یار جان بادینی ءُُ صحافت …..لیاقت شاہوانی 

من درستاں چہ پیش ماہتاک بلوچی زندءِ ادارہ ءُُ خاص ماہتاک بلوچی زند ءِ سر شونکار یار جان بادینی ءَ گوں دل ءِ جہلانکی ءَ مبارکبات دیاں کہ ماہتاک بلوچی زند ءَ وتی بیست سال ءِ چھاپءُُ شنگ کاری سرجم کرتگ۔ اے بلوچستان ءِ صحافت ءُُ حوالکارآئی حاترا مزنیں سوب مندی ءِ انت۔
من ءَ شری ءَ معلوم انت کہ بلوچستان ءِ تاک ءُُ ماہتاک ءُُ روتاکاں اسلام آباد ءَ چہ ہچ وڑیں اشتہارے رسگ ءَ نہ انت۔ وتی زبان لبزانک ءِ حُب ءُُ واھگ ءَ اے قومی کار ءَ وتی خرچ ءُُ درچے سرا کنگا انت۔
زبان ءِ زندگ دارگ ہر مردم ءِ فرض انت آ وتی زبان لبزانک دود ءُُ ربیدگ رسم ءُُ دو داں زندگ بداریت یار جان بادینی ءَ شما یک کلمکار ءَ حوالکار ے وڑا زانگ ات مئے گورا آیک سیاسی ورکرے بوتگ۔ آئی ءَ وتی جہد ءُُ کوشست پٹ ءُُ پول ءِ ذریعہ مزنیں نامے ودی کرتگ۔ آ مُلک ءُُ در ملکاں بازیں سیمینار ءُُ کانفرنس آنی تہا بہر زرتگ۔ انچو یک صحافی ءِ جہت ءَ آ بازیں مُلکانی تہا گچین کاریانی وھد ءَ ابزرورے جہت ءَ ھم بہر زرتگ۔ مروچی ماہتاک بلوچی زند ءِ بیست سال ءِ سالروچ ءِ درگت ءَ یک روچی سیمینار ے برجم دارگ بوتگ۔
ملک ءَ چہ نامداریں حوالکار وسعت اللہ خان، عامر رانا، لطیف بلوچ ءُُ پروفیسر ڈاکٹر نادر بخت اتگ انت انچو بلوچستان ءِ کُنڈ کُنڈ ءَ چہ کلمکار ءُُ کواس اتگ انت وتی مضمون ءُُ نبشتانک وانتگ انت۔
اے تاریخ اتفاق ءَ بچار ماہتاک بلوچی زند ءِ ادارہ وتی بیست سال ءِ مراگاہ برجم داشتگ انوں لہتیں روچ ءَ پد نوکیں سال 2020 شروع بوھگا انت۔ نوکیں سال ءِ تہا مئے قوم ءِ نامداریں سروکانی جہدءُُ کوشست ءِ سینچری پورہ بوھگا انت کہ آھان وتی جہد ءُُ کوشست زبان، ادب، صحافت، سیاستءِ پڑا 1920 ءَ شروع کرتگ انت ءُُ 2020 ءَ انوں آ سرجم بوھگا انت۔
اے قومی ءُُ راجی سروکانی تہا میر عبدالعزیز کرد، یوسف عزیز مگسی، میر غوث بخش بزنجو، میر گل خان نصیر، محمد حسین عنقا، ملک محمد پناہ، بابو عبدالکریم شورش ءُُ بازیں دگہ قوم ءُُ راجی سروک ھوار انت۔
بلوچستان ءِ ساری ءِ سر وزیر ڈاکٹر عبدالمالک بلوچ ھم اے دیوان ءَ ساڑی انت آئی ءَ نیشنل پارٹی ءِ نیمگا 2020 ءِ سال ءَ بلوچستان ءِ سروکانی سال ءِ نام داتگ۔
بلے اے درگت ءَ ماہتاک بلوچی زند ءِ ادارہ ءُُ خاص آئی ءِ شونکار یار جان بادینی ءَ آفرین انت کہ آ گوستگیں بیست سالاں وتی ہمے قومی ءُُ راجی سروکانی باروا نہ ایوکہ سیمینار ءُُ کانفرنس برجم داشتگ۔ بلکں آئی ءَ ہمے قومی ءُُ راجی سروکانی باروا خاصیں تاک چھاپ ءُُ شنگ کرتگ۔ تنکہ بلوچستان ءِ قومی ءُُ راجی سروکانی باروا بلوچستان ءِ ورناہاں معلومداری بہ بیت آ وتی قومی راجی سروکانی قومی ھذمتاں باروا پوہ ءُُ سرپد بہ بنت۔ اے کارءَ یار جان بادینی گوستگیں بیست سالاں کنگا انت۔ اگں زند ءِ بینر سیل کنگ بہ بیت کہ آئی تہا درجن آنی درجن قومی ءُُ راجی سروکانی عکس مان انت۔ کہ زند ءِ ادارہ آھانی باروا خاصیں تاک چھاپ ءُُ شنگ کرتگ۔
ماہتاک بلوچی زند ءِ اے قومی ءُُ راجی ھزمت بلوچی زبان ءُُ لبزانک ءِ حاترا مزنیں مڈی انت۔ بائد انت بلوچستان ءِ طالب علم بلوچی زند ءِ ادبی ءُُ صحافی مڈی ءَ چہ پائدگ بزورانت۔ انوں کمرشل دور انت اخبار بہ بیت یا ٹی وی چینل ہر کس ہما کار ءَ کنت کہ آئر ءَ مالی نپ ءُُ پائدگ برسیت۔ بلے زند ءِ ادارہ ءَ اے کار قومی کارے کہ سرپد بوتگ ءُُ کرتگ اے بلوچستان ءِ زبان، ادب ءُُ صحافت ءِ تاریخ ءِ تہا زندگ مانیت۔
ماہتاک بلوچی زند ءِ ادارہ ءِ دومی مزنیں کار اے کنگا انت کہ وتی زبان ءَ زند داشتگ اے وھدی بلوچی ءُُ براہوئی زبان ءِ تاک ءُُ ماہتاک نہ بوھگ ءِ برابر انت۔ اے ردءَ زند ءِ ریگولر چھاپ بوھگا یک مزنیں سوب مندیءِ انت۔ بلوچی ءَ براہوئی ھر دو زبان گار بوھگ ءِ خطرہ انت۔ اللہ مہ کنت کہ اے میوزیم ءِ زبان جوڑ بہ بنت۔ اے زبانانی زندگ دارگ ءِ حاترا باز کار کنگی انت تنکہ اے زندگ بہ مان انت۔
ڈاکٹر عبدالمالک بلوچ وھدے بلوچستان ءِ سر وزیر ات کہ آئی ءَ ماتی زبانانی حاترا مزنیں کارے کرت بلوچی، براہوئی ءُُ پشتو زبان اسکولانی تہا وانینگ ءِ بل پاس کرت تنکہ ماتی زبان وانینگ بہ بنت۔ انچو ادبی گل ءُُ اکیڈیماں سالگی گرانٹ ودینت۔ تنکہ ادبی کار دیما بروانت آئی ءَ بلوچستان ءِ فیض میلہ، حبیب جالب میلہ ءُُ میر گل خان نصیر ءِ باروا میاں استمانی کانفرنس ءِ برجم داشت۔ ملکءُُ در ملکی کلمکار کواس ءُُ شاعراں لوٹاھینت۔ آخر ءَ یک وارے پدا من یار جان بادینی ءِ بلوچ، بلوچی زبان ءُُ بلوچستان ءِ باروا کرتگیں ادبی کار ءُُ ھزمتانی توصیف کناں۔ اگں آ بلوٹتین آئر ءَ شریں نوکری ھم رست کرت بلے آئی ءَ وترا بلوچی زبان ءُُ لبزانک ءِ حاترا وقف کرت۔ آئی ھندی ءُُ میاں استمانی ادبی کار وتی مٹ وت انت۔ اگں من یار جان بادینی ءِ باروا اے بگُشاں کہ آ زبان، ادب، ثقافت ءِ حوالہ ءَ بلوچستان ءِ سفیر انت بلوچی زبان دود ءُُ ربیدگ رسم ءُُ دوداں دنیا ءِ کُنڈ کُنڈ ءَ سرکرتگ۔ تہ اے رد نہ بیت۔