کُلیں بلوچ یکیں لوگ ءِ پرزند انت

گراں کدریں یارجان بادینی
دیوان ءَ ساڑی ایں منی گہار ءُُ براساں
اسلام و علیکم!
سلام ءُُ دعا ءَ پد شمے سر ءِ سلامتی ءَ لوٹیں ءُُ مروچی منی واستہ مزنیں وشی ءِ گپے انت کہ ماہتاک بلوچی زند ءَ وتی بیست سال ءِ سفر پورہ کرتگ ءُُ بیست ءُُ یکمی سال ءَ گام ایر کنگا انت۔ اے بلوچی زبان ءُُ لبزانک ءِ حاترا ھم مزنیں گپے انت کہ بلوچی زند واجہ خیر محمد ندوی ءُُ آزات جمالدینی ءِ رند گیری ءَ گام جناں ءَ وتی منزل ءِ نیمگا ءَ روان انت۔ قوم ءُُ راجانی واستہ بیست سال ھچ نہ انت۔ بلے یک تاکے چھاپ ءُُ شنگ کنگ ءَ بیست سال مزنیں گپے انت منی دعا انت اللہ یار جان بادینیءَ عمر ءُُ زندے بداَنت کہ آئی ءَ اے قومی ءُُ راجی ذمہ واری زبان ءُُ ادب ءِ پڑا زرتگ سوب مند بہ بات آمین۔
یار جان بادینی شروع ءَ گوں ماہتاک بلوچی لبزانک ءَ ھور اَت۔ ماہتاک بلوچی لبزانک ءِ ذریعہ ءَ یار جان بادینی ءَ بلوچی زبان ءُُ لبزانک ءِ حاترا مزنیں پٹ ءُُ پولی کارے کرت۔ پدا وھدے ماہتاک بلوچی زند ءَ در کرت۔ انوں ماہتاک بلوچی زند ءِ بیست سال سرجم بوتگ انت۔ اے گوستگیں بیست سالانی تہا ماہتاک بلوچی زند ءَ بلوچی زبان ءُُ لبزانک ءِ واستہ مزنیں مڈی ءِ جم کرتگ۔ اے جم کرتگیں مڈی بلوچی زبان ءِ وانوک ءُُ نبشتہ کارانی واستہ مزنیں مدت ءُُ کمک ءِ بنت ءُُ آ چہ ماہتاک بلوچی زند ءِ پٹ ءُُ پولی کاراں مدت ءُُ کمک زرت کن انت۔
راستی ءَ سوچ کنئے یار جان بادینی پہ وتی کار آنی پورہ کنگ ءِ واستہ یک میز ءُُ کرسی ءِ کر ءَ نہ نشتگ۔ آ مدام گَشتگ ءُُ پٹ ءُُ پول کرتگ آ بلوچانی اولی جہاں گرد انت مروچی گندے عرب ملکاں انت باند ءَ بحرین ءُُ پوشی ترکمانستان ءَ انت آ وتی پٹ ءُُ پول ءِ کاراں گوں دنیا ءِ بلوچانی یاتءُُ یات گر ی ءَ بلوچی زند ء ِ تاکاں براھدار ءُُ زیبناک کرتگ۔
انچو یارجان بادینی ءِ ترکمانستان ءِ سفر نامہ ھم زند ءِ تہا چھاپ ءُُ شنگ بوتگ۔ یارجان بادینی ءَ ترکمانستان ءِ صدر ءِ کتاب بلوچی زبان ءَ رجانک کرت۔ روح نامہ ءِ دیمدرائی ترکمانستان ءِ بنجاہ عشق آباد ءَ بوت۔ ترکمانستان ءِ دولت ءَ یارجان بادینی ءَ خاصیں مہمان ءِ وڑا عشق آباد ءَ دعوت داتگ اَت۔چریشی ترکمانستان ءِ بلوچاں باز ھزت ءُُ شرف رست۔ اُمیت انت یارجان بادینی وتی ترکمانستان ءِ بلوچاں دل ءَ نہ بارت ءُُ آھانی حیالداری ءَ داریت۔
محمد شیر دل
ماری ولایت ترکمانستان
10 سمبر 2019