21 فروری ماتی زبانانی میاں اُستمانی روچ

ہر سال 21 فروری ءَ ماتی زبانانی میاں اُستمانی روچ برجم دارگ بیت۔ اے روچے برجم دارگ ءِ بنیاتی مول ءُُ مراد ماتی زبان آں ءَ زندگ دارگ انت۔ چیاکہ اے وھدی دنیا ءِ تہا باز انچیں زبان است انت کہ آگار ءُُ بیگواہ بوھگا انت ءُُ میوزیم ءِ زبان جوڑ بوھگا انت اے وھدی پاکستان ءِ تہا ہفتاد ءَ زیات زبان است انت بلے آ گار ءُُ بیگواہیءِ آماچ بوھگاانت۔
چیاکہ ملک ءِ تہا ماتی زباناں آ جہت دیگ بوھگانہ انت۔ چوشکہ آ ایشی حقدار انت۔ بلوچی، براہوی، سندھی، پشتو، سرائیکی، پنجابی درا علاقہانی زبان گشگ بنت کہ اے افسوزے مزنیں گپے انت کہ ماتی زبان آنی قومی زبان ءِ حق دیگ بوھگا نہ انت ماتی زبان ہر وڑا ڈھلگ چار بوھگا انت۔
بلوچی زبان یک کہن ءُُ کدیمیں زبانے انت۔ بلے بلوچی زبان ءِ تاک، ماہتاک، روتاک نہ بوھگ ءِ برابر انت۔ انچو بلوچی زبان ءِ بیست ءُُ یکمی کرن ءَ یک ٹی وی چینل ءِ انت۔ بلوچی زبان ءِ تہا ڈرامہ تھیٹر فلم نہ بوھگ ءِ برابر انت۔ انچو ملکی ءُُ در ملکی لبزانک بلوچی زبان ءَ کم رجانک بوھگ ءَ انت۔
بلوچستان ءِ اسکول ءُُ وانگ جاہانی تہا بلوچی زبان وانینگ بوھگ ءَ نہ انت۔ بلوچی زبان ءِ تہا ٹی وی ءُُ ریڈیو چینل نہ بوھگ ءِ برابر انت۔ انوں دور انفارمیشن ٹیکنالوجی ءِ انت۔ بلے بلوچی زبان ءِ باز کم تاک، ماہتاک ءُُ روتاک آن لائن انت۔ اے بازیں مسئلہ جنجالانی گندگ ہمے ترس انت کہ خدا مہ کنت کہ بلوچی زبان گار ءُُ بیگواہ بہ بیت بلے بلوچی زبان ءَ گار ءُُ بیگواہی ءَ دیر ھم نہ بیت۔ چیاکہ بلوچی زبان ءِ وانوک نہ بوھگ ءِ برابر انت۔
بلوچ ہر ھند ءُُ جاہے ءَ روت وتی زبان ءَ یل دنت ءُُ درآمدیں مردمانی زبان ءَ زوریت۔ انچو بلوچستان ءِ سیاسی پارٹی انت کہ آ وترا قوم دوست ءُُ وطن دوست گش انت آ وتی پوسٹر بینر ءُُ کارڈ آنی سرا اردو نبشتہ کن انت۔ انچو آ وتی گشتانک بلوچی زبان ءِ بدل ءَ درآمدیں زبانانی تہا دینت اے ہما مسئلہ ءُُ جنجال انت کہ چریشی ہمے ترس انت کہ خدا مہ کنت بلوچی زبان میوزیمے زبانے جوڑ مہ بیت۔
اے درگت ءَ زوتیں وڑا بازیں گام گیج کنگ لوٹیت۔تنکہ بلوچی زبان زندگ بہ مانیت۔ ہر بلوچ بائد انت بلوچی زبان ءَ بوانیت بلوچی زبان ءَ گپ بجنت بلوچی زبان ءَ نبشتہ بکنت۔ بلوچی زبان ءِ تہا ڈرامہ تھیٹر ءُُ فلم جوڑ کنگ بہ بنت۔ انچو بلوچی زبان ءِ تہا ٹی وی چینل ءُُ ایف ایم ریڈیو ءِ پروگرام شروع کنگ بہ بیت۔ تنکہ مئے شہر ءُُ بازار آنی تہا مارکیٹ ءِ زبان بلوچی بہ بیت۔
انوں انفارمیشن ٹیکنالوجی ءِ دور انت بلوچی زبان ءِ ھیل کنگ ءُُ وانینگ ءِ حاترا یوٹیوب ءِ پروگرام جوڑ کنگ بہ بنت تنکہ ہر کس بلوچی زبان ءَ ھیل گرگ بلوٹیت آ بلوچی زبان ءَ ھیل بکنت۔ (شونکار)