بلوچی حوالکاری ءِ تہا ماہتاک بلوچی زند ءِ کرد…..شہزادہ ذوالفقار 

مروچی منی حاترا مزنیں وشی ءِ گپے انت کہ بلوچستان ءِ یک ادبی تاک ماہتاک ”بلوچی زند“ ءَ ستمبر 2019 ءَ وتی چھاپ ءُُ شنگ کاری ءِ بیست سال سرجم کرتگ کہ اے بلوچی زبان ءُُ لبزانک ءِ حاترا مزنیں وشی ءُُ سوب مندی ءِ گپے انت۔
اے درگت ءَ من ماہتاک بلوچی زند ءِ ادارہ ءُُ خاص آئی شونکار یار جان بادینی ءَ گوں دل ءِ ھُب ءُُ واھگ ءَ مبارکباتی دیاں۔
یار جان بادینی ءَ وھدے وتی گشتانکے تہا ڈن ءَ اتگیں مہمانانی شکر ءُُ منت گران ءَ گشت کہ منا پہل کن ات کہ من شریں وڑھے ءَ شمے مہمانداری نہ کرت آئی ءَ لوز قرضدار کارمرز کرت۔
اے باروا من یا رجان بادینی ءَ گشگ لوٹاں کہ مہلوک تئی مقروض ءُُ وامدار بوھگ لوٹیت چیاکہ ہما کارے تہ گوستگیں بیست سال ءَ چہ بلوچی زبان ءُُ لبزانک ءِ دیمرئی ءِ حاترا کنگا انت اے کار نمیران ءُُ ابد مان انت۔
مہلوک مدام پریس کلب ءَ کاینت ءُُ حوالکاری دیوان ءُُ پریس کانفرنس کنگ لوٹ انت تہ آ سر ءُُ سوج کن انت چنچو ھرچ ءُُ درچ کیت تہ ماں آھاں گشاں کہ ھرچ ءُُ درچ چے واستہ؟مارا تنخواہ ءُُ پگار مارا چہ مئے اخباراں رسیت مارا وتی مردمانی ہر وڑا مدت ءُُ کمک کنگ لوٹیت۔
ڈاکٹر مالک بلوچ ءَ ساری ءِ سیشن ءَ یک باز شریں گپے کرت کہ اے کریڈٹ درا حاجی عبدالرحمن بادینی ءَ روت کہ آ یار جان بادینی ءِ گراں کدریں کماش انت آئی ءَ یک روچ ھم یار جان ءَ چہ نہ گشت کہ تہ چون کنگائے اے ماڑی ءِ سرا تہ قوضہ کرتگ چریشی منا ھمک ماہ ھزارآنی کلدار رست کنت۔ اگں گوستگیں بیست سال ءَ چہ اے ماڑی ءِ کرایہ ءُُ پگار انی حساب ءُُ کتاب کنگ بہ بیت تہ زانگ بیت تہ ملین آنی کلدار جوڑ بیت چیاکہ حاجی صاحب ءِ دوست پلازہ شہر ءِ تہا کمرشل ایں ھند وجاگہ ے انت۔
بلے ایشی ءَ ابید حاجی صاحب اے سرپد ات کہ آئی بچ یک قومی کازے حاترا کار کنگا انت آ بلوچی زبان، لبزانک، حوالکاری، وانگ ءُُ زانگ، علم ءُُ زانت ءَ دیمرئی دیگ ءَ انت۔ اے کار یک مزنیں ویژن ءُُ پکرے حاترا بوھگا انت۔
چریشی مئے آؤکیں نسل ءَ نپ ءُُ پائدگ رست کنت۔ ایشی پائدگ بلوچ قوم ءُُ راج ءَ ھوار بلوچستان ءَ بیت۔ اے وڑیں گہبودی کارے حاترا اللہ تعالیٰ ھم مردمے ءِ مدت ءُُ کمک ءَ کنت۔
ماہتاک بلوچی زند یک لبزانکی ماہتاکے انت، اے دور ءَ یک تاکے در کنگ باز گرانیں کارے انت۔
مروچی ایں دور ءَ انگریزی زبان ءِ نامداریں ماہتاک ایرالڑ ءُُ نیوز لائن بند بوتگ انت۔ اے ہما مزنیں ادارہ انت کہ آھانی گورا زرے ہچ وڑیں کمی نیست۔ بلے آ وتی کمرشل نپ ءُُ پائدگ ءَ سیل کن انت۔
ہرچ یک کارے یار جان بادینی کنگا انت اے یک ویژن ءُُ کمٹمنٹ ءِ لوٹیت۔ پدا تہ وتی منزل ءَ سر بوت کنئے یار جان بادینیءِ تعلقداری بلوچستان ءَ انت بلوچستان ءَ ھچ وڑیں کارخانہ ءُُ کار جاہ ءِ نیست کہ تاک ءُُ ماہتاکاں اشتہارے برسیت۔ سرکارے نیمگا ھم خاصیں مدت ءُُ کمک ءِ نہ بیت، اسلام آباد ءَ بلوچستان ءِ تاک ءُُ ماہتاکاں سالانی سال یک سینٹی میٹر اشتہار ھم نہ رسیت۔ اے گپ ءَ یارجان بادینی ءُُ زند ءِ ادارہ سرپد انت کہ آ وتی ادارہ ءَ چون دیما برگ ءَ انت۔
ڈاکٹر عبدالمالک بلوچ یار جان بادینی ءِ یک نزدیکیں دوست ءِ انت آئی دوستی ءَ چہ ماہتاک بلوچی زند ءِ اشتہار بند بوتگ انت۔یار جان بادینی ءِ سیاست ءِ تہا خاصیں کردے نیست بلے باز مردم ڈاکٹر مالک ءَ دوست نہ دار انت سیاسی اختلاف بنت ہمے حاترا آ لوٹ انت کہ یار جان بادینی ءِ تاک ءَ اشتہار مہ رسیت۔ چوشکہ بلوچی ءَ گش انت کہ منی دشمن ءِ دوست ھم منی دشمن انت۔ یارجان بادینی ءَ ڈاکٹر مالک بلوچ ءِ سنگتی ءِ سوب ءَ باز سزا رسگ ءَ انت۔زند ءِ ادارہ ءَ ھم شاباش انت کہ آ ہر سازش ءِ مقابلہ ءَ گوں صبر ءَ کنگا انت۔
بلے منی واستہ حیرانگی ءِ گپ ایش انت کہ ڈاکٹر مالک وھدے بلوچستان ءِ سر وزیر ات آئی ءَ یار جان بادینی ءَ ہچ وڑیں عہدہ ءُُ منصب ءِ نہ دات۔ کہ مردم بزانت کہ ڈاکٹر مالک یار جان ءِ باز نزدیک انت۔ بلکں نیشنل پارٹی ءِ جندے سروک یارجان بادینی ءَ مپت نا حق ژاہ بد گشنت۔
اے سیمینار ءِ تہا ہر چنکس سپت ءُُ ثنا ماہتاک بلوچی زند ءُُ یار جان بادینی ءِ باروا بوتگ انت چریشی پیش کسے ھم نہ بوتگ۔
من یار جان بادینی ءَ یک خاصیں لقبے داتگ من آئر ءَ مدام گُشین ”بلوچ پٹوک“ آ دنیا ءِ ہرچ یک ملکے ءَ روت اودا بلوچ ودی کنت آئی ءَ سنٹرل ایشیاءِ ملک ترکمانستان، افریقہ ءِ ملک کینیا، تنزانیہ ءُُ گلف ءِ ملک عمان، قطر، بحرین، امارات ءَ بلوچانی سرا پٹ ءُُ پول کرتگ۔ آئی ءَ دنیا ءِ بلوچاں یک دومی ءَ ہمگرنچ کرتگ۔ اے یک مزنیں کارے انت کہ بلوچستان ءِ تاریخ ءَ پیش کسے ءَ اے کار نہ کرتگ۔ ایشی کریڈٹ ھم یار جان بادینی ءَ روت۔
اے درگت ءَ بلوچستان ءِ تاریخ گواہ انت کہ بلوچستان ءِ ہچ یک مزنیں اخبارے حاترا اے وڑیں مزنیں سیمینار ءُُ مُچی نہ بوتگ چوشکہ بلوچی زند ءِ بیست سال ءِ سرجم بوھگاانت۔
ماہتاک بلوچی زند ءِ ادارہ ءِ کر ءَ اینکس در وسیلہ نیست انت۔ ایشی ءَ ابید اینکس مزنیں سیمینارے برجم دارگ زند ءِ ادارہ ءِ واستہ یک مزنیں سوب مندی انت۔
وسعت اللہ خان،عامر رانا، لطیف بلوچ ءُُ پروفیسر ڈاکٹر نادر بخت ءِ چہ کراچی اسلام آباد ءُُ لاہور ءَ ایگ ھم یک مزنیں دلبڈی ءِ انت۔ اُمیت انت کہ آؤکیں وھد ءَ ھم بلوچستان ءِ حوالکار ءُُ کلمکارانی دلبڈی ءِ حاترابلوچستان ءَ کاینت،من ہم تئی منت واراں کہ تہ ماہتاک بلوچی زند ءِ 20 سالگی مراگاہ ءِ کیک ءَ منی نام ءَ کرت کہ بلوچستان ءَ اول وار ءَ کسّے فیڈرل یونین آف جرنلسٹ ءِ صدر گچین کنگ بوتگ۔
یار جان بادینی ءَ چہ بلوچ قوم، بلوچی زبان ءُُ بلوچستان ءَ بازیں اُمیت است انت کہ آ وتی زبان دود ءُُ ربیدگ وانگ ءُُ زانگ، علم ءُُ زانت ءِ دیمرئی ءِ حاترا وتی کرد ءَ مدام انچو برجاہ داریت۔
رجانک: ادارہ بلوچی زند