تژن ءُُ بچکند ”منی لوگ کدی تیار بیت؟…..طارق پیشکانی 

مردم گُش اَنت کہ مشکت ءَ زند ءِ گْوازینگ سکّ اَرزان اِنت- پرچا کہ ھرچ چیزّ ءِ گِرگ ءَ وام ءُُ شام رس ایت- بنک ءَ برو وامے بہ زیر زَبرّ سیرے، اِد ءَ زال وامی، گاڑی وامی ءُُ لوگ…. اڑے لوگ ءِ نام گپت گُش ئے زاناں یکّے ءَ منی لِٹک لگت دات-،، اِد ءَ راست اِنت- کہ ھرچ چیزّ پہ وام رس ایت- بلے وامی لوگ بندگ نہ بیت- من نگدیں زرّ داتگ، انگت ءَ منی لوگ ءَ کسّ نہ بند ایت-،،
بلوچانی بابت ءَ ھمے گُشگ بیت کہ بلوچ نرمزار ءُُ مہمان داریں راجے، وائے منی سر بات- من اوں بلوچے آں، کُج اِنت منی نرمزاری ءُُ مہمانداری؟ سنگتے کہ منی چارگ ءَ کئیت، گڑا سھب ءَ بگر داں شپ من آئی ءَ گوں گاڑی تاچیناں تاچیناں داں سُبارگ ئے وھد بہ بیت-،، سُبارگ ءُُ چاہ واری پد، فلمے پیش ئےِ داراں داں کہ شپ ءِ نزّیک بہ بیت- ءُُ پد ءَ آ دپ ء وت بگُش ایت- کہ نوں بسّ اِنت- من ءَ لوگ ءَ سر بہ کن-،،
من گڑا چی بکن آں، ھُدا ءَ مارا لوگے وَ نام ءَ نہ دات- دل ءَ منی ھم لوٹ اِت کہ وام ءُُ شامے مردم بہ کنت- ءُُ پہ وت کسانیں کُڈّکے بہ بند ایت- وام وَ من کت، زمین ھم زُرت لوگ ءِ بندگ ھم شرو بیت-،، کلام بہ جنت ھما زالاں کہ برات اِش ھست-(علیم گلام حسین ءَ راست گُشتگ اَت کہ امّاں! من ءَ ھما جاگہ ءَ سیر مہ دئے کہ منی جنین ءَ برات بہ بیت)- منی لوگ ءِ زرّ اِش وارت اَنت- نوں من جن آں ٹیھ ءَ کہ من میاریگ آں ٹیھ من ءَ جنت ھم من میاریگ آں -،، وسِرگ دست جنگ نہ بیت- وتیگ اِنت- وتیگے ءَ سوچ بلے دْروگ ئےِ وَ مہ بست اِنت- زَرّ کہ تو وارتگ اَنت ءُُ درد ءُُ لاپ کتگ اَنت- بلے بہ منّ پہ شرّی!،، گُشان ئےِ! احمد! منی لوگ کدی تیار بیت؟ گُش ایت! تئی لوگ ءِ زرّ ٹھیکدار ءَ وارتگ اَنت- زرّ کہ بیت بزاں من پگار گران کناں ءُُ کم کم ءَ تئی لوگ ءِ کاراں دیم ءَ بران کن آں – شُومّ ءُُ شانزدہ! پگار ءِ سر ءَ بلکیں داں کیامت ءَ منی لوگ تیار مہ بیت؟ نوں وَ من ھما اِنت- کہ چہ ایران ءَ آتکگ آں تُرس ءَ گار آں کہ من ءَ کرونا وائرسے ءَ نہ گپت ءُُ منی جند مہ مِر ایت-،، چو کاکا سلیمان ءَ، یک روچے ٹھیدار فون جنت کہ تارِک! بیا وتی لوگ ءِ کلیتاں دز بہ گر کہ تئی لوگ تیار بوتگ- گڑا من جَن گوں گریواسکیں چمّاں ٹھیکدار ءَ پسّو دنت! کہ تارِک ءَ وَ وفات کتگ بلے کلیتاں ایر بکن کہ بیگاہ ءَ منی برات احمد کئیت ءُُ کلیتاں چہ تئی گور ءَ زیر ایت-،،
من داں وتی زند ءِ گُڈّی روچاں احمد ءَ پھل نہ کن آں، کول ء عرب ئیگے ءَ اے دنیا ءَ تو منی ھکّ ءَ نہ دئے، کیامت ءِ روچ ءَ من واجہیں ھُدا ءِ گْور ءَ وتی لوگ ءَ چہ ترا تلب کن آں -،،
شَرّ شما من ءَ گُشت کن اِت کہ…. منی لوگ کدی تیار بیت؟۔۔۔۔۔