ماہتاک بلوچی زند اولی پٹ ءُُ پولی تاک انت کہ دنیا ءِ بلوچانی سرا کارکرتگ…..لطیف بلوچ 

مروچی اے دیوان باز براھدار ءُُ جلوانک انت باز کہنیں دوست ءُُ سنگتاں گوں گند ءُُ نند بوت۔ ماہتاک بلوچی زند ءُُ یار محمد بادینی ءِ باروا بازیں گپ ءُُ تران بوتگ ءُُ بازیں مقالہ وانگ بوتگ انت۔ اد ءَ ہرچ یک زبان دود ءُُ ربیدگ ءِ سرا سرجمی ءَ گپ ءُُ تران بوت۔ یک لٹریچر ے کہ آئی باروا گپ ءُُ تران نہ بوت۔ آ سیاسی لٹریچر انت بلوچی ادب ءِ تہا یک گیشی بوتگ آ سیاسی لٹریچر انت کہ آئی باروا ماں باز کم دلگوش دیاں۔
لٹریچر ہما چیز انت کہ آ قوم ءُُ راج ءَ زندگ داریت ہرچ یک قومےءِ زانگ ءِ حاترا المی انت کہ آئی لٹریچر زانگ بہ بیت۔ لٹریچر یک روچے ءِ سفر نہ انت۔ اے گپ مزنیں پروسسے ءَ پد بیت کہ چہ آئی ءَ قوم ءُُ راج گوازیت آ کتاب تاک ءُُ ماہتاکاں شکل ءُُ دروشم ءَ نبشتہ کنگ ءَ بنت۔ ایشی ءَ پد یک نوکیں نسلے کیت آئی ءَ را وانیت۔ لٹریچر ے وتی یک اسٹینڈرڈے بیت کہ چرائی ءَ ہرچ یک قوم ءُُ راج ءِ شناخت زانگ ءُُ پجارگ بیت۔
من کساس سی ءُُ سئے سال ڈان ءِ تہا کار کرت۔ سب ایڈیٹر ءَ بگرتاں سینئر رپورٹر ءِ منصب ءَ کار کرت۔ اے سی ءُُ سئے سالانی تہا من دنیا ھم دیست۔ وزیراعظم آں گوں ڈن ءِ تر ءُُ تاب ھم کرتگ۔
کراچی ءَ منا مدام گشت انت کہ اے ایوکا بلوچانی باروا نبشتہ کنت بلوچستان ءِ باروا نبشتہ کنت من آھاں مدام گشت ہرچ یک قوم ءُُ راجے ءَ منی تعلقداری انت۔ اے منی بنیاتی فرض انت کہ من آھانی مسئلہ ءُُ جنجالاں دیما بیاریں۔ دومی مسئلہ ءُُ جنجال وت دیما کاینت۔
ڈان ءِ تہا گوستگیں سی ءُُ سئے سال ءِ کار ءُُ کرد چارگ بہ بیت تہ بلوچستان ءِ حوالہ ءَ درا مسئلہ ءُُ جنجال پدر کنگ بوتگ انت۔ ملک ءِ تہا اے وڑیں جلسہ ءُُ مچھی ءِ نہ بوتگ کہ من آئی رپورٹنگ نہ کرتگ۔ ماما قدیر ءِ اولی حوالکاری دیوان کہ گار ءُُ بیگوایں مردمانی بارواات، اولی حوالکاری دیوان ءِ من کوریج کرت۔ منی گُشگ ءِ مطلب ایش انت کہ لٹریچر ھم یک جہد ءُُ کوشستے انت۔ یک جنگ ءِ انت اے جنگ، گریبی، بزگی، تژن، پد منتگی ھلاف ءَ انت اد ءَ کلمکار وتی کرد ءَ پیش داریت۔ چوشکہ یار جان بادینی شمے دیما نشتگ آ گوستگیں بیست سال ماہتاک بلوچی زند ءَ چھاپ ءُُ شنگ کنگ ءَ انت۔
پنجاہ ءَ زیات خاصیں نمبر ھم در کرتگ کہ تہ بلوچی زبان ءُُ لبزانک ءِ حاترا باز اہمیت دار انت۔ یار جان بادینی بلوچستان ءِ اولی حوالکار ءُُ پٹ ءُُ پولکار انت کہ آئی ءَ دنیا ءِ بلوچانی سرا کار کرتگ ایشی تہا ترکمانستان، افریقہ، عمان، قطر، بحرین، امارات ءُُ دومی ملک ھوار انت۔ آئی ءَ بازیں ملکانی تہا سیمینار ءُُ کانفرنسانی تہا ھم بہر زرتگءُُ بازیں کتاب ھم نبشتہ کرتگ۔
اد ءَ افسوس ءِ مزنیں گپ ایش انت کہ زبان ءُُ لبزانک ءَ تعلقداریں بازیں مردم بیمار ءُُ نادرا انت کسئے آھانی گپ ءَ نہ کنت۔ بائد انت مارا وتی کلمکار، کواس ءُُ شاعراں یاد بکناں ءُُ آھانی حال پرسی ءَ بکناں۔ انچو مارا وتی قومی ءُُ راجی شناخت ءِ حیال دارگ لوٹیت چیاکہ مئے لٹریسی ریٹ باز کم انت۔ مارا باز جہد کنگی انت۔
بلوچی زبان ءُُ لبزانک ءَ ہر چنکس دیمرئی شاعر، کلمکار ءُُ کواساں داتگ۔ آھانی حیال دارگ بہ بیت، معلومداری ءِ اے سفر برجاہ بہ مانیت۔ من 2006 ءَ ڈان ءَ چہ ریٹائر بوت بندات ءَ من وتی اسکول ءِ بن ھشت ایر کرت۔ ہر کس شاعرے انت یا کلمکارے آ ایشی سرا پہار بہ بندایت۔ من ءَ گس ءِ مردماں گشت کہ دسمبر ءِ ماہ ءَ کوئٹہ باز سرد انت من گشت کہ منا یک انچیں دوست ءِ دعوت داتگ کہ آئی بلوچی زبان ءُُ لبزانک ءِ حاترا ھذمت باز انت آئی ءَ را من نہ گشت نہ کنیں اے مئے درستانی فرض انت کہ ماں وتی زبان، لبزانک ءُُ رسم ءُُ دودانی حیالداری ءَ بداراں۔
(رجانک ادارہ بلوچی زند)