بلوچی زبان ءِ نامداریں شاعر مبارک قاضیءِ نادرائی

دُنیاءِ ملک،قومءُُ راجانی تہا شاعر کلمکارءُُ کوّاسانی زند چارگءُُ سیل کنگ بہ بیت تہ گندگا بیت،کہ آ مزنیں عزتءُُ شرفے واھندانت۔انچو آ وتی چاگردے ءِ سیرءُُ ازگاریں مردم زانگ بنت۔چیاکہ آھانی یک کتابے ملینانی تہا بہا بیت۔آچہ مالی لاچاری ءَ دور وتی نبشتہ کنگ ءِ کارءِ تہا دلگوش بنت۔آ زند ءِ ھر روچی مسئلہ ءُُ جنجالاں دور وتی نبشتہ ءُُ تخلیقءِ نیمگادلگوش دینت۔اے حاترا آشرشرّیں کتاب دیما کار انت۔ اے باروا اگں ما وتی چاگردءَ بچاراں تہ گندگ بیت کہ مئے چاگرد ے تہا علمءُُ زانت خاص شاعر،کلمکار،کواسءُُ ازمگرانی عزتءُُ شرف آ نہ انت۔چوشکہ دری ملکانی کلمکار،کوّاس،شاعرءُُ ازمگرانی انت۔ ایشی بازیں بنیاتی سببءُُ الّت است انت۔
بلوچی زبان ءِ نامداریں شاعر واجہ مبارک قاضی نادرا ھی ءِ آماچ انت۔آئی گورا دارو درمان ءِ واستہ زر ھم نیست۔آئی حاترا مردم چندہ کنگا انت،تنکہ آئی دارو درمان بہ بیت۔افسوزے مزنیں گپ ایش انت کہ بلوچستان ءِ سرکارے گوشءَ مورے نہ وارت۔کہ آ واجہ مبارک قاضی ءِ دارو درمانے بندوبست ءَ بکنت۔تنکہ بلوچی زبان ءِ نامداریں شاعرے زند رکّینگ بہ بیت۔
بلوچستان ءِ صوبائی وزیر ظہور بلیدیءِ تعلقداری چہ کیچ مکران ءَ انت۔بلوچستان ءِ ھزانگءِ کلیت آئی گورا انت۔آ ھر چی بلوٹیت کرت کنت۔بلے واجہ مبارک قاضی ءِ جان سلامتی ءِ باروا ہچ نہ کرتگ۔انچو بانک زبیدہ جلال بنجاہی وزیر ءِ منصب ءِ سرا کار کنگا انت۔بلے آئیءَ واجہ مبارک قاضیءِ دارو درمان ءِ حاترا ہچ نہ کرتگ۔انوں مکران کہ اودا صوبائی وزیرے پجی ءَ بنجاہی وزیر ھم است۔پدا آھاں شر شرّیں عہدہءُُ منصب گوں انت۔باھد انت مبارک قاضی ءُُ دومی بلوچی زبانءِ شاعرءُُ کلمکارانی مدتءُُ کمکءَ بکن انت۔چیاکہ اے بلوچی زبان ءُُ لبزانک ءِ ہما کلات انت کہ اے وھدے شُت انت۔ایشانی پدا ودی بوھگ سکّ گراں اِنت۔
چیاکہ کلمکار،شاعرکواس ءُُ ازمگر لکھانی تہا یک یک ودی بنت۔آ وتی قوم ءُُ راجے سفیر زانگ بنت۔آھانی سوب ءَ قومءُُ راج تیوگیں دنیا ءِ تہا زانگءُُ پجارگ بیت۔اے قومءُُ راجے ءِ ہر مردمے فرض انت کہ آ وتی قوم ءِ شاعر،کلمکار،کواسءُُ ازمگرے ءِ عزتءُُ شرف ءَ کنگا ھوارجنجالے وھدءَ آئی ھر وڈا مدتءُُ کمک ءَ بکن انت۔
تنکہ آھانی دلبڈی ءَ ھوار آھانی زند ھم رکھینگ بہ بیت۔اے درگت ءَ منی چہ بلوچستان ءِ سرکارءُُ خاص جام کمال عالیانی ءُُ دودءُُ ربیدگ ءِ محکمہءَ لوٹ انت کہ آ اے باروا زُوتءَ چہ زوت بلوچی زبانءِ نامی ایں شاعر واجہ مبارک قاضیءِ دارو درمان ءِ بندءُُ بستءَ بکں انت۔تنکہ آئی جان رکےّنگ بہ بیت۔چریشی ابید بلوچی زبان ءِ گلءُُ اکیڈیمیانی فرض انت۔کہ آ بلوچی زبان ءِ شاعرءُُ کلمکارانی زندے رکّینگ ءِ حاترا وتی کردءَ پیش بدار انت۔چیاکہ ھمے شاعرءُُ کلمکارانی تخلیقانی سوبءَ اکیڈیمیانی کار دیما روگا انت۔بائد انت۔ہر سکیں وھدءَ آھانی مدتءُُ کمک کنگ بہ بیت۔تنکہ آ زندگ بہ مان انتءُُ وتی قومءُُ راجے ھزمت ءَ کرت بکن انت۔تنکہ بلوچی زبانءُُ لبزانک دیما بروتءُُ دیمرئی بکنت۔ (شونکار)