شمے کاگد

گراں کدریں شونکار ماہتاک بلوچی زند
شمئے سر ءِ سلامتی ءُُ نیکیں واھگ
ماہتاک بلوچی زند ءِ ستمبر 2019 ءِ تاک اَت منا رست اے تاک وتی مٹ وت اَت، ستمبر 2019 ءِ تاک ماہتاک بلوچی زند ءِ بیست سال ءِ چھاپ ءُُ شنگ کاری ءِ باروا اَت کہ بازیں مردماں ماہتاک بلوچی زند ءِ بیست سال ءِ کار ءُُ کرد ءِ باروا نبشتانک نبشتہ کرتگ اَت۔ اے تاک ءَ چہ ماہتاک بلوچی زند ءِ بیست سال ءِ کار ءُُ کرد ءِ باروا منا سرجمی ءَ معلومداری رست۔ اے باروا ماہتاک بلوچی زند ءِ سر شونکار واجہ یار جان بادینیءُُ آئی کارندہ لکھ ستائے لائق انت کہ آھاں گوستگیں بیست سالانی تہا مزنیں جہد ءُُ کوشستے کرتگ ءُُ واتراے ھند ءُُ جاہ ءَ آورتگ ءُُ سر کتگ۔
ماہتاک بلوچی زند ءِ ادارہ انوں یک ادارہ ءِ رنگ ءُُ دروشم گپتگ بلوچی زبان ءِ تاک ءُُ ماہتاک چھاپ ءُُ شنگ بنت، بلے پدا زوت بند بنت بلے ماہتاک بلوچی زند بلوچی زبان ءِ اولی تاک انت کہ یک ریکارڈے جوڑ کرتگ۔ گوستگیں بیست سالانی تہا بازیں خاصیں تاک ھم چھاپ ءُُ شنگ کرت کہ اے بلوچی زبان ءِ حاترا مزنیں مڈی ءِ انت اُمیت انت ماہتاک بلوچی زند وتی کار ءَ انچو برجاہ داریت ءُُ تاں وتی سلور جوبلی بزاں بیست ءُُ پنچ سال ءِ عمر ءَ بازیں دگہ سوب مندیں کار کنت۔ مئے نیمگا ماہتاک بلوچی زند ءُُ آئی ٹیم ءَ دلءِ حب ءَ مبارکبات گشاں۔ انچو دومی تاک ءُُ ماہتاک بلوچی زند ءِ رند گیری ءَ بکن انت۔
رفیق احمد بلوچ۔کیچ،مکران
……٭……٭……٭……
شونکار ماہتاک بلوچی زند
ماہتاک بلوچی زند ءِ بیست سال سرجم بوتگ انت اے بلوچی زبان ءُُ لبزانک ءِ حاترا مزنیں سوب مندی انت۔ اے درگت ءَ زند ءِ ادارہ شونکار ءُُ آئی کارندہ لکھ ستائے ءِ لائق انت کہ زند ءِ بیست سال گوں سوب مندی ءَ گوازینت، بازیں تاک در کرت کہ اے بلوچی زبان ءِ مڈی زانگ ءَ بنت۔ اُمیت انت زند آؤکیں وھد ءَ گوں ہمے جم ءُُ جوش ءَ چھاپ ءُُ شنگ بیت ءُُ وتی وانوکاں سرپدبیت۔
شمئے وھگاں گوں ہمراہ
شاہد بلوچ۔ کوئٹہ
……٭……٭……٭……
سر شونکار ماہتاک بلوچی زند
واجہ دیر انت من ماہتاک بلوچی زند ءَ وانگا وں زند من ءَ سک دوست انت۔ ایشی بنیاتی سوب ایش انت کہ زند مُدام پٹ ءُُ پولی مواد چھاپ ءُُ شنگ کنت۔ اے درگت ءَ چہ شما دزبندی انت کہ شما بلوچستان ءِ وانگ ءُُ زانگ ءِ باروا ھم خاصیں تاکے چھاپ بکں انت کہ بلوچستان ءِ وانگ ءُُ زانگ ءِ پد منتگی ءِ بنیاتی سوبءُُ ھلت چہ انت چیا کہ دنیا ءِ تہا ھما قوم ءُُ راج دیما روانت کہ آ علم ءُُ زانت ءِ پڑا کار کں انت۔ بلوچستان ءِ تہا اسکول، کالج، یونیورسٹی باز است بلے اودا زانت گندگ نہ بیت۔ بلوچستان ءِ اے ادارہانی تہا نکل کنگ ءِ رواج است۔ نقل ہما نادرائی انت کہ آ خورگ ءِ وڑا مردمے زانت ءَ ھلاس کنت۔ مردم اوشت ءِ آماچ بیت بلوچستان ءِ تہا وانگ ءُُ زانگ ءِ باروا من وتی لہتیں صلاح ءُُ سوج دیم داتگ اگں ماہتاک زند ءِ براھ جوڑے بکں۔ من شمے منت واراں۔
وحیدبلوچ۔ نوشکی
……٭……٭……٭……