہول ءِ ایدگراں گوں دلپدری درشان کناں….

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*