بنیادی صفحہ / آزمانک / ڈبل…..مہراللہ مہر

ڈبل…..مہراللہ مہر

ہر وہد ءَ کہ من ماں بازار ءَ پہ کارے ءَ شُت آں، تہ آپیر مردک ءَ را ماں بازار ءِ برے یک دَمکے ءَ دیست، کہ لَٹّ ءَ ماں زمین ءَ جِکّ دیان، مدان، مدان ءَ رَوان اِت۔ بَلے آئی ءَ بَرے بَرے ماں بُرز تواری ءَ گُشت:
”ڈبل ڈبل ڈبل…..“ بازیں جیڑگ ءَ پد من انگت آئی ءِ ہمے گپّ ءِ بِزانت ءَ سَرپَد نہ بوت آں۔ یکروچے من گوں وتی لہتیں سنگتاں ماں ہوٹلے ءَ پہ چاہ واری ءَ نِشتگ اِت ایں، تہ سنگتے ءَ وتی پیالگ ءِ چاہ وارت ءُُ پیالگ چاہینک ءِ کِرّ ءَ ایر کرت، تہ دومی سنگت ءَ چائینک چِست کُرت ءُُ آئی ءِ پیالگ ءَ چاہ مان کَنَگ ءَ لَگ اِت۔ بَلے آئی ءَ سنگت ءَ را پیالگ ءِ چاہ ءِ مان کَنَگ ءَ مکن کُرت، ءُُ گُشت: ”من ءَ بَسّ اِنت“بَلے چاہ مان کنوک ءَ گُشت: ”ڈبل“ یئِ کن۔“ تہ دِگہ سنگتے ءَ ماں بُرز تواری ءَ گُشت: ”ڈبل ڈبل ڈبل“ آئی ءِ اِے گپ ءَ منءَ ہما پیر مرد ءِ یات ءَ پِرّینت، کہ من ءَ کندگ ءَ نہ مَرّینت، من ماں بُرز تواری ءَ کندگءَ لَگ اِت آں، تہ ہمے ساعت ءَ سنگتے ءَ گُشت: ”دومی ریشبؔتو بوت ئے گوں ڈبل ءَ….“ نوں من سَرپَد بوت آں، کہ ہمے ڈبل گُشوکیں پیرمردک ءِ نام ریشبؔ اِنت۔ پمیشکا من چَہ ہمے سنگت ءَ جُست کُرت، کہ ہمے پیرمردک کَے اِنت؟ ءُُ کُج ءِ مَردُمے؟، کہ ہر وہد ءَ گُش ایت: ”ڈبل ڈبل ڈبل….‘
آئیءَ بچکندان ءَ گُشت: ”واجہ اِے مئے ہمساہگ اِنت ءُُ ایشی ءِ ڈبل گُشگ ءِ کِسّہ چوش اِنت،کہ من اِے وہداں ماں دربرجاہ ءَ پنچ تبک ءَ وانگ ءَ اِت آں۔ ایشرا ماں بازار ءَ ”پْرزاپارٹ“ ءِ دُکانے ہَست ات۔ وہد دیم ءَ جُنزان اِت، من گوں وتی وانگ ءُُ زانگ ءَ دِلگوش اِت آں۔ تہ یکروچے من چہ دربرجاہ ءَ گِس ءَ اَہت آں۔ من چَہ وتی گِس ءِ مردماں سرپد بوت آں، کہ ریشبؔ ءَ جِنّے ءَ گپتگ وت ءَ وت ءَ پَڑ ایت، کُوکار کنت۔ ایشی ءِ مردماں ایشرا پہ علاج ءَ بازیں مُلّا ءُُ ڈاکٹرانی گور ءَ بُرت، بَلے اِیشی ءِ ناجوڑی زانگ نہ بوت۔ اِے گپّ من ءَ انگت یات اِنت، کہ ما وتی گِس ءَ نِشتگ ات، وت ماں وت ءَ گپ ءَ اِت ایں، تہ گپ ماں گپ ءَ ریشبؔ ءِ گنوکی ءِ گپ دیم ءَ اَہت، کہ آئیءِ گنوکی ءِ بارہ ءَ منی پِسّ ءَ دَرائینت: ”من ہُشکرتگ ریشبؔ ءِ گنوکی ءَ پیسر ایشی ءِ پِسّ ءَ وتی مال ءُُ ”جاہیداد“ وتی زہگانی سر ءَ بَہر ءُُ ونڈ کرتگ اَنت۔ ایشی ءِ بَہر ءَ یک کمپانے ءُُ پنچ لَکّ کلدار کپتگ۔ ایشی ءَ وتی دُرائیں کلدار گِس ءَ پیتی ءَ ایر کُرتگ اَنت، شپ ءَ دُزّے ءَ پیتی پروشتگ کلدار بُرتگ اَنت۔ ایشی ءَ پہ دُزّ ءِ درگیجگ ءُُ پَجّارگ ءَ مزنیں تَگ ءُُ تاچے کرتگ۔ بَلے ناسوب بوتگ۔ یکروچے آئی گِس ءَ یک بَلّْکے کَیت آئی جنین وتی کلدارانی گاری ءِ گپّاں گوں بَلّک ءَ جَنت، تہ بَلّک گُش ایت،مارا ہمساہگے ہَست آ ”سحر ءُُ جادُو“ ءِ کار ءَ بلد اِنت، تو وتی جود ءَ را بِہ گُش ہمائی ءِ گورا بِہ رَو…..“ ہمے پیم ءَ آ وتی جود ءَ بَلّک ءِ گپاں گُش ایت۔ ایدگہ روچ ءَ آئی ءِ جود جُست ءُُ پَد کنان ءَ ہما سحر گِر ءِ گِس ءَ رَوت۔ وتی گپّاں گوں آئی ءَ درشان کنت۔ گڑا سحر گِر گُش ایت: تو زَرّانی دُزّی ءِ اَوَلی روچ ءَ بیاتین ئے، من اَلّم ءَ تئی زَرّانی دُزّ دَرگپتگ ات۔ بَلے بیست ءُُ چار کلاک ءَ پَد، من دُزّءَ درگپت نہ کن آں۔ اَلبت من پرتو دِگہ یک کارے کرت کن آں۔ بَلے اَنچش کہ تو گوں من تپاک بِہ بئے…..“گڑا ریشبؔ آئرا گُش ایت: ”واجہ اگاں منی پائدگے کارے، من گوں تو تپاک آں بِہ گُش……“ سحرگِر گُش ایت: ”تو یک لَکّ کلدار بیار من ءَ بِہ دئے اِے منی ”وعدہ“ اِنت، کہ یک شپے ءِ آزرات کَنَگ ءَ پَد، تئی لَکّ کلداراں دو لَکّ کلدار کن آں۔ بَلے ماں ایشاں سَے بَہر تئی،یکے منی۔ نوں وتی دِل ءَ بچار، اگاں تو لوٹ ئے، کہ تئی ہمے کار بِہ بیت، گڑا کَسّ ءَ را حال مہ دئے، اگاں نہ تو اِے گپ کَسّے ءَ را حال دات منی جِنّاں ترا چونیں زَلر دات، گڑا من ءَ کار نیست….“ سحر گِر آئرا ہمے وڑیں دِگہ بازیں تُرس ءُُ بیہار دَنت۔ آ چارایت، تہ اِے کار ءِ تہ ءَ من ءَ پائدگ رَسگ ءَ اِنت۔ آ گوں سحرگِر ءَ کول ءُُ مسام کنت۔تچک ءَ گِس ءَ کَیت وتی جنین ءَ را گُش ایت وتی دُرّاں بِہ دئے،بَہا اِش کن آں۔ من ءَ ملّایے ءَ گُشتگ: ”من ءَ یک لَکّ کلدار بِہ دئے تئی گاریں دُرائیں کلداراں دَرگیج آں….“ آ ئی ءِ جنین رَد کپ ایت وتی گوش ءِ دُرّاں کَشّ ایت وتی جود ءَ را دَنت۔ آرَوت سُہرجنوک ءِ کِرّ ءَ دُرّاں بہا کنت، کہ دُرّانی زَرّ دو لَکّ ءُُ پنجاہ ہزار بنت۔آ کلداراں زور ایت تچک ءَ سحرگِر ءِ گِس ءَ رَوت۔ لَکّ کلدار حساب کنت سحر گِر ءَ را دَنت۔ ایدگہ یک لَکّ ءُُ پنجاہ ہزارکارایت وتی جنین ءَ را دَنت ءُُ گُش ایت اِے کلداراں وتی کِرّ ءَ ایر بِہ کن…..“ دومی روچ ءَ آ سحر گِر ءِ گِس ءَ رَوت، سلام ءُُ دراہباتی ءَ پد آ دولَکّ کلدار حساب کنت، ریسبؔ ءِ دیم ءَ ایر کنت ءُُ گُش ایت: ”دوشی باز جہد ءَ پَد منی جِنّاں تئی کلدار ”ڈبل“ کرتگ اَنت۔ ماں ایشاں وتی کلداراں بِہ زْور، منی کلداراں من ءَ بِہ دئے۔ آ چار ایت، تہ اِے وڑ ءَ پہ من پائدگ اِنت۔ پمیشکا آ سحر گِر ءَ را گُش ایت:”اِے کلداراں اگاں من گیشتِر بِہ کن آں ترا بِہ دیاں، گڑا تو آیاں ہمے وڑ ءَ…..“ سحرگِر آئی ءِ گپّ ءَ دیم ءَ بران ءَ گُش ایت: ”اِے ہچ نہ اَنت، تو ہرچی کہ بیار من ”ڈبل“ اِش کن آں…..۔ ہمے پیم ءَ آ وتی پَجّاروکیں مردمانی گور ءَ رَوت، ہپت لَکّ کلدار وام کنت، سحر گِر ءِ داتگیں لَکّ ءُُ پنجاہ ہزار کلداراں ءُُ گِس ءِ ایریں لَکّ ءُُ پنجاہ ہزار کلداراں گوں ہپت لَکّ کلداراں ہَوار، کہ اِے دُرا دہ لَکّ ہزار کلدار بنت۔ ایشاں زْور ایت، تچک ءَ سحر گِر ءِ گور ءَ بارت، دَنت ءُُ گُش ایت: ”ایشاں بیست لَکّ بِہ کن، کہ ماں ایشاں پنچ لَکّ تئی بیت ءُُ پانزدہ لَکّ منی….“ گڑا سحرگِر گُش ایت، پہ ایشانی ”ڈبل“ کَنَگ ءَ دو شپ لَگّ ایت…..“ اِے گُش ایت پرواہ نیست، من ءَ صبر اِنت…..“ اِے سیمی روچ ءَ سحر گِر ءِ گِس ءَ روت، چارایت، تہ آئی ءِ وتاک ءُُ کمپان ءِ دپ ءَ بَلاہ بَلاہ ئیں کُبل جَتگ۔ آئی ءِ ہمساہگ ءِ کمپان ءِ دروازگ ءَ ڈُکّ ایت، تہ نیم عمر ءِ مردکے دَرکَیت۔ سلام ءُُ دراہباتی ءَ پد آئرا جُست کنت: ”واجہ اِے مُلّا کُج ءَ شُتگ، کہ ایشی ءِ وتاک ءُُ کمپان ءِ دروازگ کُبل اَنت۔ پیر مرد گُش ایت: ”ایشی ذی منی کمپان ءِ باڑہ من ءَ دات اَنت ءُُ گُشت یئِ: ”ما واتر وتی ڈیہہ سندھ ءَ رَوایں، کہ مئے مردمے بیران بوتگ….۔ اِے وہدی پہ لَڈّ ءُُ بار شُت اَنت….“ آماں بے تاہیری ءَ گِس ءَ کَیت، گوں جنین ءَ وتی تیوگیں گپّاں درشان کنت۔ جنین آئرا گُش ایت تو پہ آئی ءِ پَٹ ءُُ پول ءَ سندھ ءَ بِہ رَو۔ آوتی جنین ءِ گُشگ ءِ رِد ءَ تاں نُہہ روچ ماں سندھءَ پہ آئی ءِ پَٹ ءُُ پول ءَ سرگردان بیت۔ بَلے ماں ناسوبی ءَ واتر وتی ڈیہہ ءَ کَیت، کہ ہما روچ ءَ بِگر تاں روچء مرچی گَردیت ءُُ گُش ایت: ”ڈبل ڈبل ڈبل….“

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*