شونگال

بلوچستان یونیورسٹیءُُ طالب علم

بلوچستان یونیورسٹی کوئٹہ بلوچستان ءِ ہما اولی یونیورسٹی انت کہ نیپ ءِ سرکار ے دور ءَ جوڈ بوتگ ات۔بلوچستان یونیورسٹی ءِ اولی وائس چانسلر کرار حسین وائس چانسلر جوڈ بوھگا پد اولی وار ءَ کوئٹہ سر بوت۔تہ بلوچستان ءِ گورنر میر غوث بزنجو وت آئرا وش آہت کنگ ءِ حاترا شُت ءُُ آئرا بیا بخیر کرت۔بلوچستان یونیورسٹی ءِ اولی وائس چانسلر کرار حسین حیران بوت۔کہ گورنر آئی وش آہت کنگ ءِ حاترا آئی دیما اتگ۔آئیءَ گورنر بلوچستان ءَ گُشت کہ واجہ تہ پرچے زحمت کرتگ۔آئی ءَ کرار حسین ءَ گُشت کہ تہ علمءُُ زانت ءِ روژنائی ءَ تالان کنگائے۔من مرچی گورنر اوں۔باندا منی اے عہدہ ءُُ منصب نہ بیت۔ہما روژنائی ءَ نیپ ءِ سرکار ءَ بندات کرتگ اَت کہ بلوچستانءِ کُنڈکُنڈ ءَ چہ علم ءُُ زانت ءِ حاترا بچکءُُ جنک وانگ ءِ حاترا کوئٹہ ءَ آہت انت۔ کسے ءَ را مجال نیست ات۔آھانی ساھگ ءَ سیل بکنت۔بلوچ ہما قوم انت۔کہ در آمدیں قومءُُ راجانی جنین ءُُ زالبولانی عزّتءُُ شرف ءِ حاترا وتی جان قربان کرتگ۔
بلوچستان یونیورسٹی کوئٹہ ءَ یک انچیں اسکینڈلے دیما آہت۔کہ اے بلوچستان ءِ تاریخ ءَ ہما بد یں اسکینڈل انت۔بلوچی زبان ءَ گُش انت چمّ مہ گندیتءُُ گوُش مہ اُشکیت۔اے ویل ءُُ واقعہ ءَ دیر انت بلوچستان یونیورسٹی ءَ بوتگ۔بلے ترس ءِ سوب ءَ کسے ءَ گپ نہ جتگ۔بلوچستان یونیورسٹی یک ایف سی ءِ کلاتے انت۔اودا ایف سی ءِ صدانی مردم نشتگ اَنت۔تنکہ یونیورسٹی ءِ تہا کسے سیاست کرت مہ کنت۔بلوچستا ن یوینورسٹی ءَ گوستگیں بازیں سالاں یک انچیں وائس چانسلرے وی سی یے منصب ءِ سرا کار کنگا اِنت،کہ آئی تنے وھدی سَے وار ءَ وی سی ءِ وھدءُُ پاس ودینگ بوتگ۔ہمے زانگ بیت کہ ایشرا مزنیں سفارشے گوں اِنت۔ڈاکٹر جاوید اقبال ہما مردم انت کہ آئی ءَ بلوچستان ءِ پیشءِ وائس چانسلر محمد خان رئیسانی ءَ جنکاں تنگ کنگءُُ سلکاری ءِ سرا سزا داتگ ات۔بلے اے بلوچستان یونیورسٹیءِ وائس چانسلر جوڑ بوتءُُ گوستگیں ھشتءُُ نُھ سالان چہ بلوچستان ءِ وائس چانسلر اِنت۔ ڈاکٹر جاویداقبالءَ بلوچستان یونیورسٹی ءِ بے شرمیءِ کارگوں وتی ٹیم ءِ ھوری ءَ شروع کرت کہ ایشی تہا یونیورسٹی ءِ بازیں مردیں ءُُ جنین پروفیسر ھوار انت۔ایشان نہ ایوکہ جنکاں حراسمنٹ کرتگ۔یونیورسٹی ءِ طالب علما ن ا متحانانی پرچہ ءُُ پریٹیکل آنی تہا فیل کنگ انچوآھاں ایم فلءُُ پی ایچ ڈی ءِ تہا کورس ءِ وارءُُ بزگ کنگ ھوار انت۔اے دھندہ ءُُ کار مزنیں وڑے ءَ بلوچستان یونیورسٹی ءِ تہا بوتگ۔اے زلمءُُ زوراکیاں ابید یونیورسٹی ءِ انتظامیہ ءَ طالب علمانی باتھ روم ءُُ کمرہ آنی تہا سی سی وی کیمرہ جتگءُُ پدا آھاں ءَ واٹس آپ ءِ زریعہ دیم داتگ آھاں ءَ بلیک میل کرتگ۔انچو، پشتونخواہ ملی عوامی پارٹیءِ سروک محمود خان اچکزئی ءَ وتی پریس کانفرنسءِ ذریعہ ءَ گُشتگ کہ یونیورسٹی ءِ ہاسٹل ءَ چہ جنکاں نادرائی ءِ نیمون ءَ ایمبولینس ءِ ذریعہ ہسپتال ءِ بدل ءَ انچیں ھندءُُ جاہ اں برگ بوتگ اَنت۔اے باروا سرجمی ءَ پٹ ءُُ پول کنگ لوٹیت ءُُ سپریم کورٹ ءِ جسٹس ءِ سروکی ءَ یک کمیٹی یے جوڑ کنگ بہ بیت۔تنکہ آ پٹءُُ پول بکنت ءُُ زمہ واریں مردماں سزا بہ دنت۔
انچو بلوچستان اسمبلیءَ اسپیشل کمیٹی یے جوڈ کرتگ۔اے کمیٹی ءِ چیرپرسن بانک ماجبین شیران انت۔بلوچستان ءِ درائیں پارٹیانی ایم پی اے کمیٹی ءِ باسک اَنت۔آ باھد انت جہد بکن انت طالب علماں ملاقات بکن انت۔وتی رپورٹ ءَ دیما بیار اَنت۔پدا وائس چانسلر ڈاکٹر جاوید اقبال ءِ ھوری ءَ زمہ واریں یونیورسٹی انتظامیہءُُ ٹیچر ءُُ استادانی خلاف ءَ کاروائی کنگ بہ بیت۔آھاں ءَ یک عبرتے جوڑ کنگ بہ بیت۔تنکہ آوکیں وھدءَ کسے ءَ را مجال مہ بیت، تنکہ آطالب علماں بدیں چماّں بچاریتءُُ آھاں بلیک میل بکنت۔ہمے حاترا بلوچی زبان ءَ گُش انت۔مال خیرات پہ جان ءُُ جان خیرات پہ عزّتءَ۔ (شونکار)

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*